Zakariya 8
8
Kusheshe ku singai ku Vuzavaguɗu a Sihiyona
1Ɗa Vuzavaguɗu MalaꞋimili u doku u yaꞋin kadanshi nu mpa, u danai, 2<<Mpa Vuzavaguɗu MalaꞋimili, mi ta̱ a cisheꞋe ka̱u adama a Sihiyona, ali wupa u va̱ a̱ kuɗa̱nga̱ adama a̱ ni. 3Vuzavaguɗu u danai, mi ta̱ o kubono a Sihiyona, n da̱sa̱ngu e mere ma Urishelima. I ta̱ e kuɗeke Urishelima likuci yu usuɓi, Kusan ku Vuzavaguɗu MalaꞋimili, Kusan ku ciɗa. 4Vuzavaguɗu MalaꞋimili u danai, nkoshi nu mma̱ci, i ta̱ o kudoku ku da̱sa̱ngu a uye u Urishelima, yaba dem n kalangu ka nwalu ka̱ ni ekiye adama a tsukutsa. 5Uye u likuci wa wi ta̱ a kushana m muku, muku mu nkere n olobo a ugulani. 6Vuzavaguɗu MalaꞋimili u danai, wo okpo ɗa̱ baci ili i mereve wa̱ ɗa̱, a̱ɗa̱ na yi kagimi ka uma a̱ va̱, a makyan ma nanlo, wi ta̱ o ko okpo ili i mereve wa̱ a̱ va̱ ɗa? Mpa Vuzavaguɗu MalaꞋimili n dansai. 7Ili i na Vuzavaguɗu MalaꞋimili u danai i ɗanna, mi ta̱ a ku wawa uma a̱ va̱ a̱ ubuta̱ wu ugbashi, a iɗika i kasana n ka̱livi. 8Mi ta̱ o kubonoko le a̱ da̱sa̱ngu a Urishelima. I ta̱ o kokpo uma a̱ va̱, mpa kpamu mo okpo Ka̱shile ke le ku usuɓi n kamayun.>>
9Vuzavaguɗu MalaꞋimili u danai, <<A̱ɗa̱ na yi a kupana kadanshi ka na eneki a dansai, aza a na i lo a makyan ma na a varai ugiti u kumaꞋa ku kpaꞋa ku Vuzavaguɗu MalaꞋimili, yaꞋan ekiye a̱ ɗa̱ o yongo n utsura adama a na A̱Ꞌisa̱ a gbayin a. 10Kafu makyan ma nanlo babu katsupu adama a vuma ko manama. Babu ida̱shi i ma̱ta̱na̱ u vuza kuꞋuwa n ku uta̱ adama a irala. Adama a na n zuwa le ta̱ tsurala uteku u le. 11Ama gogo na mi a kuyaꞋan n kagimi ka uma a̱ va̱ tsu na n yaꞋin cau ba, mpa Vuzavaguɗu MalaꞋimili n dansai. 12Adama a na i ta̱ a kuyaꞋan vica̱Ꞌa̱ m ma̱ta̱na̱. nɗanga mi itacishi mi ta̱ a kumatsa, iɗika kpamu i matsa ilikulyaꞋa, gaɗi tamkpamu utuka̱ n ciza. Mi ta̱ a kuzuwa kagimi ka uma a̱ va̱ a̱ ciya̱ una̱singai u nampa wa. 13A̱ɗa̱ kpaꞋa ku Yahuda m kpaꞋa ki Isaraila! Tsu na yo okpoi ili i kugoyi a̱ ka̱tsuma̱ ku uduniyan, ta ma ku isa ɗa̱ nannai, yi ta̱ o ko okpo una̱singai we le. Ka̱ta̱ i pana wovon ba, ama tsurukpai ka̱ta̱ i gbama asuvu.>>
14Na ɗa ili i na Vuzavaguɗu MalaꞋimili u danai, <<Tsu na n sheshei n takacika ɗa̱ a makyan ma na ikaya i ɗa̱ i zuwai mu wupa, Vuzavaguɗu MalaꞋimili u dansai, m kpa̱ɗa̱ ba, 15ta mi ishi n sheshei n tuka̱ n kasingai a Urishelima n kpaꞋa ku yahuda a ayin a nanlo. Adama a nannai ka̱ta̱ i pana wovon ba, 16Na ɗa ili i na i kuyaꞋan. i dana itoku i ɗa ukuna u mayun, ka̱ta̱ kpamu i yaꞋansa afada a mayun n a usuɓi, a̱ kunu ka fada ku ɗa̱. 17Ka̱ta̱ i sheshe kuyaꞋanka itoku i ɗa̱ ka gbani-gbani ba. Ka̱ta̱ kpamu i yaꞋan akucina aꞋuwa ba. Adama na n iwan ta̱ ili i nanlo ra̱ka̱, mpa Vuzavaguɗu mpa ɗa n dansai.>>
18Ɗa Vuzavaguɗu MalaꞋimili u doku uyaꞋin kadanshi nu mpa u danai, 19<<Na ɗa ili i na Vuzavaguɗu MalaꞋimili u danai. Kakuli ko wotoi u na̱shi, n ko wotoi u tawun, n ko wotoi u cindere, n ko wotoi u kupa, ita̱ o ko okpo ayin a̱ ma̱za̱nga̱, n kupana ku uyoꞋo. ita̱ o kokpo ka̱ɗiva̱ ka̱ ma̱za̱nga̱, a kpaꞋa ku Yahuda. Adama nannai, i ciga ukuna u mayun m ma̱ta̱na̱.
20<<Ili i na Vuzavaguɗu MalaꞋimili u danai i ɗanna. Uma aduniya n aza a ida̱shi a̱ likuci kakau ita̱ a̱ kuta̱wa̱ a Urushelima, 21ka̱ta̱ uma a̱ likuci i yoku a bana a̱ likuci i yoku a dana le,<Ta̱wa̱i tsu bana tsu la̱nsa̱ mapasa ma singai u Vuzaguɗu, ka̱ta̱ tsu la̱nsa̱ kasingai ka Vuzavaguɗu MalaꞋimili. Mpa n ka̱ci ka̱ va̱ feu mi ta̱ a kubana.> 22Uma n a̱bunda̱i n uduniyan wu utsura ita̱ a̱ kuta̱wa̱ a Urushelima a̱ la̱nsa̱ Vuzavaguɗu MalaꞋimili, ka̱ta̱ o folono kasingai wa̱ ni. 23Na ɗa ili i na Vuzavaguɗu MalaꞋimili u danai. A ayin a nanlo, uma kupa i ta̱ a̱ kuka̱na̱ kukiye ku motogu ma vuma vu Yahuda a dana. <Ka̱sukpa̱ tsu bana koɓolo n avu, adama a na tsu pana ta̱ a danai Ka̱shile ki ta̱ koɓolo n a̱ɗa̱.> >>
©️2025 Language Development and Translation Initiative (LDTI)