Mika 6
6
Kadanshi ka na Vuzavaguɗu wi n kaꞋa n aza a Isaraila
1Isaraila, panai ili i na Vuzavaguɗu u danai,
ɗenga̱ vu dansa kakuna ka̱ va̱ adama a aza a Isaraila,
e kelime ka nsasan m gbagbaꞋin,
yaꞋan nsasan n pana ka̱la̱ka̱tsu ka̱ ni.
2A̱ɗa̱ nsasan m gbagbaꞋin,
panai kadanshi ka na Vuzavaguɗu wi n kaꞋa n a̱ɗa̱,
panai a̱ɗa̱ ugiti wa aduniyan.
Adama a na Vuzavaguɗu wi ta̱ n kadanshi,
n uma a̱ ni,
a kadanshi ki Isaraila.
3<<Uma a̱ va̱, yiɗa̱i n yaꞋankai ɗa̱?
Nini ɗa̱i mo oꞋwusoi ɗa̱?
Ushuki mu.
4Mpa ɗa mu uta̱ka̱i ɗa̱ a Masar ba?
Ɗa n shiba̱i ɗa̱ a̱ ubuta̱ wu ugbashi ba?
Mpa n suku Musa n Haruna n Miriyamu
o tono n a̱ɗa̱ ba?
5Uma a̱ va̱, ciɓai,
ciɓai n ili i na Balaku mogono ma Muwabu,
u sheshei kuyaꞋanka ɗa̱,
ciɓai n ili i na Balam kolobo ka Biyo ka̱ ushuki ni.
Ciɓai n ili i na i gita̱i a̱ Shitim ali a kubana a Giliga,
adama a na i yeve ukuna u wi ishi u Vuzavaguɗu.>>
6Nu n yiɗa̱i n kuta̱wa̱ u Vuzavaguɗu,
n cikpa Ka̱shile ka gaɗi?
Ko n ta̱wa̱ wa̱ ni n kuneꞋe ku kusongu,
ku medendem ma̱ ka̱ya̱ ke te?
7Vuzavaguɗu u kupana ta̱ uyoꞋo wa alyuka a̱giri a̱kpa̱n-a̱kpa̱n?
Ko edele a maniꞋin a̱kpa̱n-a̱kpa̱n feu?
Ko n neke maku ma ugiti ma̱ va̱,
adama a̱ unushi u va̱,
ko n neke muku n va̱ adama a̱ unushi wu ugbamukaci u va̱?
8Avu vuma,
Vuzavaguɗu u yotsongu wu ta̱ ɗe,
ili i na yi i singai,
ili i na Vuzavaguɗu u cigai wa̱ a̱ nu ɗaɗa,
vi yaꞋan ili yi usuɓi n i na yi derere n kasingai,
vu yaꞋan nwalu n nu n Ka̱shile derere babu kadama.
Unushi wa aza a Isaraila n atakaci e le
9Zuwai atsuvu,
Vuzavaguɗu wi ta̱ e kuɗeke uma a̱ likuci i Urushelima,
ugboji u ɗa vuza u pana wovon u Vuzavaguɗu.
Zuwai atsuvu, Vuzavaguɗu u zuwaka ɗa̱ ta̱ makyan ma̱ kukuwa̱.
10Mi a kucinukpa n uciyi wu uye u gbani-gbani ba,
Ko n cinukpa n kagisamkpatsu ka na a lapai o kogundoi ba.
11Yi ta̱ e kusheshe mi a kutakacika,
vuza kagisamkpatsu ka aꞋuwa koɓolo n kaburuma ka aꞋuwa ba?
12Aza a uciyi a̱ ɗa̱,
i ta̱ tukpa n ucigi u kawuya,
aza a na i ida̱shi a̱ likuci i ɗa̱ i ta̱ tukpa n aꞋuwa,
elentsu e le o modoruko a ɗa.
13Adama a nannai, mi ta̱ a kulapa ɗa̱ nu mɓa̱la̱,
m bonoko ɗa̱ agali adama a̱ unushi u ɗa̱.
14Yi ta̱ a kulyaꞋa ama yi a̱ kucuwa̱ ba,
a̱tsuma̱ a̱ ɗa̱ i ta̱ o kuyongo n kambulu.
Yi ta̱ o kuɓolongu ili ama ko ili yi a kuzuwa ba,
ili i na i ciya̱i i zuwai,
mi ta̱ a̱ kula̱nga̱sa̱ i ɗa a̱ ubuta̱ u kuvon.
15Yi ta̱ a̱ kuca̱Ꞌa̱ ama ya kukyaꞋa ili ba,
yi ta̱ a kupisha umaci u zaitu, ama ya kuyaꞋan ulinga m maniꞋin ma̱ ni ba,
yi ta̱ a kupisha umaci wu nɗanga, ama yi o kusoꞋo ma̱kya̱n ma ba.
16Adama a na i tono ta̱ wila̱ u Omiri,
n ulinga u kpaꞋa ku Ahabu dem,
i tonoi kusheshe ku wuya.
Adama a nannai, mi ta̱ o kubonoko ɗa̱ agali,
yi okpo ili i ka̱curu,
ka̱ta̱ kpamu yi okpo ili i kugoyi a̱ ubuta̱ u uma a̱ va̱.#1 Ng 16:23-34; 21:25-26
©️2025 Language Development and Translation Initiative (LDTI)