Liuk 22
22
Odiomo idigbo Jizȯs
(Matiu 26:1-5,14-16; Mak 14:1,2,10,11; Jȯn 11:45-53)
1Adipine ini ami anasi ima Juu ellia usrȯ uyo ami livin nama edio ami in̄wi ekuo usrȯ ugbȯhȯ-ufen. 2Ipono Igu ma ima epiek ibed eluȯn̄ȯ adeghe idigbo Jizȯs ki nlibe, siaki imi ekenye udulan̄a eban̄a otu-in̄wi ami esan̄a epan̄utȯn̄ enȯ upiek mpȯ anin̄ Jizȯs. 3Ene setan ȯluk azid anin̄ Judas Iskariȯd, anyi akenni sin̄ kotu ima aka-uto anin̄ Jizȯs Loho-iba. 4Ene Judas akabine ima ipono igu ma ima epime Obio anin̄ Ahta-Etie akaluk odu sighi anyi idinne iditab Jizȯs inȯ imi. 5Ipono igu ma ima apime Obio anin̄ Ahta-Etie eniezid etieti enȯn̄ enyime idino anyi ȯkuk. 6Judas anyime, ene anyi ȯluȯn̄ȯ adeghe sighi anyi adisan̄a idiyak Jizȯs inȯ imi, kini otu in̄wi nama ebak.
Jizȯs allia apatre ullia ma mbed Iseghe loho-iba
7Adikȯ uso usrȯ uyo ami livin nama edio, asim ini idigbo oyo-edȯn̄ uwaa usrȯ ugbȯhȯ-ufen. 8Ene Jizȯs ȯdȯn̄ Pita ma Jȯn esan̄a anye eka etim mpȯusrȯ usrȯ ugbȯhȯ-ufen ebono enȯ imi. 9Imi ebid Jizȯs, «Ȯgwȯn̄-Etie, Avi sȯluȯn̄ȯ inyin itim mpȯ ibono ki onun̄ mbie edellia usrȯ ugbȯhȯ-ufen? 10Jizȯs ȯbrȯ imi, «Kini ifi iluk udun̄ Jeruzelem, anweni sin̄ ami obio aban̄ mmȯn̄ masan̄a adisim ifi. Ikȯn̄ anyi kede ikiluk uvȯk ami anyi adisan̄a iluk. 11Ifi idȯhȯ anye uvȯk ȯgȯ, «Ȯgwȯn̄-Etie inyin ȯdȯhȯ yak avi ȯgbȯ inyin ele asie anwi ami imi ma mbed imi iditio illia usrȯ ugbȯhȯ-ufen. 12Anye uvȯk mabe ifi enien̄ ȯnyȯn̄ akagbȯ opono epo ami ebono afidefid mpȯ ekre, etim mpȯ usrȯ ugbȯhȯ-ufen ebono ken. 13Imi eka ekekid afidefid mpȯ sighi Jizȯs ȯkȯdȯhȯ imi, imi etim mpȯ usrȯ ugbȯhȯ-ufen ebono ken.
Jizȯs allia usrȯ ugbȯhȯ-ufen ma mbed Iseghe loho-iba
14Kini adikȯ idillia ullia usrȯ ugbȯhȯ-ufen, Jizȯs ma ima aka-uto Iseghe loho-iba enien̄ eka ubed ani eketio ki opokro idillia mpȯ. 15Jizȯs ȯdȯhȯ imi, «Ekenen̄ye ȯlȯn̄ Imi utȯn̄ idillia ullia usrȯ ugbȯhȯ-ufen ma ifi pan̄ nka mbȯhȯ ufen mpe. 16Ani ndȯhȯ ifi kama andinsȯ nlia usrȯ ugbȯ-ufen ma ifi tutu senyi ala ȯnȯ ȯgbȯsu ki ukra anin̄ Ahta-Etie. 17Ene Jizȯs abe mmi ki ȯmun̄ (ȯkȯp) aka ki ubȯk, ȯkȯ Ahta-Etie. Ene Anyi ayak ȯnȯ mbed ȯdȯhȯ imi, «Ibȯhȯ mmi ami ikei kotu ifi.» 18Yak ndȯhȯ ifi, «Andinsȯ n̄wȯn̄ mfri vain ami ma ifi, tutu ukra anin̄ Ahta-Etie adi. 19Jizȯs abe uyo aka kubȯk, ȯnȯ Ahta-Etie ekȯ. Anyi epehe ayak ȯnȯ mbed Iseghe ȯgȯ, «Anyemi ani ipȯkile Ami, amewa ki ntak ifi, esan̄a enne sem edetuei Mi. 20Ukemsen, kini imi ellia mpȯ ekre, Jizȯs abe ȯmun̄ mmi ȯnȯ Ahta-Etie ekȯ, ȯdȯhȯ mbed iseghe, «Anyemi anni ȯmun̄ mmi nyafa ediomo. Nyava ediomo ami ȯtȯn̄ȯ ma ubra ami nluȯk si uwaa kufȯ ifi. 21Ani n̄ne ifi ifiak kenwi ami aditap Mi inȯ ima esughe Mi mȯkotio ma ami kemi allia mpȯ. 22Ami Oyo Anwi ma mpe sighi Ahta-Etie akaduak eban̄a mi. Ani madiȯk ȯnȯ anwi ami aditap mi inȯ ima esuehe Mi. 23Ima mbed Iseghe loho-iba etȯn̄ȯ idibid ilimi ȯgȯ, «Anen̄e kotu inyin amaduak idinne utȯ udiȯk mpȯ ani?»
