Matayo 19

Ɨmbataa Yesu nɨ fèle àrú ɨretaa drìa vɨɨ

(Mariko 10:1-12)

1Yesu nɨ eꞌyo ꞌdɨ̀vɨɨ ɨnɨ azíjʉ́ ꞌbá vɨɨ butia, kʉ àngʉ̀ Galilia vɨɨ ra díká kodrì mu àngʉ̀ ꞌba Yudea vɨɨ ꞌyowa vɨɨ alɨa yí àra Yorudani drʉ vɨɨ ɨ̀gaa àlele vɨɨ alɨa. 2ꞌBa òꞌbɨ́ányá bɨ́ ɨ̀rɨ buti nɨ̀ díká àtɨ̀ ɨnɨ nàa ra.

3ꞌBa Farasayi drʉ vɨɨ alóo mú ɨ̀rɨ bʉ ɨ̀rɨ òꞌbí kɨ́nɨ̀, “Àzítáá àꞌɨ̀ agú àloo yɨ́ nɨ awo izí drojʉ eꞌyo cɨ vɨ́ɨvɨɨ yɨ̀ ra yà?”

4Yesu òmvɨ ɨnɨ yɨ́ kɨ́nɨ̀, “Àmɨ awɨɨ eꞌyo sɨ̀zà ꞌyole, ‘Ɨꞌdorɨa Orɨ òꞌbà ꞌba ada agú ɨnɨ izí be’#Iꞌdoza 1:27 vɨɨ la kʉ ya? 5Díká Orɨ kɨ̀nɨ̀, ‘Eꞌyo ꞌdɨ̀vɨɨ yɨ̀ agú nɨ ngaa atapi ɨnɨ kʉ ayopi be ra, mujʉ ànɨ ɨ̀cɨjʉ túàlʉ izípi be akú sijʉ kara àlʉa, díká ꞌba ìrì ꞌdɨ̀vɨɨ ɨnɨ ngaa ca àfa àlʉ drʉ.’#Iꞌdoza 2:24 6Ànɨ ngáá ace ovʉ àfa mgbimgbi ìrì drʉ kʉ te ɨnɨ ovʉʉ àfa àlʉ drʉ. Ànɨyɨ̀ àfa Orɨ nɨ ɨ̀cɨle túàlʉ ꞌba vɨɨ lè ꞌba àloo ɨ̀rɨ awa kʉ.”

7ꞌBa Farasayi nɨ vɨɨ zí ɨ̀rɨ kɨ́nɨ̀, “Acete Musa fè ndráánɨ́ àzítáá agú yɨ́ waragà gàtaa nɨ vɨɨ fèjʉ izípi gíá díká ɨ̀rɨ drojʉ ra àrɨ eꞌyo yɨ̀ yà?”

8Yesu òmvɨ kɨ́nɨ̀, “Musa fè àmɨ yɨ́ àzítáá zi gàjʉ vɨɨ ra àrɨ̀yɨ̀kʉ àmɨ así nɨ́ mbale kongolo drʉ ɨmbataa gàle sɨ̀ vɨɨ yɨ̀. Te ɨꞌdorɨa ndráá ovʉʉ vɨ́nɨ kʉ. 9Ma lè ꞌyo àmɨ yɨ́, agú àloo izípi nɨ gàa eꞌyo tòó yɨ̀ isú vɨɨ dèè izípi ꞌbàa àlɨ nɨ kʉ, díká tè izí àloo mgbia ru ɨ, agú ndee dèè naa ꞌbà àlɨ nɨ.”

10ꞌBa Yesu nɨ ɨmbale vɨɨ ꞌyó ɨ̀rɨ yɨ́ kɨ́nɨ̀, “Eꞌyo agú ɨnɨ ɨ̀sɨlɨa izí be vɨɨ tè ovʉʉ vɨ́nɨ cɨ̀kàa ꞌbanɨ ànɨ rujʉ kʉ vɨɨ ɨ.”

