Mota̱a̱ 1
1
O ɓongi ta̱ ama a Isra'ila
1Apa ala a̱ muwun mo olobo ma Isra'ila aza a na a̱ ta̱wa̱i oɓolo na̱ Yakubu a̱tsuma̱ a Masar, ulobo suru u tara ta̱ ama o u'wa a̱ yi: 2Roben na̱ Saminu na̱ Levi na̱ Yahuza 3na̱ Isaka na̱ Zebulun na̱ Banyami, 4na̱ Dan na̱ Nafutali na̱ Gadu na̱ Asha. 5Limatan va Yakubu shi ta̱ ama kupocindere suru suru.#1:5 Akuci a atagada o uzuwa o ro a damma ta̱ a na kupocindere no ozo o ton. Ulobo wa̱ yi Isuhu shi ta̱ ɗe Masar.
6Ana a jimai, reve Isuhu na̱ a̱za̱ a̱ yi a̱ kuwa̱, oɓolo na aza a na a̱ da̱na̱i acari a̱ yi a mantsa'a. 7Agba aza a Isra'ila a matsasan ta̱ lon a yuwan ta̱ a̱bunda̱ lon. A̱vu o shiton iɗa ya Masar.
8Reve vuma ro za na revei Isuhu shi kumba wo o'wo mogono ma Masar. 9A̱vu u damma ama a̱ yi, Ka̱lyuwa̱i, aza a Isra'ila a nda a yuwan ta̱ a̱bunda̱ e iɗa i tsu, waru a ta la'a ucira u tsu. 10Lyawai tsu yuwain ifoɓi i sa'ani adama e le, na̱ ne ɗa shi, a̱ ta̱ da̱shi a̱bunda̱ lon. Reve nu uvon u ta̱wa̱, a ta gura ɓolo aci na̱ n'yuwatan n tsu, a̱vu a yuwan uvon na̱ a̱tsu, reve a suma a lyawa iɗa'a.
11Adama o ndolo reve a zuwaa le azagbagbain o ulinga adama a ca le a̱tsuma̱lima̱ nu ulinga u tsugbashi. A̱vu a zuwa le a suwa lyuci va Pitom na̱ Ramase, adama e izuwa i mogono. 12Agba ele o ɓongishi le, ele a̱ da̱shishi a̱bunda̱ na̱ mabala. Reve aza a Masar a̱ ka̱ra̱ a uwwusa wovon u le. 13Adama o ndolo, reve a̱ da̱shi zuwa le ulinga wu usa̱n. 14Reve a zuwa wuma wa aza a Isra'ila a̱tsuma̱ a̱ a̱tsuma̱lima̱ lon nu ulinga wu usa̱n wu uzuru u ci'in na̱ ma̱zuɗa̱ me iponu. Reve waru a zuwa le cu'un vu ulinga vu usa̱n vu ɗuma̱ suru.
15A̱vu mogono ma Masar ma yuwan adanshi na̱ Sifira na̱ Fuwa, a̱ma̱ci a̱ ma̱guza̱ ma mamatsan ma̱ a̱ma̱ci a Isra'ila a na, 16<<A mantsa ma na ya̱a̱ guza̱sa̱ a̱ma̱ci a Isra'ila a limatan, i zuwa ugbozu na̱ mawun mo ulobo ma ɗa yu una yi, agba nu usheli u ɗa i lyawa yi.>> 17Agba a̱ma̱ci a̱ ma̱guza̱ ma limata'an aza a na a uwwusa wovon wa̱ A̱sula̱ a ɗa, adama o ndolo a yuwan cine mogono ma Masar ma damma nle a yuwan shi, reve a lyawa muwun mo olobo fo wuma. 18Adama o ndolo reve mogono me ɗe a̱ma̱ci a ma̱guza̱ ma limata'an, reve we ece le, <<Adama a nye i yuwain ne? Adama nye i lyawai muwun mo olobo wuma?>>
19Reve a̱ usu yi a damma, <<A̱ma̱ci a Isra'ila a̱ ri tsa̱ a̱ma̱ci a Masar shi, a̱ ta̱ nu ucira lon, a tsu matsan ta̱ babu tsu rawa.>> 20Adama o ndolo a ɗa A̱sula̱ a yuwayin a̱ma̱ci a̱ ma̱guza̱ ma limata'an isa'ani. Reve gba aza a Isra'ila a bala a̱vu a yuwan ucira lon. 21Adama o wovon wa̱ A̱sula̱ u na a̱ma̱ci'i a̱ ri na̱ yi, reve A̱sula̱ a ca le limatan va aciyele. 22Reve waru Firi'awuna damma ama a̱ yi suru a na, <<Ulobo u na suru a matsayin aza a Isra'ila, ni i 'yuwan i ciga i vari yi o Uɗolu wa̱ Nilu. Amma i lyawa mawun mo usheli suru wuma.>>
Currently Selected:
Mota̱a̱ 1: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
