Matthieu 20

1Nèdaka nou‐ouane li‐zane ouiè ma dè ouaïli toa pome, nè hoa zane nè toutouli choute, oui̱ne fa oui‐gossala‐ngui̱nzè nèda fo nya‐ouara‐ti ko‐a. 2N’a bi ngui̱nzè ho ouo̱‐o nè franca pome oui̱ne kè ouichi pome, ndo ouo̱ koda k‐a, n’a toumbou ouo̱‐o di sènè fo nya‐ouara‐ti ko‐a mè. 3Nè l’heure tara hèdè nè hi, n’a ho zane n’a joko o ma kè doungounou nè oloyara goloumbo nè ola. 4N’a to oui̱ne ho ouo̱‐o, ègui̱: Ènè nèno di sènè fo‐nya‐ouara‐ti ko‐m’ mè bo, no mi tè ha mo h’ènè nè ouiè olo gossala k’ènè‐o. Ndo ouo̱ nèno o di sènè mè bo. 5N’a ho zane da nè l’heure dongpo dè l’heure mbéa‐pome‐kè‐bou; k’a dè nè pome mo da. 6Nè hèdè nè l’heure boua‐pome‐ne‐joua‐pome n’a pa ma ouili o nè doungounou sènè goloumbo nè ola; n’a to oui̱ne ho ouo̱‐o, ègui̱: Nè oui̱ne gui̱ h’ènè doungounou o sènèmo̱ nè ola sossoè nè oli gui̱ndi? 7Ndo ouo̱ pikifiè h’a, ègui̱: Oui̱ne ma ouili kè ha gossala‐ngui̱nzè h’alè bènè ouo̱. N’a to oui̱ne ho ouo̱‐o, ègui̱: Ènè nèno o di sènè fo‐nya‐ouara‐ti ko‐m’ mè bo. 8Kè ouichi dè li hi, nè ouaïli fo‐nya‐ouara‐ti to oui̱ne hè oui‐pama ngui̱nzè ko‐a, ègui̱: Samo ho oui‐gossala o, mè ha ngui̱nzè ko‐ouo̱‐o ho ouo̱‐o, mè kouyanga nè ouili‐da o mè iyaaa mono nè dida o ouili‐siti o mè. 9Ndo ouino‐o nè ba gossala nè l’heure boua‐pome‐nè‐joua‐pome hi, tèno ouo̱ nè oli ba ko‐lo‐o nè franca pome. 10Ndo oui‐siti o tèno, ouo̱ li̱nggui ba ko‐lo‐o gana i; mais ndo ouo̱ nè oli ba nè franca pome, pome bo. 11Ndo ouo̱ ba nè o hi, ndo ouo̱ chi guènè moungoulou oui̱ne o dè ouaïli toa, 12ouo̱ to oui̱ne o, ègui̱: O ouili‐da o déè gossala nè oui̱ne kè l’heure pome iè, no mè dè mo do ouo̱‐o oui ma dè’lè, nd’alè déè mo iyaaa bémo bara li’lè dè tè’lè dolo sa. 13Mais n’a pikifiè hè kètè ma, a to oui̱ne, ègui̱: Ouigara ko‐m’, mi tè dè nanmo do mè nè; mè tè koda siti oui̱ne kè franca pome nè ndi? 14Ba mo ko‐mè mè nèno. Mi koa ha hè ouili‐nè‐da ouara pome do mè. 15Mi ouiè dè dè mo dè mo ko‐m’ hèmo no‐m’ kodaka higo go ndi? Kèo̱nè no mè joko nè li mè dinè no‐m’ dè nè démo ndi? 16Hèmonggo o ouili‐nè‐da tè o̱ nè ti, do ouili‐siti o tè o̱ nè da.

