Matthieu 21

1Ko ouo̱ dè hèdè nè Jérusalem, ndo ouo̱ ma o Bethphagé nè ka kara olivier, nè Jésus toumbou disciple k’è o litou, 2a to oui̱ne ho ouo̱‐o, ègui̱: Ènè nèno o di sarli̱ mè nè tana ma dè ti’nè‐o hi; k’ènè tè pa ko‐tolofou didi ko ouo̱ pou’a, dè bi̱me ko‐a hè do a hi: ènè yara ouo̱‐o, ènè mbo ouo̱‐o pi̱li nè ho‐m’. 3Kè ma ouili hè to oui̱ne h’ènè‐o, n’ènè pikifiè, ègui̱: Seigneur ko ouo̱‐o. Nè didi n’a tè é ouo̱‐o ho ouo̱ nèno. 4Oui̱ne d‐è ma, sè kè dè bara oui̱ne hèmo nè Nzapa toa nè ouara tè prophète, ègui̱:

5Mè to oui̱ne hè bi̱‐ouiko kè Sion, ègui̱:

Joko, ouane ko‐mè hè tèno dida mè nè,

Sèl’a nè ga, a danga jou tolofou,

Nè jou bi̱‐tolofou è, nè bi̱ kè ko‐tolofou.

6Ndo disciple o nèno, ouo̱ dè o hèmo nè Jésus toa nè ho ouo̱‐o higo. 7Ouo̱ mbo̱ tolofou dè bi̱me ko‐a pi̱li nè, ouo̱ a toulou ko‐ouo̱‐o jou ouo̱‐o, ouo̱ b’a é jou a. 8Ndo ma ouili nè doko bo̱bo̱ do̱ o é toulou ko‐lo‐o liouara; ndo ma o nèngè bi̱‐baka‐ti, ouo̱ nèkè o nè liouara. 9Ouino‐o nè nèno nè tiè, ndo ino‐o nè tèno nè da diè hi, ouo̱ himo o, ègui̱: Hosanna hè Bi̱‐oui‐ouili kè David! Démo o̱ jou ouaïl’è nè tèno nè yini Seigneur! Hosanna di oloyara ngo̱ne mè ouinè!

10K’a dè bô Jérusalem mè, kè oui̱ne d‐è fô sèlè ouili‐sarli̱ o nè oli, ouo̱ to oui̱ne, ègui̱: Ouaïl’è nè ndo ndi? 11Ndo do̱ pikifi oui̱ne, ègui̱: Nè Jésus nè nè prophète kè Nazareth nou Galilée ouo̱.

12Nè Jésus lé ko toa temple kè Nzapa. A ndaka o ouino‐o nè bi̱ nou‐guènè‐mo do ouino‐o nè hè mo nè éli ouo̱‐o ko temple hi; n’a kini tablo ko oui‐para‐ngui̱nzè, dè ngui̱ndi ko oui‐hè‐pigeon o. 13N’a to oui̱ne ho ouo̱‐o, ègui̱: Mbèti to oui̱ne, ègui̱: Ouo̱ sa yini toa ko‐m’ nè toa toro Nzapa ouo̱. Mais k’ènè‐o, ènè b’a o dè ko̱ kè oui‐jou‐mo o.

14Ko bouo‐li‐ouili o dè oui‐koum o tèno di ka té a di ko temple nè. N’a dè zèlè ko‐ouo̱‐o sa.

15Mais ko nga‐oui‐sacrificateur o do scribe o joko oui̱ne ba di̱ngguè mo n’a déè hi, dè oui̱ne kè bi̱me nè himo nè ko temple: Hosanna hè Bi̱‐oui‐ouili kè David ouo̱, ndo ouo̱ dè houn‐sèlè ouo̱. 16Ndo ouo̱ to oui̱ne h’a, ègui̱: Mè zili oui̱ne ndo ouo̱ to o hi nè ndi? Nè Jésus pikifiè ho ouo̱‐o, ègui̱: Nè bara oui̱ne. Ènè tè toro oui̱ne ko mbèti siti nè, ègui̱: Mè ba nou bi̱me dè ino‐o nè mono kè ama li‐béli hi, nè mo jono mè è hi ndi?

17N’a é ouo̱‐o, a ho zane ko di̱ngguè sarli̱ oui̱ne nèno di Béthanie mè, oui̱ne o̱ sèn’a.

