Liuk 19
19
Jizȯs aka uvȯk anin̄ Zakiȯs
1Ken amakogbo, Jizȯs ma mbed Iseghe esan̄a ediluk udun̄ Jeriko. Imi esan̄a egbo ki isȯn̄ udun̄. 2Anwi ami ekekre Zakiȯs akabak nen. Anyi akeni alanye kotu ima ȯbȯhȯ utib ami akenye unye etieti. 3Anyi ȯkȯluȯn̄ȯ idikid nsutȯ anwi ami Jizȯs anni, ani awikiwak in̄wi ekesan̄a ma Jizȯs. Anyi akenni upok anwi, ntak ani enne anyi ekime idikid Jizȯs ki n̄tak otu-in̄wi. 4Ani enne anyi abiak ogbo otu-in̄wi anye akanien̄ atitie ami ekuo sikamȯ man anyi akime idikid Jizȯs siakana Jizȯs asan̄a ogbo nen. 5Kini Jizȯs asan̄a adisim atak atitie ami Zakiȯs okoduo, adiaha anye ase ȯnyȯn̄ ȯdȯhȯ anyi, «Zakiȯs, wura tehedi ulahami, siaki ndi mbak kuvȯk avi si asienwi mfin. 6Ene Zakiȯs etehedi inisin̄inisin̄ adisan̄a ma Jizȯs aka uvȯk iseghe ma uniezid. 7Kini otu-in̄wi ekid sighi Jizȯs aka uvȯk anin̄ Zakiȯs imi etȯn̄ȯ idikȯn ȯgȯ, «Anyi aka ididio ki uvȯk anin̄ enne udiȯk-mpȯ.» 8Pasuk uson, Zakiȯs alahala ki anye otu-in̄wi ȯdȯhȯ Jizȯs, «Ȯgwȯn̄-Etie, n̄ne fi afiak ki ami manyak mbahade iba unye mi n̄no ima ugbo. Imami n̄ki mbȯhȯ utib nwak nkie samana mbȯhȯ imi, mansȯnyak nnȯ imi utim n̄kenian̄. 9Ene Jizȯs ȯdȯhȯ anyi, «Mfin ami, Ahta-Etie anyan̄a fi ma uvȯk avi, siaki avi ȯkȯn̄ anni oyo ubon anin̄ Ebraham. 10Ani Ami Oyo Anwi, ndi oduobod man enyan̄a imami ekewiaha ayak ȯpȯdeghe anin̄ Ahta-Etie nlaha nyan̄a imi nseghe ki nsinsi ufen udiȯk-mpȯ imi.
Ebetȯ nsen̄e ami aban̄a iyuvȯk ite
(Matiu 25:14-30)
11Sighi in̄wi epan̄utȯn̄ enȯ Jizȯs, Anyi akanye atan̄ nsen̄e ki ebetȯ ȯnȯ imi siaki Anyi akepine idisim udun̄ Jeruzelem, ene in̄wi ekre ki ukra anin̄ Ahta-Etie mȯkeditȯn̄ȯ inisin̄inisin̄ kini Jizȯs ȯluk udun̄ Jeruzelem. 12Jizȯs ȯdȯhȯ imi, «Ata ȯgbȯ-anye anwi aketim ile aka ȯnyȯn̄ȯdeghe udun̄ idikibȯhȯ Adidem unen idini ȯgwȯn̄ ki udun̄ iseghe. Kini anyi ȯbȯhȯ unen ekre mayȯn̄ adikra udun̄ iseghe. 