Ufaru 47
47
1Reve Isuhu 'ya̱wa̱ ya Firi'awuna reve u damma yi, <<Dada va̱ na̱ a̱za̱ a̱ va̱ no oɓolo e mgbele n le ni ikyon ni inan i le ni ili i na a̱ ri ne ele biti a̱ ta̱wa̱ ta̱ diga e iɗa ya Ka'ana. Gogo a̱ tu upasu wa̱ Goshen.>>
2Reve u tara ama o ton a̱tsuma̱ a̱ a̱za̱ a̱ yi u roco Firi'awuna.
3Reve Firi'awuna ece a̱za̱ a̱ Isuhu, <<Nye i ɗa ulinga u ɗu?>>
Reve a̱ usu, <<Agbashi a̱ wu aza a aguɓa a ɗa cine nkaya n tsu n da̱na̱i.>> 4Reve waru a damma, <<Tsu ta̱wa̱ ta̱ nden n limocin e iɗa i nda, adama a na babu uba̱ta̱ wa alyuna wi ikyon i tsu na̱ mgbele n tsu e iɗa ya Ka'ana, adama a na ambulu a suɗuwa ta̱ e iɗa'a lon. Tsu te ipati vu lyawa tsu agbashi a̱ wu tsu da̱nu e iɗa ya̱ Goshen.>>
5Ɗaɗa Firi'awuna dammai Isuhu, <<Gogo a na dada va̱ wu na̱ a̱za̱ a̱ wu a̱ ta̱wa̱i ya̱'a̱ wu, 6iɗa ya Masar i te ekere a̱ wu. Vu zuwa le a̱ da̱nu uba̱ta̱ u na u la'ai ulobonu e iɗa'a. Zuwa le a̱ da̱nu upasu wa̱ Goshen. Waru na̱ vu reve a̱tsuma̱ e le a̱ ta̱ na aza a na a la'a gurai aguɓa, vu zuwa le a̱ ka̱lyuwusa̱ iliyamunga i va̱ fo.>>
7Reve Isuhu ta̱wa̱ na̱ dada va̱ yi Yakubu a̱ ma̱ka̱ka̱n ma Firi'awuna, a̱vu Yakubu zuwaa Firi'awuna aba'un. 8Reve Firi'awuna ece Yakubu, <<A'wan a yan a ɗa vu ri?>>
9A̱vu Yakubu damma Firi'awuna, <<A'wan a̱ nden n limocin n va̱ ukpaku na̱ mata'atsu (130) a ɗa. A'wan a̱ va̱ wa'a ɗa waru tapu na̱ a̱tsuma̱lima̱. A rawa a'wan o limocin a nkaya n va̱ o uvaɗi shi.>> 10Reve Yakubu zuwaa Firi'awuna aba'un reve u ka̱ra̱ o uta̱.
11Reve Isuhu zuwa dada va̱ yi na̱ a̱za̱ a̱ yi a̱ da̱nu e iɗa ya Masar. U ca le ta̱ uba̱ta̱ a̱tsuma̱ o upasu u na u la'ai ulobonu e iɗa'a, upasu wa Ramase, cine Firi'awuna zuwai. 12Isuhu ca ta̱ dada va̱ yi na̱ a̱za̱ a̱ yi na ama o u'wa wa dada va̱ yi suru ilyalya o una̱ wa̱ a̱bunda̱ a̱ muwun n le suru.
Isuhu na ambulu'u
13Reve gba ambulu'u a suɗuwa lon hali gba babu ilyalya e iɗa'a suru, hali ama e iɗa ya Masar na̱ Ka'ana o sowo a̱tsuma̱lima̱. 14Ama a Masar na̱ Ka'ana o una ta̱ ikebe i le suru a tsulusa ishina e ekere a̱ Isuhu. Reve Isuhu ɓoloto ikebeꞌe suru u tyowe o u'wa wa Firi'awuna. 15A mantsa ma na ikebe ya ama a Masar na aza a Ka'ana suru i kotoi, reve aza a Masar suru a̱ ta̱wa̱ ya̱ Isuhu a damma, <<Ikebe i tsu i koto ta̱, vu ca tsu ilyalya. Adama a̱ nye tsa̱a̱ kuwa̱ a̱vu a̱ a̱ka̱nla̱?>>
16Ɗaɗa Isuhu usuyi, <<Ana wo o'woi ikebe i ɗu i kotoi, she i ca mu iliyamunga i ɗu reve n ca ɗu ilyalya akita'yan.>> 17Ɗaɗa gba e tyoweyi Isuhu ni iliyamunga i le, a̱vu u ca le ilyalya akita'yan e ido na̱ mgbele ni ikyon ni inan na̱ nloli. Reve u ca le ilyalya ya aa'wan o ndolo na akita'yan e iliyamunga i le.
