Ufaru 42

Azakpakpara a̱ Isuhu a̱ ta̱wa̱ ta̱ Masar

1Ana Yakubu uwwai a na ilyalya i ta̱ ɗe e iɗa ya Masar, a̱vu u damma muwun ma̱ yi, <<Adama a̱ nye i ri a̱ nka̱la̱la̱i? 2Mu uwwa ta̱ a na ishina i ta̱ ɗe Masar. 'Ya̱wa̱i ɗe tsa̱ra̱ i tsula ilyalya, tsa̱ra̱ tsu kuwa̱i wan.>>

3A̱vu azakpakpara a̱ Isuhu ele ama kupa a̱ ka̱ra̱ a̱ tyo Masar, adama a tsula ilyalya. 4Agba Yakubu usu u lyungu Banyami mawun ma̱ a̱na̱wun ma̱ Isuhu oɓolo ne ele shi, adama a na u da̱na̱ ta̱ o wovon ta̱wa̱ ili i ro i cina yi. 5Tsundolo tsa ɗa muwun ma Yakubu n 'ya̱wa̱i Masar, na akapi a ama o ro a na a̱ 'ya̱wa̱i adama a tsula ilyalya, adama a na ambulu'u u rawa ta̱ Ka'ana fo.

6Gogo gba Isuhu ɗa zagbain vi iɗa'a, a̱yi ɗa waru za na aa winaa ama ishina e iɗa'a suru. Ana azakpakpara a̱ yi a rawai, reve a̱ kingyo a̱ ka̱ɗa̱to a̱ ma̱ka̱ka̱n ma̱ Isuhu nu urewesu u le e iɗa. 7Ana Isuhu enei a̱za̱ a̱ yi, u reve le ta̱, agba u tara le ta̱ tso omocin. A̱vu we ece le ni igbaranu, <<Te ɗa yu uta̱i?>>

A̱vu a damma, <<E iɗa ya Ka'ana i ɗa tsu uta̱i, tsu ta̱wa̱ ta̱ tsa̱ra̱ tsu tsula ilyalya.>>

8Ko na Isuhu revei a̱za̱ a̱ yi, a̱za̱ a̱ yi e reve yi shi. 9A̱vu Isuhu cuwan na alavu a na u yuwain a aci e le, a̱vu u damma le, <<A̱ɗu aza a matawa mo utyo wi iɗa i ɗa, i ta̱wa̱ ta̱ adama i reve uba̱ta̱ u na iɗa i tsu i ri nu ucira shi.>> 10Reve a̱ usu, <<O'o, zagbain, agbashi a̱ wu a̱ ta̱wa̱ ta̱ adama a tsula ilyalya. 11Suru ntsu muwun m vuma ta̱ n ɗa. Agbashi a̱ wu a̱za̱ a̱ a̱ɓula̱ a ɗa, aza a matawa mo utyo wi iɗa i ɗa shi.>> 12Reve u damma le, <<O'o, i ta̱wa̱ ta̱ adama i reve uba̱ta̱ u na iɗa i tsu i ri nu ucira shi.>>

13A̱vu a damma, <<A̱tsu kupa ne ejere ɗa tsu ri suru suru, muwun n vuma ta̱ e iɗa ya Ka'ana. A̱tsuma̱ a̱ tsu za ta̱ kuwa̱ ta̱ ɗe, mokosoto ma̱ tsu waru, u ta̱ ɗe na̱ dada tsu.>>