13Kini anyi adilaha, anyi okuo iyuvȯk iseghe loho ȯnȯ imi nsip ȯkuk silva loho, sin̄ kille anwi. Anyi ȯdȯhȯ imi, «Ide ibin mbibene inim uduo inȯmi tutu nyȯn̄ ndi. 14Ani ubiak in̄wi udun̄ imi ekesughe anyi etieti. Ene imi eseghe in̄wi edȯn̄ esan̄anye ekedȯhȯ Adidem ani ȯgȯ, «Inyin iluȯn̄ȯ anwi ami akra inyin-o. 15Ani ekenne ȯgbȯ-anye anwi ani ȯgwȯn̄, anyi ȯnyȯn̄ȯdi si n̄yava ȯgwȯn̄ imi. Ene, anyi ȯluȯn̄ȯ idifiak ȯkuk ifan̄ ami iyuvȯk enwana enim enȯ anyi. Anyi okuo iyuvȯk ami anyi ȯkȯnȯ ȯkuk edinne ibad mbibene enȯ imi. 16Apa oyuvȯk adidȯhȯ anyi, «Ȯgwȯn̄, nye uduo ȯkuk loho ndian ki ȯkuk sin̄ ami avi ȯkȯnȯ mi.» 17Ȯgwȯn̄ ani ȯbrȯ anyi, «Avi enne eje edeghe oyuvȯk. siaki avi enne apanikwȯ ki uyo ȯkuk, n̄nȯ fi unen idikra udun̄ loho. 18Ene oyuvȯk iba adidȯhȯ anyi, «Ȯgwȯn̄, ȯkuk sin̄ ami avi ȯkȯnȯ mi nsȯnye uduo ȯkuk itin̄ ndian.» 19Ȯgwȯn̄ ȯbrȯ anyi, «Avi anni edeghe anwi, n̄nȯ fi unen idikra udun̄ itin̄. 20Ene oyuvȯk ite asan̄a adidȯhȯ anyi, «Ȯgwȯn̄, bȯhȯ ȯkuk avi. N̄ki mbe mfȯd ki ȯvȯn̄ n̄lip n̄nim ki ntitun̄.» 21Udulan̄a ȯkȯmȯ mi aban̄a fi siaki mfiak ki avi anni otuitu anwi. Avi asan̄a abe mpȯ ki mbie ami nama ukunim, ȯbuȯ ki ukȯ ami nama ukutȯ. 22Ȯgwȯn̄ ani ȯbrȯ anyi, «Avi oyuvȯk ibak! ma nde si ȯgbȯ fi ki inue mpe ipe n̄no fi, avi kiile fi ȯdȯhȯ ki inue fi kemi n̄ni otuitu anwi, nsan̄a n̄bȯhȯ in̄wi mpȯ ki n̄kiubȯk, mbuȯ ki ukȯ ami nama ȯnkȯntȯ. 23Aneki avi akafiak sen, nsi enne nama avi ukube ȯkuk amii ukudio ki uvȯk unim ȯkuk, kemi nyȯn̄ ndi ami, mmi mbȯhȯ ȯkuk ami ima uduo. 24Ȯgwȯn̄ ani ȯdȯhȯ in̄wi amekela epine ȯgȯ, «Ebȯhȯ udiȯk oyuvȯk ani ȯkuk edian enȯ oyuvȯk ami akebin mbibene anye ȯkuk loho. 25Ani imi ebrȯ anyi, «Ȯgwȯn̄, anyi anyenye nsip ȯkuk silva loho! 26Anyi ȯbrȯ imi, «Ndȯhȯ ifi ngȯ, Ahta-Etie ma adian unye ȯnȯ anwi ami enne apanikwȯ ki si enȯ anyi ase mpȯ aban̄a, ani anwi ami nama anwi ekime idinim anyi ki apanikwȯ, ma ebȯhȯ anyi uyo si anyi anye edian enȯ anwi ami anye mpȯ awak. 27Ani amani ima esughe mi ami nama ekeluȯn̄ȯ mi n̄ni ȯgwȯn̄ imi, etan̄ imi edipi ewod kenye mi.»
