Liuk 23
23
Eyak Jizȯs enȯ pȯntiȯs Pailed
(Matiu 27:1,2,11-14; Mak 15:1-5; Jȯn 18:28-38)
1Ene, afidefid ipono in̄wi Juu ede Jizȯs ezȯk Pailed, ami akeni ala-uboho ukra. 2Imi eduo Jizȯs ndiduo kenye anin̄ Pailed ȯgȯ, «Inyin ikid nda ami sighi ȯluȯn̄ȯ ididio mfana kotu in̄wi inyin. Anyi ȯdȯhȯ kenni udiȯk mpȯ idinȯ Adidem utib, alaha ȯdȯhȯ ki Imi inni Krais. 3Ene Pailed abid Jizos ȯgȯ, «Avi anni ȯgwȯn̄ ima Juu?» Jizȯs ȯbrȯ anyi, «Ih, anni sighi avi atan̄.» 4Kini Pailed amakebid Jizȯs mbid ukre, anyi ȯdȯhȯ ipono igu ma otu-in̄wi ȯgȯ, «Ami nduȯn̄ȯde nkid kama anwi ami enne udiȯk-mpȯ sisin̄. Ami ankid si Anyi elei idide itip Anyi ipe. 5Ani imi etu eyre ȯgȯ, «Anyi ede upiekmpȯ Iseghe ene in̄wi inyin etu uboho ma ukra ki afidefid ipehe Judia. Anyi ȯkȯtȯn̄ȯ ima upiek-mpȯ ami ki ipehe Galilii tutu abe adisim kemi ki Jeruzelem.»
Jizȯs ala kenye anin̄ Erȯd
6Kini Pailed agie nsen̄e ani, anyi abid imi, «Ndi Anyi asie Galilii?» 7Kini Pailed afiak ki Jizȯs asie ipehe Galilii, ipehe ami Erȯd akra, anyi ȯdȯhȯ ede Jizȯs ezȯk Erȯd, siaki Erȯd akabak ki udun̄ Jeruzelem ki ini ani. 8Erȯd akeniezid etieti siaki anyi akegie aban̄a Jizȯs ȯnȯn̄ anye uduonye idikid Anyi man Anyi enne utibe-mpȯ kenye iseghe. 9Ene Erȯd abid Jizȯs awikiwak mbid, ani Jizȯs ebrȯ anyi-o. 10Ipono igu ma ima epiek ibed anin̄ Moses ebono keni etamatam etan̄ nsen̄e eduo Jizȯs. 11Erȯd ma in̄wekun̄ iseghe esȯn̄ȯ Jizȯs n̄nen̄e elaha ede anyi enne mpȯ-imme. Ebe ȯvȯn̄ ȯgwȯn̄ edȯn̄ȯ Anyi esenȯ Anyi esȯk Pailed. 12Tutu adisim uso ani, Erȯd ma Pailed ekebak ki itȯk, ani ki ntak anin̄ Jizȯs imi enne emem uso ani.
Anyi Abe ubie anin̄ Barabas
(Matiu 27:15-26; Mak 15:6-15; Jȯn 18:38-19:16)
13Kini iyuvȯk anin̄ Erȯd ede Jizȯs esesȯk Pailed, anyi okuo ipono igu, ipono in̄wi udun̄ ma afidefid otu-in̄wi obono mbie sin̄. 14Ene anyi Pailed ȯnȯ ubiere imi, «Ifi ikide anwi ami isȯk mi ikȯ ki Anyi ȯdiȯ mfana kudun̄, enne in̄wi etu uboho ma ukra Rumen. Ami nluȯn̄ȯ idinne ifi ifiak kini mbid Anyi mbid nduȯnȯde Anyi nse kenye ifi, nkid kama enye udiȯk mpȯ ami Anyi enne-o. 15Erȯd ngo akid kama enye si Anyi elei-o, ntak ani enne Erȯd ȯsȯnȯ Anyi esȯk inyin. Ifi ikid kama enye si anyi enne ede odo mpe. 16Ene ami ma ndȯhȯ in̄wekun̄ emgbai Anyi, ene ma nyak Anyi ȯnyȯn̄. 17(Kini ukra anin̄ Pailed akeni ulo iseghe idisa anwi-mbȯkȯbȯ Juu sin̄ iyak kuso usrȯ ugbȯhȯ-ufen.) 18Ani afidefid otu-in̄wi epȯk upekun̄ ȯgȯ, «Gbo Jizȯs, sa Barabas yak nȯ inyin. 19Barabas okodio kuvȯk-mbȯkȯbȯ siaki anyi akasan̄a ki ibo ami ekenwana ki udun̄ Jeruzelem ami anyi ekede ogbo anwi. 20Pailed ȯsȯkuo imi obono mbie sin̄, siaki anyi ȯkȯluȯn̄ȯ adeghe idisa Jizȯs iyak. 21Ani imi ekanye idipȯk, «Ekwei Anyi ki krȯs epe, ekwei Anyi ki krȯs epe! 22Ene Pailed ȯnȯn̄ȯsȯ atan̄ nsen̄e ma imi ȯyȯhȯ ȯpe ete ȯgȯ, «Nsi anni udiȯk-mpȯ ami Anyi enne? Ami anye ntak idibire ipe mpe inȯ Anyi. Yak n̄nȯ in̄wekun̄ uje emgbai Anyi ki ipe man nsa Anyi nyak ȯnyȯn̄. 