Liuk 17
17
Adidi ukra
(Matiu 18:6,7; Mak 9:42)
1Ene Jizȯs ȯdȯhȯ mbed Iseghe ȯgȯ, «Idime ami enne in̄wi etuboho ma Ahta-Etie masan̄a abak. Ani madiȯk ȯnȯ anwi ami adidime onun̄ anwi man anyi enne udiȯk-mpȯ. 2Amakam ȯfȯ ma utȯ anwi ani kini ebe ata opono utai eyid anyi kutȯn̄ etiedio ki apa, ekie anyi idinne sin̄ kotu ani ima ami enim Mi kapanikwȯ ȯduȯhȯ ȯluk udiȯk-mpȯ. 3Ene, ipime sighi ifi idu-wem. «Aneki anwi ami anim Mi kapanikwȯ enne udiȯk-mpȯ, suehe nȯ anyi. Aneki anyi akabadezid, efen enȯ anyi. 4Ȯnȯn̄ede ani si anwi ami anim Mi kapanikwȯ enne fi udiȯk-mpȯ nketan̄aba kuso sin̄, aneki anyi adipe fi ubȯk, anasi efen ȯnȯ anyi.
Mbuȯdile ma Uto
(Matiu 17:19-21; Mak 9:28,29)
5Enne ima aka-uto Iseghe loho-iba edȯhȯ Anyi Ȯgwȯn̄-Etie Jizȯs, «Mbȯk n̄ne mbuȯdile in̄yin opo. 6Ani Jizȯs ȯbrȯ, «Aneki ifi inye mbuȯdile ami anii si usip ntinyun̄, ifi ikime idȯhȯ ata opono atak ukim ȯgȯ, «Die ma ȯliȯn̄ ka duȯhȯ ki apa, ma atibe ki uje ifi. 7Jizȯs ȯsȯdȯhȯ imi, «Aneki anwi sin̄ kotu ifi amenye oyuvȯk ami enne uto ki ukȯ nemepime edȯn̄ ȯnȯ anyi. Kini anyi ȯnyȯn̄ adi, ndi avi madȯhȯ oyuvȯk ani aditio ki isȯn̄ allia mpȯ?» 8Utuk ken, adidȯhȯ oyuvȯk avi, «Nne ullia nȯmi! Dȯn̄ȯ ȯvȯn̄ avi ami elee dila tutu nlia mpȯ nkre pan̄ akallia akevi. 9Ndi avi ma ȯkȯ anyi kini anyi enne si avi ȯkȯdȯhȯ anyi ekre? Ukime ikȯ! 10Ukem sen kenni ma ifi; kini ifi inne si Ahta-Etie ȯdȯhȯ ifi inne ikre, anasi ikre ȯgȯ, «Inyin inni iyuvȯk, inyin ido sekȯ-o, siaki inyin inne ubiȯn̄uto inyin.»
Nye azid ekȯ
11Sighi Jizȯs asan̄a ma mbed Iseghe aka udun̄ Jeruzelem, imi esan̄a egbo ki ipe Sameria ma ipehe Galilii. 12Kini imi esan̄a epine udun̄ sin̄, in̄wi apamvia loho ediebine Jizȯs. Ani imi etuakela nsense. 13Imi epȯk ekuo anyi kotuitu uje, Jizȯs, Ȯgwȯn̄-Etie inyin; nye mbȯm ban̄a inyin, kȯk inyin ulȯn̄ȯ.» 14Jizȯs adiaha anye atin imi ȯdȯhȯ, «Ika ibine ȯgu ki udun̄ Jeruzelem man imi etin ifi ile ni ulȯn̄ȯ ifi ekre kapan. Sighi imi esan̄a eka ki ȯpȯdeghe idikid igu, Ahta-Etie enne ulȯn̄ȯ apamvia imi ekre. 15Afidefid imi ekid ki ulȯn̄ȯ imi ekre, ani anwi sin̄ kotu imi eliek ȯsȯkȯn̄ Jizȯs, ȯpȯk upekun̄ aniesid ȯkȯ Ahta-Etie ami ȯnȯ anyi ntu-ile. 16Anyi adi tȯn̄elȯn̄ ki upono ȯnȯ Jizȯs alaha ȯkȯ anyi. Anwi sin̄ ani akeni oyo Sameria. 17Jizȯs ȯdȯhȯ imami ekebak ma Anyi, «Ahta-Etie ȯkȯkȯk in̄wi apamvia loho. Nsi enne nama in̄wi itan̄anian̄ aki edikȯ Ahta-Etie? 18Ani anwi sin̄ prepre kotu in̄wi loho adikȯ Ahta-Etie. Ile anwi sin̄ ani enni oyo Juu.» 19Ani Jizȯs ȯdȯhȯ anyi, «lahala nyȯn̄. Avi akenim Ahta-Etie kapanikwȯ ani enne fi ede enyan̄a.
