Matthieu 25

1Hèmonggo, nou‐ouane li‐zane mè tè amâ do bi̱‐ndifi boua‐pome, ndo ouo̱ kara lampe ko ouo̱‐o oui̱ne nèno to sangbè dè oui‐ba‐ko. 2Ma bo̱bo̱ ouo̱‐o mo̱ro nè yéè mo o, do ma mo̱ro nè ouaka mo. 3Nè yéè ouino‐o ba lampe ko‐ouo̱‐o, mais ouo̱ tè ba dèn do ouo̱‐o nè; 4mais nè ouaka ouino‐o hi ba dèn ko da dè lampe ko‐lo‐o. 5Hèmonggo nè oui‐ba‐ko mono kè tili nè té è hi, nè la ba li ouo̱‐o nè oli, ndo ouo̱ o̱la o. 6Nè ba kosan zè, nè ma ouili himo, ègui̱: Joko oui‐ba‐ko, ènè tèno ènè to sangbè do a o! 7Ndo bi̱‐ndifi no‐o ou‐è kilingo̱ne o, ouo̱ dafa lampe ko‐ouo̱‐o. 8Ndo yéè ouino‐o ou‐è to oui̱ne ho ouaka ouino‐o ou‐è, ègui̱: Ènè ha tè ma dèn da’nè‐o hè’lè, oui̱ne lampe da’lè bi ouo̱. 9Ndo ouaka ouino‐o ou‐è pikifi oui̱ne, ègui̱: Hodo, tè oui d’alè d’ènè‐o nè; ol’a hi n’ènè nèno o dida ouino nè pèlè nè mo o mè hi, ènè hè k’ènè‐o bè tè bè’nè‐o. 10Ndo ouo̱ mono ko ouo̱ nèno guènè hé a o hi, kè oui‐ba‐ko ma; ndo ouino‐o nè dafa mo ko‐lo‐o sa hi ndo ouo̱ a ko toa sadaga mariage do a, nè nou‐toa pi̱. 11Kèchida guèda ndo koli bi̱‐ndifi o ma, ouo̱ to oui̱ne, ègui̱: Seigneur, Seigneur, mè bô nou‐toa hè’lè. 12Mais n’a pikifi oui̱ne, ègui̱: Mi to h’ènè‐o, nè bara oui̱ne mi i̱ngi ti’nè‐o nè.

13Li’nè‐o bè ouo̱, nèdaka n’ènè tè i̱ngi ouichi dè l’heure nè.

14Oui̱ne nou‐ouane li‐zane mè amâ dè ma ouili nè nè guènè nè ma nou nè yèlè, n’a samo ho oui‐gossala ko‐a o, n’a ha mo ko‐a ho ouo̱‐o. 15N’a ha talent mo̱ro hè ma oui‐gossala pome, n’a ha talent litou hè ma, nè talent pome hè ma, a ha ho ouo̱‐o nè oli oui dè ngaïli‐dè‐mo ko‐ouo̱‐o, n’a nèno. 16Kè didi nè ouaïl’è nè ba talent mo̱ro h‐è a nèno, a kara ngui̱nzè hi, a hè mo, n’a pa mbéa talent mo̱ro, a a sènè. 17Hè pome mo go, nè ouaïl’è nè ba k’è talent litou hi, n’a pa mbéa litou. 18Nè ouaïl’è nè ba k’è talent pome iè, a nèno a za ko̱, a houssou ngui̱nzè kè oua‐mbaliè sènè. 19Nè ouichi raka nè ouinè, nè oua‐mbali kè oui‐gossala no‐o ou‐è pi̱lida, k’a toro ngui̱nzè da do ouo̱‐o. 20Nè ouaïl’è nè ba talent mo̱ro hi tèno nè mbé talent mo̱ro, a to oui̱ne, ègui̱: Seigneur, mè ha talent ho‐m’ mo̱ro; joko, mi pa mbéa mo̱ro da. 21Oua‐mbaliè to oui̱ne h’a, ègui̱: Dièouinè, mè nè dé mbouo oui‐gossala; mè déè nè mbouo‐mo nèda solobi̱ mo guèdè, mi tè é mè oui̱ne joko da mo ouinè; mè tèno sènè dèssa kè oua‐mbali ko‐mè. 22Nè ouaïl’è nè ba talent litou hi, tèno bo, a to oui̱ne, ègui̱: Seigneur, siti mè ha talent ho‐m’ litou; joko, mi pa mbéa talent litou. 23Nè oua‐mbaliè to oui̱ne h’a, ègui̱: Dièouinè; mè dé mbouo oui‐gossala; mè déè nè mbouo‐mo nèda solobi̱ mo guèdè, mi tè é mè oui̱ne joko da mo ouinè; mè tèno sènè dèssa kè oua‐mbali ko‐mè. 24Nè ouaïl’è nè ba k’è talent pome iè hi tèno, to oui̱ne, ègui̱: Seigneur, mi i̱ngi mè ngangga ouinè, mè kara yono sènè fo no mè tè péè nè, dè mè kara mo bèi no mè tè yèlè nè hi; 25kili gbè mi, mi nèno mi houssou talent ko‐mè do̱ nou; joko, mè ba mo nè nè mo ko‐mè hi. 26Nè oua‐mbaliè pikifiè h’a, ègui: Mè nan oui‐gossala dè oui-hèlètè, mè i̱ngi no‐m’ kara yono sènè fo no‐m’ tè péè nè, dè mi kara mo bèi no‐m’ tè yèlè nè hi; 27mè ouiè dè ha ngui̱nzè ko‐m’ ho ouili ko toa‐ngni̱nzè, no‐m’ pi̱li nè hi no‐m’ pa ngui̱nzè ko‐m’ dè mbéa jou a da. 28Ènè ba talent pome él’a dida, h’a hè ouaïl’è nè talent ko‐a boua‐pome hi. 29Nèdaka ouo̱ tè ha hè ouaïl’è nè ko‐a aï, kè mo él’a tè doko ouinè, mais ouaïl’è nè mo ko‐a bènè hi, sèba oa él’a ouo̱ tè ba dida. 30Ènè pi oui‐gossala nè o̱ soko nè di‐zane sènè toum mè, oloyara ndo ouo̱ tè hélikoa dè yongo yini o.

