Zakariya 7
7
Ka̱shile ka iwain kakuli ka uwa
1A̱ kanna ka̱ na̱shi ko wotoi u kuci, ɗaɗa wotoi u Kisilebu, a̱ ka̱ya̱ ka̱ na̱shi ko tsugono tsu mogono Dariyu, ɗa Vuzavaguɗu u yaꞋin kadanshi n zakariya. 2Ci na ɗe aza a Betelu a̱ suku Sherezeru n Regem-meleku koɓolo n uma a̱ ni a̱ la̱nsa̱ mapasa ma singai u Vuzavaguɗu, 3ka̱ta̱ kpamu a ece a nan ganu a na i a kpaꞋa ku Vuzavaguɗu MalaꞋimili, n eneki, a dana, <<Ko mi ta̱ o kuyotsongu una̱mgbuka̱tsuma̱ va̱ a̱ ubuta̱ u kuyaꞋan kakuli o wotoi u tawun tsu na tsu kiwanai?>> 4Ɗa Vuzavaguɗu MalaꞋimili u yaꞋin kadanshi nu mpa u danai. 5<<YaꞋan kadanshi n uma a iɗika ya ra̱ka̱ n anan ganu, vu dana, <Ayin a na baci yi a kuyaꞋan kakuli nu una̱mgbuka̱tsuma̱ ko wotoi u tawun n u cindere, a̱ ka̱tsuma ka̱ a̱ya̱ amangatatsunkupa a na a lazai, mayun ɗa i yaꞋin kakuli ka adama a̱ va̱? 6Kpamu, ana yi a kulyaꞋa n i soꞋi, adama a̱ ka̱ci ka̱ ɗa̱ a ɗa ba? 7Kadanshi ka nampa ka ɗaɗa Vuzavaguɗu u dansai a̱ una̱ u eneki a cau, makyan ma na Urishelima n likuci i na yi uka̱ra̱Ꞌi n a̱yi, i a ku uvuka n ka̱tsuma̱ ku uciyi, a ayin a nanlo uma i lo e Negebu n uɓon u ɗakai n kumi ku nsansa ba?> >>
8Ɗa Vuzavaguɗu u doku u yain kadanshi n Zakariya u danai, 9<<Ili i na Vuzavaguɗu MalaꞋimili u danai i ɗanna, yaꞋin afada a mayun, yaꞋankpanai kasingai i sa̱Ꞌa̱ itoku i ɗa̱. 10Ka̱ta̱ i doro agapa a̱ma̱ci nu mkpaꞋan ba, ko omoci ko aza a unambi ba. Ka̱ta̱ vuza yoku vu ɗa̱ u shesheke vutoku vu ni ka gbani-gbani ba.>> 11Ama ikaya i ɗa̱ i iwain kupana akaka nampa a, ɗa a yaꞋin ugbamukaci, a kpanduki atsuvu e le n a̱jivu adama a na ka̱ta̱ a pana ba. 12A bonokoi a̱ɗu e le an katali, adama a na ka̱ta̱ a pana kuyotsongusu ku Musa n kadanshi ka na Vuzavaguɗu MalaꞋimili u suki a̱ ubuta̱ wa ayinviki a̱ ni, a̱ una̱ u eneki a cau. Ɗaɗa i zuwai Vuzavaguɗu MalaꞋimili u yaꞋin wupa n ele ka̱u. 13<<Ana wo okpoi a iwan ta̱ kupanaka mu a na n ɗekei le, ta feu nannai e ɗeke mu baci mi a kupanaka le ba,>> Vuzavaguɗu MalaꞋimili u danai. 14<<Ɗa n wacuwai le n kabatalikpau a kubana wu uduniya u na wi ishi u yevei le ba. Adama a nannai ɗa iɗika i le yo okpoi agali, ko vuza a kubana n u bonoi punu. Ta o bonokoi iɗika i singai yo okpoi agali.>>
©️2025 Language Development and Translation Initiative (LDTI)