Emosu 5
5
Meɗevile ma̱ kushika̱ unushi
1Zuwai atsuvu, a̱ɗa̱ aza a Isaraila,
na ɗa vishipa vu kpalu vu na mi a kuyaꞋanka ɗa̱.
2<<Isaraila u yikpa̱ ta̱,
wi tana o kudoku ku ɗa̱nga̱ ba.
wi ta̱ a ivaꞋin a iɗika,
ko vuza wi a̱ kuɗa̱ngusa̱ yi ba.>>
3Adama a na Vuzavaguɗu Malyaimili, u dana ta̱.
<<Likuci i na baci yi uta̱i kuvon n osoji ka̱kpa̱n,
amangatawun a ɗa koci o kubono.
Likuci i na baci yi uta̱i kuvon n osoji amangatawun, kupa ɗa koci o kubono.>>
4Vuzavaguɗu u danai aza a Isaraila,
<<Ta̱wa̱i wa̱ a̱ va̱, yi ta̱ a kulaꞋaka.
5Ama ka̱ta̱ i la̱nsa̱ mu wa̱ a̱ma̱li e Betelu ba,
ko i uwa a̱ma̱li a Giliga ba,
ko kpamu i pasa a kubana a Biyasheba ba.
Adama na i ta̱ a kuɗika aza a Giliga a banka tsugbashi,
Betelu tamkpamu wi ta̱ o ko okpo ili i gbani.>>
6La̱nsa̱i Vuzavaguɗu, ka̱ta̱ i laꞋaka,
ta baci nannai ba, mi ta̱ a kulyaꞋa kpaꞋa ku Isufu tsa akina,
akina i ta̱ a kulyaꞋa Betelu,
ko vuza wi a kufuɗa kukima̱ akina a nanlo ba.
7Ili ya asuvayali a ɗa, a̱ɗa̱ na i sabaꞋi afada a mayun,
a kutakacika aza a usuɓi,
8A̱yi na u yaꞋin azangata,
u yain motoku n muku n ni,
katain n mesheꞋe n kyalu,
vuza na u bonokoi ka̱yimbi usana,
vuza na u bonokoi kanna ka̱yimbi,
vuza na u tsu rono mini ma mala,
u bonoko maꞋa mini ma̱ Ka̱shile.
kula ku ni ɗa Vuzavaguɗu.
9U tsu zuwa ta̱ vuza vu utsura u kuwa̱,
adama a na una o ɓoso likuci yi nshilya.
10I iwan ta̱ vuza na u tsu shamkpa kamayun,
n vuza na u tsu dansa kamayun a̱ ubuta̱ wa afada.
11I takacikai aza u unambi,
yi isai ilikulyaꞋa i le.
adama a nannai iꞋuwa i singai-singai,
i na i maꞋin n atali a,
yi a̱ kuda̱sa̱ngu punu ba.
Yi tana feu o kusoꞋo ma̱kya̱n,
ashina a itacishi a singai-singai a̱ ɗa̱ ba,
12N yeve ta̱ ka̱bunda̱i ka unushi u na yi a kuyaꞋansa,
n ka gbani-gbani ka na i yaꞋin.
Yi a kutakacika aza a usuɓi,
a ku isa kalyaꞋa.
Yi a̱ kusa̱nka̱ a yaꞋanka aza a unambi afada a singai,
e kefeku ka afada.
13Mayun, a makyan tsu nampa,
aza a ugboji a tsu paɗa ta̱ bini,
adama a na ayin a gbani-gbani a ɗa.
14Sheshei kuyaꞋan ukuna wu usuɓi,
ba ka gbani-gbani ba.
adama a na i laꞋaka.
ɗaɗa Vuzavaguɗu MalaꞋimili,
u kuyongo n a̱ ɗa̱,
tsu na i danai wi.
15Iwain ka gbani-gbani, i ciga kasingai,
i yaꞋan afada a mayun,
a̱ ubuta̱ u na i tsu ɓolongu a̱ utsutsu u likuci,
ugan ba, Vuzavaguɗu MalaꞋimili,
wi ta̱ a kuyaꞋanka kagimi ka kumaci ku Yusufu kasingai.
