Ufaru 49
49
Yakubu zuwayi olobo a̱ yi aba'un
1Reve Yakubu ɓoloto olobo a̱ yi reve u damma le, <<Ɓolotoi uba̱ta̱ u ta̱ n damma ɗu ili i na yaa cina ɗu a mantsa ma na ma̱a̱ ta̱wa̱. 2Ɓolotoi adama yu uwwa a̱ɗu olobo a̱ va̱, i zuwa atsuvu e ili i na dada ɗu Isra'ila aa damma ɗu.>> 3<<A̱vu Roben, a̱vu ɗa mawun mo ufaru ma̱ va̱, ucira u va̱, nu umatsun wu ucira wu ufaru u tsulolobo tsa̱ va̱, za na la'ai tsugbain nu ucira. 4Vu ta̱ tsu uɗolu u na u ri nu ujaaru, agba va̱a̱ o'wo elime shi, adama a na vu 'ya̱wa̱i a̱ a̱a̱ga̱da̱ a dada va̱ wu reve vu lungusa̱ yi. 5A̱ɗu Saminu na̱ Levi muwun ma̱ a̱na̱wun n ɗa, mutsun mu pe'eni n le ili yu u'ya̱susa̱n yu ugbozu i ɗa. 6Lyawa mu n da̱na̱ a̱tsuma̱ e ifoɓi i ɗu wan, lyawa mu n da̱na̱ a̱tsuma̱ e iɓolo i ɗu wan. Adama a na a̱tsuma̱ o upan u le u ɗa o unai ama, a̱tsuma̱ o ucigu u le u ɗa o o'wotoi ogono e inan a̱kutsuma̱. 7A yuwaan ta̱ upan u le una̱ adama a na u tu usuɗuwu lon, nu upan wu ulambu u mene me iliyali u le. N te ne'eshen le a̱tsuma̱ o ugundo wa Yakubu, waru m bete'we le a̱tsuma̱ a Isra'ila.>> 8<<A̱vu Yahuza, a̱za̱ a̱ wu a ta cuwa wu. Ukere wa̱ wu u ta̱ da̱na̱ a̱ yinlu ya aza a na a 'yuwan nuwu. Muwun ma dada va̱ wu n ta̱ kingyo a̱ ma̱ka̱ka̱n ma̱ wu. 9A̱vu Yahuza mawun ma kamu ma ɗa, za na ka̱mba̱i diga mona me inama, a̱vu u sa̱ɓa̱ru u von tsa kamu, zane ɗa a kawan 'ya̱sa̱n wu? 10Aaɗanga a tsugbain tsaa kasa na̱ Yahuza shi, ko aɗanga o tsugono o ugundo wa̱ wu, adama a̱ ta̱wa̱a̱ yi nu utafa, elentsu waru a ta yuwaan yi tsutoni. 11U ta̱ nla̱ mololi ma̱ yi o uɗanga u ina̱bi u na ri ulobonu lon. U ta̱ za̱'wa̱ utugu wa̱ yi na̱ masayan, itana ya̱ yi na̱ mini ma̱ shili ma̱ inabi. 12Esu a̱ yi a ta yuwan ushili adama a masayan ma̱ inabi. Anga a̱ yi a ta yuwan u'uri adama a madara.>> 13<<Zebulun ta̱ da̱nu a̱ wuyun wu nge'en m mala, uba̱ta̱ wu nden wa̱ yi u to o'wo uba̱ta̱ u na antsun a̱a̱ da̱na̱ e ivuwusan, utyo wa̱ yi u ta rawa Sidon. 14Isaka mololi ma na ma̱ ri nu ucira ma ɗa nven e memere mo asaka e re e itana. 15Na̱ we ene cine uba̱ta̱ u na wee ivuwusan u ri ulobonu, waru na̱ cine iɗa'a i ri maluwa, u ta̱ ka̱ɗa̱to ilyungu ya̱ yi adama u tanu itana. Waru u ta yuwan ulinga ko u 'yuwan u ciga.>> 16<<Dan ta yuwaan ama a̱ yi uge'etosu tso ugundo u ta̱ wa aza a Isra'ila. 17Dan to o'wo yo a̱ nge'en mu ure, apili a̱ nge'en mu uzuɓa̱, za na tsu gasa okotsu o do tsa̱ra̱ za na ri ɗe ukumbu u riya̱ na̱ a̱ca̱pa̱. 