Matthieu 19

1Kè Jésus hè oussou oui̱ne d‐è sa, n’a iè Galilée, a nèno di sènè nou Judée mè, di ouara koulou Jourdain di. 2Ba doko ouili o ouinè nèno pat’a, n’a dè zèlè ko‐ouo̱‐o sa mè.

3Ndo pharisien o tèno di ka té a nè oui̱ne fa liouara ko‐a, ouo̱ to oui̱ne, ègui̱: Mboulou é ouili bi̱li ko k’è nèda oui̱ne nè oli ndi? 4N’a pikifiè, ègui̱: Ènè tè toro o nè ndi hèmo nè kotè‐dè‐nou déè oui‐ouili dè ouiko nè kouyanga‐mo mè, 5n’a to oui̱ne, ègui̱: Nèda oui̱ne d‐è hi, nomo nè ouili tè é sème k’è dè na k’è, n’a tè hèlè té è dè ko n’è, ouo̱ litou tè tèno hè mourou‐tè pome go ouo̱ ndi? 6Hèmonggo bè ouo̱‐o litou da go, mais ouo̱‐o nè mourou pome iè. Nèda oui̱ne d‐è ouili ya kèkosan mo bèi nè Nzapa hèlè tè ma sa hi nè. 7Ndo ouo̱ to oui̱ne h’a, ègui̱: Nè oui̱ne gui̱ hè Moïse toa nè, ègui̱: Ouili ouiè ha mbèti‐bi̱li‐ko hè ouiko dè bi̱l’a ouo̱ gui̱ndi? 8N’a pikifiè ho ouo̱‐o, ègui̱: Nèda oui̱ne ngangga sèlè’nè‐o nè mo nè Moïse iè n’ènè‐o oui̱ne bi̱li ko k’ènè‐o hi; nè kouyanga mo mè, bè hègo go. 9Mais mi to h’ènè‐o, Ouili bèi nè bi̱li ko k’è, bè nè o̱ nèda oui̱ne nè yama nè, k’a ba ma ko ol’a, k’a nè nè yama, dè ouili bèi nè ba ko nè ma ouili bi̱l’a hi, k’a nè nè yama.

10Ndo disciple ko‐a o to oui̱ne h’a, ègui̱: O̱nemo oui̱ne kè oui‐ouili dè ouiko hè oa hèmonggo, kè dièouinè o ya ba ouiko nè ouo̱. 11N’a pikifiè ho ouo̱‐o, ègui̱: Ba doko ouili nè oli tè zili dome oui̱ne d‐è go, mais nè ouino‐o n’a ha ho ouo̱‐o iè. 12Oui̱ne ma ouili o hè aï nè na ko‐ouo̱‐o kouo ouo̱‐o ko ouo̱‐o nè manra nè tiè; ndo ma o hè aï hi nè nè ouili hè ba ouo̱‐o nè manra; ndo ma o hè aï hi, nè ba to lo‐o nè manra nèda oui̱ne nou‐ouane kè li‐zane. Ouili bèi nè ouiè zili dome oui̱ne d‐è n’a zili.

13Ndo ouo̱ kara solobi̱ bi̱me o tèno dida k‐a, h’a é él’a jou ouo̱‐o oui̱ne toro Nzapa nèda ouo̱‐o. Mais ndo disciple o gaïya ouo̱‐o. 14Nè Jésus to oui̱ne, ègui̱: Ènè é bi̱me o, ènè ya gono liouara ko‐ouo̱‐o oui̱ne tèno dida mi nè nè; nèdaka nou‐ouane li‐zane mè nè oui̱ne kè ouino‐o nè amâ do ouo̱‐o hi. 15N’a é él’a jou ouo̱‐o, n’a kili̱ngone aï hi.

