Liuk 18
18
Ebetȯ nsen̄e ami aban̄a Ebie-upe ami otu-ayre
1Ken amakogbo, Jizȯs atan̄ nsen̄e ki ebetȯ ȯnȯ mbed Iseghe kanasi imi ebȯn̄ akam afidefid ini ukupe-mba. 2Anyi ȯdȯhȯ imi, «Anye abiripe sin̄ ami akabak ki udun̄ sin̄. Anyi ekebiak Ahta-Etie enȯn̄ epono in̄wi idi ibiom. 3Ebie-upe sin̄ akabak ki udun̄ ani ngo. Anyi asan̄a akabine abiripe akape anyi ubȯk ȯgȯ, «Bire unen ipe nȯ mi ma esughe imi.» 4Abiripe, abe anye ase anyi abeseghe. Ani kini ubiak ini ogbo, abiripe ani ȯdȯhȯ ki azid iseghe ȯgȯ, «Ani apanikwȯ kama mi ambiak Ahta-Etie ȯnȯn̄ ompono in̄wi, 5ani siaki anwinwa ami asan̄a afana mi, ma mbire ipe iseghe nnȯ anyi man anyi etre idisidi fana mi.» 6Ȯgwȯn̄-Etie Jizȯs ȯdȯhȯ, «Ikre iban̄a si ukuan̄ ibiom atan̄. 7Aneki ukuan̄ anwi akime idinwam anwi, ifi ikre ki Ahta-Etie manȯ in̄wi ami Anyi emek unen imi, kini imi eben̄e Anyi afidefid ini? 8Ndȯhȯ ifi ki Ahta-Etie mawra adinne sȯfȯ ȯnȯ in̄wi Iseghe. Ani kini Ami Oyo Anwi ndi nsȯndi oduobod, ma nkid in̄wi ami enim mi kapanikwȯ?»
Ebetȯ nsen̄e ami aban̄a anwi Farisi ma ȯbȯhȯ utib
9In̄wi ekebak ami ekebuȯdile ki enininen udȯk imi. Imi ekese afidefid in̄wi ki mbio. Jizȯs atan̄ nsen̄e ki ebetȯ ȯnȯ imi. 10Anyi ȯdȯhȯ, «Uso sin̄, in̄wi iba ekeka Obio anin̄ Ahta-Etie ki udun̄ Jeruzelem idi ibȯn̄ akam. Anwi sin̄ akeni Farisi. Anwi anyeki anni ȯbȯhȯ utib. 11Anwi Farisi alahala ȯbȯn̄ akam aban̄a iliseghe ȯgȯ, «Ahta-Etie, nkȯ fi siaki ami nama ani enne udiȯk-mpȯ si in̄wi imaki. Anni inȯ, anni anwi unana apanikwȯ, ȯnluk-ulȯ. Ami ȯnȯn̄ anla si nda ȯbȯhȯ utib aki. 12Ami ntio utruullia nkeba ki udue, n̄nȯ ubiak sin̄ ki mpȯ loho ki afidefid unye mi.» 13Ani ȯbȯhȯ utib adiala nsense ayak in̄wi, ȯsu anye kisȯn̄ ki nsuhȯdile, Ediaha anyeki ipe-ȯnyȯn̄ oduo ubȯk iba ki azid idigbȯ ki imi ikabadezid iyak udiȯk mpȯ imi. Anyi ȯdȯhȯ, «Mbȯk, Ahta-Etie, ami n̄ni udiȯk anwi. Mben̄e fi anye mbȯm aban̄a mi alaha efen ȯnȯ mi!» 14Ndȯhȯ fi ki ȯbȯhȯ utib ȯnyȯn̄ uvȯk si anwi ami Ahta-Etie efen-ȯnȯ ani Farisi ebȯhȯ mfen n̄nȯ. Ide ami ifiak ki anwi aki abille iseghe ki ȯnyȯn̄ mesuhȯde anyi, ani anwi aki ȯsuhȯde ile iseghe, mebe anyi kȯnyȯn̄.»
Jizȯs ȯdiȯn̄ nyiyon̄ ntihiyo
(Matiu 19:13-15; Mak 10:13-16)
15Uso sin̄ in̄wi etan̄ ntihiyo imi edi man Jizȯs oduo imi ubȯk ȯdiȯn̄ imi. Kini mbed Iseghe ekid, imi edȯhȯ ima ekie ma etie etan̄ iyo imi enyȯn̄. 16Ani Jizȯs okuo ntihiyo ȯnȯ iliseghe. Anyi ȯdȯhȯ mbed Iseghe ȯgȯ, Iyak ntihiyo edi ekȯn̄ mi ikipan imi, siaki ukra anin̄ Ahta-Etie ana ȯnȯ ima ami eduonye ki Ahta-Etie si ntihiyo. 17Apanikwȯ ki n̄dȯhȯ ifi, anwi aki nama esuȯhȯde iliseghe ebȯhȯ ukra anin̄ Ahta-Etie si uyetȯ, anyi edibuana ki ukra Iseghe.
