Mika 5
5
Uzuwakpani u vuza tsugono na a kumatsa a Batalami
1Ɓolongu osoji a̱ nu,
adama a na a kambuku wu ta̱ n kuvon,
n kalangu kaꞋa a lapai mogono mi Isaraila,
a lapai ni a maguji n alangu.
2Ama avu Batalami vu Efarata,
avu maku ma̱ likuci maꞋa a̱ ka̱tsuma̱,
ka Yahuda,
ama a̱ ka̱tsuma̱ ka̱ nu vuza vu yoku wi ta̱ a̱ ku uta̱ adama a̱ va̱,
vuza na u kulyaꞋa tsugono ci Isaraila,
vuza na kumaci ku ni ki ali a tsumani.
3Adama a nannai Vuzavaguɗu wi ta̱ a kuvaruku uma a̱ ni,
ali ayin a na vuza na wi a̱ga̱nda̱ a limata u matsa,
ɗaɗa aza a̱ ni a na a buwai,
o kubono a̱ ubuta̱ u uma a Isaraila.
4Wi ta̱ a̱ kula̱na̱ uma a̱ ni tsu maguɓi,
n utsura u na wu uta̱i u Vuzavaguɗu,
a tsugbayin tsu kula ku Vuzavaguɗu Ka̱shile ka̱ ni.
Uma a̱ ni i ta̱ o kuyongo m ma̱ta̱na̱,
adama a na utsura u tsugbayin tsu kula ku ni,
ki ta̱ a kubana a̱ ubuta̱ dem aduniyan.
5A̱yi ɗa u ko okpo ma̱ta̱na̱ me le.
Wishi n atakaci,
A ayin a na baci aza a Asiriya,
a̱ ku tuka̱ tsu n kuvon,
i ta̱ kuta̱sa̱ mashilya ma̱ likuci i tsu,
ci ta̱ a kuzuwa nguɓi n cindere,
n aza e kelime uma kunla̱i,
a yaꞋan tsurala n e le.
6I ta̱ a kulyaꞋa tsugono ci iɗika ya aza a Asiriya n kotokobi,
a uwa utsutsu wi iɗika i Nimirodu n kotokobi utali,
Wi ta̱ a ku isa tsu ekiye a vuza vu Asiriya,
a ayin a na baci u tuka̱i iɗika i tsu kuvon,
n ayin a na kpamu u dasasai iɗika i tsu.
7Kagimi ka kumaci ku Yakubu,
ka na ki a̱ ka̱tsuma̱ ka kumaci ku uduniyan n a̱bunda̱i,
i ta̱ ko okpo tsu ciza,
tsu na Vuzavaguɗu u tsu yoꞋo,
tsu ijaꞋashi a̱ mita̱ ma̱ ta̱ku,
aza a na a tsu vana ko,
a zuwa ka̱ɗu u vuma ba.
8Kagimi ka kumaci ku Yakubu,
ka na ki a ida̱shi a̱ ka̱tsuma̱ ka uma,
ka na ki e mere ma uduniyan wa̱ a̱bunda̱i,
wi ta̱ o ko okpo tsu kawu,
e mere ma nnama n kakamba a̱ kutsun,
tsu kawu vu utsura e mere,
ma ushiga wu nkyon,
za na u ɗikpangu baci u uwai le,
wi ta̱ a ku sazasa le,
kpamu ko vuza u ku isa le ba.
9Nannai ɗa aza a Yakubu a na a buwai a kulyaꞋa irala i le,
aza a na i a tsurala n ele ra̱ka̱ i ta̱ a kuyaꞋan wu uni.
10Vuzavaguɗu u danai, a kanna ka nanlo,
mi ta̱ a ku una odoku a̱ ɗa̱,
n ekeke o odoku a̱ ɗa̱ feu.
11Mi ta̱ a̱ kula̱nga̱sa̱ likuci yi iɗika i ɗa̱,
ka̱ta̱ kpamu m ɓoso ubuta̱ u kusheɗeku ɗa̱ ra̱ka̱.
12Mi ta̱ a ku una oboci a iɗika i ɗa̱,
yi o kudoku ku ciya̱ aza a na a kuyaꞋanka ɗa̱ kula̱na̱ ba.
13Mi ta̱ o kuɓoso a̱ma̱li a na i sheꞋwei,
n atali a kuɗarukpa a na i punu,
yi o kudoku ya̱ kuɗa̱nku,
ili i na i sheꞋwei n ekiye a̱ ɗa̱ ba.
14Mi ta̱ a̱ kumuɗa̱ ululu a̱ma̱li a Ashera a̱ ka̱tsuma̱ ka̱ ɗa̱,
ka̱ta̱ mu una likuci i ɗa̱.
15N asuvu a̱ usuɗukpi ka̱u mi ta̱ a kuyaꞋan katsupu,
wa aza a na a̱ kpa̱ɗa̱i kutono mu.
©️2025 Language Development and Translation Initiative (LDTI)