11Yesu òmvɨ kɨ́nɨ̀, “Ɨmbataa ꞌdɨ̀vɨɨ ꞌba drɨ́á ɨcóó àti nɨ̀ kʉ, te kíríá ꞌba Orɨ nɨ eꞌyo ndee fèle ɨnɨ yɨ́ vɨɨ ɨnɨ ɨ. 12Àrɨ̀yɨ̀kʉ asísílé àgu nɨ zi rujʉ kʉ vɨɨ ɨnɨ tree; alóo ɨnɨ ꞌba òsí vɨ́nɨ, alóo ɨnɨ arípí àgu fé cá ɨnɨ yɨ́ vɨ́nɨ nɨ̀#19:12 nòsɨ̀kʉ alóo òví ànɨ cenɨ̀cenɨ̀., díká alóo gá zi rule sɨ̀ Kárí ꞌbù nɨ vɨɨ eꞌyoa yɨ̀. ꞌBarʉʉ ɨmbataa ꞌdɨ̀vɨɨ àꞌɨ̀le ra vɨɨ ɨco eꞌyo ndee àti ra.”

Yesu nɨ anzɨ nyɨ́rɨ́ yɨ́ asíndrɨ̀zà fèjʉ vɨɨ

(Mariko 10:13-16; Luka 18:15-17)

13Acete ꞌba alóo jí anzɨ nyɨ́rɨ́ Yesu bʉ ɨ̀rɨ nɨ gí tìjʉ ɨnɨ drìa asíndrɨ̀zà fèjʉ ɨnɨ yɨ́ díká ɨnɨ yɨ́ Orɨ nɨ zijʉ benì. Te ꞌba Yesu nɨ ɨmbale vɨɨ ɨꞌdó ɨtre ꞌba ndee ɨnɨ drìa.

14Yesu kɨ̀nɨ̀, “Àmɨ kʉ́ anzɨ nyɨ́rɨ́ ɨnɨ mú ma bʉ, díká àmɨ ògá ɨnɨ kʉ, àrɨ̀yɨ̀kʉ Kárí ꞌbù nɨ vɨɨ ɨ̀rɨ ꞌba ꞌdɨ̀vɨ́ɨvɨɨ ꞌyowa nɨ.” 15Ɨ̀rɨ nɨ gí tìjʉ ɨnɨ drìa asíndrɨ̀zà fèjʉ ɨnɨ yɨ́ ꞌba, mʉ ace nàa naa yɨ̀ ra.

Kàdrúòo lonyɨ be vɨɨ

16Àcete kàdrúòo àloo mu Yesu bʉ díká zi ɨ̀rɨ kɨ́nɨ̀, “Ɨmbaápi, lè màá ꞌo eꞌyo ònyɨ̀be ngoo ɨ manɨ ɨdrɨ nánináni isújʉ́ yà?”

17Yesu òmvɨ ɨ̀rɨ yɨ́ kɨ́nɨ̀, “Mɨ ma zi eꞌyo ònyɨ̀be drìa àrɨ eꞌyo yɨ̀ yà? ꞌBarʉʉ kíríá ònyɨ̀be vɨɨ àlʉ. Mɨ tè lèe fɨɨ ɨdrɨ alɨa ra, mɨ mba àzítáá tà.”

18Agú ndee zi ɨ̀rɨ tia kɨ́nɨ̀, “Àzítáá ngoo ɨnɨ ɨ yà?”

Yesu òmvɨ kɨ́nɨ̀, “Mɨ ki ꞌba kʉ, mɨ ꞌbà àlɨ kʉ, mɨ ògì kʉ, mɨ li ɨ̀nzò kʉ, 19mɨ rʉ ateè ɨnɨ ayèè be,#Ipuza 20:12-16; Azita Amviza 5:16 díká mɨ lè àrɨɨ̀ nɨ mɨnɨ mɨ ngʉlʉpɨ nɨ lèle vɨ́nɨ.#Levi 19:19”

20Kàdrúòo ndee kɨ̀nɨ̀, “Ma mba àzítáá ꞌdɨ̀vɨɨ ɨnɨ tà drɨ́á rá. Àsìle vɨɨ àrɨ nɨ yà?”

21Yesu òmvɨ ɨ̀rɨ yɨ́ kɨ́nɨ̀, “Mɨ tè lèe ovʉʉ àlátárá drʉ, mɨ mʉ àkúá, mɨ ozí àfa drɨ́á mɨ awo vɨɨ ɨnɨ ra díká mɨ awa séndèa aluu yɨ́ ànɨ mɨ ngaa ovʉ lonyɨ be ꞌbùa benì. Acete mɨ mu ma bʉ, mɨ bɨ̀ ma buti.”

