Zakariya 4
4
Kashamkpatsu ka̱ ma̱kuni ma azanariya ka na me enei tsa
1Ɗa kalingata ka na ka yaꞋin kadanshi nu mpa va ko bonoi ka̱ ɗa̱ngushi mu, n yaꞋin tsu vuza na a̱ ɗa̱ngusa̱i alavu. 2Ɗa we ecei mu, <<Yiɗa̱i ve enei?>> Ɗa mu ushuki n danai, <<Me ene ta̱, kashamkpatsu ka̱ ma̱kuni ma azanariya ka na ka̱ tsu ɓa̱na̱ ma̱kuni, wi ta̱ n kebelyu ka maniꞋin gaɗi vu ni. Uka̱ra̱Ꞌi n kebelyu ka, wi ta̱ nu nkuni n cindere, una̱ u ma̱kuni dem wi ta̱ n eleje e cindere. 3Akambu a nkuni ma, nɗanga n Zaitu mi ta̱ lo, me te a kakambu ku usingai, me te a kakambu ku ugula̱.>> 4Ɗa me ecei kalingata ka na ka yaꞋin kadanshi nu mpa n danai, <<Vuzagbayin yiɗa̱i ili i nampa yi a kadanshi?>> 5Ɗa wu ushuki u danai, <<Vu yeve ko yiɗa̱i na va ba?>> Ɗa mu ushuki, <<A̱Ꞌa̱, vuzagbayin.>> 6Ɗa u danai mu, <<Na ɗa Kadanshi ka Vuzavaguɗu a kubana u Zerubabelu, <Ba adama a utsura u ɗa ko adama a tsugbayin a ba, ama adama ayinviki a̱ va̱,> >> Vuzavaguɗu MalaꞋimili ɗa u dansai. 7<<Yayi avu, kusan ku gbayin? E kelime ka Zerubabelu i ta̱ o kuɓoso wu vu okpo keteshe. Ka̱ta̱ vu utuka̱ n atali a na a laꞋi n ugaꞋin, ka̱ta̱ uma a̱ ka̱na̱ yoroli i ma̱za̱nga̱ n a danai <U gaꞋan ta̱! U gaꞋan ta̱!> >> 8Ɗa Vuzavaguɗu u yaꞋin kadanshi nu mpa, u danai, 9<<Ekiye a Zerubabelu a ɗa a varai ugiti u kumaꞋa ka̱ A̱Ꞌisa̱ a gbayin a nampa. Ekiye a̱ ni a ɗa kpamu a kukotso kumaꞋa ka.>> Nannai ɗa i kuyeve a na Vuzavaguɗu MalaꞋimili ɗa u suki mu wa̱ ɗa̱. 10<<Yayi u goyoi kanna ka na a̱ gita̱i kumaꞋa ku nampa, a̱yi ɗa vuza na u kuyaꞋan ma̱za̱nga̱ ayin a na baci we enei kawin ka kugisanku ukocishi u kumaꞋa ekiye a Zerubabelu. <Nkuni n cindere n nan lo ma, ele ɗa urotu u a̱shi a Vuzavaguɗu a na i a kinda aduniyan ra̱ka̱.> >> 11Ɗa me ecei kalingata ka n danai <<Yiɗa̱i nɗanga nre n zaitu n na mi a kakambu ku usingai n ku ugula̱ ku kashamkpatsu ka̱ ma̱kuni ka ki a kadanshi?>> 12Ɗa kpamu n doku me ecei ni n danai, <<Yiɗa̱i acaka ere a nɗanga n zaitu n na mi a kakambu ka igbala ya azanari i a̱ ku uta̱ka̱ mani ma azanari i a kadanshi?>> 13Ɗa wu ushuki u danai, <<Vu yeve ko yiɗa̱i ba?>> ɗa mu ushuki, <<A̱Ꞌa̱, vuzagbayin va̱.>> 14Ɗa u danai, <<Acaka a nanlo a, ɗaɗa iyoci i uma ere, a na erengi i a kuyaꞋanka vuzagbayin va aduniyan ra̱ka̱ a̱ga̱nda̱.>>
©️2025 Language Development and Translation Initiative (LDTI)