Emosu 6
6
Ukpa̱ wa aza a Isaraila
1<<Ili ya atakaci i ɗa a̱ɗa̱ na yi a̱ ida̱shi i ɗa̱,
ba̱ri a Sihiyona,
n a̱ɗa̱ na yi e kene yi ta̱ a̱ ida̱shi
i ma̱ta̱na̱ a kusan ku Samariya,
a̱ɗa̱ na yi aza a gbagbaꞋin,
a uduniyan a nanlo,
a̱ɗa̱ na aza a Isaraila a̱ tsu ta̱wa̱,
wa̱ ɗa̱ kula̱nsa̱ uɓa̱nki.
2Banai a̱ likuci i Kaline yi ene,
i laza a kubana a̱ likuci i gbayin i Hamatu-raba.
ka̱ta̱ i gida̱la̱ a kubana a̱ likuci i Gatu vu Filistiya.
A̱ɗa̱ i laꞋa ta̱ tsugono tsu nanlo ɗa?
Ko kureꞋe ki iɗika ku ɗa̱ ku laꞋa ta̱ ku le?
3Ili ya atakaci i ɗa, a̱ɗa̱ na yi a kuciga,
kukatsukpa kanna ka atakaci ka nanlo,
ama adama a ka gbani-gbani ka̱ ɗa̱,
yi o kudoku kuta̱wa̱ka̱ n kanna ka ɗevu.
4Iliya atakaci i ɗa, a̱ɗa̱ na yi a ivaꞋin
a ivaꞋamkpatsu i na a yaꞋin n anga a kagiwa,
a kupana uyoꞋo u kuba̱rukpa̱ i kyamba i ɗa̱,
akuba a gbagbaꞋin a̱ ɗa̱.
A kutakuma inyama yi nlala a ushiga u ɗa̱,
nu ndendem a ushiga u ɗa̱.
5Yi a kuwaꞋa umolu n ishipa,
e kusheshe ku ɗa̱ yi ta̱ a kuyaꞋan tsu Dawuda.
6O kusoꞋo ma̱kya̱n,
n asasu m gbagbaꞋin
a̱ kusukuya̱ maniꞋin ma̱ ma̱gula̱ni ma ikebe a ikyamba i ɗa̱,
ama i na̱mgba̱ ka̱tsuma̱,
adama a̱ una̱mgbi u kumaci ku Isufu ba.
7Adama nannai a̱ɗa̱ ɗa ya ko okpo aza a ugiti,
a na a̱ kupura̱ kubana ugbashi,
ka̱ɗiva̱ ka̱ ɗa̱, n kupana ku uyoꞋo ku ɗa̱
ki ta̱ a kuzuwa uteku.>>
8Vuzavaguɗu MalaꞋimili u kucina ta̱ n kula ku ni,
a̱yi Vuzavaguɗu MalaꞋimili u dana ta̱,
<<Mi ta̱ e ku ene unata wu ugbamukaci u kumaci ku Yakubu,
n iwan ta̱ ubuta̱ u kusheɗeku u ni.
Mi ta̱ e ku neke likuci ya n ili i na,
yi punu ekiye irala i le ra̱ka̱.>>
9Ko uma kupa ɗa baci a buwai a kpaꞋa kute i ta̱ a kukuwa̱ ra̱ka̱. 10Ɗa baci vuza a̱ ka̱tsuma̱ ka kumaci ka vuma vu na u kuwa̱i, u uwai a kpaꞋa dama a na wu uta̱ka̱ n keven ki ikyamba ka u songu, ka̱ta̱ wu ece, <<Ko keven ki ikyamba ko yoku ka buwa ta̱ punu a kpaꞋa ka?>> Ɗa baci a̱ ushuki ni <<ko vuza.>> Ka̱ta̱ vuza vu keci va u dana, <<Ka̱ta̱ yi ula kula ku Vuzavaguɗu ba, talo ili i yoku ya̱ kuciya̱ tsu.>>
11Adama a na, Vuzavaguɗu u neke ta̱ kadanshi, u danai,
i ta̱ o kuɓoso iꞋuwa i gbagbaꞋin n i kenkeꞋen okpo miri-miri.
12Odoku a tsu suma ta̱ atali ɗa?
Ko vi ta̱ a kufuɗa kunima mala n anaka a kunima?
Ama ɗa i bonokoi afada a mayun okpoi tsukono,
ɗa i bonokoi ukuna wa aza a usuɓi okono.
13A̱ɗa̱ na yi a̱ ma̱za̱nga̱,
adama a na i ciya̱ ta̱ ulyaꞋi,
u likuci i Lo-debaru, ɗaɗa ili i gbani,
yi a kudana, <<N utsura u ka̱ci ka̱ tsu u ɗa,
ci isai likuci i Karanayim, ɗaɗa avana e re.>>
14Ɗa Vuzavaguɗu MalaꞋimili,
n ka̱ci ka̱ ni, u danai,
<<Mi ta̱ a̱ kusuku uduniyan u yoku u yaꞋan tsurala n a̱ ɗa̱, kpaꞋa ki Isaraila,
i ta̱ a kutakacika ɗa̱,
ili i na i ɗikai a kuꞋuwatai ku uɓon u Hamatu,
n tsu kasana,
ali a kubana a̱ ka̱ra̱Ꞌa̱ ka̱ Araba a uɓon u ɗaka.>>
©️2025 Language Development and Translation Initiative (LDTI)