Mbed efan̄a eban̄a anwi ami anni mponkie
24Ken amakogbo, ununi abak kufȯd imi aban̄a anwi aki adini mpo-nkie kotu imi. 25Ani Jizȯs ȯdȯhȯ imi, «Igwȯn̄ ulid ekra in̄wi ki mfiomo. Ima alanye imi ede ulu imi enne in̄wi enne mpȯ kuje imi, elaha eluȯn̄lȯ in̄wi ede imi si ima ȯnȯ-unwam. 26Enasi ifi ebi imi. Utuk ken, anwi ami anni alanye kotu ifi anasi abi nsuhȯde nkie. Anwi ami adinni alanye kotu ifi anasi enne mpȯ ȯnȯ in̄wi ma nsuhȯdile si anyi anni oyuvȯk. 27Nluȯn̄ȯ ifi ikre, anwi ami otio ki opokro ullia ma anwi ami abe ullia ȯsȯk anwi ki opokro, onon̄o anwi sopo-ekie? Ngȯ ani anwi ami otio ki opokro allia mpȯ. Ani ami mbak mifi si anwi ami abe ullia ȯsȯk in̄wi kopokro. 28Ifi inni imami eketu ela ma Ami ki ini idime. 29Ene Ami ma n̄nȯ ifi unen idikra si igwȯn̄ ki ukra Ami, sighi Ahta-Etie Mi ȯnȯ Mi unen idikra si Ȯgwȯn̄. 30Ene, ki ini ukra Ami, ifi millia inȯn̄ in̄wȯn̄ mpȯ ma Ami kopokro. Ifi ngo mitio ki ufim-ukra idikra efak Isuel loho-iba.
Jizȯs atan̄ aban̄a ki Pita makan̄ Imi
(Matiu 26:31-35; Mak 14:27-31; Jȯn 13:36-38)
31Ene Jizȯs ȯdȯhȯ Saimȯn Pita, «Saimȯn, Saimȯn, pan̄utȯn̄ nȯ Mi! Setan ekeben̄e idibȯhȯ ulu man anyi eken̄ ifi si ȯtȯ-ukȯ eken̄ mbokro ȯsuȯn̄ȯ ayak mpata. 32Ani Ami mbȯn̄ akam n̄nȯ fi, man avi akanye ȯbuȯdile ki Ami. Ini aki avi eliek ȯsȯbine Mi, sȯn̄ȯ ntihiyo-etie fi ile. 33Ani Saimȯn Pita ȯbrȯ Anyi, «Ȯgwȯn̄-Etie, n̄nyime idikon̄ fi ika mbȯkȯbȯ, n̄nȯn̄ mben̄e-ile idipe ki ntak Avi. 34Jizȯs ȯbrȯ, «Pita, ndȯhȯ fi ngȯ, ȯkikȯ-unnie ȯkipȯk mfin ami, avi ma akan̄ Mi ȯpe ete, kama imi ifiak Mi-o.
