Ufaru 48

Manase na̱ Ifiramu

1Ana ili i nda i kotoi, reve a damma Isuhu a na dada va̱ yi tu ubanakun. Ɗaɗa u tarai olobo e re a̱ yi Manase na̱ Ifiramu a̱vu u 'ya̱wa̱ we ene yi. 2Ana Yakubu uwwai ulobo wa̱ yi Isuhu ta̱ lo rawai adama we ene yi, ɗaɗa u yuwain ukadu reve u 'yon u da̱nu a̱ a̱a̱ga̱da̱.

3Reve u damma Isuhu, <<A̱sula̱ Mogono me Ili Suru ma̱ ta̱wa̱ ta̱ ya̱'a̱ va̱ a Luz e iɗa ya Ka'ana, reve gba u zuwaa mu aba'un. 4U damma mu ta̱, <Uwwa nda, n ta zuwa vu bala na̱ limatan lon. Waru n ta zuwa ugundo wa̱ wu wo o'wo oɓolo e iɗa, reve waru n ca ugundo wa̱ wu iɗa ya Ka'ana wo o'wo agadu e le hali hali hali.>

5<<Gogo nda olobo e re a̱ wu a na a matsaan nuwu pa e iɗa Masar kafu n ta̱wa̱ ya̱'a̱ wu Ifiramu na̱ Manase, n ka̱mba̱to le ta̱ muwun n va̱, cine Roben na̱ Saminu ri. 6Amma muwun n na aa matsaan wu na̱ a̱ca̱pa̱, o to o'wo a̱za̱ wu. E te kece le na ala a Ifiramu na̱ Manase azakpakpara e le a agadu e iɗa i le. 7N ta yuwusan ne adama a mma va̱ wu Rahila. U kuwa̱ ta̱ e iɗa Ka'ana kafu tsu rawa Efarata, a̱mu a̱ ma̱ka̱mba̱a̱ diga Mesopatamiya. N ciɗo yi ta̱ a̱ nge'en mu ure a̱ tyo Efarata, (za na a̱ tsu ɗe gogo Batalami).>>

8Ana Yakubu enei olobo e re a̱ Isuhu'u reve we ece, <<Olobo a̱ ne a ɗa nda'a?>>

9Reve Isuhu usu, <<Ele ɗa olobo a na A̱sula̱ a ca numu pa e iɗa ya Masar.>>

Reve Isra'ila damma, <<Ta̱wa̱a̱ mu ne ele, adama n zuwaa le aba'un.>>

10Esu a̱ yi a̱ shi ta̱ a fara bili bili adama a tsukutsa hali we inda ulobonu shi. Reve Isuhu ta̱wa̱ no olobo'o zuzu na̱ a̱yi. Reve Yakubu katala le u papura le.

11Reve Yakubu damma Isuhu, <<N reve a na ma̱a̱ da̱shi ene wu waru shi, a̱yi ɗa nda gba hali A̱sula̱ a zuwa me enei muwun ma̱ wu fo.>>

12Reve Isuhu tawa muwu'un diga a agutsu a kaka vali le, a̱vu u kingyo u ka̱ɗa̱to nu urewesu wa̱ yi hali e iɗa a̱ ma̱ka̱ka̱n ma̱ yi. 13Reve u zuwa mawu'un Ifiramu o ukere usa'ani wa̱ yi wuntsawu nu ukere wu ugula̱ wa Isra'ila Manase waru o ukere u ugula̱ wa̱ yi wuntsawu nu ukere wu usa'ani wa Isra'ila. Reve u ta̱wa̱ ne ele zuzu na̱ dada va̱ yi. 14Agba reve Yakubu canana ekere a̱ yi upaɗalu, reve u kuruwa̱ Ifiramu zawa'a ukere usa'ani a aaci. Reve u kuruwa̱ Manase ukere ugula̱ a aaci, ko na wo o'woi a̱yi ɗa mawun mo ufaru.

15Reve u zuwaa Isuhu aba'un u damma, <<Lyawa A̱sula̱, A̱sula̱ a na nan dada va̱ Ibrahim ni Ishiyaku walai a̱ ma̱ka̱ka̱n ma̱ yi, A̱sula̱ a na a̱yi ɗa za va aguɓa va̱ a wuma u va̱, 16malingata ma na me geshe numu e ekere e iwuya, lyawa u zuwaa olobo'o aba'un. Lyawa e ɗesu le na aala a̱ va̱ na ala a nan dada va̱ Ibrahim ni Ishiyaku. Lyawa a bala a̱bunda̱ lon a̱tsuma̱ o uvaɗi.>>

17Amma ana Isuhu enei dada va̱ yi kuruyi ukere usa'ani wa̱ yi a aaci a Ifiramu, reve okolo a̱ yi la̱nga̱ a̱ yi. Ɗaɗa u tawai ukere wa dada va̱ yi adama u kuru yi a aaci a Manase. 18Isuhu damma ta̱ dada va̱ yi, <<Ne ɗa shi dada, a̱yi nda ɗa mawun mo ufaru, kuru ukere usa'ani wa̱ wu a aaci a̱ yi.>>

19A̱vu gba dada va̱ yi 'yuwan u damma, <<Mawun ma̱ va̱ n reve ta̱. Manase fo u to o'wo iɗa, waru u to o'wo fo vuma gbain, amma zawa'a va̱ yi ta la'a yi tsugbain. Ugundo wa̱ yi u to o'wo oɓolo e iɗa ya̱ a̱bunda̱!>>

20Ne ɗa Yakubu zuwayi olobo'o aba'un o urana'a u damma, <<Na ala a̱ ɗu a ɗa aza a Isra'ila a zuwulai aba'un a dansa, <Lyawa A̱sula̱ a zuwa vo o'wo tsa Ifiramu na̱ Manase.> >> Ne ɗa Yakubu zuwai Ifiramu elime a Manase.

21Reve Yakubu damma Isuhu, <<Uwwa nda, n yuwan ta̱ zuzu na ma̱a̱ kuwa̱. Amma A̱sula̱ o to o'wo oɓolo na̱ a̱vu, waru u ta̱ ka̱mba̱towisa̱ wu e iɗa yi nkaya ma̱ wu. 22N ca wu ta̱ upasu wa̱ Shekem, za na n usai e ekere a aza a Amoriya na̱ matsun me pe'eni ma̱ va̱ nu utan u va̱ upasu na̱ a̱za̱ a̱ wu.>>

Currently Selected:

Ufaru 48: TSW

Highlight

Copy