18N te ipiri vu wawa mu A̱sulazuva.>> 19<<Gado, a̱za̱ o ugeshe e te geshe yi, amma u ta̱ riya̱a̱ a̱civa̱ e le.>> 20<<Asha, itana yu uɗuma̱ ya̱ yi i ta yuwan ulobonu, itana yu uɗuma̱ i na yi ntsayi na̱ mogono.>> 21<<Nafutali, meshon ma na a lyawai fa̱a̱n ɗa, za na tsu matsusan muwun n sa'ani.>> 22<<Isuhu, ataci a ɗa a na a̱a̱ tsusun muwun, ataci a na a̱ tsusun muwun zuzu na̱ lyusu mini za na eten a̱ yi a kumbusa uɓaɓu. 23Nu usuɗawu a̱za̱ e tewin a̱ riya̱a̱ niyi, reve a tawan yi, reve a zuwa yi elime babu uro. 24Amma utan wa̱ yi wi isawan ta̱ cip cip, reve ekere a̱ yi a̱ tsura̱ ucira e ekere a Za vu Ucira va Yakubu, e ekere a Za va Aguɓa, Aatali a Isra'ila, 25adama a̱ A̱sula̱ a dada va̱ yi, za na aa kambusa yi, adama o Mogono me Ili Suru za na a zuwusaa yi aba'un e iro'i na̱ mini ma̱ a̱ru'un ma na ma̱ ri za̱la̱, na aba'un a maani na̱ za vu umatsutsun. 26Aba'un a na dada va̱ yi aa casu yi a la'a ta̱ aba'un a akuci a nsasan mu ufaru ni isa'ani ya agaɗi o ujumu. Lyawa le suru a̱ da̱na̱ a aaci a̱ Isuhu, a̱ a̱ga̱pa̱na̱ a za na a ɗangwai a̱tsuma̱ a̱ a̱za̱ a̱ yi.>> 27<<Banyami, mekerenkesu ma ambulu ma ɗa. Nu usana u tsu kara ta̱ u tama, nu ulivu a̱vu u ne'eshen ili i na u remei.>>
28Ele nda suru ele ɗa ugundo wa aza a Isra'ila kupa ne ejere. Waru a̱yi nda a̱yi ɗa ili i na dada le damma nle a̱yi a zuwusaa le aba'un. Vuma suru a̱tsuma̱ e le a zuwaa yi ta̱ aba'un a na a ntsaa niyi.
Ukwa̱ wa Yakubu
29Reve dada le damma le, <<A̱mu n ciga ta̱ ma̱kuwa̱a̱ n toni nkaya n va̱. I ciɗo mu oɓolo na̱ nkaya n va̱ a̱ a̱a̱ba̱nu o uɗuma̱ wa Efuro vuma va Hitiya. 30A̱yi ɗa a̱a̱ba̱nu a na a̱ ri o uɗuma̱ wa Makafela, na asana a Mamure, e iɗa ya Ka'ana, za na Ibrahim tsulai e ekere a Efuro za va Hitiya adama wo o'wo uba̱ta̱ wa̱ a̱ciɗa̱. 31Uba̱ta̱ u ɗaɗa a̱ ciɗoi Ibrahim na̱ ka va̱ yi Saratu. Waru lo ɗa a̱ ciɗoi Ishiyaku na̱ ka va̱ yi Rikatu. Waru lo ɗa n ciɗoi Liyatu. 32Atsusa'a na̱ a̱a̱ba̱nu a na a̱ ri pe a tsula le ta̱ e ekere a aza a Hitiya.>>
33Ana Yakubu kotoi a casu olobo a̱ yi adanshi a nda, a̱vu u kuruwisa̱ ana a̱ yi a̱ a̱a̱ga̱da̱, reve u rono wivuwun wa̱ yi wu ukosu, ɗaɗa u kuwa̱i u kuru nkaya ma̱ yi.
Currently Selected:
Ufaru 49: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
