Liuk 24
24
Jizȯs ezed ki mpe
(Matiu 28:1-10; Mak 16:1-8; Jȯn 20:1-10)
1Ki mbak-mbak usieje uso edre, mmani ani ebak elahela, ebe ada ami imi ekede inielu mvan̄ enuan̄ elaha eka ulei. 2Kini imi ekesim, imi ekid ki ekepra utai ami akebe ki inue ulei esighe. 3Ani kini imi esan̄a eluk ȯvȯhȯ ulei, imi eluȯn̄ȯ opo anin̄ Jizȯs ekak. 4Sighi imi enwana idikre si ametibe, in̄wi iba ami edȯn̄ȯ emineminen̄ afia ȯvȯn̄, edila imi ki nkan̄. 5Sighi udulan̄a ede ȯmȯ mmani ani, imi esu anyeki isȯn̄ kido upono. Ani n̄nini iba ani ebid imi, «Nsi enne ifi iluȯn̄ȯ anwi ami odu uwem kotu ima epe-mpe? 6Anyi ebak kemi-o, Ahta-Etie enne Anyi ezed ki mpe. Ituei senyi ȯkȯdȯhȯ ifi kadan̄a ini ami Anyi akabak ma ifi ki ipehe Galilii. 7Anyi ȯkȯdȯhȯ ȯgȯ, «Meyak Oyo Anwi edio ndiȯk-in̄wi kubȯk, imi ma ekwei Anyi ki krȯs, ani ki ȯyȯhȯ uso ite Ahta-Etie mane Anyi ezed ki mpe. 8Imi etuei si Jizȯs akatan̄ ȯnȯ imi. 9Kini Meri Magdalin, Juana, Meri ekie anin̄ Jems ma mmani imaki esȯ ki ulei edinyȯn̄, imi ebe afidefid seketibe editan̄ enȯ mbed loho-sin̄ ma onun̄ in̄wi. 10Enyin mmani ami ekeditan̄ enȯ ima aka-uto loho-sin̄ setibe anem; Meri Magdalin, Juana, Meri ekie anin̄ Jems, ma mmani ami ekesan̄a ma imi ekebe nsen̄e ami editan̄ enȯ mbed. 11Ani mbed loho-sin̄ etre idinim nsen̄e mmani ani kapanikwȯ, siaki akala si ndisime nsen̄e kutȯn̄ imi. 12Ani Pita obu alahala, abiak aka ulei. Kini anyi ȯnyun̄ȯ ase ȯvȯhȯ ulei, anyi akid ȯvȯn̄ linen ami ekede efuk Jizȯs sighi ana kille iseghe. Pita alaha ȯnyȯn̄ uvȯk abak ki mpile aban̄a setibe.
Jizȯs aya ile ȯgbȯ mbed Iseghe iba
(Mak 16:12,13)
13Pasik uso ani, mbed anin̄ Jizȯs iba esan̄a eka uyudun̄ ami ekre Emaus, ami ȯkȯnyȯn̄ adeghe ulaha utai itan̄aba kini elaha ki udun̄ Jeruzelem eka. 14Sighi imi esan̄a eka, imi etan̄ nsen̄e imi in̄wi iba eban̄a ima mpȯ ami ȯkȯgbȯ ȯnȯ Jizȯs ki ima uso ami okogbo. 15Sighi imi ekanye ki n̄neme imi, Jizȯs asan̄a adiana imi ȯnȯn̄ asan̄a ma imi. 16Ani Ahta-Etie eyak imi efiak kenni Jizȯs. 17Ene Anyi abid imi, «Nsi ki ifi itan̄ isan̄a ki ȯpȯdeghe? Imi etuak ela anye mfuhȯ-mfuhȯ. 18Anwi sin̄ kotu imi ami ekre Klopas abid Jizȯs, «Avi unȯsin̄ anni asie-anwi ami adi udun̄ Jeruzelem nama ufiak afidefid setibe ki uso ifan̄ amogbom?» 