18Kè ho toutouli n’a pi̱li nè da di di̱ngguè sarli̱ mè hi, kè ouo̱ gbé a. 19N’a joko ti‐figuier pome nè ka liouara, a nèno di ka té a; mais n’a pa kè nè ma‐ng‐a iè, n’a to oui̱ne h’a, ègui̱: Bè ko mè ouara mbé mo doumè go. Kè didi kè figuier koulou. 20Ko disciple o hè dè joko mo hi ndo ouo̱ koukou oui̱ne, ègui̱: Ti‐figuier è dè tan hègo gui̱ kè koulou nè didi gui̱ndi? 21Jésus pikifiè ho ouo̱‐o, ègui̱: Mi to bara oui̱ne h’ènè‐o, o̱nemo i̱ngi‐mo‐ko‐sèlè k’ènè‐o hè oa sènè, o̱nemo ènè téli oui̱ne o nè, bè ènè tè dè mo o nè déè ti‐figuier hi iè go, mais ènè tè to oui̱ne hè ba di̱ngguè kara è mè, ègui̱: Mè you to mè sènèmo̱, mè lô do̱ ba nana li ouo̱, nè mo è tè dè hègo. 22Ba doko mo nè oli n’ènè tè aka nè i̱ngi‐mo‐ko‐sèlè nè ouara tè toro Nzapa, n’ènè tè pa o.

23Jésus nèno ko temple, n’a mono k’a oussou nè oui̱ne hi, ko nga‐oui‐sacrificateur o do a‐ouilio o tèno, ouo̱ to oui̱ne h’a, ègui̱: Dome ngaïli bo‐mè dè mo no‐o ou‐è hoa nè ouara do ndi, ndo iè mè oui̱ne dè mo no‐o ou‐è o ndi? 24Nè Jésus pikifi oui̱ne ho ouo̱‐o, ègui̱: Mi koa aka mo pome h’ènè‐o bo; o̱nemo ènè pikifi oui̱ne d‐è ho‐m’ o, no‐m’ tè oussou dome ngaïli no‐m’ dè mo no‐o ou‐è h’ènè‐o. 25Baptême kè Jean téèno nè do ndi? nè li‐zane mè kèo̱nè kè nè ouara tè ouili o ndi? Ndo ouo̱ to oui̱ne do ma o, ègui̱: O̱nemo alè to, ègui̱: Nè li‐zane mè ouo̱, n’a tè to hè’lè: Nè oui̱ne gui̱ h’ènè i̱ng’a b’a nè ko sèlè’nè‐o nè gui̱ndi? 26Mais o̱nemo alè pikifiè, ègui̱: Nè ouara tè ouili ouo̱, nd’alè ouiè dè kili kè ba doko ouili o, nèdaka ndo ouo‐o nè oli joko Jean nè prophète. 27Ndo ouo̱ pikifiè hè Jésus, ègui̱: Alè i̱ngi nè ouo̱. N’a to oui̱ne bo‐a ho ouo̱‐o: Mi bo hègo, mi tè oussou h’ènè‐o dome ngaïli no‐m’ dè nè mo no‐o ou‐è h’ènè‐o go.

28Ènè li̱nggui k’ènè‐o bè tè’nè‐o hègo gui̱ndi? Ma ouili pome, bi̱‐oui‐ouili ko‐a litou; a to oui̱ne hè ka‐bi̱me, ègui̱: Bi̱me ko‐m’, mè nèno mè dè gossala sossoè sènè fo‐nya‐ouara‐ti ko‐m’ ouo̱. 29N’a pikifiè h’a, ègui̱: Mi ko nè. Mais didi n’a para nou a, n’a nèno. 30N’a nèno dida ma, n’a to nè pome oui̱ne d‐è hi. Nè bi̱me b‐è pikifiè h’a, ègui̱: Mi kodaka diouinè ouo̱, seigneur. N’a tè nèno nè. 31Nè ndo bo̱bo̱ ouo̱‐o litou hè déè mo hèmo nè sème ko‐ouo̱‐o koa nè higo o ndi? Ndo ouo̱ pikifiè h’a, ègui̱: Nè ka‐bi̱me ouo̱. Nè Jésus to oui̱ne ho ouo̱‐o, ègui̱: Mi to bara oui̱ne h’ènè‐o, o publicain o do ouiko‐nè‐yama o tè ma sènè nou‐ouane kè Nzapa ti’nè‐o. 32Nèdaka nè Jean téèno dida’nè‐o nè liouara bolon‐mo, n’ènè tè i̱ng’a b’a ko sèlè’nè‐o nè. Mais ndo publicain o do ouiko‐nè‐yama o i̱ng’a b’a ko sèlè ouo̱‐o; n’ènè joko oui̱ne d‐è o hi, n’ènè tè dè yoro sèn’a oui̱ne raka nanmo di̱ hè i̱ng’a ba ko sèlè’nè‐o nè.

