Ufaru 43

A̱za̱ a̱ Isuhu a̱ ka̱mba̱i Masar

1A mantsa'a a̱vu ambulu a̱ da̱shi yuwan a̱bunda̱ e iɗa'a. 2Ana ishina i na a̱ ta̱wa̱yi diga Masar a cigai mokotoo, reve Yakubu damma muwun ma̱ yi, <<Ka̱ra̱i a̱ ka̱mba̱ i da̱shi tsulaa tsu ilyalya.>> 3Amma a̱vu Yahuza damma, <<Vuma'a u rono tsu ta̱ atsuvu lon u damma, <Ya̱a̱ da̱shi ene urewesu u va̱ shi, she na̱ mokosoto ma̱ ɗu ma̱ ri oɓolo na̱ a̱ɗu.> 4Nna̱ vaa lyawa Banyami 'ya̱wa̱ oɓolo na̱ a̱tsu, tsu ta̱ 'ya̱wa̱ tsu da̱shi tsula ilyalya. 5Amma na̱ vaa lyawa yi u 'ya̱wa̱ shi, a̱tsu fo tsa̱a̱ 'ya̱wa̱ shi. Vu cuwan a na vuma'a u dammai, <Ya̱a̱ da̱shi ene urewesu u va̱ shi, she na̱ mokosoto ma̱ ɗu ma̱ ri oɓolo na̱ a̱ɗu.> >>

6A̱vu Yakubu damma, <<Adama a̱ nye i paala numu tsunda, reve i damma vuma'a a na i ri na̱ zawa'a ro?>>

7Reve a̱ usu, <<Vuma ɗaɗa remei yeci adama o u'wa u tsu, u ciga ta̱ u reve ko a̱vu dada tsu buwa ta̱ wuma. Reve we ece tsu ko tsu ta̱ na̱ zawa'a ro, ɗaɗa gba tsu damma niyi. Cine tsa ɗa tsee reve a na waa damma, <Ta̱wa̱i na̱ zawa'a ɗu?> >>

8Reve Yahuda damma dada va̱ yi Isra'ila, <<Lyawa mawu'un u 'ya̱wa̱ oɓolo na̱ a̱mu, adama tsu remei ure. Na̱ ne ɗa shi, tsu ta̱ kuwa̱i na ambulu, na̱ a̱vu na̱ a̱tsu na̱ muwun n kekeꞌen n tsu. 9A̱mu na aciya̱va̱ n te geshe yi. Ve ece yi e ekere a̱ va̱. Na̱ n ta̱wa̱a̱ wu na̱ a̱yi shi, lyawa mpasa ma̱ yi me ece mu babu ukotu. 10Tsu shi ta̱ a̱ 'ya̱wa̱ tsu ka̱mba̱ ure, a na tsu lungusa̱i mantsa ma ɗa.>>

11Reve dada le Yakubu damma le, <<Na̱ ne ɗa woo o'wo babu ure u mota̱a̱, she i shiton ibufu i ɗu ni itana yu uɗuma̱ yi iɗa i na i la'ai ulobonu. I tyowe vuma'a uneꞌe wi itana yu ucita ya̱ a̱guma̱ na aturare ni ishiki na̱ muwun mu uɗanga u na a̱ tsu ɗe fistashiyo na aza a alumon. 12Reve waru i tara ikebe udoɓonuwu a̱ ka̱ra̱ wi ili i na i cinai a̱ ka̱mbuwa̱i e ibufu i ɗu. U ta gura o'wo unusu u ɗa a nusain. 13A̱vu i tara zawa'a ɗu i reme ure a̱ ka̱mba̱ uba̱ta̱ u vuma'a. 14Lyawa A̱sula̱ Mogono me Ili Suru a zuwa vuma'a we ene iliyali i ɗu ni rawa ya̱'a̱ yi. Reve u lyawa za ɗu Saminu oɓolo na̱ Banyami a̱ ka̱mba̱ o u'wa. Amma a̱mu nu ure wu lo shi she na̱ n lamba muwun n va̱, n ri ni ili i na maa yuwan shi.>>

15Ɗaɗa a tarai une'e'en, oɓolo na̱ Banyami a̱vu o doɓonu ikebeꞌe. Reve a̱ jika̱ a̱ tyo Masar, reve a̱ 'ya̱wa̱to aciyele ya̱ Isuhu. 16Ana Isuhu enei Banyami oɓolo ne ele, reve u damma aagbashi a gbain o u'wa wa̱ yi, <<Tara ama a nda a uwa o u'wa, reve vu paɗa nama vu foɓo ilyalya adama a na a ta lyuwa ilyalya yu urana oɓolo na̱ a̱mu.>> 17Reve vuma'a u yuwan cine Isuhu damma niyi, a̱vu wo oto ama'a o u'wa wa̱ Isuhu.

