Ufaru 44

Mokkoto ma azurufa a̱ buhu a Banyami

1Ele azama a̱ ka̱ra̱ reve Isuhu damma aagbashi a gbain o u'wa wa̱ yi, <<Shiton a̱buhu a ama o ndolo ni ishina a̱tyoo a na a gura tanu, reve vu zuwaa vuma biti ikebe ya̱ yi pe o una̱ wa̱ a̱buhu a̱ yi. 2Reve waru vu zuwa mokkoto ma azurufa ma̱ va̱ pe o una̱ wa̱ a̱buhu o mokosoto me le oɓolo ni ikebe yi ishina ya̱ yi.>> Reve u yuwan cine a zuwa niyi.

3Na̱ wasasa reve a lyawa le a̱ ka̱ra̱ na̱ nloli n le ni itana i le. 4Ana o uta̱i a̱ lyuci hali a yuwan makasu ɗaɗa Isuhu tsu damma aagbashi a gbain o u'wa wa̱ yi'i, <<Kuru ama o ndolo, na̱ vu cina le ve ece le, <Adama a̱ nye i tsupai isa'ani ni iwuya? 5Adama a̱ nye yi iva̱i mokkoto ma azurufa mo oso ma̱ mini ma zagbain va̱, na̱ a̱yi ɗa waa yuwusaan yindi shi? I yuwan ta̱ ili i wuya lon.> >>

6Ana u cina nle reve u yuwaan le adanshi cine a zuwa niyi u damma. 7Reve a̱ usu, <<Zagbain, adama a̱ nye vaa yuwan adanshi ne tsunda? A̱sula̱ a para a na agbashi a̱ wu aa yuwan cu'un vi ili i ndolo. 8Tsu ka̱mbuwa̱ ikebe i na tsu cinai a̱tsuma̱ a̱ a̱buhu a̱ tsu diga Ka'ana shi? Adama a̱ nye tsee iva̱ azurufa ko zinariya o u'wa wu zagbain va̱ wu? 9Nna̱ vu tsura̱ yi e ekere o zo ro a̱tsuma̱ a̱ tsu, lyawa o una yi. Reve a̱tsu na tsu buwai tso o'wo agbashi a̱ wu.>>

10Reve vuma'a u damma, <<U lobono ta̱, amma a̱yi za na a̱ tsura̱i mokkoto'o o ukere wa̱ yi ɗa, a̱yi ɗa wo o'wo aagbashi. Akapi a̱ ɗu i ta̱ ka̱ra̱ fa̱a̱n.>>

11Ɗaɗa suru nle a cu'wushin a̱buhu e le e iɗa reve a̱ kpa̱tu'wa̱ le. 12Reve aagbashi a̱ Isuhu e teme ibingi, diga ya zagbain a̱tyo yo mokosoto. Reve gba u tsura̱ yi a̱ a̱buhu a Banyami. 13Ɗaɗa gba azakpakpara a̱ yi a karai a̱tugu e le adama a̱ a̱tsumola̱ngu. Reve a zuwaa nloli n le itana a̱ ka̱mba̱ a̱ lyuci'i.

14Ana Yahuda na̱ a̱za̱ a̱ yi a rawai o u'wa wa̱ Isuhu u shi ta̱ u buwa pe o uwa'a, reve o von a̱ ma̱ka̱ka̱n ma̱ yi ma̱kpa̱ɓa̱. 15Reve Isuhu ece le, <<Nye i yuwain ne tsunda? I reve a na vuma tsa̱ va̱ waa gura reve ili i na i yuwain na̱ yindi shi?>>

16Reve Yahuda damma, <<Nye tsaa damma zagbain va̱? Nye tsaa damma? Cine tsaa sa'a aciya̱tsu? A̱sula̱ a ɗa a̱ pa̱lu'wa̱i unusu wa agbashi a̱ wu. Gogo nda suru ntsu tso o'wo ta̱ agbashi a zagbain va̱, a̱tsu na̱ za na a̱ tsura̱i na̱ mokkoto'o.>>

17Reve Isuhu damma, <<A̱sula̱ a para na maa yuwan ne tsundolo! Za na a̱ tsura̱i mokkoto o ukere wa̱ yi ɗa goon o o'wo aagbashi a̱ va̱. A̱ɗu gba akapi i ta gura ka̱mba̱ o u'wa gbaga ya dada ɗu.>>