Mpodoho uka isan̄
35Ene Jizȯs abid mbed Iseghe, «Iniemi nki ndȯn̄ ifi ika nsehensehe udun̄ ikikurȯ edeghe etie nama ikibe epe ȯvȯn̄ ma epe ȯkuk, ma ipekuo, nsi ki ifi ikinana? Imi ebrȯ Anyi, «Inyin ikinanna mpȯ sisin̄!» 36Jizȯs ȯdȯhȯ imi, «Ani ulahami, in̄wi edisȯ in̄wam ifi-o! Ene aneki anwi ifi sisin̄ anye epe ȯvȯn̄, epe ȯkuk, yak abe. Nama unye akankan̄, seghe ȯvȯn̄ avi nye de lie. 37Siaki ndȯhȯ ifi ngȯ, ekewed ȯgȯ, «Ebad Anyi edio kotu ima abiad-ibed. Ndȯhȯ ifi ki afidefid si ima asiakuduak ekewed ki elille-nwed anin̄ Ahta-Etie eban̄a Mi magbȯsu edibukȯbuk. 38Mbed Iseghe edȯhȯ Anyi, «Ȯgwȯn̄-Etie, inyin inye akan̄kan̄ iba kem.» Anyi ȯbrȯ imi, «iba ani ȯkȯ.
Etap Jizȯs enȯ edemȯ ekegbo
(Matiu 26:36-46; Mak 14:32-42; Jȯn 18:1)
39Jizȯs ȯgbȯ asan̄a ma mbed Iseghe loho-iba aka Obod Olif sighi udȯk Iseghe asan̄a ani. 40Kini esim mbieni, Jizȯs ȯdȯhȯ mbed Iseghe, «Ibȯn̄ akam Ahta-Etie anwam utuk ki ifi inne udiȯk-mpȯ kini idime adi. 41Ani Jizȯs an̄wana alahayak imi, akatȯn̄elȯn̄ Anyi unȯsin̄ ȯbȯn̄ akam ȯnȯ Ahta-Etie. 42Anyi ȯbȯn̄ akam ȯgȯ, «Etie Mi, aneki anni uduak Avi be ȯmun̄ ufen̄ ami seghe yak mi. Mbȯk kunne si Ami nluȯn̄ȯ, ani nne si Avi ȯluȯn̄ȯ. 43Ene enjel sin̄ asie Ahta-Etie aditu Anyi ile. 44Sighi Jizȯs abak ki ȯpȯsȯn̄ mfuhȯ, Anyi akanye ȯbȯn̄ akam edehedehe. Nyiyoho ȯgbȯn̄ȯ Anyi kiile ȯtȯi ki ison̄ si ntuk ubra. 45Kini Jizȯs ȯbȯn̄ akam ekre, Anyi alahala aka mbie ami mbed Iseghe ekebono. Anyi adikid ki imi enana elile asieki mfuhȯ. 46Jizȯs atuak imi ȯzȯ ȯdȯhȯ imi, «Eni ini amanasi ifi ilile anemi! Ilaha ila ibȯn̄ akam yak Ahta-Etie anwam ifi ntuk ki ifi inne udiȯk-mpȯ kini idime adi.
Judas anwam ima esughe anin̄ Jizȯs idimȯ Anyi
(Matiu 26:47-56; Mak 14:43-52; Jȯn 18:1-11)
47Sighi Jizȯs akan̄ye atan̄ n̄sen̄e ma mbed Iseghe, otu-in̄wi edisim nen. Judas ami akeni sin̄ kotu mbed loho-iba ede imi adeghe. Judas Iskariȯd asan̄a adiana Jizȯs aditam Anyi mfuk ki ido ekȯ. 48Ani Jizȯs ȯdȯhȯ anyi, «Judas Iskariȯd, Ami mfuhȯ etieti siaki avi ede ntam inue ekȯ fi atap Mi Oyo Anwi. 49Kini mbed anin̄ Jizȯs enye ifiȯk eban̄a sȯluȯn̄ȯ iditibe inȯ Jizȯs, imi ebid Anyi, «Ȯgwȯn̄-Etie, ndi inyin ide akankan̄ inyin in̄wana ma imi?» 50Ani mbed anin̄ Jizȯs sin̄ aseghe akankan̄ epehe oyuvȯk anin̄ ata opono ȯgu sin̄ utȯn̄ ulo. 51Ani Jizȯs ȯdȯhȯ mbed Iseghe, «Itre! Ikinne sen-o! Anyi abe utȯn̄ anwi ani adian. 52Jizȯs ȯdȯhȯ ima ipono igu, ma ima apime Obio anin̄ Ahta-Etie, ma ipono in̄wi udun̄ ami ekedi idimȯ Anyi, «Ifi ifiak kama Ami anni inȯ, ani ifi isan̄a ma akankan̄, ma ȯpun̄ ededi idimo Mi. 53Nki mbak ma ifi ki Obio anin̄ Ahta-Etie afidefid uso mpiek mpȯ, ani ifi ikikime idimȯ Mi. Ani ini ifi anem, ami setan ede ulu ekim akra uwem ifi.