22Te kàdrʉ́òo ndee nɨ eꞌyo ꞌdɨ̀vɨɨ ɨrɨjʉ ꞌba, mvɨ càndɨ be asíá, àrɨ̀yɨ̀kʉ ɨ̀rɨ nɨ ovʉle lonyɨ be angɨrɨ vɨɨ yɨ̀.

23Acete Yesu ꞌyo ꞌba ɨ̀rɨ nɨ ɨmbale vɨɨ ɨnɨ yɨ́ kɨ́nɨ̀, “Ma lè ꞌyo àmɨ yɨ́ tàándí drʉ, ɨ̀rɨ ɨ̀wa drʉ ꞌba lonyɨ be vɨɨ ɨnɨ nɨ fɨjʉ Kárí ꞌbù nɨ vɨɨ alɨa. 24Díká ma lè ꞌyo àmɨ yɨ́, ɨ̀rɨ ɨ̀wako drʉ ngàmɨ́à nɨ fɨjʉ sɨ̀ndánɨ̀ tele yɨ̀ ɨ̀gàtɨ ꞌbarʉʉ lonyɨ be vɨɨ nɨ fɨjʉ Kárí Orɨ awo vɨɨ alɨa vɨɨ ra.”

25Ace ꞌba Yesu nɨ ɨmbale vɨɨ ɨnɨ nɨ eꞌyo ꞌdɨ̀vɨɨ ɨrɨjʉ ꞌba, ovʉ́ ànɨ òsùtaa yɨ̀ tʉ̀ díká zí ɨ̀rɨ kɨ́nɨ̀, “Acete àrɨ ɨco ovʉ pazà drʉ nɨ̀ yà?”

26Yesu ndrè àngʉ̀ ɨnɨ bʉ díká ꞌyo ɨnɨ yɨ́ kɨ́nɨ̀, “ꞌBa ada nɨ nɨ ngʉlʉpɨ nɨ pajʉ ɨ̀rɨ ɨ̀wa be, te Orɨ yɨ́ eꞌyo drɨ́á ɨ̀wa yʉ.”

27Petero òmvɨ ɨ̀rɨ kɨ́nɨ̀, “Mɨ ndrè ngà, Àma kʉ àfa àma ꞌyowa vɨɨ ɨnɨ drɨ́á mɨ buti bɨ̀jʉ! Àma te ace ngaa òròdrí ngoo isúu ɨ yà?”

28Yesu ꞌyo ɨnɨ yɨ́ kɨ́nɨ̀, “Ma lè ꞌyo àmɨ yɨ́ tàándí drʉ, sawà ꞌBa mvápi nɨ ngajʉ rɨjʉ ìnzìtaa be òpɨ̀ drìa iwú oꞌdɨ vɨɨ alɨa vɨɨ yɨ̀, àmɨ ꞌba ma buti bɨ̀ꞌba vɨɨ ɨnɨ drʉ, àmɨ pàbaa ngaa mu rɨɨ òpɨ̀ komɨ mudrí drìa ìrì vɨɨ ɨnɨ drìa, kárí mudrí drìa ìrì Isiralia vɨɨ ɨnɨ drì cejʉ. 29Díká ꞌba drɨ́á ànɨ ꞌyowa jó kʉle nòsɨ̀kʉ adrípí kʉle nòsɨ̀kʉ ambúpí kʉle nòsɨ̀kʉ àtapí kʉle nòsɨ̀kʉ ayópí kʉ̀le nòsɨ̀kʉ anzɨ ꞌyowa vɨɨ ɨnɨ kʉle nòsɨ̀kʉ nyawú kʉle drɨ́á ma eꞌyo yɨ̀ vɨɨ ɨnɨ ngaa àfa ndee ɨnɨ isúu atɨzà drʉ paaleko tʉrʉàlʉ díká ɨnɨ ngaa mu fɨɨ ɨdrɨ nánináni vɨɨ alɨa ra. 30Te ꞌba òꞌbɨ́ sawà vɨɨ yɨ̀ ovʉle òkò vɨɨ ɨnɨ ngaa ovʉ àva díká ꞌba sawà vɨɨ yɨ̀ ovʉle àva vɨɨ ɨnɨ ngaa ovʉʉ òkò.

Currently Selected:

Matayo 19: MADI-URL

Highlight

Copy