Matayo 21

Yesu nɨ fɨjʉ rʉtaa ose be Yerusalemua vɨɨ

(Mariko 11:1-11; Luka 19:28-40; Yohana 12:12-19)

1Yesu ɨnɨ nɨ muria ꞌba ɨ̀rɨ nɨ ɨmbale vɨɨ ɨnɨ be Yerusalemua, cá ɨnyati Betefagi nɨ ovʉle ꞌBee Olivu patí nɨ vɨɨ àgapíá ꞌba dèe, Yesu pè ꞌba ɨ̀rɨ nɨ ɨmbale vɨɨ ìrìa ɨnɨ ti adro, 2ꞌyo ɨnɨ yɨ́ kɨ́nɨ̀, “Àmɨ mú ɨnyati wereá àmɨ drìlia vɨɨ alɨa díká drìle àlʉ drʉ àmɨ ngaa àkànyà isúu ꞌɨ̀zàdrʉ sotia àkànyà mva be. Àmɨ àyú ɨnɨ ji ma bʉ. 3ꞌBa àloo tè àmɨ zii eꞌyoa yɨ̀, àmɨ òmvɨ́ ɨ̀rɨ yɨ́ kɨ́nɨ̀, ‘Opɨ lè ɨnɨ nɨ̀.’ Ànɨ ɨ̀rɨ ngaa fèe muu àmɨ yɨ́ ɨbe rá.”

4Eꞌyo ꞌdɨ̀vɨɨ ꞌonɨ fèjʉ eꞌyo ndráánɨ́ ꞌba eꞌyo ondrílé vɨɨ nɨ ꞌyole vɨɨ ɨ̀rɨ ca kòꞌbò benì kɨ́nɨ̀:

5“Mɨ ꞌyo ꞌba ovʉle àkú ìmgbélé Zionia vɨɨ ɨnɨ yɨ́,

Àmɨ ndré, Opɨ àmɨ ꞌyowa vɨɨ nɨ caa àmɨ bʉ ꞌdɨ̀,

ìnzìtaa yɨ̀ díká ɨ̀rɨ dùu àkànyà yɨ̀,

pàbaa àkànyà mva yɨ̀ ɨ̀ndɨ̀.”

6Ànɨ ꞌba Yesu nɨ ɨmbale vɨɨ mú rá díká ꞌó kòꞌbò ɨ̀rɨ nɨ azílé vɨ́nɨ. 7Jí àkànyà ayo ndee ɨnɨ mvaa be, ɨjá bòngo ꞌyowa vɨɨ ɨnɨ ngʉkʉa, díká Yesu tu rɨ drìa. 8Òꞌbɨ múkúkú ɨjá bòngo ꞌyowa vɨɨ ɨnɨ léti alɨa, vɨɨ dèè alóo òŋó patí ɨnɨ bí ɨjá léti alɨa. 9Òꞌbɨ ɨ̀rɨ drìlia díká ɨ̀rɨ butia vɨɨ rɨ́ oyʉ kɨ́nɨ̀,

“Òzanà#21:9 Ozana Iburania ti yɨ̀ vɨɨ ɨkɨ́a “Mɨ pa àma!” Ca ace rú icútáá drʉ. ɨ̀rɨ ovʉ Daudi Mvápi yɨ́!”

“Drìleba ɨ̀rɨ ovʉ ́ꞌbarʉʉ cale Opɨ rú yɨ̀ vɨɨ yɨ́!”#Zaburi 118:26

“Ozana ɨ̀rɨ ovʉ oru tʉ!”

10Yesu nɨ fɨjʉ Yerusalemua ꞌba, ꞌba àkú ìmgbélé ndee alɨa vɨɨ cá òyàzà drʉ díká zí kɨ́nɨ̀, “Agú ꞌdɨ̀vɨɨ àrɨ ɨ yà?”

11Òꞌbɨ òmvɨ́ kɨ́nɨ̀, “ꞌDɨ̀vɨɨ Yesu ɨ, ɨ̀rɨ ꞌbarʉʉ eꞌyo ondrílé ɨngale Nazeretia àngʉ̀ Galili nɨ vɨɨ alɨa vɨɨ ɨ.”