16Ta Vuzavaguɗu Ka̱shile MalaꞋimili u dansai nannai,
<<I ta̱ a̱ kushika̱, a lapasa una̱ a uye u likuci i ɗa̱,
adama atakaci,
i ta̱ e kuɗeke uma a na i a̱ ka̱pula̱ka̱,
a̱ ta̱wa̱ a yaꞋan ma̱shi ma kpalu,
ma aza a na a̱ kuwa̱i,
ka̱ta̱ aza a na a fuɗai ma̱shi, a̱ ta̱wa̱ a̱ ka̱na̱ ma̱shi.
17I ta̱ a̱ kushika̱ punu, ashina a itacishi a̱ ɗa̱,
adama a na mi ta̱ a kuta̱wa̱ wa̱ a̱ ɗa̱,
n takacika ɗa̱.>>
Mpa Vuzavaguɗu n dansai.
Kanna ka Vuzavaguɗu
18Ili ya atakaci a i ɗa, a̱ɗa̱ na yi a mali ma,
kanna ka Vuzavaguɗu.
Yiɗa̱i kanna ka Vuzavaguɗu ka kuyaꞋanka ɗa̱?
Kanna ka̱ ka̱yimbi kaꞋa, kanna ka kutashi kaꞋa ba.
19Wi ta̱ o ko okpo tsu vuza na u fa̱ta̱tsa̱i ekiye a kawu,
ɗa kucikpa u yikpa̱i ekiye a̱ ma̱kunzukunzu,
ko vuza na u uwai a kpaꞋa,
u zuwai kukiye a kasaka,
ɗa koko ka kapai ni.
20Kanna ka Vuzavaguɗu kanna ka̱ ka̱yimbi kaꞋa,
kanna ka kutashi kaꞋa ba.
Kanna ka̱ una̱mgbi u ka̱tsuma̱ kaꞋa n atakaci,
kanna ka̱ ma̱za̱nga̱ kaꞋa ba.
21Vuzavaguɗu u danai,
<<N kovo ta̱, ka̱ɗiva̱ kakau o kutoni a̱ ɗa̱,
mi ta̱ e kene unata u koɓolo ka̱ ɗa̱.
22Ko ɗa baci i nekei mu,
kuneꞋe ku kusongu,
n kuneꞋe ki ishina ku ɗa̱, mi a ku isa ba,
Kpamu mi a ku isa nnama mi ikyamba n ɗa̱,
n na i nekei mu, adama e kuneꞋe ku ma̱ta̱na̱ ba.
23Buwakai mu uye n kacaꞋa ki ishipa i ɗa̱,
n ciga n pana tsuwaꞋi tsu ɗa̱ n ciliki tsu ɗa̱ ba.
24Ama yaꞋan afada a mayun,
o yongo a̱ ubuta̱ dem tsu mini ma na mi e kuyene.
Usuɓi kpamu tsu kuyene ku na ku tsu ɗekpe ba.
25<<A̱ɗa̱, aza a Isaraila.
n la̱nsa̱ alyuka n kuneꞋe ku ɗa̱,
a̱ ka̱tsuma̱ ka̱ya̱ amangere a na i yaꞋin e meremune ba. 26Ama ɗa i ɗikai nlulu ma a̱ma̱li a̱ ɗa̱,
a na i yaꞋankai ka̱ci ka̱ ɗa̱,
Sukotu ka̱ma̱li ka̱ ɗa̱ ka na i ci ɗeke mogono,
n Kaiwan ka̱ma̱li ka na ki ni iyoci i kazangata. 27Adama nannai mi ta̱ a̱ kupura̱ ɗa̱ a kubanka a ugbashi,
a iɗika i yoku kasana n Dimaska.
Mpa Vuzavaguɗu n dansai,
vuza na kula kuva̱ ku ɗa, Ka̱shile MalaꞋimili.
©️2025 Language Development and Translation Initiative (LDTI)