18Reve ama'a a uwwa wovon ana a tara nle a uwa o u'wa wa̱ Isuhu. Reve a damma, <<Adama e ikebe i na a̱ ka̱mbuwa̱i e ibuhu i tsu i ɗa na tsu ta̱wa̱i nu ufaru. A̱yi ɗa i zuwai a uwato ntsu pa. U te izami yu ure u na waa tawaa tsu, reve u reme tsu wo o'woto tsu agbashi avu u usa nloli n tsu.>>

19Adama o ndolo reve a̱ 'ya̱wa̱ uba̱ta̱ vu zagbain vu uka̱lyuwusa̱ wu u'wa wa̱ Isuhu'u. 20Reve a damma, <<Zagbain, ana tsu ta̱wa̱i atsulu e ilyalya nu ufaru, 21a̱tsu a̱ ka̱mba̱ o u'wa, ana tsu cu'wain tsaa asa o ure, reve tsu ba̱ɗa̱ ibuhu i tsu. Ɗaɗa gba tsu cinai pe ikebe i tsu i na tsu tsulayi ishina. Ikebeꞌe cine tsu tsupai ne ɗa a̱ ri, ele ɗa nda tsu ka̱mbuwa̱ nle. 22Waru tsu ta̱wa̱ ta̱ ni ikebe i ro adama tsu da̱shi tsula ishina. Tsu reve ko zane ɗa ka̱mbuwa̱i pe ikebeꞌe e ibufu i tsu shi.>>

23Reve zagbain vu u'wa wa̱ Isuhu'u u damma, <<Votoin ugbozu u ɗu, she yu uwwa wovon wan. U ta gura o'wo A̱sula̱ a̱ ɗu, A̱sula̱ a nkaya n ɗu a ɗa a zuwa nle pe, adama a na a̱mu n ushi ta̱ ikebe i ɗu.>> Reve u ta̱wa̱a̱ le na̱ Saminu.

24Reve zagbain vu u'wa'a u tara le a̱ tyo pe o u'wa wa̱ Isuhu, a̱vu u ca le mini a sa'a ana e le. Reve u ca nloli n le ilyalya a tama. 25Reve o foɓo uneꞌe u le na aa ca Isuhu nu u ta̱wa̱ nu urana, adama a na a damma le ta̱ a ta lyuwa ilyalya oɓolo na̱ a̱yi pe.

26Ana Isuhu ta̱wa̱i, reve a ca yi uneꞌe u na a uwayi pe o u'wa'a, a̱vu a̱ kingyo a̱ ma̱ka̱ka̱n ma̱ yi a̱ ka̱ɗa̱to urewesu u le she e iɗa. 27Reve we ece alafiya e le, reve waru u damma, <<Cine tsa ɗa abara dada ɗu na i yuwaan numu adanshi a̱ yi? U ta̱ lo wuma hali n gogo?>>

28A̱vu a̱ usu, <<Aagbashi a̱ wu dada tsu ta̱ lo wuma waru gbaga.>> Reve a̱ ka̱ɗa̱towisa̱ a̱ ma̱ka̱ka̱n ma̱ yi.

29Ana u ka̱lyuwa̱i we enei zawa'a va̱ yi Banyami mawun ma̱ a̱na̱wun ma̱ yi, reve u damma, <<A̱yi nda ɗaɗa mokosoto ma̱ ɗu ma na i damma numu'u?>> Reve u damma <<Lyawa A̱sula̱ o roco wu isa'ani ulobo u va̱>> 30Ana Isuhu uwwai okolo a̱ 'yon niyi azama u ɓoso na̱ mesun ana we enei mawun ma̱ a̱na̱wun ma̱ yi, ɗaɗa u jika̱i o uta̱ reve u uwa a aasula a̱ yi u shon.

31Reve u sa'a esu a̱ yi a̱vu wu uta̱ uba̱ta̱ u le. Reve u kaɓa asuvu, a̱vu u damma, <<Ne'eshein ilyalya.>>

32Reve a zuwaa yi ilyalya ya̱ yi ko'o, a̱za̱ a̱ yi waru za le ko'o. Aza a Masar waru a zuwaa le ilyalya i le ko'o adama a na aza a Masar a tara ta̱ ili yi idaba i ɗa a lyuwa na̱ Mmaci ma Ibrahim. 33Reve Isuhu zuwa a̱za̱ yi a̱ da̱nu, reve e gere le na a'wan e le diga a zakpara a̱ tyo mokosoto. Reve a̱za̱ a̱ yi'i e reme asalama, ɗaɗa e remei nka̱la̱la̱i. 34Reve e kene ilyalya diga a̱ ma̱ka̱ka̱n ma̱ Isuhu na a casu nle. Reve a ca Banyami ilyalya i na i rawai za va̱ a̱za̱ a̱ yi toto uton. Reve a lyuwa o sowo oɓolo ni Isuhu a uwwa uyo'o.

Currently Selected:

Ufaru 43: TSW

Highlight

Copy