31Kè Bi̱‐oui‐ouili kè ouili tè pi̱lida dè gloire ko‐a, do ange o nè oli, a tè doungounou ngo ngui̱ndi‐ouane kè gloire ko‐a. 32Ba doko nouli̱ nè oli tè to a‐jou‐ma di ti è nè. A tè kèkosan ouo̱‐o do ma o hèmo nè oui‐pama‐badoua kèkosan badoua dè gui̱li̱ doua higo; 33k’a tè é badoua o di ouara ouiliko, dè gui̱li̱ doua di ouara galè. 34Kè ouane tè to oui̱ne ho ouino‐o ouara ouiliko, ègui̱: Ènè tèno, n’ènè‐o nè Sème ko‐m’ iè démo jou’nè‐o hi, ènè ba nou‐ouane o nè mo k’ènè‐o, n’a dafa h’ènè‐o nè dome dè nou mè. 35Oui̱ne ouo̱ gbè mi, n’ènè ha kame ho‐m’ o; hèlè‐li gbè mi, n’ènè ha li ho‐m’ o; mi nè oui‐guène, n’ènè ba mi di ko toa k’ènè‐o. 36Mi nè kouli, n’ènè a toulou to‐m’ o, nè to‐m’ himi nè, n’ènè téèno o oui̱ne joko mi; no‐m’ o̱ nè ko kanga, n’ènè téèno o dida mi nè. 37Ndo bolon ouili o tè pikifi oui̱ne h’a, ègui̱: Seigneur, alè joko mè nè olo ouo̱ bè gui̱ssi gui̱, k’alè ha nè kame ho mè gui̱ndi; kèo̱nè nè hèlè‐li gbè mè, k’alè ha nè li ho mè ko mè no̱ nè hi gui̱ndi? 38Alè joko mè nè oui‐guène, k’alè ba no mè di ko toa kè’lè bè gui̱ssi gui̱ndi; kèo̱nè nè kouli, k’alè a toulou to mè hi ndi? 39Alè joko mè kè to mè himi nè, kèo̱nè nè ko kanga, k’alè nèno di ka to mè bè gui̱ssi gui̱ndi? 40Nè ouane tè pikifi oui̱ne ho ouo̱‐o, ègui̱: Nè bara oui̱ne ho‐m’ to h’ènè‐o, ba doko ouara nè oli n’ènè déè nè mo no‐o ou‐è dè kètè ma solobi̱ yan mi o ou‐è, k’ènè déè do‐m’ o. 41Kèchida n’a tè to oui̱ne ho ouino‐o nè yolo ouara galè, ègui̱: Ènè yoko tè’nè‐o yèlè no‐m’, ènè nè dan‐mo o̱ jou’nè‐o hi, ènè nèno di sènè oui̱ nè tè bi go doumè hi, oui̱ n’a dafa nèda Bison do ange k’è o. 42Nèdaka ouo̱ gbè mi, n’ènè tè ha mo‐yongo ho‐m’ o nè; hèlè‐li gbè mi, n’ènè tè ha li ho‐m’ mi no̱ o nè; 43mi nè oui‐guène, n’ènè tè ba mi é ko toa k’ènè‐o nè; mi nè kouli, n’ènè tè a toulou to‐m’ o nè; mi nè zèlè dè ko kanga, n’ènè tè tèno oui̱ne joko mi o nè. 44Ndo ouo̱ tè pikifi oui̱ne o bo, ègui̱: Seigneur, bè gui̱ssi gui̱ nd’alè joko no mè nè olo ouo̱, kèo̱nè nè olo hèlè‐li, kèo̱nè nè guène, kèo̱nè nè kouli, kèo̱nè nè zèlè, kèo̱nè nè ko kanga, k’alè tè baka no mè nè gui̱ndi? 45N’a tè pikifi ho ouo̱‐o, ègui̱: Nè bara oui̱ne ho‐m’ to h’ènè‐o, ba doko ouara n’ènè tè dè mo no‐o ou‐è hè ma kètè solobi̱ bi̱me no‐o ou‐è nè, k’ènè tè déè do‐m’ o nè. 46Ko ouino‐o ou‐è tè chi guènè kanga nè o̱ doumè doumè hi, mais ndo bolon ouili o tè chi ko‐lo‐o guènè monotouni doumè.

Currently Selected:

Matthieu 25: GBANU

Highlight

Copy