Emosu 4
4
Aza a Isaraila a̱ kpa̱ɗa̱i kubono a̱ ubuta̱ u Ka̱shile.
1<<Zuwai atsuvu i pana kadanshi ka nampa,
a̱ɗa̱ a̱ma̱ci a na yi a̱ likuci i Samariya,
a̱ɗa̱ ɗa na i yaꞋin ikyamba tsu obomburon a̱ ka̱ɓa̱na̱,
a̱ɗa̱ na yi a kutakacika aza a babu utsura, n aza unambi,
a̱ɗa̱ na i tsu dana ali a̱ ɗa̱, <Tuka̱i tsu n ili i kusoꞋo.>
2Vuzavaguɗu MalaꞋimili u kucina ta̱ n ukuna u ciɗa u ni, u danai,
Mayun kanna ka ki ta̱ lo a̱ kuta̱wa̱ ɗa̱,
ana a kuɗika ɗa̱ a kubanka a ugbashi,
yaba dem i ta̱ a kurono yi n kuɗopi.
3Yi ta̱ o kutono n uɓon u na mashilya ma ɓatsai,
yaba dem wi ta̱ a ku uta̱ magaba,
ka̱ta̱ a taɗuku ɗa̱ a kusan ku gbayin ku Harumon,>>
Mpa Vuzavuguɗu n dansai.
4<<Ta̱wa̱i e Betelu ubuta̱ u ciɗa,
i lyaꞋa wo kelime n kuyaꞋan unushi,
banai a Giliga, i doku i yaꞋan unushi wu ucigi u ka̱ɗu.
i tuka̱ n alyuka a̱ ɗa̱ usana lakam,
ite a̱ ka̱tsuma̱ ka kupa tankpamu a kanna ka tatsu dem.
5Nekei alyuka a ucikpi m boroji vu ɗa̱,
ka̱ta̱ i sala kuneꞋe ku ucigi u ka̱ɗu u ɗa̱,
i neke arabali e kuneꞋe ka,
ili i na yi a kuciga a̱ɗu a̱ ɗa̱ i ɗaɗa na lo,
a̱ɗa̱ aza a Isaraila,>>
Mpa Vuzavaguɗu n dansai.
6Vuzavaguɗu u danai, <<Mpa ɗa n zuwai a yaꞋan kambulu a̱ likuci i ɗa̱ ra̱ka̱,
n nannai dem i bono wa̱ a̱ va̱ ba,>>
7<<Ɗa n iwain kuyoꞋo mini adama a ica̱Ꞌa̱shi i ɗa̱,
a makyan ma na a cigai mini.
Ɗa n yoꞋi mini a̱ likuci i yoku,
likuci i yoku tankpamu n sa̱nka̱i le mini.
ashina o yoku a̱ ciya̱ ta̱ mini,
ama ashina a na a̱ ciya̱i mini ba e ɗekpe ta̱.
8Uma a̱ ka̱na̱i kuka̱ra̱Ꞌa̱ likuci-likuci,
a̱ kula̱nsa̱ mini mo kusoꞋo,
ama a̱ ciya̱ mini ma gbayin ba,
n nanai dem, i bono wa̱ a̱ va̱ ba,>>
Mpa Vuzavaguɗu n dansai.
9<<N zuwai ashina a̱ ɗa̱ a̱ pa̱lukpa̱i ɗa a̱ la̱nga̱sa̱i ubuta̱ wi ishuꞋwan u ɗa̱,
n zuwai akyun a takumai umaci wu nɗanga mu mbiri n ɗa̱ n nɗanga n zaitu.
n nannai dem i bono wa̱ a̱ va̱ ba,>>
mpa Vuzavaguɗu n dansai.
10<<Ɗa n suꞋuki ɗa̱ n ma̱dukpa̱ a̱ ka̱tsuma̱ ka̱ ɗa̱,
tsu na n yaꞋin a Masar,
mu unai a̱ɗa̱nga̱ni a̱ ɗa̱ n kotokobi,
n pura̱i odoku a̱ ɗa̱.
ɗa n shatangi yunu i ɗa̱ n ushami wa aza a na a̱ kuwa̱i,
n nanai dem i bono wa̱ a̱ va̱ ba,>>
mpa Vuzavaguɗu n dansai.
11<<Mu unai aza o yoku a̱ ɗa̱,
tsu na mu unai Sodom n Gomora.
Yi ta̱ tsu kagimi ka maɗanga ka na a̱ utuka̱i akina,
n nannai dem i bono wa̱ a̱ va̱ ba,>>
mpa Vuzavaguɗu n dansai.
12<<Adama a nannai a̱ɗa̱ aza a Isaraila,
na ɗa ili i na mi a kuyaꞋanka ɗa̱,
mi ta̱ tana a kuyaꞋan i ɗa ra̱ka̱,
i foɓuso kugasa n Ka̱shile ka̱ ɗa̱.>>
13Ka̱shile kaꞋa ka yaꞋin nsansa,
a̱yi ɗa kpamu u yaꞋin wunla̱i,
u yotsongi kusheshe ku ni u vuma,
u bonokoi kutashi ka̱yimbi,
a kulyaꞋa tsugono tsa aduniyan ra̱ka̱,
kula ku ni ku ɗa Vuzavaguɗu MalaꞋimili.
©️2025 Language Development and Translation Initiative (LDTI)