Yesu nɨ mujʉ Orɨ jó ìmgbélé alɨa vɨ́ɨ

(Mariko 11:15-19; Luka 19:45-48; Yohana 2:13-22)

12Acete Yesu fɨjʉ kalɨ Orɨ jó nɨ vɨɨ alɨa ꞌba díká ɨdro ꞌba àfa ozílé vɨɨ ɨnɨ ꞌba àfa jele vɨɨ ɨbe drɨ́á àja. Ɨze mézà ꞌba sɨ̀lɨngɨ̀ àlèle vɨɨ ꞌyowa vɨɨ ɨnɨ komɨ ꞌba àmamù ozílé vɨ́ɨ ꞌyowa vɨɨ ɨbe drɨ́á agangùlè drʉ. 13ꞌYo ɨnɨ yɨ́ kɨ́nɨ̀, “Eꞌyo sɨ̀zà ꞌyo ra kɨ́nɨ̀, ‘Jó ma awo vɨɨ nɨ ngaa ovʉʉ jó ìzítáá nɨ vɨɨ ɨ,’#Isaya 56:7 te àmɨ oja ɨ̀rɨ ‘kara ogi nɨ ànɨ òzìjʉ vɨɨ drʉ.’#Yeremia 7:11 ”

14Butia ꞌba muleko vɨɨ ɨnɨ ꞌba acozà vɨɨ ɨbe mú ɨ̀rɨ bʉ kalɨ alɨa nàa, díká àtɨ̀ ɨnɨ ra. 15Te ꞌba ꞌwàrà orɨ ɨteꞌba vɨɨ ɨnɨ nɨ ɨ̀mbaꞌba àzítáá Orɨ awo vɨɨ nɨ vɨɨ ɨbe eꞌyo Yesu nɨ ꞌole òsùtaa drʉ vɨɨ ɨnɨ ndrèjʉ àloo oyi anzɨ nyɨ́rɨ́ nɨ́ ɨtrejʉ Orɨ jó alɨa kɨ́nɨ̀, “Òzanà ɨrɨ ovʉ Mva Daudi yɨla drʉ vɨɨ bʉ” vɨɨ ɨrɨjʉ ꞌba, cá òmbà yɨ̀. 16Ànɨ zí Yesu nɨ kɨ́nɨ̀, “Mɨ ɨrɨ eꞌyo anzɨ nyɨ́rɨ́ ꞌdɨ̀vɨɨ ɨnɨ nɨ ꞌyole òdékʉá vɨɨ ɨbe vɨɨ ra yà?”

Yesu òmvɨ ɨnɨ yɨ́ kɨ́nɨ̀, “Èè, ma ɨrɨ ra, àmɨ làa ngà eꞌyo sɨ̀zà ꞌyole kɨ́nɨ̀,

‘Àmɨ ɨmbá anzɨ nyɨ́rɨ́ ɨnɨ òdékʉá ɨbe

mujʉ inzútáá fèjʉ vɨɨ kʉ yà?’#Zaburi 8:2”

17Yesu kʉ ɨnɨ ra díká mu ngajʉ Yerusalemua vɨɨ yɨ̀ Betania, la iní náa yɨ̀ nàa.

Yesu nɨ ɨlʉ́ʉ́ patí trɨjʉ vɨɨ

(Mariko 11:12-14,20-24)

18Òꞌbuti drɨ̀òdrɨ̀ò drù vɨ́nɨ, Yesu nɨ drìkàrɨa àkú ìmgbélé ndee alɨa, àbírí ki ɨ̀rɨ ra. 19Ndrè ɨlʉ́ʉ́ patí léti tia díká mu bʉa ògògò, te isúú síá ɨkɨ́á kʉ te lʉ́ kíríá bía ɨnɨ ɨ. Acete ꞌyo patí ndee yɨ́ kɨ́nɨ̀, “Mɨ ngaa ɨkɨ́ ka díká kʉ!” Cotícotí patí ndee ꞌwɨ ra.

20ꞌBa Yesu nɨ ɨmbale vɨɨ ɨnɨ nɨ eꞌyo ꞌdɨ̀vɨɨ ndrèjʉ ꞌba, ovʉ òsùtaa yɨ̀. Zí ɨ̀rɨ kɨ́nɨ̀, “Ɨlʉʉ patí ꞌdɨ̀vɨɨ ꞌwɨ ngà ɨ̀ndɨ̀ɨ̀ndɨ̀ ngóningóni drʉ yà?”