Jizȯs ȯluk udun̄ Jeruzelem si Ȯgwȯn̄
(Matiu 21:1-11; Mak 11:1-11; Jȯn 12:12-19)
28Jizȯs amakatan̄ n̄sen̄e ekre, anyi alaha asan̄a ma mbed Iseghe enien̄ aka udun̄ Jeruzelem. 29Sighi Anyi asan̄a apine udun̄ Bethphage ma Betani, ami apine Obod Olif, Jizȯs okuo mbed Iseghe iba ȯdȯhȯ imi, 30«Ika udun̄ anala ifi kenye ani. Kini isim ken, mikid enan̄-ukisan̄ ami etuo eyid nen. Anwi sisin̄ ekenenne egbe anyi ekisan̄. Itra anyi isȯk Mi. 31Aneki anwi sisin̄ abid ifi ȯgȯ, «Nsi ene ifi itra anyi?» Idȯhȯ anyi ȯgȯ, «Ȯgwȯn̄-Etie ȯluȯn̄ȯ anyi idigbe.» 32Ene mbed ami Jizȯs ȯkȯdȯn̄ uto eka udun̄ ani ekekid afidefid mpȯ sighi Jizȯs ȯkȯdȯhȯ imi. 33Sighi imi ela etra enan̄-ukisan̄ ani, ima anyinye edibid senne imi etra anyi. 34Imi ebrȯ, «Ȯgwȯn̄-Etie ȯluȯn̄ȯ anyi idigbe.» 35Ene mbed ede enan̄-ukisan̄ ani esȯk Jizȯs. Imi ȯvȯn̄ȯ ȯvȯn̄ imi etra kȯnyȯn̄ enan̄, ediaha Jizȯs ete. 36Sighi Jizȯs egbe idikiluk Jeruzelem. In̄wi evȯn̄ȯ ȯvȯn̄ imi ebid ki ȯpȯdeghe idipono Anyi. 37Sighi Jizȯs egbe aka, Anyi adisim mbie ami ȯpȯdeghe akwiaha aka Obod Olif ami edekasim Jeruzelem. Afidefid otu mbed Iseghe etȯn̄ȯ idipȯk itro Ahta-Etie ki ikwȯ idra aban̄a afidefid ima utibe-mpȯ ami imi ekid Jizȯs enne. 38Imi epȯk ȯgȯ, «Ȯfȯfȯ ȯnȯ ȯgwȯn̄ ami adi ma ulu anin̄ Ahta-Etie. Yak emem abak ma Ahta-Etie ki ȯnyȯn̄.» 39Ubiak ima Farisi ekebak ki otu-in̄wi. Imi edȯhȯ Jizȯs, «Ȯgwȯn̄-Etie, dȯhȯ yak otu mbed avi ukusȯ utan̄ ima nsen̄e ani.» 40Jizȯs ȯbrȯ imi, «Yak n̄dȯhȯ ifi, aneki mbed Ami etre iditro Mi, ima utai mepȯk upekun̄ etrȯ Mi.
Jizȯs ȯfuhȯ aban̄a Jeruzelem
41Kini Jizȯs apine udun̄ Jeruzelem ȯnȯn̄ ala akid udun̄, Anyi ȯtȯn̄ȯ idifuhȯ iban̄a udun̄ Jeruzelem ma in̄wi ami edun̄ ki anyi. 42Jizȯs ȯdȯhȯ, «Ifi in̄wi Jeruzelem, emedȯhȯ ki in̄wi ifi efiak si adide emem isȯk ifi mfin! Ani kemi, ifi ikime idifiak anyi. 43Ani edibukȯbuk ifi mikid uso ukud. Ima esughe ifi mekan ifi ekuk elaha egbȯ ȯkȯh ekan ifi ekuk, ene anwi edi igbȯgbȯ, inȯn̄ ilukȯluk udun̄ ifi. Imi mewana ma ifi ki afidefid adeghe.
44Imi megab udun̄ ifi elaha ewod afidefid in̄wi ifi enȯn̄ esȯk ifi ki isȯn̄. Imi mewuri ufȯk ma ȯkȯh ifi fafab. Siaki nama ifi ikifiak ini ami Ahta-Etie akedi idinyayan̄a ifi.
Jizȯs abine ima enye udue ȯsuȯn̄ȯ ki Obio anin̄ Ahta-Etie
(Matiu 21:12-17; Mak 11:15-19; Jȯn 2:12-25)
45Ene Jizȯs ȯluk etehe Obio anin̄ Ahta-Etie ȯtȯn̄ȯ idibine in̄wi ami ekenye ima atak-nze ma mpȯ imaki isun̄ȯ. 46Jizȯs ȯdȯhȯ imi, «Ekewed ȯgȯ, Obio anin̄ Ahta-Etie adini mbie ubȯn̄ akam, ani ifi iliek anyi inne mbie ami inȯ elibe.» 47Jizȯs akanye epiek mpȯ ki Obio anin̄ Ahta-Etie afidefid uso. Ani ima ipono igu, ma ima epiek ibed, ma ima ipono in̄wi udun̄ eluȯn̄ȯ avan̄ idigbo Anyi. 48Ani imi ekid adeghe sisin̄, siaki otu-in̄wi ekenen̄ede epan̄utȯn̄ idigie upiek-mpȯ Iseghe.
Currently Selected:
Liuk 19: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
