Zakariya 9
9
Akaka afada n a wishi
1Na ɗa akaka a na uta̱i a̱ ubuta̱ u Vuzavaguɗu.
Vuzavaguɗu wi ta̱ a̱ kuda̱sa̱ngu a iɗika i Hadaraku,
wi ta̱ o kuyongo a̱ likuci i Dimaska.
Mayun, a̱shi a̱ ni i ta̱ u vuma vu lima̱ dem
uteku tsu na kaꞋa ki a kumaci ki Isaraila dem.
2A̱shi a̱ ni kpamu i ta̱ u Hamatu,
vu na vi a uteku u Dimaska,
a̱shi a̱ ni i ta̱ Taya n Sidon
ko a na wo okpoi i ta̱ n kuyeve ka̱u.
3Taya u maꞋaka ta̱ ka̱ci ka̱ ni mashilya mu ugaɗi,
u ɓolongi azurufa tsu kubuta̱ ki iɗika,
azanariya tamkpamu tsu kolyoꞋo ku uye.
4La̱na̱,
Vuzavaguɗu wi ta̱ a ku isa ucanuku u ni ra̱ka̱,
Wi ta̱ a o kuɓoso antsu a̱ uciyi a̱ ni a̱ mala,
akina kpamu i ta̱ o kusongu yi.
5Likuci i Ashikelon yi ta̱ e kene, ka̱ta̱ i pana wovon.
Likuci i Gaza yi ta̱ e kujeꞋeke ikyamba.
Likuci i Ekoron yi ta̱ a kutakpa ka̱ɗu.
Gaza wi ta̱ a ku namba mogono a kakuba ko tsugono ci ni,
Ashikelon tamkpamu wi ta̱ o ko okpo agali.
6Omoci i ta̱ a̱ kuda̱sa̱ngu a Ashidodu,
mpa Vuzavaguɗu mi ta̱ a kutakpa ugbamukaci wa aza a Filisitiya.
7Mi ta̱ a ku ciɗatangu le a̱ ubuta̱ u kutakuma ki inyama nu mpasa,
mi ta̱ a kutakpa ili yi unata a anga ele.
Aza a Filisitiya a na a buwai dem
i ta̱ o ko okpo uma a̱ Ka̱shile ka̱ tsu.
I ta̱ o kubonoko le tsu kumaci ku yoku ku Yahuda,
mi ta̱ a ku isa Ekoron tsu na mi isai aza a Jebusiya.
8Mpa mi ta̱ a kukanza iɗika i va̱,
m me ere i ɗa a̱ ubuta̱ wo ovonshi aza a kubana n obonoi.
Adama a na talo aza o modoruko a kulyaꞋa iɗika ya,
adama a na gogo na a̱shi a̱ va̱ ene ta̱ iɗika i va̱.
Mogono ma Sihiyona ma̱ kuta̱wa̱
9YaꞋan ma̱za̱nga̱ ka̱u, avu Sihiyona,
yaꞋan yoroli i ma̱za̱nga̱ avu Urishelima.
La̱na̱ mogono ma̱ nu ma lo a̱ kuta̱wa̱ wa̱ nu,
a̱yi vuza vu usuɓi ɗa n vuza vu ulyaꞋi kpamu,
a̱yi vuza vu asuvayali ɗa. wi ta̱ a nwalu gaɗi vu majaki,
a gaɗi vu maku ma majaki maꞋan wi a nwalu.#2 Sam 5:9; Mat 21:5; Yah 12:15; Zaf 3:14-15
10Mi ta̱ a̱ kula̱nga̱sa̱ ekeke odoku a kuvon a Ifirayimu,
mi ta̱ kpamu a ku una odoku o kuvon a Urushelima,
i ta̱ feu o kukoɗo utan u kuvon wa.
I ta̱ a kusala ukuna u ma̱ta̱na̱ wu uduniyan.
Tsugono ci ni ci ta̱ a̱ kuka̱ra̱Ꞌa̱ a mala a kubana a mala,
n kuyene ku Yufiretu ali a kubana uteku wa aduniyan.
11Avu tamkpamu, adama a mpasa mu uzuwakpani u va̱ n avu,
mi ta̱ a kisa agbashi, e kpenle ku na ki m mini ba.
12Bonoi a̱ ubuta̱ u kusheɗeku u ɗa̱, a̱ɗa̱ agbashi a na i keɗei a̱pa̱Ꞌa̱,
ko gogo na n dansa ta̱ n danai mi ta̱ o ku bonoko ɗa ili i na isai ɗa̱ i ɗa ali kure.
13Mi ta̱ a̱ kuka̱nza̱ Yahuda tsu utan u va̱,
mi ta̱ kpamu o kubonoko Ifirayimu aya a̱ va̱.
Mi ta̱ a̱ kuɗa̱ngusa̱ muku mo olobo n nu avu Sihiyona,
a̱ shilika̱ m muku mo olobo n nu avu Helam,
m bonoko wu tsu otokobi ovonshi.
14Ka̱ta̱ Vuzavaguɗu u kuyotsongu ka̱ci ka̱ ni we ele,
ayaꞋa a̱ ni i ta̱ a̱ ku uta̱ tsu ulaɗi,
Vuzavaguɗu Ka̱shile wi ta̱ a̱ ku uvula̱ kavana,
wi ta̱ a̱ kuta̱wa̱ tsu kabatalikpau a uɓon u ɗakai.
15Vuzavaguɗu MalaꞋimili wi ta̱ a ku ere le,
i ta̱ a ku una irala i le aza a̱ vingba̱tsu.
i ta̱ a ku yaꞋan yoroli yi ulyaꞋi tsu o soꞋi,
i ta̱ a kushana tsu mevene
ma a tsu vishangu ku mpasa a̱ga̱Ꞌin a katalikalyuka.
16Vuzavaguɗu Ka̱shile ke le ki ta̱ a ku wawa le a kanna ka nanlo,
adama a na ele uma a̱ a ɗa, ushiga u ni,
I ta̱ a kutasa a iɗika ya,
tsa atali a singai a̱ ka̱tsuma̱ ko oroliko o tsugono.
17N yiɗa̱i a kugisanku ugaꞋin u le n tsuloboi ci le,
a̱ɗa̱nga̱ni i ta̱ a kuyimkpa tsu ilya,
nkere kpamu tsu ma̱kya̱n ma savu.
©️2025 Language Development and Translation Initiative (LDTI)