Mika 4
4
Kusan ku Vuzavaguɗu
(Ish 2:2-4)
1A ayin a̱ kuta̱wa̱,
kusan ku na A̱Ꞌisa̱ a gbayin a Vuzavaguɗu ki,
ki ta̱ kokpo ku na ku laꞋi n kugaꞋan,
i ta̱ a kucikpa ku ɗa ku laꞋa nsasan n na n buwai,
ka̱ta̱ uduniya wa̱ a̱bunda̱i u shida̱ a kubana ɗe.
2Uduniyan n a̱bunda̱i wi ta̱ a̱ kuta̱wa̱ ka̱ta̱ u dana,
<<Ta̱wa̱ tsu banai a gaɗi vu kusan ku Vuzavaguɗu,
a kubana a kpaꞋa ku Ka̱shile ka Yakubu.
u yotsongusu tsu uye u ni,
a̱tsu kpamu ci yaꞋan nwalu a uye u ni.>>
adama a na kuyotsongusu ki ta̱ a̱ ku uta̱ a Sihiyona,
a Urushelima ɗa kadanshi ka Vuzavaguɗu ka̱ kuta̱wa̱.
3Vuzavaguɗu wi ta̱ a kuyaꞋanka uduniya wa̱ a̱bunda̱i afada,
ka̱ta̱ u ɓolongu una̱ u uduniya wu utsura u na wi a kananai daꞋin.
I ta̱ o kubonoko otokobi e le okpo mba̱ri,
nsara n le tankpamu mo okpo mpaɗa.
Iɗika yi o kudoku ya̱ shilika̱ n iɗika i yoku ba,
ko a piꞋisa tsu na a kuyaꞋan kuvon ba.
4Ama i ta̱ a̱ kuda̱sa̱ngu ashina a itacishi e le,
n ulu a nɗanga n zaitu n le,
babu vuza na u kuneke le wovon,
adama a na Vuzavaguɗu MalaꞋimili ɗa u dansai.
5Ko a na wo okpoi uma i ta̱ o kutono a̱ma̱li e le,
ama a̱tsu ci ta̱ o kutono Ka̱shile ka̱ tsu,
kowannai.
Aza a Isaraila i ta̱ o kubono n ugbashi
6Vuzavaguɗu u danai, a kanna ka nanlo,
mi ta̱ o kuɓolongu nkutsuma̱,
ka̱ta̱ m ɓolongu aza a na o lokoi,
n aza a na n takacikai.
7Mi ta̱ a kuzuwa nkutsuma̱ n na n laꞋakai va okpo uma a̱ va̱,
aza a na ishi o lokoi kpamu okpo uduniya wu utsura.
Mpa Vuzavaguɗu mi ta̱ a kulyaꞋaka le tsugono
a Sihiyona kowannai.
8Ama a̱ɗa̱ uma a Urushelima,
a̱ɗa̱ na yi a kinda uma va̱ tsu na maguɓi ma tsu inda nkyon,
a mashilya ma ugaɗi,
a̱ɗa̱ na yi a Sihiyona,
yi ta̱ a kutsurukpa kpamu,
a̱ɗa̱ uma a na yi Urushelima, yi ta̱ a kulyaꞋa tsugono tsu cau.
9Gogo na yiɗa̱i i zuwai ɗa vi a̱ ma̱shi n utsura?
Vi n mogono ba?
Vuza vu odoki a̱ nu u kuwa̱ ta̱ ɗa?
Ana atakaci a̱ ta̱wa̱i nu tsu vuka va̱ a̱ga̱nda̱ a limata?
10Gandalasa n yura̱,
avu Sihiyona,
tsu na vuka vu tsu pana mɓa̱la̱ ma̱ a̱ga̱nda̱ a limata,
gogo na vi ta̱ a̱ ku uta̱ a̱ likuci,
vu bana vu da̱sa̱ngu a̱ uka̱ra̱Ꞌi u likuci.
Vi ta̱ a kubana a Babila,
ta ɗe Vuzavaguɗu u kushiba̱ wu,
ekiye a irala i nu.
11Ama gogo na iɗika n a̱bunda̱i,
yi ta̱ a tsurala n avu.
A kudana, <<YaꞋan a uka yi nshinda̱,
yaꞋan tsu zuwaka Sihiyona a̱shi.>>
12Ama ele e yeve kusheshe ku Vuzavaguɗu ba,
e yeve ofoɓuso a̱ ni ba,
a na u kuɓolongu le tsu mkpakulu,
a kubanka a̱ ubuta̱ u kulapa.
13Vuzavaguɗu u danai,
ɗenga̱ vu lapa, avu Sihiyona,
adama a na mi ta̱ e kuneke wu utsura tsu kobomburon,
ka kavana ka̱ viyum n ko okotsu a̱ viyum vu shili.
vi ta̱ a kulapa uma n a̱bunda̱i,
vi ta̱ e kuneke uciyi u le u Vuzavaguɗu,
uciyi u le u Vuzavaguɗu va aduniyan ra̱ka̱.
©️2025 Language Development and Translation Initiative (LDTI)