14Agba Isuhu gbagba ta̱, <<Cine n dammai, ne ɗa, a̱ɗu aza a matawa mo utyo wi iɗa i ɗa! 15Apa cine a̱a̱ lyungwa̱ ɗu: N kucina ta̱ na̱ wuma wa Firi'awuna, ya̱a̱ ka̱ra̱ shi she na̱ mokosoto ma̱ ɗu ma̱ ta̱wa̱ pa. 16Lyunguyi za ta̱ a̱tsuma̱ a̱ ɗu u 'ya̱wa̱ u ta̱wa̱ na̱ zawa'a ɗu pa. Agba akapi a̱ ɗu, a̱ ta̱ ɓa̱ru ɗu o u'wa wa ali. Ne tsundolo tsa ɗa ee reve ko adanshi a̱ ɗu amayun a ɗa yaa dansa. N kucina ta̱ na̱ wuma wa Firi'awuna a na na̱ ne ɗa shi, n te reve a̱ɗu aza a matawa mo utyo wi iɗa i ɗa!>> 17A̱vu u zuwa le o u'wa wa ali hali rana ta'atsu.

18O urana wa ta'atsu, reve Isuhu damma le, <<Adama a na a̱mu n ta uwwusa wovon wa̱ A̱sula̱, apa ili i na yaa yuwan adama i da̱na̱ wuma: 19Na̱ a̱ɗu a̱za̱ a̱ a̱ɓula̱ a ɗa, lyawa za ta̱ a̱tsuma̱ a̱ ɗu u da̱nu pa a̱tsuma̱ o u'wa wa ali, a̱vu akapi a na a buwai a̱ 'ya̱wa̱a̱ a̱za̱ o u'wa ni ilyalya adama a na a̱ ta̱ ɗe na ambulu. 20A̱vu i ta̱wa̱a̱ mu na̱ mokosoto ma̱ ɗu. Ni i yuwan tsundolo n te reve adanshi a̱ ɗu amayun a ɗa, waru oo una ɗu shi.>> A̱ usu ta̱ a ta yuwan tsundolo.

21Reve a dammulai va̱ni le ne elentsu e le, <<Na amayun, alaki a za tsu a ɗa oo tono tsu, ana wo o'woi tse ene ta̱ a̱tsuma̱lima̱ a na u da̱na̱i o sowuso ana u da̱na̱i a patishi tsu tsu kamba yi, reve tsu 'yuwan a zuwaa yi atsuvu. Adama o ndolo a ɗa a̱tsuma̱lima̱ a nda oo tono tsu.>>

22A̱vu Roben damma le, <<Ashe a̱mu n damma ɗu she i yuwaan mawun mo ndolo ili i ro wan shi? Reve i 'yuwan a zuwaa mu atsuvu. To, gogo tsunda alaki a̱ yi a ɗa a̱ ri oo tono tsu.>> 23E reve a na Isuhu ri a uwwusa ili i na a dansa shi, adama a na u yuwusan ta̱ adanshi na̱ za na a cuɗuwusa adanshi. 24Reve Isuhu vadala a̱ 'ya̱wa̱ upasu u ro, u reme mesun. A̱vu u ka̱mbisa̱ uba̱ta̱ u le u reme adanshi ne ele. A̱vu u tara Saminu a̱tsuma̱ e le a̱vu u zuwa a̱ nla̱ yi e esu e le.

Azakpakpara a̱ Isuhu a̱ ka̱mba̱ ta̱ Ka'ana

25Isuhu zuwa ta̱ o shiton ibuhu ya azakpakpara a̱ yi ni ishina, waru a̱ ka̱mbuwa̱a̱ vuma suru ikebe ya̱ yi a̱tsuma̱ a̱ bufu va̱ yi, waru a ca le ilyalya i na aa lyuwa o ure. Tsundolo tsa ɗa a yuwaan nle. 26A̱vu a tanuwa nloli n le ishina, reve e reme ure.