18Reve Yahuza rawa zuzu a̱vu u damma, <<Zagbain va̱, yuwan ankuri lyawa mu aagbashi a̱ wu n damma wu adanshi a̱ ta̱ a nda. She vu yuwan upan na̱ a̱mu wan, ko na wo o'woi una̱ta̱ u ɗa vu ri na̱ Firi'awuna na aciya̱yi. 19Zagbain, ana ve ece ntsu vu damma ta̱, <I ta̱ na̱ dada ko zawa'a?> 20Tsu usu wu ta̱ tsu damma, <Tsu ta̱ na̱ dada abara na̱ zawa'a mokosoto ma̱ tsu ma na a matsaan niyi na̱ tsukutsa za na zakpara va̱ yi kuwa̱i ɗe. Agba a̱yi ɗa u buwai a̱ nde'en o umatsun wa mma va̱ yi, waru dada va̱ yi ciga yi ta̱ lon.>

21<<Reve vu damma agbashi a̱ wu, <Ta̱wa̱i na̱ a̱yi adama me ene yi.> 22Zagbain, a mantsa'a tsu damma wu ta̱, <Mawu'un waa gura lyawa dada va̱ yi shi, adama a na dada va̱ yi ta̱ kuwa̱.> 23Reve vu usu agbashi a̱ wu, <Na̱ mokosoto ma̱ ɗu ma̱ ta̱wa̱ shi, ya̱ da̱shi ene mu shi.> 24Ɗaɗa ana tsu ka̱mba̱i o u'wa ya dada tsu, reve tsu ka̱mbuwa̱ yi adanshi a̱ wu.

25<<Ana a yuwisain reve dada tsu dammisa, <Ka̱mba̱i I tsulisaa tsu ilyalya.> 26Reve gba tsu usu yi, <Tsa̱a̱ 'ya̱wa̱ shi she na̱ vu lyawa mokosoto ma̱ tsu ma̱ 'ya̱wa̱ oɓolo na̱ a̱tsu. Adama a na tsa̱a̱ tsura̱ tse ene vuma'a shi nna̱ mokosoto ma̱ tsu ma̱ ri oɓolo na̱ a̱tsu shi.>

27<<Ɗaɗa aagbashi a̱ wu dada va̱ cuwaan ntsu, <I reve ta̱ a na muwun n re n ɗa Rikatu matsaan numu. 28Reve za ta̱ ka̱ra̱ agba u ka̱mba̱ shi, n tara ta̱ inama yu una yi kara yi ta̱ muyejin muyejin adama a na n da̱shi ene yi shi. 29Ni i tara zawa'a va̱ yi waru, reve ili i wuya i na i cina yi, i ta̱ tyowetyo a̱nji a̱ uri a nda a̱ tyo uba̱ta̱ wa aza a na a̱ kuwa̱i ɗe na̱ a̱tsumola̱ngu.>

30<<Adama o ndolo zagbain maa gura ka̱mba̱ ya dada va̱ babu mawu'un shi. Wuma wa dada tsu u tu uɓoluloi na̱ wuma wu ulobo'o. 31Nna̱ we ene tsu oɓolo nu ulobo'o shi, u ta̱ kuwa̱. Atsu agbashi a̱ wu u to o'wo a̱tsu ɗa tsu zuwai dada tsu kuwa̱ na̱ tsukutsa adama a̱ a̱tsumola̱ngu. 32Agba waru n yuwaan ta̱ dada tsu nzuwulai n na ma̱ ka̱lyuwa̱ mawu'un, a̱vu n damma yi, <Na̱ n ka̱mba̱a̱ wu na̱ a̱yi shi, lyawa mpasa ma̱ yi n kuru mu.>

33<<Adama o ndolo yuwan ankuri, zagbain, lyawa mo o'wo aagbashi a̱ wu o una̱ wa̱ yi. Reve u ka̱ra̱ a̱ ka̱mba̱ na azakpakpara a̱ yi. 34Cine tsa ɗa maa kawan ka̱mba̱ ya dada va̱ na̱ mawu'un u ri oɓolo na̱ a̱mu shi? Maa gura ka̱lyuwa̱ a̱tsuma̱lima̱ a na e reme dada va̱ shi.>>

Currently Selected:

Ufaru 44: TSW

Highlight

Copy