Mika 7
7
Una̱mgbi wa aza a Isaraila
1Ili ya atakaci i ɗa a̱ kuta̱wa̱ wa̱ a̱ va̱,
mi ta̱ tsu vuza kanbulu,
vuza na u ciya̱i ili ba a ayin a na a yaꞋin vikyaꞋa,
ayin a na baci o kotsoi kuɗayu a kashina ki itacishi,
babu umaci u mambulu u na vuza u kutaɓa u lyaꞋa,
babu umaci u ma̱biri u na u geꞋwei u na ka̱ɗu ka̱ va̱ ka cikalai.
2Babu uma a usuɓi a na a buwai a iɗika ya,
babu ka̱ ma̱riki a̱ɗu a uma.
Uma dem o ci yongo ta̱ a kuvana adama a na a̱ tsuwa̱n mpasa,
yaba dem a kutamba vuza ni n maza.
3Ekiye e le ra̱ka̱ a kiwana ta̱ n kuyaꞋan ki ili i wuya,
mogono n kayaꞋinkafada a̱ kula̱nsa̱ kuyaꞋan kalyaꞋa,
vuzagbayin a kuzuwa a yaꞋan ili i na ka̱ɗu ka̱ ni ka cikalai,
Ta i a̱ kuvita̱la̱sa̱ kamayun nannai,
4Vuma vu ma̱riki wi ta̱ tsu kawana a̱ ka̱tsuma̱ ke le,
wi ta̱ tsu maɗanga ma na ma̱ tsu kpa̱ɗa̱ kumatsa,
vuza na u laꞋi n usuɓi a̱ ka̱tsuma̱ ke le,
wi ta̱ tsu ma̱kuru.
Kanna ka atakaci ka̱ ɗa̱ ka yawa ta̱,
kanna ka na a danai le a̱ una̱ u eneki,
aza a kindi e le i ta̱ a̱ ku ripula̱.
5Ka̱ta̱ vu zuwa ka̱ɗu u vuza na yi a ida̱shi ɗeɗevu ba,
ka̱ta̱ vu soɗongu ku ka̱ja̱Ꞌa̱ ka̱ nu ma̱tsa̱n ba.
Ko vu ushuku n vuka vu na vu cigai ba,
vi yaꞋan mayin n ili i na yi a̱ kuta̱ una̱ u nu.
6Adama a na kolobo ko tsu goyo ta̱ esheku,
ka̱ta̱ kpamu mekere ma̱ shilika̱ n a̱na̱ku,
kejene ka̱ shilika̱ n a̱na̱ku a vali a̱ ni,
irala i vuma ele ɗa aza a kpaꞋa a̱ ni.#Mat 10:35-36; Luk 12:53
7Ama mpa n zuwa ta̱ a̱pa̱Ꞌa̱ a̱ va̱ u Vuzavaguɗu,
mi ta̱ a kuvana Ka̱shile kishi ka̱ va̱,
Ka̱shile ka̱ va̱ ki ta̱ a kupanaka mu.
Isaraila i ta̱ a̱ kuciya̱ wishi.
8A̱ɗa̱ irala i va̱ ka̱ta̱ i yaꞋan ma̱za̱nga̱ adama a̱ va̱ ba,
adama a na n yikpa̱ ba ci, mi ta̱ a̱ kuɗa̱nga̱ kpamu.
A makyan ma na ba ci mi ida̱shi a̱ ubuta̱ u ka̱yimbi,
Vuzavaguɗu wi ta̱ o ko okpo kutashi ku va̱.
9Mi ta̱ a kugbama asuvu n wupa u Vuzavaguɗu,
adama a na n yaꞋanka yi ta̱ unushi,
ama a ukocishi wi ta̱ a ku shamkpa mu,
ali u yaꞋanka mu afada.
Wi ta̱ a kuɗika mu u tuka̱ a̱ ubuta̱ u kutashi,
ka̱ta̱ me ene usuɓi u ni.
10Ka̱ta̱ irala i va̱ ye ene,
ali wono u bono u ka̱na̱ le,
ele na a danai mu,
<<Te ɗai Vuzavaguɗu Ka̱shile ka̱ nu?>>
A̱shi a̱ va̱ i ta̱ e kene uyikpi u le,
gogo na i ta̱ a kuyaꞋan udashi n ene,
tsu kayala ka na ki a uye.
11Kanna ka na o kudoku kumaꞋasaka nshilya n ɗa̱ ki ta̱ lo a̱ kuta̱wa̱,
kanna ka na o kudoku wanshi wi iɗika i ɗa̱.
12A kanna ka nanlo uma i ta̱ a̱ kuta̱wa̱ wa̱ ɗa̱,
i ta̱ a̱ ku uta̱ a Asiriya koɓolo n likuci kakau i Masar,
m Masar va kpamu ali sai o kuyene ku Yufiretu,
a mala a kubana a mala mo yoku,
a kusaꞋan a kubana a kusan ku yoku.
13Iɗika ya yi ta̱ o ko okpo agali adama a aza a na i punu ida̱shi,
adama a kawuya ka na a yaꞋin.
Asuvayali a Vuzavaguɗu wa aza a Isaraila
14Vuzavaguɗu, guɓa uma a̱ nu n kalangu ka̱ nu,
ushiga u nu wu uka̱ni,
ushiga u na wi o kuyongo babu maguɓi ɗe a kakamba,
a iɗika i singai i na yi m tsuta̱,
vu ka̱sukpa̱ le a lina a iɗika i Bashan n Giliyadu,
tsu ayin a cau.
15<<Tsu ayin a na yi uta̱i a iɗika i Masar,
mi ta̱ o kuyotsongu ɗa̱ ili i mereve i va̱.>>
16Iɗika n a̱bunda̱i yi ta̱ e ku ene ka̱ta̱ o okpo n wono,
adama a utsura u le dem.
I ta̱ a kupala una̱ u le a paɗa bini,
ka̱ta̱ kpamu o votsuku atsuvu le.
17I ta̱ e kupeɗe kubuta̱ tsu koko,
ci ili i na i tsu wala a iɗika.
I ta̱ a̱ ku uta̱ n kujeꞋe ki ikyamba a̱ ubuta̱ u na ishi usheɗeki ka̱ta̱ a̱ ta̱wa̱ wa̱ va̱,
i ta̱ o kubono wa̱ va̱, mpa Vuzavaguɗu Ka̱shile ka̱ ɗa̱,
adama o wovon.
18Yayi wi kpamu Ka̱shile tsu nu,
a̱yi na u tsu za̱Ꞌa̱ unushi ka̱ta̱ kpamu u cinukpa,
kagimi ka uma a̱ ni a na a buwai a̱ uka̱ni.
Vi tsu reme wupa u nu kowannai ba,
ama vu tsu pana ta̱ uyoꞋo u kuyaꞋan kasingai.
19Vi ta̱ kpamu o kudoku kupana asuvayali a̱ tsu,
Vi ta̱ a kudasa unushi u tsu a ɗaka va adasukpatsu a̱ nu.
Vi ta̱ feu a kutaɗuku unushi u tsu ra̱ka̱ punu a asuvu a mala mu uga̱vi.
20Vi ta̱ o kuyotsongu kasingai ka̱ nu a kubana u uma a Yakubu,
wi Ibirahi tankpamu ucigi u na tsu sabaꞋa ba,
tsu na vi yaꞋankai ikaya i tsu uzuwakpani,
ali n ayin a cau ɗe.
©️2025 Language Development and Translation Initiative (LDTI)