Emosu 8
8
Alatani a umaci wu nɗanga a mabana
1Vuzavaguɗu u doku u yotsongu mu alatani o yoku, punu va, ɗa me enei mabana tukpa n umaci wu nɗanga. 2Ɗa Vuzavaguɗu u danai, <<Emosu yiɗa̱i ve enei?>> Ɗa n danai, <<Me ene ta̱ mabana n umaci wu nɗanga punu.>> Ɗa Vuzavaguɗu u danai,
<<Tsu na umaci wu nɗanga wa u geꞋwei,
ta unushi u uma a̱ va̱ u yawai tsu na a kutakacika le.
Uteku u ta̱wa̱ ta̱ u uma a̱ va̱ aza a Isaraila
mi o kudoku kucinukpa unushi u le ba.
3A kanna ka nanlo, ishipa i ɗa̱ ya̱ A̱Ꞌisa̱ a gbayin,
yi ta̱ o kokpo ishipa i kpalu,>>
Vuzavaguɗu Ka̱shile u danai,
<<Even a ikyamba i ta̱ a kuyimkpa.>>
<<U taɗuku shi a̱ ubuta̱ dem.>>
<<Ko izumgbi.>>
4Panai ukuna u nampa,
a̱ɗa̱ na yi a kudasa aza a babu utsura,
yi a ku una aza a unambi a iɗika,
5Yi a kudana,<<Wannai ɗai ka̱ɗiva̱ ko wotoi u savu ka kulaza,
adama a na tsu denge ishina i tsu?
Wannai ɗai kanna ka Ashibi ka kulaza,
adama a na tsu banka alkama tsu e kuden?
A tsulaga tsu tsu, ci ta̱ a kugisanku n ugboji,
adama a na ci denge n ikebe ka̱u,
ci ta̱ a kulapa ugundoi u kagisamkpatsu ka
tsu na tsa ku ya̱nsa̱ atsuli,
6ciya̱ tsu tsula vuza vu unambi n aza babu utsura o okpo kagbashi,
tsu ataka a kaguɓa, adama a na i a kufuɗa kutsupa kutan ba,
ci ta̱ e kudenge ishina i na i gaꞋin ba n ikebe ka̱u.>>
7Vuzavaguɗu Ka̱shile ka Isaraila u kucina ta̱,
u danai, <<Mi a kucinukpa n ka gbani-gbani ka̱ ɗa̱ ba.
8ɗaɗa i kuzuwa iɗika i kugba̱ɗa̱,
vuza na baci wi punu dem wi ta̱ a̱ kuna̱mgba̱ ka̱tsuma̱,
iɗika yi ta̱ a̱ kugba̱ɗa̱,
tsu aɓau e kuyene ku Nilu.>>
9<<A kanna ka nanlo,>>
Mi ta̱ a kuzuwa ubuta̱ u yimba̱na̱ a kanna a kaci,
aduniyan i ta̱ o ko okpo n ka̱yimbi n kanna.
mpa Vuzavaguɗu n dansai
10Mi ta̱ o kubonoko ka̱ɗiva̱ ka̱ ɗa̱ ko okpo ili yi una̱mgbi u ka̱tsuma̱,
ishipa i ɗa̱ yi ta̱ o ko okpo ishipa i ma̱shi ma kpalu.
mi ta̱ a kuzuwa ɗa̱ i uka akari akashi,
n zuwa ɗa̱ i gbonduwo aci a̱ ɗa̱.
Yi ta̱ a kuyaꞋan tsu mmaci n na n nambai maku mete me le.
Ukocishi wa, kanna ka ki ta̱ o ko okpo ɗa̱ okono.
11Vuzavaguɗu Ka̱shile ka danai,<<La̱na̱, ayin i ta̱ lo a̱ kuta̱wa̱,>>
<<Ana n kutuka̱ n kambulu a iɗika ya,
ba kambulu ka tsuwa ko kakuli ba,
ama kambulu n kakuli ka kadanshi ka Vuzavaguɗu.
12Uma i ta̱ a̱ ku ka̱ka̱ra̱sa̱ a nɗolu dem,
a kasana a kubana a̱ ka̱livi,
n uɓon u ɗakai a kubana a uɓon u gaɗi.
I ta̱ a̱ kula̱na̱ ubuta̱ dem a̱ kula̱nsa̱ kadanshi ka Vuzavaguɗu,
ama a̱ kuciya̱ kaꞋa ba.
13<<A kanna ka nanlo,
nkere n singai-singai n olobo,
i ta̱ a̱ kulima̱ adama a kakuli.
14Aza a na a kucinai n ka̱ma̱li ka Samariya, a danai,
<N kucina ta̱ n ka̱ma̱li ka Dan,>
<Ko ka̱ma̱li ka Biyasheba,>
icuꞋu i uma a nanlo i ta̱ a̱ ku yikpa̱,
i tana o kudoku kuɗa̱nga̱ ba.>>
©️2025 Language Development and Translation Initiative (LDTI)