Ufaru 50

1A̱vu Isuhu vowon dada va̱ yi a̱ lipu a̱vu u showen yi, a̱vu u katala yi. 2A̱vu Isuhu zuwa a̱za̱ o ulinga wa alafiya a̱ yi a̱ tsuwa̱n dada va̱ yi a̱guma̱ a na a tsu putsa lipu na̱ mashama. Ne ɗa gba a yuwain. 3A yuwan tsundolo a ciga ta̱ rana amunga, adama a na a̱yi ɗa rana na vu ntsayi a̱ tsun a̱guma̱ a na a tsu putsa na̱ mashama. Aza a Masar e showen yi ta̱ hali rana kupocindere.

4Ana rana mesun kotoi, reve Isuhu yuwan adanshi na azagbain a Firi'awuna, u damma, <<Nna̱ n tsura̱ isa'ani e ekere a̱ ɗu, i patiya mu Firi'awuna. I damma, 5<Dada va̱ zuwa mu ta̱ n kucinaa yi u damma, <<A̱mu ɗa nda a zama ma̱kuwa̱a̱, vu ciɗo mu a aason a na n foɓoyi aciya̱va̱ e iɗa ya Ka'ana.>> N te ipati ya̱ wu vu lyawa mu n 'ya̱wa̱ n ciɗo dada va̱, reve n ka̱mba̱.> >>

6Reve Firi'awuna usu, <<'Ya̱wa̱ vu ciɗo dada va̱ wu, cine u zuwa nuwu vu yuwan akucunu.>> 7Ɗaɗa Isuhu ka̱ra̱i adama u ciɗo dada va̱ yi. U da̱na̱ ta̱ oɓolo na azagbain a Firi'awuna suru na̱ mbara mu ukobu u tsugono tsa̱ yi, oɓolo na azagbain e iɗa ya Masar suru, 8oɓolo na ama o u'wa wa̱ Isuhu suru, oɓolo na̱ a̱za̱ a̱ yi, nu u'wa wa dada va̱ yi suru. Muwun n ɗa goon oɓolo no oɓolo e ikyon na̱ mgbele ni inan a lyawai e iɗa ya̱ Goshen. 9Reve ikeke yi ido na aza a akumba e ido ele fo a̱ 'ya̱wa̱ oɓolo na̱ a̱yi. A̱ba̱jini e iɓolo a ɗa a̱ da̱na̱i.

10Mantsa ma na a̱ rawai o osoroto ɗe Atada, za na ri mavada ma̱ Urudu, reve a yuwan nden ma̱ a̱tsumola̱ngu na̱ mesun ma̱ a̱bunda̱. Reve Isuhu yuwan rana cindere a yuwusan a̱tsumola̱ngu adama a dada va̱ yi. 11Mantsa ma na aza a Ka'ana aza a na a̱ da̱na̱i na̱ nden e iɗa'a e enei cine a̱ da̱na̱i na̱ a̱tsumola̱ngu uba̱ta̱ u na a fabusa ishina a Atada, reve a damma, <<Nden ma̱ a̱tsumola̱ngu a nda za vu usuɗuwu u ɗa e ekere a aza a Masar!>> Adama o ndolo a ɗa a cayi uba̱ta̱'a̱ aala Abel Mizirayim. 12Ne ɗa muwun mo olobo ma̱ yi n yuwaan niyi cine u damma nle. 13A tanu yi ta̱ a̱ tyo Ka'ana, reve a̱ ciɗo yi a̱ a̱a̱bunu atsusa a Makafela, a atsusa u na a̱ ri zuzu na Mamure, za na Ibrahim tsulai e ekere a Efuro vuma va Hitiya adama wo o'wo uba̱ta̱ wa agadu a na a̱a̱ da̱na̱ a̱ ciɗosu ama a̱ yi. 14Ana u kotoi a̱ciɗa̱ a dada va̱ yi, reve Isuhu na̱ a̱za̱ a̱ yi oɓolo na aza a̱ shewun niyi a̱ciɗa̱ a dada va̱ yi a̱ ka̱mba̱ e iɗa ya Masar.

Isuhu ca ta̱ a̱za̱ a̱ yi adanshi

15Ana a̱za̱ a̱ Isuhu e enei dada le kuwa̱ ta̱, reve a damma, <<Kila Isuhu zuwa tsu ta̱ okolo, waru u ta ciga u tsupa iwuya i na tsu yuwaan niyi suru.>> 16Ɗaɗa a̱ lyunguyi ni ikaka a̱ tyo uba̱ta̱ wa̱ Isuhu a damma, <<Kafu dada va̱ wu kuwa̱, apa ili i na u dammai, 17<Apa ili i na yaa damma Isuhu, m pati wu ta̱ vu yuwaan a̱za̱ a̱ wu gafura vu unusu ni iwuya i na a yuwaan nuwu babu uyo'o.> Adama o ndolo tsu ta patishi wu vu yuwaan agbashi a̱ A̱sula̱ a dada va̱ wu gafura.>> Isuhu gba yuwan ta̱ mesun ma̱ a̱bunda̱ ana a damma niyi adanshi o ndolo.

18Reve a̱za̱ a̱ yi a̱ ta̱wa̱ a̱ riya̱ a̱ ma̱ka̱ka̱n ma̱ yi, reve a damma, <<Apa tsu nda, a̱tsu agbashi a̱ wu a ɗa.>>

19Amma Isuhu damma le ta̱, <<She yu uwwa wovon wan! A̱mu A̱sula̱ a ɗa? 20A̱ɗu i foɓoo mu ta̱ iwuya, agba A̱sula̱ o foɓoo mu ta̱ isa'ani, adama a wawa wuma wa ama na̱ a̱bunda̱ cine yee inda ana'an. 21Adama o ndolo, she yu uwwa wovon wan. N ta kamba ɗu a̱ɗu na̱ muwun n ɗu.>> Tsundolo tsa ɗa u ca nle adanshi a na o votoyin okolo e le.

Ukwa̱ wa̱ Isuhu

22Isuhu lyuwa ta̱ elime na̱ nden e iɗa ya Masar oɓolo na̱ muwun ma dada va̱ yi. U yuwan ta̱ a'wan ukpaku na̱ kupa (110) o uvaɗi. 23Isuhu yuwan ta̱ wuma u na we enei muwun ma Ifiramu hali mantsa ma ta'atsu, hali waru u kasa olobo a Maki aza a na wo o'wotoi tsa̱ muwun ma̱ yi.

24Reve Isuhu damma a̱za̱ a̱ yi, <<N ciga ta̱ ma̱kuwa̱a̱. Amma n ri na̱ metete shi A̱sula̱ a̱ ta̱ ta̱wa̱ u kamba ɗu, reve u tara ɗu a gawan a̱ tyo e iɗa i na u yuwayin Ibrahim na̱ Ishiyaku na̱ Yakubu nzuwulai a na u ta ca le.>> 25Reve Isuhu zuwa muwun ma Isra'ila n yuwan akucunu u damma, <<Mantsa ma na A̱sula̱ a̱ ta̱wa̱i u kamba nɗu, i ta tara etele a̱ va̱ a̱ ka̱ra̱.>>

26Ɗaɗa Isuhu kuwa̱i a̱yi na a'wan ukpaku na̱ kupa (110). Reve a̱ tsuwa̱n lipu va̱ yi a̱guma̱ a na a putsa lipu va̱ yi na̱ mashama, reve a zuwa yi a aakpati ɗe Masar.

Currently Selected:

Ufaru 50: TSW

Highlight

Copy