16Joko, kè ma ouili pome tèno dida k‐a nè, a to oui̱ne, ègui̱: Maître, mi ouiè dè nè démo gui̱, sè ko‐m’ monotouni doumè doumè gui̱ndi? 17N’a to oui̱ne h’a, ègui̱: Nè oui̱ne gui̱ ho mè aka no‐m’ nèda oui̱ne mo nè diouinè gui̱ndi? Pome iè aï nè diouinè. O̱nemo mè koa ma sènè monotouni, no mè pama mboulou o. 18Nè ouaïl’è to oui̱ne h’a, ègui̱: Nè mboulou bèi do? Nè Jésus pikifiè h’a, ègui̱: Mè ya gbè ouili nè; mè ya nè yama nè; mè ya jou mo nè; mè ya to ndèlè tè ma ouili nè; 19mè é sème ko‐mè sènè dè na ko‐mè; Mè ko béa mè hè kili to mè go. 20Nè boulou bi̱me b’è pikifiè h’a, ègui̱: Mi déè mo no‐o ou‐è nè oli no‐m’ mono nè bi̱me iyaaa didi; koli nè mono da nè gui̱ndi? 21Nè Jésus pikifiè h’a, ègui̱: O̱nemo mè koa yoada ko‐mè ya o̱ nè, no mè nèno mè hè mo ko‐mè nè mo, no mè ha ho oui‐sane o, ko mè tè pa mo‐dèmè ko‐mè li‐zane mè ouo̱. Kèchida no mè tèno, mè tèno pata‐m’. 22Kè boulou bi̱me b‐è dè zili oui̱ne d‐è, n’a chi nè himi‐sèlè; nèdaka nè pa‐mo él’a ouinè. 23Nè Jésus to oui̱ne ho disciple k’è o, ègui̱: Nè bara oui̱ne mi to h’ènè‐o, ngangga ouinè nèda oui̱ne kè oui‐dèmè oui̱ne ma sènè nou‐ouane li‐zane mè. 24Mi to h’ènè‐o da, ngangga ouinè nèda oui‐dèmè oui̱ne ma sènè nou‐ouane kè Nzapa gana i nè chameau tè raka nè li holo sio. 25Ko disciple o hè dè zili oui̱ne d‐è hi, ndo ouo̱ koukou oui̱ne ouinè, ègui̱: Nè ndo ouiè dè passa o ndi? 26Jésus joko ouo̱‐o, a to oui̱ne ho ouo̱‐o, ègui̱: Liouara kè ouili dè nè mo è bènè, mais Nzapa ouiè dè mo nè oli.

27Nè Pierre ba oui̱ne to h’a, ègui̱: Joko, alè iè mo nè oli, alè nèno pata mè; mo nd’alè tè pa nè gui̱ndi? 28Nè Jésus pikifiè ho ouo̱‐o, ègui̱: Nè bara oui̱ne ho‐m’ to h’ènè‐o, ènè‐o n’ènè nèno pata‐m’ h‐è, nè po‐ouichi dafa mo da nè oli hi, nè Bi̱‐oui‐ouili kè ouili tè doungounou sènè kiti‐ouane kè gloire k’è hi, n’ènè‐o bo hè doungounou ngo kiti‐ouane boua‐pome‐nè‐joua litou hègo, oui̱ne to mbanga jou nouli̱ kè Israël boua‐pome‐nè‐joua‐litou. 29Nè ouili bèi nè yaka toa o, kèo̱nè yan o, kèo̱nè kè nè yan‐bok’a, kèo̱nè sème ko‐a, kèo̱nè na ko‐a, kèo̱nè bi̱me ko‐a o, kèo̱nè nou ko‐a o di̱, nèda yini‐m’, n’a tè pa mbéa pèlè‐pome ol’a, n’a tè ba monotouni doumè doumè olo (Nzapa). 30O ma o ti mè hi hè pi nè da, o ma o nè da mè hi hè pi nè ti.

Currently Selected:

Matthieu 19: GBANU

Highlight

Copy