Zakariya 6
6
Kene ku ekeke odoku a̱ na̱shi
1Ɗa n doku n ɗa̱ngusa̱i a̱shi a̱ va̱, ɗa me enei ekeke odoku a̱ na̱shi a̱ ku uta̱ e mere ma nsansa n re mi iyim i shili. 2Ekeke odoku a ugiti odoku a shili a ɗa i o kurono le. E ire, odoku a̱ lima̱ a ɗa i o kurono le. 3A tatsu, odoku a̱ a̱ri a ɗa i o kurono le. A̱ na̱shi tamkpamu, odoku a na i o kurono le, i ta̱ kpa̱ra̱sha̱ n ajaku, ra̱ka̱ vu le aza a utsura a ɗa. 4Ɗa me ecei kalingata ka na ki a kadanshi nu mpa, <<Ya̱ɗa̱i na lo va, vuzagbayin va̱?>> 5Ɗa kalingata ka ka̱ ushuki mu, <<Na va wunla̱i wu ngon n na̱shi u ɗa, u na wu uta̱i gaɗi, ana o yotsongi ka̱ci ke le u vuzagbayin va aduniyan ra̱ka̱. 6Ekeke odoku a̱ lima̱ i ta̱ a kubana a uɓon u gaɗi, vuza na wi n odoku a̱ri a kubana a̱ ka̱livi, vuza vu odoku a jaku-jaku tankpamu a kubana a uɓon u ɗakai. 7Ana odoku a utsura a nanlo uta̱i, a̱ ka̱na̱i mali ma na a̱ ka̱ra̱Ꞌa̱ aduniyan ra̱ka̱.>> Ɗa Vuzavaguɗu u danai,<<Banai i ka̱ra̱Ꞌa̱ aduniyan ra̱ka̱.>> Ɗa tana a̱ ka̱ra̱Ꞌi aduniyan a ra̱ka̱. 8Ɗa u ɗekei mu u danai, <<La̱na̱, aza a na a banai a uɓon u gaɗi a zuwa ta̱ wupa u Vuzavaguɗu u ra̱pa̱i.>>
Oroliko n A̱Ꞌisa̱ a gbayin
9Ɗa Vuzavaguɗu u yaꞋin kadanshi nu mpa u danai, 10<<Avu n ka̱ci ka̱ nu, bana a kpaꞋa ku Josaya#6:10 Josaya Kula ku nampa ka e ci ɗeke ta̱ ku ɗa kpamu Hen. maku ma Zafaniya anana. Ta ɗe va ku isa kuneꞋe e ekiye a Helidai n Tobiya, n Jedaya aza a na uta̱i ubuta̱ u tsugbashi i ɗika i Babila. 11Ka̱ta̱ vu ɗika azurufa n azanariya a na e nekei va, vu yaꞋanka oroliko, ka̱ta̱ vu kapaka Jesuwa ganu vu gbayin, kolobo ka Jehozadaku. 12Ka̱ta̱ vu dana yi, ili i na Vuzavaguɗu MalaꞋimili u danai, <Vuma vu nampa ɗaɗa e ɗekei kacaka ka, wi ta̱ a̱ ku uta̱ a̱ ubuta̱ u na wi, u bana u maꞋa A̱Ꞌisa̱ a gbayin a Vuzavaguɗu. 13A̱yi ɗa u kumaꞋa A̱Ꞌisa̱ a gbayin a Vuzavaguɗu, ka̱ta̱ kpamu u ciya̱ tsugbayin, ka̱ta̱ u lyaꞋa tsugono a kakuba ko tsugono ci ni koɓolo n ganu. Ka̱ta̱ o yongo a mapanakpanai.> 14Oroliko o tsugono a nanlo a, i ta̱ o kuyongo A̱Ꞌisa̱ a gbayin a Vuzavaguɗu, adama a na Helidai n Tobiya n Jedaya n Josaya maku ma Zafaniya. okpo ili i kuciɓasa 15Ka̱ta̱ aza a na i daꞋin a̱ ta̱wa̱ a maꞋa A̱Ꞌisa̱ a gbayin a Vuzavaguɗu. Nannai ɗa i kuyeve a na Vuzavaguɗu MalaꞋimili a̱yi ɗa u suki mu wa̱ ɗa̱. Ili i nampa ya ra̱ka̱ yi ta̱ a kushana i tono baci Vuzavaguɗu Ka̱shile ka̱ ɗa̱ mayin.>>
©️2025 Language Development and Translation Initiative (LDTI)