Emosu 7
7
Alatani Akyun
1Na ɗa ili i na Vuzavaguɗu u yotsongi mu tsalatani. Me ene yi ta̱ o kufoɓuso ka̱kuma̱ ka akyun a makyan ma na o kotsoi vukyaꞋa vu kashina ko mogono, derere a ayin a na mita̱ ma savu mi o kutopo. 2Punu alatani a, me enei akyun a takumai ka̱vuku ka̱ ta̱ku a iɗika ya dem, ɗa n danai,
<<Vuzavaguɗu Ka̱shile, n folono wu ta̱,
cinukpaka uma a̱ nu unushi u le.
kumaci ku Yakubu ki ta̱ a kulaꞋaka?
Ele ɗa na i gbayin ba.>>
3Ɗa Vuzavaguɗu u sabaꞋi kusheshe ku ni,
u danai, <<Ili i nanlo ya kuyaꞋan ba.>>
Alatani Akina
4Ɗa Vuzavaguɗu u doku u yotsongi mu alatani o yoku. Ɗa me enei Vuzavaguɗu e kuɗeke akina a takacika uma a̱ ni. Ɗa tana akina a leɓecei mala ma uga̱vi, ali n iɗika ya dem. 5Ɗa n danai,
<<Vuzavaguɗu Ka̱shile, n folono wu ta̱,
vi ta̱ a̱ kuka̱sukpa̱,
kumaci ku Yakubu u kulaꞋaka?
Ele ɗa na i gbayin ba.>>
6Ɗa tana Vuzavaguɗu u sabaꞋi kusheshe ku ni,
ɗa u danai, <<Ili i nampa ya yi a kuyaꞋan ba. Mpa Vuzavaguɗu n dansai.>>
7Na ɗa i na Vuzavaguɗu u doku u yotsongi mu a alatani o yoku. A ka̱tsuma̱ ka alatani ka, me enei Vuzavaguɗu kashani a kasaka ka na a maꞋin n kagisamkpatsu ka kawin ka kumaꞋa. Vuzavaguɗu uɓa̱ni n kaꞋa e kukiye ku ni.
8Ɗa Vuzavaguɗu we ecei mu, u danai,
<<Emosu yiɗa̱i vu enei?>>
Ɗa mushuki ɗa n danai, <<Kagisamkpatsu ka kawin ka kumaꞋa.>>
Ɗa kpamu u danai,
<<La̱na̱, n kagisamkpatsu ka kawin ka kumaꞋa ka nampa,
ka ɗaɗa n kugisangu uma a̱ va̱ aza Isaraila,
okpoi tsu kasaka ka na ko kondoroi.
Mi a kusabaꞋa kusheshe ku va̱,
a̱ ubuta̱ u kutakacika le ba.
9Mi ta̱ a̱ kufa̱da̱ nva̱li n kumaci ku Ishaku,
n ubuta̱ wu nva̱li ma aza a Isaraila,
ka̱ta̱ okpo agali,
mi ta̱ a̱ kuɗa̱ngusa̱ kotokobi ko kuvon,
ka yaꞋan tsurala n kpaꞋa ku Jerobuwam.>>
Emosu n Amaziya
10Ɗa Amaziya ganu vu Betelu u suꞋuki Jerobuwam mogono mi Isaraila n akaka, u danai, <<Emosu wi ta̱ ɗe a nsata n nu a kpaꞋa ku nu Isaraila. Ili i na wi a kadanshi i ɗaɗa wi ta̱ a kuta̱ka̱ n vishili a iɗika ya. 11Adama a na Emosu u dana ta̱,
<< <Jerobuwam wi ta̱ a kubana ukpa̱ u kotokobi,
ka̱ta̱ a̱ pura̱ aza a Isaraila a iɗika i le a kubana ugbashi a iɗika i yoku.> >>
12Ɗa Amaziya u danai Emosu, <<Avu keneki. Bono a iɗika i Yahuda. Bana vu la̱nsa̱ ilikulyaꞋa i nu ɗe, vi yaꞋansa ɗe kene ku nu. 13Ama ka̱ta̱ vu doku vu yaꞋan kene e Betelu ba. Adama a na Betelu ubuta̱ u ma̱va̱li mo mogono maꞋa, a̱Ꞌisa̱ o tsugono a ɗa.>>
14Ɗa Emosu wu ushuki Amaziya u danai, <<Mpa keneki kaꞋa ba. Na lo ulinga uva̱ u ɗa ba. Mpa maguɓi ma mi ishi nu m la̱na̱i nɗanga mu mbiri. 15Ama ɗa Vuzavaguɗu u pecei mu n ulinga u va̱ u kaguɓa, u danai mu, <Bana vu yaꞋanka uma a̱ va̱ kadanshi aza a Isaraila.> 16Adama a nannai zuwa atsuvu vu pana kadanshi ka Vuzavaguɗu.
<<Adama a na vu dana mu ta̱, <Ka̱ta̱ n yaꞋan kene a kpaꞋa ki Isaraila,
ka̱ta̱ m ɓarangu kpaꞋa ki Ishaku ba.>
17<< <Ama na ɗa ili i na Vuzavaguɗu u danai nu, avu Amaziya.
Vuka vu nu vi ta̱ a kokpo kashakanlai a̱ likuci,
i ta̱ a ku una muku n nu a̱ ubuta̱ u kuvon,
i ta̱ e peceke aza o yoku iɗika i nu,
avu a̱ ka̱ci ka̱ nu vi ta̱ a̱ kukuwa̱ a iɗika yi unata,
mayun i ta̱ a̱ kupura̱ aza a Isaraila a banka iɗika i yoku.> >>
©️2025 Language Development and Translation Initiative (LDTI)