Zakariya 3
3
Ganu vu gbayin
1Ɗa Vuzavaguɗu u yotsongi mu Jesuwa, ganu vu gbayin kashani e kelime ka kalingata ka Vuzavaguɗu. Kalijani tankpamu kashani e kukiye ku singai ku Jesuwa, adama a na u yaꞋanka yi nsata. 2Ɗa Vuzavaguɗu u danai Kalijani, <<YaꞋan Vuzavaguɗu u ɓarangu wu, avu Kalijani, mpa Vuzavaguɗu na n zagbai Urushelima wo kopo ubuta̱ wu ida̱shi i va̱, mi ta̱ a kuɓarangu wu, Vuma nanlo Jesuwa wi ta̱ tsu maɗanga ma na uta̱ka̱i akina.>> 3Jesuwa lo kashani u uki nu ntogu mu unata n ni e kelime ka kalingata ka. 4Ɗa kalingata ka, ka danai aza a na i lo kashani e kelime ka̱ ni, <<Foɗokoi ni ntogu n nanlo mu unata ma.>> Ɗa u danai Jesuwa, <<La̱na̱, n takpaka wu ta̱ unushi u nu, mi ta̱ a ku uka wu ntogu n ciɗa.>> 5Ɗa n yaꞋin kadanshi, n danai, <<YaꞋan a ukai yi oroliko a ciɗa a kaci ka̱ ni.>> Ɗa a ukai ni oroliko nu ntogu n tsuganu ma, kalingata ka Vuzavaguɗu lo kashani ɗevu. 6Ɗa kalingata ka Vuzavaguɗu ke nekei Jesuwa kadanshi u danai. 7<<Ili i na Vuzavaguɗu MalaꞋimili u dansai i ɗanna. <Vi baci o kuyongo a uye u va̱, ɗa kpamu vu tonoi wila̱ u va̱, mi ta̱ kuzuwa wu vo okpo Vuzagbayin va̱ A̱Ꞌisa̱ a gbayin a̱ va̱, vu la̱na̱ kpamu ulanga wa. Mi ta̱ kpamu e kuneke wu ubuta̱ a uma a na i kashani na lo va. 8Panaka mu, avu Jesuwa ganu vu gbayin, n a̱ja̱Ꞌa̱ a̱ nu a na i a ida̱shi e kelime ka̱ nu, yi ta̱ o ko okpo iyoci yi ili singai. Mi ta̱ a̱ kutuka̱ n kagbashi ka̱ va̱ vuza na wi kacaka. 9La̱na̱ katali ka na n shikpa̱i e kelime ke Jesuwa, kaꞋa ki ta̱ n apashi e cindere. Mi ta̱ a kuyaꞋan iɗani a gaɗi vi ni, mi ta̱ a kutakpa unushi u uma a nanlo kanna ke te.> >> Mpa Vuzavaguɗu MalaꞋimili n dansai. 10<<A kanna ka nanlo yaba dem wi ta̱ a kubanuku aza a na yi ida̱shi ɗeɗevu i da̱sa̱ngu a̱ kumiꞋi ku maɗanga mi itacishi, m ma̱biri.>> Vuzavaguɗu MalaꞋimili u dansai.
©️2025 Language Development and Translation Initiative (LDTI)