17Nè Jésus danga nè di Jérusalem mè hi, n’a ba disciple o boua‐pome nè‐joua‐litou di ouara‐badi, a to oui̱ne ho ouo̱‐o nè liouara, ègui̱: 18Joko, alè danga di Jérusalem mè, ko ouo̱ tè ha Bi̱‐oui‐ouili kè ouili nè éli o nga‐oui‐sacrificateur o do scribe o. Ko ouo̱ tè to mbanga jou a nè fio, 19ko ouo̱ tè ha a ho gui̱li̱ ouili o, sè kè déè ndo ouo̱ mam’a o, ko ouo̱ mbèl’a o nè gafi, ko ouo̱ mbod’a o jou croix; kè zè tara k’a tè tounou.

20Kè na kè bi̱me kè Zébédée tèno di da Jésus nè do bi̱‐oui‐ouili ko‐a o, a lônou di ti a nè, oui̱ne ak’a nèda mo pome. 21A to oui̱ne h’a, ègui̱: Mè koa nè gui̱ndi? N’a to oui̱ne, ègui̱: Mè é ho bi̱‐oui‐ouili ko‐m’ o litou h‐è oui̱ne doungou, ma pome nè ouara ouiliko, nè ma pome nè ouara galè sènè nou‐ouane ko‐mè. 22Nè Jésus pikifiè, ègui̱: Ènè i̱ngi mo n’ènè aka hi nè. Ènè ouiè dè no̱ kopo no‐m’ tè no̱ hi ndi? Ndo ouo̱ pikifiè h’a, ègui̱: Alè ouiè ouo̱. 23N’a to ho ouo̱‐o, ègui̱: Ènè tè no̱ kopo ko‐m’ nè mbètè; mais oui̱ne doungounou nè ouara ouiliko dè ouara galè ko‐m’, è nè bènè oui̱ne ko‐m’ go; mais nè nè oui̱ne ko ouino nè Sème ko‐m’ dafa ho ouo̱‐o hi. 24Ko disciple boua‐pome hè dè zili oui̱ne d‐è hi, nè sèlè ouo̱‐o himi do yan o litou hi. 25Jésus samo ho ouo̱‐o, a to oui̱ne, ègui̱: Ènè i̱ngi o nè ouane‐nouli̱ noukoulou ndo ouo̱‐o, ndo di̱ngguè ouili ko‐ouo̱‐o ba ouo̱‐o nè bara o. 26Oui̱ne tè o̱ bo̱’nè‐o hègo go. Mais ouili bèi nè koa di̱ngguè bo̱bo̱’nè‐o hi, n’a oui dè oui‐gossala kè’nè‐o; 27dè ouili bèi nè koa pi‐ti bo̱bo̱’nè‐o hi, n’a ouiè dè bara h’ènè‐o. 28Nè pome mo go, Bi̱‐oui‐ouili kè ouili tèno, bè hè ouili dè mo h’a go, mais oui̱ne dè mo ho ouili dè oui̱ne ha monotouni ko‐a nè mo gonojou ouili o ouinè.

29Ko ouo̱ dè ho zane o Jéricho, ko ba doko ouili o ma pata Jésus. 30Joko, bouo‐li‐ouili litou doungounou nè ka liouara, ndo ouo̱ zili o nè Jésus raka nè hi, ouo̱ himo, ègui̱: Seigneur, mè Bi̱‐oui‐ouili kè David, bako dè li mè nèda’lè ouo̱! 31Nè ba doko ouino‐o dèda do ouo̱‐o ho ouo̱ da nou ouo̱‐o; mais ndo ouo̱ mbèlè nou ouo̱ o dingo̱ne, ègui̱: Seigneur, Bi̱‐oui‐ouili kè David! bako dè li mè nèda’lè ouo̱! 32Nè Jésus yolo, a samo ho ouo̱‐o, a to oui̱ne, ègui̱: Ènè koa o mi dè nè gui̱ h’ènè‐o gui̱ndi? 33Ndo ouo̱ to oui̱ne h’a: Seigneur, alè koa li’lè ma ouo̱. 34Nè oui̱ne d‐è ba sèlè kè Jésus ouinè, a doubou li ouo̱‐o; kè didi ndo ouo̱ joko mo o, ouo̱ nèno pat’a o.

Currently Selected:

Matthieu 20: GBANU

Highlight

Copy