Mika 3
3
A ɓarangi aza e kelime a Isaraila
1Ɗa n danai,
Panai, a̱ɗa̱ aza e kelime a kumaci ku Yakubu,
nu ngono mi Isaraila.
U gaꞋan ta̱ i yeve afada a mayun.
2Ama ɗa i iwain kasingai,
i cigai kawuya,
yi a kuminya uma a̱ va̱,
adanshi yi ta̱ a kutakpa inyama punu e etele e le,
3Yi a kutakuma inyama i uma a̱ va̱,
a kuminya ukpan wi ikyamba i le,
o kukoɗoso etele e le,
a kiɗasai inyama i le akiɗi-akiɗi,
tsu inyama i na a̱ kutsungu o mogbodo,
4Ka̱ ta̱ a banka m ma̱shi me le u Vuzavaguɗu,
ama wi a̱ ku ushuku le ba.
wi ta̱ o kusokongu ku le a̱shi a̱ ni,
adama a ukuna u gbani-gbani u le.
5Na ɗa ili i na Vuzavaguɗu u danai,
u eneki a na a vakangi uma a̱ va̱,
aza a na a tsu dana, <<Ma̱ta̱na̱>>
a makyan ma na i n ili i kulyaꞋa,
ama a tsu banka ta̱ kuvon,
wa aza a na e ci neke le ili i kulyaꞋa ba.
6Adama a nannai,
ili ra̱ka̱ yi ta̱ o ko okpo ɗa̱ kayin n ka̱yimbi,
babu kene ko kula̱na̱,
Kanna ki ta̱ a̱ kuyikpa̱ ka̱ eneki,
kanna ki ta̱ o ko okpo ka̱yimbi kpaɓam.
7Oboci i ta̱ o ko okpo n wono,
aza a̱ kula̱na̱ i ta̱ a̱ kuripa̱la̱.
Ra̱ka̱ vi le i ta̱ a̱ kupala una̱ u le,
adama a na a̱ ciya̱ wu ushuki u Ka̱shile ba.
8Ama mpa mi ta̱ tukpa n utsura,
n ayinviki a Vuzavaguɗu,
adama a kuyaꞋan afada a mayun n kasingai,
n dana Yakubu kawuya ka̱ ni,
n aza a Isaraila feu unushi u le.
9Panai ili i nampa, a̱ɗa̱ aza e kelime,
a kpaꞋa ku Yakubu,
nu ngono mi Isaraila,
a̱ɗa̱ na i iwain afada a mayun,
a ku vadalukpa sa kamayun,
10Yi a kumaꞋa Sihiyona n ikebe yi mpasa n uma
ɗa i maꞋin Urushelima n kawuya.
11Aza e kelime a kuyaꞋan afada n kalyaꞋa,
anan ganu a kuyaꞋan kuyotsongusu adama a katsupu,
eneki a̱ ni a kuyaꞋan kene adama e ikebe.
N nannai dem, a zuwa ta̱ Vuzavaguɗu wi ta̱ koɓolo n ele n a danai,
<<Vuzavaguɗu wi ta̱ koɓolo n a̱ tsu,
Babu kadama ka na ka̱ kuciya̱ tsu.>>
12Adama a̱ ɗa̱,
i ta̱ a kucimba Sihiyona tsu kashina,
Urushelima wi ta̱ o ko okpo koɓolo ka̱ ka̱kiza̱,
a kaginda ka na A̱Ꞌisa̱ i, ki ta̱ o ko okpo kutsun. #Ir 26:18
©️2025 Language Development and Translation Initiative (LDTI)