21Yesu òmvɨ kɨ́nɨ̀, “Ma ꞌyo àmɨ yɨ́ tàándí drʉ, àmɨ tè àꞌɨ̀ɨ ra díká àmɨ tè àbàa kʉ, àmɨ ɨcoo kíríá eꞌyo manɨ ꞌole ɨlʉ́ʉ́ patí ꞌdɨ̀vɨɨ rúá vɨɨ ꞌo ɨ aꞌdúle kʉ, te pàbaa àmɨ ɨco ꞌyo ꞌbee ꞌdɨ̀vɨɨ yɨ́, ‘Mɨ nga, mɨ ꞌbe mɨ mèrè alɨa,’ díká ɨco nɨ ꞌo ra. 22Àmɨ tè àꞌɨ̀ɨ ra, àmɨ ngaa eꞌyo cɨ àmɨ nɨ zile Orɨ bʉ vɨɨ ɨnɨ isúu ra.”

Zitaa òkpo Yesu awo vɨɨ drìa vɨɨ

(Mariko 11:27-33; Luka 20:1-8)

23Acete Yesu kàdrì kalɨ Orɨ jó nɨ vɨɨ alɨa díká ɨ̀rɨ nɨ rɨrɨa ꞌba ɨmbarɨa, ꞌba ꞌwàrà Orɨ ɨteꞌba vɨɨ ɨnɨ oroo be cá ɨrɨ bʉ díká zí ɨ̀rɨ kɨ́nɨ̀, “Mɨ eꞌyo ꞌdɨ̀vɨɨ ɨnɨ ꞌoo òkpo ngoo yɨ̀, díká àrɨ fè mɨ́ yɨ́ òkpo ndee vɨɨ nɨ̀ yà?” 24Yesu òmvɨ ɨnɨ kɨ́nɨ̀, “Ma muu àmɨ zii zitaa àlʉ yɨ̀. Àmɨ tè zitaa ndee òmvɨɨ ra, mà ngaa ꞌyo àmɨ yɨ́ ma ꞌo eꞌyo ꞌdɨ̀vɨɨ ɨnɨ òkpo ngoo yɨ̀ yà vɨɨ ra. 25Òkpo Yohana nɨ bàbùtízìmù fèjʉ vɨɨ ɨnga ngʉ̀a yà? Ngajʉ ꞌbùa yà nòsɨ̀kʉ ꞌba ada bʉ yà?”

Nyá eꞌyo ndee alɨa ànɨ ɨsɨlɨa díká kɨ́nɨ̀, “Àma tè ꞌyoo, ‘Ɨngajʉ ꞌbùa,’ ɨ̀rɨ ngaa àma zii kɨ́nɨ̀, ‘Acete àmɨ awɨɨ eꞌyo ɨ̀rɨ awo vɨɨ àꞌɨ kʉ àrɨ eꞌyo yɨ̀ yà?’ 26Te àma tè ꞌyoo ɨnga ‘ꞌba ada bʉ,’ àma caa òrì yɨ̀ òꞌbɨ nɨ mule cale àma be ònzɨ vɨɨ yɨ̀, àrɨ̀yɨ̀kʉ àꞌɨ́ Yohana nɨ ꞌbarʉʉ eꞌyo ondrílé nɨ vɨɨ ra.”

27Ànɨ òmvɨ́ Yesu yɨ́ kɨ́nɨ̀, “Àma nìi kʉ.”

Acete ꞌyo ɨnɨ yɨ́ kɨ́nɨ̀, “Ma ngaa pàbaa àmɨ yɨ́ ꞌyo ma eꞌyo ꞌdɨ̀vɨɨ ɨnɨ ꞌoo òkpo ngoo yɨ̀ yà vɨɨ kʉ.”

Eꞌyo oꞌbezà àguanzɨ ìrì vɨɨ ɨnɨ drìa vɨɨ

28“Àmɨ́ ɨrɨ́ ngà eꞌyo ꞌdɨ̀vɨɨ! Agú àloo awo ndráánɨ́ àguanzɨ ìrì. Mu mva òkò vɨɨ bʉ díká ꞌyo ɨ̀rɨ yɨ́ kɨ́nɨ̀, ‘Mvamàa lá, mɨ mu àndrʉ̀ àzí nga wɨ́nò nga alɨa.’