33Ènè zili ma donggo‐oui̱ne o. Ma ouili pome hè sènè, a nè ouaïli toa, a gounou nya‐ouara‐ti. A mama k‐a nè bi̱‐ti, n’a za ko̱ pili‐li‐ouara‐ti, n’a dè jia toa bo hi; kèchida n’a é fo nè éli oui‐pama nya‐ouara‐ti h’a o, n’a nèno di ma sarli̱ nè yèlè mè. 34Kè ouichi kara yono fo hè ma, n’a toumbou oui‐gossala ko‐a dida oui‐pama nya‐ouara‐ti o mè oui̱ne ba ouara ol’a. 35Ndo oui‐pama fo‐nya‐ouara‐ti o kara oui‐gossala ko‐a, ouo̱ mbèlè ma pome, ouo̱ gbè ma pome, ndo ouo̱ lou ma nè ta. 36N’a toumbou mbé oui‐gossala a da doko gana ino siti o hi; ndo oui‐pama fo‐ouara‐ti o dè nè pome mo do ouo̱‐o. 37Mais nè ndouti koliè n’a toumbou nè bi̱‐oui‐ouili ko‐a dida ouo̱‐o mè, n’a to oui̱ne, ègui̱: Ouo̱ tè di̱ngguili bi̱‐oui‐ouili ko‐m’ o ouo̱. 38Mais nè oui‐pama fo‐ouara‐ti hè joko bi̱‐oui‐ouili ko‐a, ndo ouo̱ to oui̱ne o do ma o, ègui̱: Joko, oui‐kara‐mo ol’a nomo. Ènè tèno alè gbé a, k’alè ba mo ol’a ouo̱. 39Ndo ouo̱ b’a o, ouo̱ pi a di‐zane donggo fo di, ouo̱ gbé a o. 40Kinè, kè ouaïli fo‐ouara‐ti hè téèno, n’a tè dè nè gui̱ do oui‐pama fo‐ouara‐ti o ou‐è gui̱ndi? 41Ndo ouo̱ pikifiè h’a, ègui̱: A tè gbè nan ouino‐o ou‐è nè nan fio, k’a tè ba fo‐ouara‐ti oui̱ne ha ho ma ouili‐pama‐fo nè tè ha ouara‐ti h’a nè ouichi kara mo fo hi.

42Jésus to oui̱ne ho ouo̱‐o, ègui̱: Ènè tè toro oui̱ne d‐è kosan mbèti kè Nzapa o nè ndi:

Ta nè oui‐dè‐toa o pi jon hi

Pi̱li da dè di̱ngguè ta‐touli‐toa;

Oui̱ne è téèno nèda Seigneur mè,

K’è nè di̱ngguè mo nè ba‐li’nè‐o ndi?

43Nèda mo hi, mi to h’ènè‐o: ouo̱ tè ba nou‐ouane kè Nzapa nè éli’nè‐o dida, ko ouo̱ tè ha ho ma nouli̱ nè tè ha ouara ol’a da. 44Ouili bèi nè tè lônou ngo ta è, n’a tè bini té a, dè ouili bèi nè ta tè lô ngo té a hi, n’a tè roto hè fou‐nou higo. 45Ko ouo̱ dè zili donggo‐oui̱ne d‐è o hi sa, ndo nga‐oui‐sacrificateur o do pharisien o i̱ngi tana o kè Jésus to nè oui̱ne ko‐ouo̱‐o, 46ndo ouo̱ fa liouara oui̱ne b’a o; mais ouo̱ dè kili kè do̱ o, nèdaka ouo̱ jok’a hè prophète go.

Currently Selected:

Matthieu 21: GBANU

Highlight

Copy