27Uba̱ta̱ u na e isawain adama aa asa ana za ta̱ a̱tsuma̱ e le u kpa̱tu'wa̱i bufu va̱ yi, adama u ca mololi ma̱ yi ilyalya, a̱vu we ene ikebe ya̱ yi o una̱ u bufu va̱ yi. 28Reve u damma a̱za̱ a̱ yi, <<A̱ ka̱mbuwa̱a̱ mu ta̱ ni ikebe i va̱! Apa le a̱ bufu va̱.>>

A̱vu asuvu e le a̱ riya̱, reve a vadala a uwa nka̱la̱la̱i adansa, <<Ili i ne i ɗa A̱sula̱ a yuwaan tsu tsunda?>> 29Ana a̱ ta̱wa̱i uba̱ta̱ wa dada le Yakubu e iɗa ya Ka'ana a̱vu a damma yi ili i na i cina nle suru, a damma, 30<<Gwamna va Masar yuwaan tsu ta̱ adanshi ni igbaranu, u tara tsu ta̱ aza a na a̱ 'ya̱wa̱i a tawa utyo wi iɗa. 31Agba tsu damma yi ta̱, <A̱tsu ama a̱ a̱ɓula̱ a ɗa, a̱tsu aza a na a̱ ta̱wa̱i a tawa utyo wi iɗa i ɗa shi. 32A̱tsu muwun ma̱ a̱na̱wun kupa ne ejere a ɗa, olobo a dada ta̱. Za ta̱ kuwa̱ ta̱ ɗe, mokosoto ma̱ tsu waru u ta̱ ɗe oɓolo na̱ dada tsu e iɗa ya Ka'ana.>

33<<A̱vu a̱yi vuma'a za na a̱yi ɗa Gwamna vi iɗa'a, u damma tsu, <Apa cine mee reve ko a̱ɗu a̱za̱ a̱ a̱ɓula̱ a ɗa. Lyawai pa vuma ta̱ oɓolo na̱ a̱mu, a̱vu i tara ilyalya adama a̱za̱ o u'wa a̱ ɗu aza a na a̱ ri ɗe na ambulu, a̱vu i ka̱ra̱. 34A̱vu i ta̱wa̱a̱ mu na̱ mokosoto ma̱ ɗu, tsundolo tsa ɗa mee reve a̱ɗu aza a na a ta̱wa̱i a tawa utyo wi iɗa i ɗa shi, agba a̱ɗu a̱za̱ a̱ a̱ɓula̱ a ɗa. Reve n ka̱mbuwa̱a̱ ɗu na̱ za ɗu, waru i ta̱ da̱na̱ a yuwusan awina na atsulu a̱tsuma̱ e iɗa'a.> >>

35Mantsa ma na a̱ zuɗusa̱i ishina i le diga e ibufu i le, a̱vu suru nle e ene ikebe i le pe. Ana ele oɓolo na̱ dada le e enei a̱kutsu e ikebeꞌe, a̱vu a uwwa wovon. 36A̱vu dada le Yakubu damma le, <<A̱mu ɗa i ta̱wa̱yi nu ulambu. Isuhu buwa lo shi, Saminu waru u buwa lo shi, gogo waru Banyami ɗa i cigai i tara. A̱mu ɗa waru za na a uwwusa a̱tsuma̱lima̱ a nda!>>

37A̱vu Roben damma dada le, <<Vu una muwun mo olobo n re n va̱ na̱ n ta̱wa̱a̱ wu na̱ mawun ma̱ wu shi. Lyawa yi u da̱na̱ o ukere u va̱, n ta̱ ta̱wa̱a̱ wu na̱ a̱yi.>>

38Amma Yakubu damma ta̱, <<Mawun ma̱ va̱ ma̱a̱ 'ya̱wa̱ oɓolo na̱ a̱ɗu shi, adama a na mawun ma̱ a̱na̱wun ma̱ yi ma̱ kuwa̱ ta̱ ɗe, a̱yi ɗa goon u buwai wuma. Ni ili i ro i cina yi a̱ɗu a̱tsuma̱ a mmalu n na yaa zama i reme, i ta̱ tyowetyo a̱nji a̱ uri a nda a̱ tyo uba̱ta̱ wa aza a na a̱ kuwa̱i ɗe na̱ a̱tsumola̱ngu.>>

Currently Selected:

Ufaru 42: TSW

Highlight

Copy