23Ani imi ekanye idipȯk kotuitu uje ȯgȯ yak ekwei Anyi ki krȯs. Kapatre, siaki uje imi otu ekie anin̄ Pailed, imi ekie. 24Pailed adinyime idinne si imi ekeluȯn̄ȯ. 25Anyi ȯnȯ uje yak in̄wekun̄ iseghe esa Barabas ami ekemȯ edio uvȯk-mbȯkȯbȯ ki ntak ibo ma ugbo anwi eyak enȯ ima Juu. Anyi ȯdȯhȯ in̄wekun̄ ebe Jizȯs ekegbo ki krȯs sighi otu-in̄wi ekeluȯn̄ȯ.
In̄wekun̄ ekwei Jizȯs ki krȯs
(Matiu 27:32-44; Mak 15:21-32; Jȯn 19:17-24)
26Sighi in̄wekun̄ anin̄ Pailed ede Jizȯs eka mbie ami edikwei Anyi ki krȯs, imi emȯ anwi sin̄ ami ekre Saimȯn, ami akesie udun̄ siren adi udun̄ Jeruzelem. In̄wekun̄ ebe krȯs anin̄ Jizȯs enȯ anyi obio ȯkȯn̄ Jizȯs kede. 27Opono otu-in̄wi ekȯn̄ Jizȯs kede, ma mmani ami ebai-eje ekȯn̄ Anyi. 28Ani Jizȯs eliek anye ase imi ȯdȯhȯ, «Ifi mmani udun̄ Jeruzelem, ikibai-eje ki ntak Ami, ani ibai-eje ki ntak seditibe inȯ ifi ma iyo ifi. 29Siaki ima uso mȯkedi ami in̄wi edi idȯhȯ, «Ȯfȯfȯ ȯnȯ mmani ami enni azi, ami ekenenne nama eyudip eme oyo. 30Ene in̄wi medȯhȯ ipono-obod duȯhȯ fi inyin, medȯhȯ nyiyon̄ obod be mi mien̄. 31Aneki in̄wi enne sem ma Ami ami n̄ni nzizi atitie, sediladeghe ma ifi ami inni mpipo atitie? 32Imi emȯ in̄wi iba ami ekeni inȯ edian ma Jizȯs edeka idigbo. 33Kini imi esan̄a ekasim usoho ami ekuo «mpȯpȯnȯ», imi ekwei Anyi ki krȯs egbo mima inȯ, sin̄ kubȯk ulo, sin̄ kubȯk ufen̄e. 34Ene Jizȯs ȯbȯn̄ akam ȯnȯ imami ekekwei Anyi ki krȯs ȯgȯ, «Etie, efen nȯ imi, siaki imi nama efiak si imi enne. Imi etie nsa edekei ȯvȯn̄ Iseghe kotu imi. 35In̄wi ebono nen ese. Ani ima ala anye esȯn̄ȯ Anyi n̄nen̄e egȯ, «Anyi enne enyan̄a onun̄ in̄wi, yak ȯkȯn̄ anyan̄a ile Iseghe aneki Anyi anni Krais ami asie Ahta-Etie adi si anyin̄inyan̄a inyin. 36In̄wekun̄ ngo ede Anyi etȯ-ndȯk. Imi ebe atilio-epo (viniga) esȯk Anyi ȯnwȯn̄. 37Ene imi edȯhȯ Anyi, «Aneki Avi anni Ȯgwȯn̄ ima Juu, nyan̄a ilefi sighe.» 38Imi ewed ki nsen̄e Grik, Latin ma Ibru ki ȯpipȯk ȯgȯ, «Anyemi anni ȯgwȯn̄ ima Juu.» Imi ebe ekwei edian ki uboho krȯs anin̄ Jizȯs. 39Sin̄ kotu inȯ ami ekekwei ki krȯs ma Jizȯs ȯsȯn̄ȯ Anyi n̄nen̄e ȯgȯ, «Ngȯ Avi anni krais, n̄ne enyan̄a ilefi laha nyan̄a inyin.» 40Ani inȯ anyeki esughe ȯnȯ anyi ȯgȯ, «Kutan̄ sen! Nsi senne nama avi ubiak Ahta-Etie? Avi ngo ȯkȯn̄ anni sin̄ kotu in̄wi ami ipe atip. 41Inyin in̄wi iba ibȯhȯ ufen ami ȯkȯ ma udiȯk-mpȯ inyin. Ani anwi anyemi elei ki adeghe sisin̄-o. 42Anyi eliek anye ase Jizȯs ȯdȯhȯ, «Ȯgwȯn̄-Etie Jizȯs, tuei mi kini Avi adide ukra si Ȯgwȯn̄. 43Jizȯs ȯbrȯ anyi, «Yak n̄ne fi afiak, mfin ami avi mabak ma Ami ki ȯnyȯn̄.
