Zakariya 5
5
CiꞋimkpi tsu katagarda ku uka̱ta̱li
1Ana n doku n ɗa̱ngusa̱i a̱shi a̱ va̱ gaɗi, ɗa me enei katagarda ku uka̱ta̱li a ciꞋimkpi gaɗi. 2Ɗa kalingata ka ka danai mu, <<Yiɗa̱i ve enei?>> Ɗa mu ushuki n danai, <<Me ene ta̱ katagarda ka̱ uka̱ta̱li a ciꞋimkpi gaɗi. ugaɗi u katagarda wa udashi kamangankupa ɗa, wanshi u ni kpamu udashi kupa n u tawun.>> 3Ɗa u danai mu, <<Katagarda ka nampa ka ki ta̱ uɗiki n una̱wuya u na wi a̱ kuka̱ra̱Ꞌa̱ a iɗika ra̱ka̱. Iɗani i kakambu kete ka katagarda ka, ki ta̱ a kadanshi vuza vu na baci wi uboki, i ta̱ a ku una yi. Iɗani i kakambu kete ka kpamu ki ta̱ a kadanshi vuza na baci u yaꞋin akucina aꞋuwa, a̱yi feu i ta̱ a ku una yi.>> 4<<Mi ta̱ a̱ ku suku katagarda ku uka̱ta̱li ka uwa a kpaꞋa ku vuza va aꞋuwa, m kpaꞋa ku vuza va akucina aꞋuwa n kula ku va̱. Una̱ u wuya wa wi ta̱ o kuyongo punu a kpaꞋa ka, wu una yi u la̱nga̱sa̱ nɗanga n atali a kpaꞋa ka.>>Vuzavaguɗu MalaꞋimili u dansai,
Vuka a mabana tsa alatani
5Ɗa kalingata ka na ki a kadanshi nu mpa va ka̱ ta̱wa̱i kelime, ɗa ka danai mu, <<Ɗa̱ngusa̱ a̱shi a̱ nu gaɗi, vu ene ili i na yi a̱ ku uta̱.>> 6Ɗa n yaꞋin keci n danai, <<Yiɗa̱i tankpamu nannai?>> Ɗa wu ushuki mu, <<Mabana ma kugisangu ilya i ɗa a̱ ku uta̱.>>Ɗa u danai, <<Wi ta̱ tukpa n unushi wi iɗika ya ra̱ka̱.>> 7Ana a̱ ɓa̱yuwa̱i ka̱kuya̱ntsu ka mabana ma, ɗa me enei vuka punu a̱ ida̱shi gan! 8Ɗa kalingata ka danai, <<Vuka va iyoci i ka gbani-gbani kaꞋa,>> Ɗa u ka̱Ꞌa̱ngi ni punu a mabana ma, u kuya̱ngi maꞋa ɗa u tsugbai n katali. 9Ana n doku n ɗa̱ngusa̱i a̱shi a̱ va̱, ɗa me enei a̱ma̱ci ere a̱ kuta̱wa̱. wunla̱i a̱ ku uvula̱ evelyu e le, adama a na i ta̱ n evelyu an koborou. Ɗa a̱ma̱ci a, a̱ ɗa̱ngusa̱i mabana ma gaɗi. 10Ɗa me ecei, kalingata ka na ka yaꞋin kadanshi nu mpa, n danai, <<Teɗai a ɗikai mabana ma, a kubana?>> 11Ɗa wu ushuki u danai, <<Iɗika ya aza a Babila, adama na a maꞋakai A̱Ꞌisa̱ a gbayin. Ayin a na baci o kotsoi kumaꞋa ka, ka̱ta̱ a zuwa mabana ma punu.>>
©️2025 Language Development and Translation Initiative (LDTI)