18Ana aa'wan o ndolo o kotoi, reve a̱ ta̱wisa̱ ya̱'a̱ yi aa'wan a na a̱ kuruyi a̱vu a damma, <<Tsaa pala wu shi zagbain, ikebe i tsu suru i koto ta̱, waru iliyamunga i tsu suru o o'wo ta̱ a̱za̱ a̱ wu. Gogo nda ko ili i buwa tsu she lipu tsu na̱ a̱ɗuma̱ a̱ tsu. 19She vu lyawa tsu tsu kuwa̱ reve a̱ɗuma̱ a̱ tsu o o'wo ili ye pere a̱vu a̱ a̱ka̱nla̱ wan. Tsula tsu na̱ a̱ɗuma̱ a̱ tsu na akita'ya e ilyalya, reve tso o'wo agbashi a Firi'awuna. A̱vu de vu ca tsu ishina ni icu'un adama tsu kuwa̱ wan waru iɗa'a yo o'wo pere wan.>>
20Ne ɗa Isuhu tsulayi Firi'awuna a̱ɗuma̱ a Masar suru. Aza a Masar suru a wina ta̱ a̱ɗuma̱ e le adama a na ambulu a suɗuwa ta̱. Reve iɗa'a yo o'wo za va Firi'awuna. 21Ne ɗa ama a Masar suru o o'woi agbashi a Firi'awuna diga a̱tyoo e iɗa a̱ tyo a̱ a̱tyoo. 22A̱ɗuma̱ a nan ganu a ɗa goon u tsulai shi, adama a na a ta lyuwusa akunda a na Firi'awuna zuwai a casu le, o una̱ u ndolo a̱ ta̱ ni ilyalya i na i rawa nle. A̱yi ɗa i zuwai a winai a̱ɗuma̱ ele shi.
23Reve Isuhu damma ama'a, <<Gogo ana wo o'woi suru nɗu na̱ a̱ɗuma̱ a̱ ɗu n tsulaa ta̱ Firi'awuna, n ta ca ɗu icu'un adama i cu'wa̱n a̱ɗuma̱. 24Agba na̱ mantsa mo ugasa ma rawa i ta tara za ta̱ a̱tsuma̱ o ozo o ton i ca Firi'awuna. Reve a̱za̱ a̱ na̱shi a̱tsuma̱ o ozo o ton o o'wo za ɗu, adama i tsura̱ icu'un yi ca̱'a̱n ni ilyalya adama a̱ ɗu na ama a 'wa ɗu na̱ muwun n kekeꞌen n ɗu.>>
25Reve a̱ usu, <<Vu wawa ta̱ wuma u tsu. Nu u yo'ono wu ta̱ zagbain tsu, tsu to o'wo agbashi a Firi'awuna.>>
26Reve Isuhu zuwa wo o'wo wila̱ e iɗa ya Masar, a na za ta̱ a̱tsuma̱ o ozo o ton vi itana yu uɗuma̱ za va Firi'awuna ɗa. Ne ɗa gba wo o'woi hali a̱ tyo ana'an. A̱ɗuma̱ a nan ganu a ɗa goon o o'woi aza a Firi'awuna shi.
27Aza a Isra'ila a̱ da̱nu ta̱ Goshen e iɗa ya Masar. Reve a yuwan pe utsuru, a matsan lon a bala.
28Reve Yakubu da̱nu e iɗa ya Masar a'wan kupa na̱ a̱za̱ e cindere. Adama o ndolo u yuwan ta̱ a'wan ukpaku na amunga na̱ a̱za̱ e cindere (147.) 29Ana mantsa ma na wa̱a̱ kuwa̱ ma yuwain zuzu, reve u ɗe ulobo wa̱ yi Isuhu u damma yi, <<Vu roco mu isa'ani i nda, vu zuwa ukere wa̱ wu a mpataka ma agutsu a̱ va̱, reve vu yuwaan mu akucunu a amayun a̱ a̱ɓula̱ va̱a̱ ciɗo mu e iɗa ya Masar shi. 30Na̱ n von oɓolo na̱ nkaya n va̱ n kuwa̱, vu tara mu o uta̱ e iɗa ya Masar vu ciɗo mu oɓolo na̱ nkaya n va̱.>>
Reve Isuhu usu, <<N ta yuwan cine vu dammai.>>
31A̱vu Yakubu damma yi, <<Vu kucinaa mu>> A̱vu Isuhu kucinaa yi. A̱vu Yakubu ka̱ɗa̱to urewesu wa̱ yi a aci a̱ a̱a̱ga̱da̱ a̱ yi u yuwan a̱ga̱nda̱.
Currently Selected:
Ufaru 47: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