Pita akan̄ Jizȯs
(Matiu 26:69-75; Mak 14:66-72; Jȯn 18:13-18,25-27)
54Kini imi emȯ Jizȯs, imi ede Anyi eka uvȯk ata opono ȯgu. Ani Pita asan̄a nsense ȯkȯn̄ imi kede. 55Ki uvȯk opono ȯgu, ubiak in̄wi edio ukan̄ ki esen̄e-mvak etuak etio ewei. Pita ngo akatio ma imi ewei ukan̄. 56Ȯfȯn anwin̄wa sin̄ ami aka Pita anye akid anyi sighi otio ma in̄wi ewei ukan̄. Anyi enen̄ede ase Pita anye, ȯdȯhȯ in̄wi ami eketio nen, «Anwemi anni sin̄ kotu imami ekebak ma Jizȯs! 57Pita ȯbrȯ, «N̄ne, avi ȯsuȯzu! Ami ekenenne amfiak Anyi.» 58Kuyo ini amakogbo, onun̄ anwi akid Pita ȯnȯn̄ ȯdȯhȯ anyi, «Avi ngo anni sin̄ kotu imi. Ani Pita ȯbrȯ anyi, «Nda, enni ami-o! 59Ki ufan̄ awa sin̄ amakogbo, onun̄ anwi adizȯn̄ȯ ȯgȯ, «kapanikwȯ avi akabak ma Anyi, siaki avi anni sin̄ kotu in̄wi Galilii.» 60Ani Pita ȯbrȯ anyi, «Nda, ami amfiak si avi atan̄ aban̄a. Sighi Pita ȯbrȯ imi nsen̄e, ȯkikȯ-unnie ȯpȯk. 61Kukem ini ani, Ȯgwȯn̄-Etie eliek anye ase Pita. Ene Pita etuei si Jizȯs akatan̄ ȯnȯ anyi ȯgȯ, «Avi makan̄ Mi ȯpe ete pan̄ ȯkikȯ-unnie ȯpȯk ki mpȯ uzie. Avi madȯhȯ in̄wi ngete kama imi ifiak Mi.» 62Kini Pita etuei, anyi ȯgbȯ ki uvȯk esȯp akala ki esen̄e abai-eje ma mbuȯn̄ȯ azid.
Ima apime Obio anin̄ Ahta-Etie ede Jizȯs edȯn̄ ndȯk
(Matiu 26:67,68; Mak 14:65)
63Ene in̄wekun̄ ami ekepime Jizȯs ede Anyi edȯn̄ ndȯk, elaha emgbai Anyi. 64Imi egbȯ Anyi ubiak ȯvȯn̄ kenye edȯhȯ Anyi ȯgȯ, «Siak nȯ inyin anwi ami atuak fi.» 65Imi ekanye etan̄ udiȯk nsen̄e edian Jizȯs.
Ima alanye Juu ebid Jizȯs mbid
(Matiu 26:57-68; Mak 14:61-64; Jȯn 18:12-14,19-24)
66Kini eje azie, afidefid ipono in̄wi udun̄, ipono igu, ma ima epiek ibed edibono mbie sin̄. Ene, ede Jizos edi ki uvȯk-esop imi. 67Ene imi ebid Anyi, «Dȯhȯ inyin ise! Avi anni Krais?» Jizȯs ȯbrȯ imi, «Aneki ndȯhȯ ifi keni Ami n̄ni Anyi, ifi idinim si Ami ntan̄. 68Aneki Ami nkȯn̄ mbid ifi mbid mban̄a Krais, ifi idibrȯ mi-o. 69Ani ki uyuyo ini, Ami Oyo Anwi ma ntio ki mbie upono kubȯk-ulo ulu anin̄ Ahta-Etie. 70Ene afidefid imi ebid Jizȯs, «Avi anni Oyo anin̄ Ahta-Etie?» Jizȯs ȯbrȯ imi, «Ifi itan̄ n̄nenen ki inue ifi.» 71Imi edȯhȯ kotu ilimi ȯgȯ, «Inyin ide utȯn̄ inyin igie si Anyi atan̄ aban̄a ile Iseghe, ndi ufȯ ȯsȯbak inyin idiluȯn̄ȯ ntiontin?»
Currently Selected:
Liuk 22: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