Sehekime inye nsinsi uwem
(Matiu 19:16-22; Mak 10:17-22)
18Ȯgbȯnye anwi Juu sin̄ adibid Jizȯs, «Ȯgwȯn̄-Etie, Avi anni edeghe etiubo. Nsi kanasi n̄ne man nye nsinsi uwem?» 19Ani Jizȯs ȯbrȯ anyi, «Ebak anwi aki anni edeghe kogboyak Ahta-Etie anyunȯ. 20Avi afiak ibed anin̄ Ahta-Etie, kuluk-ulȯ, kugbo-anwi, kuyip-inȯ; kusu-nsu udian anwi, nȯ etie fi ma ekie fi upono. 21Anyi ȯdȯhȯ Jizȯs, «Ami nki n̄nim afidefid mbed ami tȯn̄ȯde ki ini ami nkinni ulap-oyo.» 22Kini Jizȯs agie si anyi atan̄, ȯdȯhȯ anyi, «Mpȯ sin̄ onun̄ mȯkȯsuȯhȯ avi idinne. Nyee afidefid unye avi be ȯkuk ani kei nȯ ima ugbo. Aneki enne sen, Ahta-Etie manȯ fi unye ki ȯnyȯn̄. Ene avi kȯn̄ Mi dini mbed Ami. 23Kini Jizȯs atan̄ sen ekre, anyi ȯfuȯhȯ etieti, siaki anyi akenye ata awikiwak unye ekenȯn̄ eluȯn̄ȯ idinye mpodoho iseghe.
Ma Ahta-Etie, afidefid mpȯ ammie-ile
(Matiu 19:23-30; Mak 10:23-31)
24Jizȯs abe anye ase anyi ȯdȯhȯ mbed Iseghe, Anni ata otuile mpȯ in̄wi unye idiluk ukra anin̄ Ahta-Etie. 25Sighi otuile enan̄-mbio idigbo ki unwan̄ abiabin ukem sen kotuile anwi unye idiluk ukra anin̄ Ahta-Etie. 26Kini otu-in̄wi egie si Anyi atan̄, imi ebid Anyi, «Onon̄o edi enyan̄a?» 27Ani Jizȯs ȯbrȯ imi, «Ima mpȯ ami otu in̄wi ile idinne, ma Ahta-Etie ammie-ile. 28Ene Pita ȯdȯhȯ Jizȯs, «Tuei ki inyin ikilaha iyak afidefid mpȯ idikȯn̄ fi man asie ken inni mbed Avi. Menyan̄a inyin? 29Jizȯs ȯbrȯ, «Kapanikwȯ, ndȯhȯ ifi ki anwi sisin̄ ami asa uvȯk iseghe ayak, asa nwa, nyekie, etie ma ekie, ma iyo ayak ki ntak ukra anin̄ Ahta-Etie, 30kapanikwȯ, anyi mabȯhȯ afidefid mpȯ awak ekie si akatak anyi ki oduobod ami alaha ȯbȯhȯ nsinsi uwem ngo.
Jizȯs atan̄ aban̄a mpe ma asidized Iseghe ene ȯpe ete
(Matiu 20:17-19; Mak 10:32-34)
31Ken amakogbo, Jizȯs okuo mbed Iseghe loho-iba adiala ayak otu-in̄wi ȯdȯhȯ imi, «Ipan̄utȯn̄! Inyin mȯkika udun̄ Jeruzelem. Sighi inyin idibak nen, afidefid ima mpȯ si ima asiakuduak ekewed eban̄a Mi, Oyo Anwi ki ȯnyȯn̄ȯdeghe ini magbȯsu. 32Ima Juu meyak mi enȯ ima ulid. Imi memana Mi imee, mesȯn̄ȯ Mi n̄nen̄e, metȯ Mi iteh, ma emgbai Mi ki ipe elaha egbo Mi. 33Ani ki ȯyȯhȯ uso ite, Ami ma nzed ki mpe. 34Kini Jizȯs atan̄ sen, mbed Iseghe ekȯd efiak si nsen̄e Iseghe ȯgbȯ. Ekebe si nsen̄e Iseghe ȯgbȯ elip imi, ene nsen̄e Iseghe ekenwan̄a imi.
Jizȯs enne ujee ȯmuȯn̄ȯ mpȯ
(Matiu 20:29-34; Mak 10:46-52)
35Sighi Jizȯs ma mbed Iseghe esan̄a epine udun̄ Jeriko, anwi ujee (n̄nan) sin̄ otio ki n̄dek ȯpȯdeghe eben̄e in̄wi ȯkuk. 36Kini anwi ujee ani agie uyom otu-in̄wi amesan̄a egbo anyi, anyi abid in̄wi ami ekela ebana anyi, «Nsi setibe?» 37Imi edȯhȯ anyi, «Jizȯs amesie udun̄ Nazared asan̄a ogbo.» 38Kini anwi ujee ani agie sen, anyi ȯtȯn̄ȯ idipȯk kotuitu uje, «Jizȯs, oyo ubon anin̄ ȯgwȯn̄ Devid nye mbȯm ban̄a mi! 39Imami ekesan̄a anyenye epan anyi ȯgȯ, «Kap inue; tre upekun̄! Ani anyi atamatam ȯpȯk ki otuitu uje, «Jizȯs, oyo ubon anin̄ Devid nye mbȯm ban̄a mi! 40Kini Jizȯs agie uje iseghe, Anyi atuakala ȯnȯ uje yak emȯ anyi esȯk imi. Kini anwi ujee (n̄nan) asan̄a apine, Jizȯs abid anyi, 41«Nsi kȯluȯn̄ȯ mi n̄ne n̄nȯ fi? Anyi ȯbrȯ, Ȯgwȯn̄-Etie, nluȯn̄ȯ fi enne mi nsȯ mmuȯn̄ȯ mpȯ.» 42Ene Jizȯs ȯdȯhȯ anyi, «Sȯmuȯn̄ȯ mpȯ! Mbuȯdile ami avi anye kille Mi enne anyan̄a fi. 43Inisin̄inisin̄, anwi ujee (n̄nan) ȯsȯmuȯn̄ȯ mpȯ. Anyi ȯtȯn̄ȯ idisan̄a ikȯn̄ Jizȯs, otro Ahta-Etie. Kini otu-in̄wi ekid setibe ȯnȯ anyi, imi ngo ekȯn̄ ekȯ Ahta-Etie.
Currently Selected:
Liuk 18: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