29“Mvápia ndee òmvɨ ɨ̀rɨ yɨ́ kɨ́nɨ̀, ‘Ma mu kʉ,’ te butia oja nɨ así rá díká mu ra.

30“Acete atapi mu mva àloo vɨɨ bʉ díká ꞌyo ɨ̀rɨ yɨ́ eꞌyo àlʉ vɨɨ ɨ. Mvápia ndee òmvɨ ɨ̀rɨ yɨ́ kɨ́nɨ̀, ‘Mà mu ra,’ te awɨɨ mu kʉ.

31“Anzɨ ìrì ꞌdɨ̀vɨɨ ɨnɨ ɨ̀sɨlɨa àrɨ ꞌo eꞌyo atapi nɨ lèle vɨɨ ra nɨ̀ yà?”

Òmvɨ́ kɨ́nɨ̀, “Mva òkò vɨɨ ɨ.”

Yesu ꞌyo ɨnɨ yɨ́ kɨ́nɨ̀, “Ma lè ꞌyo àmɨ yɨ́ tàándí drʉ, ꞌba mʉ̀sorò traꞌba vɨɨ ɨnɨ zi àlɨ òꞌbàle vɨɨ ɨnɨ be muu fɨɨ Kárí Orɨ awo vɨɨ alɨa àmɨ drìlia òkò.” 32Àrɨ̀yɨ̀kʉ Yohana bàbùtízìmù fèle vɨɨ ca ndráánɨ́ àmɨ yɨ́ léti eꞌyo ada nɨ vɨɨ ɨ̀ce ra, díká àmɨ awɨɨ àꞌɨ kʉ. Te ꞌba mʉ̀sorò traꞌba vɨɨ ɨnɨ zi àlɨ òꞌbàle vɨɨ ɨbe àꞌɨ́ ra. Káꞌdí àmɨ nɨ eꞌyo ndee ndrèjʉ ra kpé, àmɨ gà así ojako sɨ̀ díká eꞌyo Yohana awo vɨɨ àꞌɨ̀ko sɨ̀.

Eꞌyo oꞌbezà ꞌba wɨ́nò nga ɨ̀pàngɨle vɨɨ ɨnɨ drìa vɨɨ

(Mariko 12:1-12; Luka 20:9-19)

33Yesu ꞌyo kɨ́nɨ̀, Àmɨ ɨ̀rɨ ngà pàbaa eꞌyo oꞌbezà àloo ꞌdɨ̀: “Àngʉ̀ apíri àloo sa ndráánɨ́ wɨ́nò nɨ awo nga alɨa, sò kalɨ pílía yɨ̀ kúrù cɨ, ga ꞌbúlé wɨ́nò sú nzɨjʉ vɨɨ cɨ díká si kàlakala ɨ̀zʉʉ ogi ònèjʉ cɨ. Acete ɨ̀pàngɨ nga ndee ꞌba nga ꞌàꞌba vɨɨ alóo ɨnɨ yɨ́ díká mu àcìa àloo alɨa.” 34Ànɨ sawà wɨ́nò patí ɨkɨ́ ndee tɨ̀jʉ vɨɨ nɨ cajʉ ꞌba, pè atɨꞌboo nɨ awo vɨɨ ɨnɨ ti ꞌba nga ɨ̀pàngɨle vɨɨ ɨnɨ bʉ ɨ̀sɨle nɨ awo vɨɨ àꞌíjʉ́ ra.

35Te ꞌba nga ɨ̀pàngɨle vɨɨ òrú atɨꞌboo ɨ̀rɨ awo vɨɨ ɨnɨ cɨ, có àlʉa ra, kí àloo vɨɨ káyɨ̀, díká oꞌbé àloo àsìjʉ vɨɨ ɨrà yɨ̀. 36Acete pè atɨꞌboo alóo ɨnɨ ti díká kàlàfe angɨrɨ yɨ̀ ɨ̀gàtɨ té òkò vɨɨ ra, díká ꞌba ndee ꞌó ɨnɨ kòꞌbò kɨ̀le ɨnɨ nɨ ꞌba òkò vɨɨ ɨnɨ ꞌole vɨ́nɨ. 37Àsìjʉ mgbɨ́, àngʉ̀ apíri pè mvápia ti ɨnɨ bʉ ɨ. ꞌYo ɨnɨ yɨ́ kɨ́nɨ̀, “Ɨnɨ ngaa mvamàa nɨ ìnzìi ra.”