19Jizȯs abid imi, «Nsi aketibe? Imi ebrȯ Anyi, «Inyin ikineme iban̄a ima mpȯ ami aketibe ȯnȯ Jizȯs ami akesie Nazared. Anyi akenni asiakuduak ami ekenne ima utibe uto ȯnȯn̄ epiek nsen̄e anin̄ Ahta-Etie mulu. 20Ani ima ipono igu inyin ekeyak Anyi enȯ ima ala-ukra ekwei Anyi ki krȯs. 21Inyin ikinye uduonye kenni Anyi adivak Isuel iseghe kubȯk ima esughe. Ani elasi utȯ mpȯ ani akime iditibe, siaki mfin enne uso ite tȯn̄ȯ ekegbo Anyi. 22Ken amakogbo, ubiak mmani kotu inyin enne ile-epe inyin. Imi ekeka ulei ami ekeluȯk Anyi usieje ami, 23ani imi ekid opo anin̄ Jizȯs-o. Ani imi edidȯhȯ inyin kimi ikid ima enjel ami edidȯhȯ imi kenyi ezed ki mpe. 24Ani ene ubiak n̄nini kotu inyin ekekid ulei sighi anna upȯk ukem sighi mmani ani ekedȯhȯ inyin, ani imi ekid Jizȯs-o. 25Ene Jizȯs ȯdȯhȯ imi, «Ifi ndisime in̄wi, nsi enne otu ifi ile idinim kapnikwȯ si ima asiakuduak ekewed enim ki elille nwed eban̄a Krais? 26Amakana ifi ifiak ki Krais anasi ȯbȯhȯ ukid, epe man Anyi ogbo ȯluk ugwȯn̄ Iseghe. 27Jizȯs ȯtȯn̄ȯ idinne anwan̄a imi si afidefid ilille nwed ȯdȯhȯ aban̄a Anyi. Anyi ȯtȯn̄o ki elille-nwed ibed anin̄ Moses ekewed tutu asim si ima asiakuduak imaki ekewed eban̄a Anyi.
Anye anwan̄a mbed anin̄ Jizȯs
28Kini Jizȯs asan̄a ma imi akasim Emaus ami ani udun̄ ami mbed iba ani ekeka, Jizȯs enne si Imi mȯki idisan̄a igbo. 29Ani imi epe Anyi ubȯk ȯgȯ, «Nna minyin ki ejeh mokedibre. Jizȯs ȯkȯn̄ imi ȯnyȯn̄ uvȯk akabak ma imi. 30Kini imi ebe uyo edinim idita ma Anyi, Jizȯs abe uyo ani aka kubȯk ȯkȯ Ahta-Etie ȯbun̄ ayak ȯnȯ imi eta. 31Ki ukem ini ani, Ahta-Etie enne anye anwan̄a imi, imi efiak kenni Jizȯs. Ani Anyi asie sok ayak imi. 32Imi ebid ilimi mbid ȯgȯ, «Eni akesik afana inyin ki azid kini ami Anyi akatan̄ nsen̄e ma inyin kȯpȯdeghe edenne elille-nwed anwan̄a inyin? 33Inisin̄inisin̄, imi elaha esenyȯn̄ Jeruzelem. Ekekid mbed loho-sin̄ ma onun̄ in̄wi sighi etio mbie sin̄. 34Kini imi edisim, mbed loho-sin̄ edȯhȯ in̄wi iba ani ȯgȯ, «Si mmani ani ekedidȯhȯ inyin akeni apanikwȯ. Jizȯs ezed ki mpe, Anyi aya ile ȯgbȯ Saimȯn. 35Ene mbed iba ani etan̄ seketibe ȯnȯ imi ma Jizȯs kȯpȯdeghe udun̄ Emaus, ma sighe Anyi aya ile ȯgbȯ imi kini imi eketio idita uyo. Sighi imi ekefiak Jizȯs kini ami Anyi ȯdiȯn̄ uyo ȯnȯ imi.