Jizȯs epiek mpȯ aban̄a ukra anin̄ Ahta-Etie
20Uso sin̄, ima Farisi ebid Jizȯs ȯgȯ, «Ukra anin̄ Ahta-Etie sedidi mbȯn̄ onun̄?» Jizȯs ȯbrȯ, «Utibe-mpȯ edibak in̄wi idifiak mbȯn̄ ami ukra anin̄ Ahta-Etie adidi-o. 21In̄wi edidȯhȯ, se! «Anyi mȯkabak kemi, mȯkabak ki n̄kan̄ aki, siaki ukra anin̄ Ahta-Etie mȯkabak ki ufȯd ifi. 22Ene Jizȯs ȯdȯhȯ mbed Iseghe, «Ini mȯkedi ami ifi idiluȯn̄ȯ idibak ma Ami Oyo Anwi ile uso sin̄ kini nde ukra ani idikȯd. 23Ki ima uso ani, in̄wi medȯhȯ ifi, «Sese, Krais mȯkabak kemi, Anyi mȯkabak keki, Ikikȯn̄ imi ika, ikinȯn̄ inim imi kapanikwȯ, bak puk akabak. 24Siaki Ami Oyo Anwi ma ndi kedeghe ami in̄wi edikid si emineminen̄ ami enne afidefid ȯnyȯn̄ elee kini anyi adi. 25Ani anyeni ȯkitibe, anasi mbȯhȯ ufen etieti in̄wi emana anyemi elaha ezin mi. 26Ituei seketibe ki ejeh anin̄ Nua pan̄a ukwȯ akedi. Adila sen pan̄a Ami oyo anwi nsȯ ndi oduobod. 27Pan̄ ukwȯ akedi, in̄wi mȯkedu uwem imi sighi ido asan̄a anni, in̄wi ellia mpȯ elaha enwȯn̄ mpȯ. In̄wi kellȯ nlȯ, ubiak in̄wi kebe iyo imi enȯ nlȯ tutu asim uso ami Nua ma ufȯk iseghe ekeluk ubo edim edetȯn̄ȯ ididie tutu ede mmȯn̄ ukwȯ osobo afidefid oduobod ȯnȯn̄ owod in̄wi ami nama ekedȯn̄ȯ ki ubo. 28Ukem ani ngo aketibe ki ejeh anin̄ Lȯd. In̄wi kudun̄ Sȯdȯm, ekedu uwem imi sighi ido asan̄a anni. Ellia mpȯ elaha enwȯn̄ mpȯ, ubiak in̄wi kenye udue, ubiak kelen̄e mpȯ ki udue, ubiak in̄wi ketȯ mpȯ kukȯ, ubiak kegbȯ uvȯk. 29Ani kuso ami Lȯd ma uvȯk iseghe egbeyak udun̄ Sȯdȯm, ukem uso ani, ukan̄ itai adie sedim ki ipe-ȯnyȯn̄ ȯdȯn̄ȯ kudun̄ ata afidefid udun̄ ma in̄wi ki ȯvȯhȯ owod ekre. 30Adila sen ki uso ami Ami Oyo Anwi ndinsȯ ndi. Adinni ki ini ami in̄wi nama ekenye uduonye. 31Kuso ani, anwi ami oduo kȯnyȯn̄ ȯkikȯ, yak anyi ukutehe uka idibe mpȯ ki ȯvȯhȯ uvȯk. Anwi ami odio kukȯ, yak ukunyȯn̄ udi uvȯk. 32Etuei seketibe ȯnȯ n̄wa anin̄ Lȯd! 33Anwi ami ȯluȯn̄ȯ idinyan̄a uwem iseghe mataba upȯn̄, ani aneki anwi ayak uwem iseghe ki ntak ami anyi anni mbed Ami made nsinsi uwem anye. 34Ndȯhȯ fi ngȯ kini ndinsȯ ndi, in̄wi iba mena ki mpana sin̄, Ahta-Etie mabe anwi sin̄ alahayak anwi sin̄. 35Mmani iba mela ekȯk mbokro, Ahta-Etie mabe anwi sin̄ alahayak anwi sin̄. 36N̄nini iba medio kukȯ nte, Ahta-Etie mabe anwi sin̄ alahayak anwi sin̄. 37Imi edȯhȯ Anyi, «Konun̄, Ȯgwȯn̄-Etie?» Anyi ȯbrȯ imi, «Ubie ami opo mpȯ ana ki ima utehelei esan̄a ekebono.»
Currently Selected:
Liuk 17: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