38“Te ꞌba nga ɨ̀pàngɨle vɨɨ ɨnɨ nɨ mvápia nɨ ndrèjʉ ꞌba, ꞌyó ànɨ ɨ̀sɨlɨa kɨ́nɨ̀, ‘Vɨɨ kárímvá ɨ. Àmɨ mú àma kí ɨ̀rɨ ra díká àma ꞌdú kòlònzɨ̀ ɨ̀rɨ awo vɨɨ ra.’” 39Ànɨ rú ɨ̀rɨ, ɨ̀pʉ́ ɨ̀rɨ wɨ́nò nga alɨa vɨɨ yɨ̀ àja díká kí ɨ̀rɨ ra.

40Acete Yesu zi ɨnɨ kɨ́nɨ̀, “Wɨ́nò nga apíri tè caa ꞌba, ɨ̀rɨ ngaa ꞌba nga ɨ̀pàngɨle ꞌdɨ̀vɨɨ ɨnɨ ꞌoo ngóni yà?”

41ꞌBa ꞌwàrà Orɨ ɨteꞌba vɨɨ òmvɨ́ oroo be ɨ̀rɨ yɨ́ kɨ́nɨ̀, “Ɨ̀rɨ ngaa ꞌba onzɨ ꞌdɨ̀vɨɨ ɨnɨ drìjàa òrìòrì drʉ díká ɨ̀rɨ ngaa wɨ́nò nga ndee ɨ̀pàngɨɨ ꞌba alóo ɨcole òrɨ ti òkʉle vɨɨ ɨ̀sɨlɨa ɨ̀rɨ awo vɨɨ fèle ɨ̀rɨ yɨ́ rá vɨɨ ɨnɨ yɨ́.”

42Yesu ꞌyo ɨnɨ yɨ́ kɨ́nɨ̀, “Àmɨ awɨɨ ngà eꞌyo sɨ̀zà ꞌyole kɨ́nɨ̀,

‘Ɨrà ꞌba jó sile nɨ gàle sɨ̀ vɨɨ,

ca ɨrà òródrí be tʉ̀ vɨɨ drʉ kʉ yà?#21:42 Nòsɨ̀kʉ ꞌDɨ̀vɨɨ adanɨa ɨrà bɨ̀le kónà nɨ ka sòjʉ vɨɨ ɨnɨ ɨ.

Opɨ ꞌo eꞌyo ꞌdɨ̀vɨɨ nɨ̀,

díká eꞌyo ndee ɨ̀rɨ àma mulia ndrɨ̀zà drʉ tʉ̀.’

43“Ànɨyɨ̀ ma ꞌyo àmɨ yɨ́ Kárí Orɨ awo vɨɨ ꞌba ngaa ꞌduu àmɨ gíá vɨɨ yɨ̀ ra díká ꞌba ngaa ɨ̀rɨ fèe ꞌba ngale ɨkɨ́ kale ra vɨɨ ɨnɨ yɨ́. 44ꞌBarʉʉ zòle ɨrà ꞌdɨ̀vɨɨ drìa vɨɨ nɨ ngaa nɨ òŋòo nyɨ́rɨ́nyɨ́rɨ́, te ꞌbarʉʉ ɨrà ꞌdɨ̀vɨɨ nɨ zòle drìa vɨɨ nɨ ngaa nɨ ii fʉ́rá drʉ.” 45ꞌBa ꞌwàrà Orɨ ɨteꞌba vɨɨ ɨnɨ nɨ eꞌyo oꞌbezà Yesu awo vɨɨ ɨnɨ ɨrɨjʉ ꞌba Farasayi drʉ vɨɨ ɨbe ꞌba, ní rá ɨ̀rɨ ɨ̀tàa ànɨ drìa. 46Ànɨ òꞌbí léti ndru ɨ̀rɨ rujʉ, te rɨ́ ꞌo òrì yɨ̀ òꞌbɨ yɨ̀, àrɨ̀yɨ̀kʉ ꞌba drɨ́á àꞌɨ́ ndráánɨ́ ɨ̀rɨ ꞌba eꞌyo ondríi nɨ.

Currently Selected:

Matayo 21: MADI-URL

Highlight

Copy