Jizȯs ȯgbȯ ima mbed Iseghe ile
(Jȯn 20:19-23)
36Sighi imi ekanye eneme eban̄a ima mpȯ ami, Jizȯs ȯluk adila kufȯd imi ȯgȯ, «Yak emem Ami abak ma ifi. 37Kini imi ekid Anyi, imi ede senni epo, ene ile aduai imi etieti. 38Ani Jizȯs ȯdȯhȯ imi, «Nsi enne ile aduai ifi? Nsi enne eyehe abak ki azid ifi? 39Ise mi ubȯk ma ukuo, ifiak kenni ami. Itu mi ise; epo enye ȯbuk ma ȯpȯ sighi ifi ikid Mi nye-o. 40Kini Jizȯs amakatan̄ sen ekre, Anyi anya ubȯk ma ukuo ȯgbȯ imi epa unan. 41Asieki uniezid ma mpile, imi ekȯd ewra enim Anyi ki apanikwȯ-o, ani Jizȯs abid imi, «Ifi inye ullia? 42Imi ebe upok ȯfifȯ eyak enȯ Anyi. 43Sighi mbed akanye ese, Anyi ȯbȯhȯ eyak ani ata. 44Ene Jizȯs ȯdȯhȯ imi, «Ami anni ima nsen̄e ami nkinsan̄a ntan̄ n̄nȯ ifi kini ami nkimbak ma ifi pan̄ki mpe ngȯ, «afidefid si ekewed eban̄a mi ki ibed anin̄ Moses, ma ki nwed ima asiakuduak, ma ki nwed Saams, anasi ȯgbȯsu. 45Ene Jizȯs enne elille-nwed anwan̄a imi. 46Ene Anyi ȯdȯhȯ imi, «Ekewed ki elille-nwed kana Krais epe ȯsȯ ezed ki mpe ki ene uso ite. 47Ewed ngo ki elille-nwed kanasi mbed Iseghe ekekurȯ enȯ in̄wi eban̄a Krais. efinifen ki udiȯk-mpȯ abak ȯnȯ imami ekabadezid. Anasi imi esan̄anye ekurȯ ki udun̄ Jeruzelem pan̄ ekekurȯ ki afidefid ulid. 48Ifi inni imami ekid afidefid setibe. Anasi ifi itan̄ inȯ onun̄ in̄wi iban̄a si ifi ikid si ntiontin. 49Ami kille Mi ma ndȯn̄ Elille Sibirid ami Etie Mi ȯkȯnwȯn̄ȯ esȯk ifi. Ani anasi ifi ibie kemi ki udun̄ Jeruzelem tutu Elille Sibirid adinȯ ifi ulu ami asie ȯnyȯn̄.
Ebe Jizȯs enien̄ ȯnyȯn̄
(Mak 16:19,20)
50Kini Jizȯs atan̄ sen ekre, Anyi abe mbed Iseghe ȯgbȯ ki udun̄ Jeruzelem esan̄a epine udun̄ Betani. Ene Anyi adiaha ubȯk Iseghe kȯnyȯn̄ ȯdiȯn̄ imi. 51Sighi Anyi akanye ȯdiȯn̄ mbed Iseghe, ebe Anyi elaha-eyak isȯn̄ enien̄ ipe-ȯnyȯn̄ tutu Anyi asie imi kenye ekre. 52Ene mbed Iseghe etȯn̄elȯn̄ elaha etuak-uboho-enȯ Anyi elian̄a esȯ edinyȯn̄ udun̄ Jeruzelem ma idra. 53Imi esan̄a eka Obio anin̄ Ahta-Etie ki udun̄ Jeruzelem afidefid uso eketro Ahta-Etie.
Currently Selected:
Liuk 24: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
