Emosu 9
9
Uyikpi wi Isaraila
1Me enei Vuzavaguɗu kashani a katalikalyuka ka,
Ɗa u danai,
<<Lapa kebelyu ka ashamkpatsu A̱Ꞌisa̱ a gbayin a,
ali kumiꞋi ku kasaka ka ku gba̱ɗa̱.
Ɓoso le adama a na kumaꞋa ka ku yikpa̱ aci a uma.
aza a na a laꞋakai mi ta̱ a ku una le n kotokobi.
ko vuza u kusuma wa laꞋaka ba.
2Ko ɗa baci a̱ la̱nsa̱i a̱ ubuta̱ u kusheɗeku a̱ ubuta̱ wa̱ a̱kpisa̱,
mi ta̱ a̱ ku utuka̱ le pulai.
Ko ɗa baci a kumbai gaɗi,
mi ta̱ a̱ kucipa̱ka̱ le a iɗika.
3Ko e sheɗeku baci a kusan ku Kamelu,
mi ta̱ a̱ kula̱nsa̱ le ɗe n reme.
Ko ishi baci e sheɗeku a ɗaka vu mala,
mi ta̱ a kuzuwa ka̱di ka kapa le.
4Ko ishi baci a banka le ugbashi a iɗika yi irala i le,
mi ta̱ a kuzuwa a bana una le ɗe n kotokobi.
mi ta̱ a kuzuwaka le a̱shi,
adama a kasingai ba ama kawuya.>>
5Vuzavaguɗu Ka̱shile ko osoji,
vuza na u saꞋwai iɗika ɗa i gba̱ɗa̱i,
aza a na i punu ida̱shi ra̱ka̱ a̱ shika̱i.
aduniyan ra̱ka̱ i ta̱ kuyaꞋan tsu aɓau e kuyene ku Nilu.
6Vuza na umaꞋi kpaꞋa ku ni a̱da̱nga̱shile,
u varai kumiꞋi ku ni gaɗi va uduniya.
A̱yi na u tsu rono mini a mala,
ka̱ta̱ u tsuwa̱n maꞋa a iɗika i ɗekpu,
Vuzavaguɗu ɗa kula ku ni.
7Vuzavaguɗu u danai, <<A̱ɗa̱ aza a Isaraila,>>
a̱ɗa̱ i laꞋa aza a Itopiya wa̱ a̱ va̱ ba,
<<Mayun mu utuka̱ ɗa̱ ta̱ a Masar a̱ ɗa̱ aza a Isaraila,
ɗa n tuka̱i aza a Filisitiya a Karita,
aza a Siriya kpamu ɗe a Kiru.
8La̱na̱, a̱shi a Vuzavaguɗu Ka̱shile,
i ta̱ a kinda tsugono tsu gbani-gbani,
mi ta̱ a ku una tsugono tsu nanlo aduniyan.
ama mi a ku una kpaꞋa ku Yakubu ra̱ka̱ ba,>>
mpa Vuzavaguɗu n dansai.
9<<Adama a na mi ta̱ e kuneke kadanshi,
irala yi ta̱ ku sa̱ka̱ɗa̱ kpaꞋa ka aza a Isaraila,
tsu na a̱ tsu susa̱ kayala, ka̱ta̱ ko okpo babu atali, a na a̱ ku yikpa̱ punu a kayala ka.
I ta̱ a ku vakangu aza a gbani-gbani,
ka̱ta̱ n wacuwa aza a usuɓi a̱ ka̱tsuma̱ ku uduniyan.
10Ama aza a unushi a̱ ka̱tsuma̱ ka uma va̱ ra̱ka̱
i ta̱ a kubana ukpa̱ u kotokobi,
aza a na i a kudana, <Ka gbani-gbani ki lo a̱ kuciya̱ tsu ba.>
Uzuwakpani u Kulapulusuka Isaraila
11<<A kanna ka nanlo,
mi ta̱ o kudoku ku ɗengusa̱ kpaꞋa ku Dawuda,
ku na ku yikpa̱i,
mi ta̱ a kulapula ubuta̱ u na u na̱mgba̱i,
n doku n maꞋasaka ku ɗa tsu na ki shi cau.
12Adama a na aza a Isaraila a lyaꞋa uka̱ni wi ili i na i buwai i Edom,
ka̱ta̱ kpamu a lyaꞋa uduniya ra̱ka̱ u na ishi e ci ɗeke n kula ku va̱,>>
Mpa Vuzavaguɗu n dansai.
13Vuzavaguɗu u danai, <<Ayin i ta̱ lo a̱ kuta̱wa̱,>>
<<Ana aza a kunima o kutono aza a vukyaꞋa.
aza a kupisha ka̱ a̱ɗimbi kpamu o kutono aza a̱ vica̱Ꞌa̱.
Nsasan mi ta̱ a̱ kuka̱na̱ kuyoꞋo ma̱kya̱n ma savu,
ka̱ta̱ aginda a̱ ka̱na̱ kuyoꞋo ma̱kya̱n a̱ ubuta̱ dem.
14Mi ta̱ o kubonoko uma a̱ va̱ aza a Isaraila uciyi u le,
i ta̱ a kumaꞋasaka likuci i na yi okpoi agali,
ka̱ta̱ a̱ da̱sa̱ngu punu,
I ta̱ a kucimba ashina e le a lyaꞋa mele me le.
15Mi ta̱ a̱ kuca̱Ꞌa̱ le a iɗika ya,
i o kudoku kumuɗa̱ le a iɗika i le,
i na mi e kuneke le ba,>>
Mpa Vuzavaguɗu Ka̱shile n dansai.
©️2025 Language Development and Translation Initiative (LDTI)