Jizȯs epe ki krȯs
(Matiu 27:45-56; Mak 15:33-41; Jȯn 19:25-30)
44Akeni ufȯd epei-eje, ani ȯnyȯn̄ ebre ki afidefid udun̄ tutu n̄kidikie amgbai ite. 45Siaki utin etre idisȯ inȯ unwana iseghe, ȯvȯn̄-ipehe Obio anin̄ Ahta-Etie ki udun̄ Jeruzelem asiaha iba. 46Jizȯs ȯpȯk kotuitu uje ȯnȯ Ahta-Etie, «Etie, nyak uwem Ami n̄nȯ Fi.» Kini Anyi atan̄ sen ekre, Anyi ayak ivek. 47Kini opono anwekun̄ Rumen ami akese mpȯ aban̄a ekun̄ imaki akid afidefid setibe, anyi otro Ahta-Etie ȯnȯn̄ ȯdȯhȯ ȯgȯ, «Kapanikwȯ, anwemi akenni enininen anwi.» 48Ata awikiwak in̄wi ekesie edi iditin sighe ekwei imi ki krȯs. Kini imi ekid afidefid setibe, imi epan̄ ubȯk ki azid ki mfuhȯ elian̄a enyȯn̄ uvȯk imi. 49Afidefid imami ekenen̄ede efiak Jizȯs, ma mmani ami ekesan̄a ma Anyi ki Galilii ededi ela nsense ese sighe afidefid mpȯ ami akanye.
Josef abe Jizȯs ȯluȯk ki ulei iseghe
(Matiu 27:57-61; Mak 15:42-47; Jȯn 19:38-42)
50Ki ini ani, anye anweni sin̄ ami ekekre Josef ami akesie Arimatia, udun̄ sin̄ ki Judia. Anyi akenni alanye sin̄ ki esȯp ima Juu. Anyi akenni edeghe anwi. 51Anyi ekesan̄a kodiomo ami ima alanye Juu ekenne eban̄a Jizȯs. Anyi akesie udun̄ Arimatia ȯkȯnȯn̄ otio abie ukra anin̄ Ahta-Etie. 52Josef adika abine Pailed ami akeni Adidem Rumen akaben̄e anyi ayak imi ibe opo anin̄ Jizȯs ikiluȯk. Pailed anyime ȯnȯ anyi. 53Josef asan̄a ma onun̄ in̄wi ekesiȯ opo anin̄ Jizȯs ki krȯs esighe enim kisȯn̄. Anyi ede ȯvȯn̄ linen ȯfuk opo anin̄ Jizȯs ebe ekeluȯk ki ulei ami egbȯ ki utai, ami ekenenne nama anwi edeluȯk anwi sisin̄. 54Uso ami Jizȯs ekepe akenni uso ntimille sabad, sighi ulo ima Juu ekenni, tȯn̄ȯ ki epei-eje uso ani, ibed ȯkȯbiȯn̄ȯ in̄wi idinne uto, siaki uso ntuakuboho ȯtȯn̄ȯ. 55Mmani amekesan̄a ma Jizȯs esie Galilii edi, ekȯn̄ Josef ma in̄wi amekesan̄a ma Josef ekekid ulei ami ebe opo anin̄ Jizȯs eluȯk. 56Ken amakogbo, mmani ani esenyȯn̄ uvȯk imi eka ekip inie-ulu mvan̄ ede enne anielu-ada idifiȯn̄ȯ opo anin̄ Jizȯs, ani imi esulu ki uso sabad sighi ibed atime.
Currently Selected:
Liuk 23: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
