Ufaru 41

Isuhu cuɗuwa ta̱ Firi'awuna alavu a̱ yi

1Ana a yuwain a'wan e re, reve Firi'awuna yuwan alavu a na u ri mishin a̱ nge'en mu Uɗolu wa̱ Nilu. 2A̱tsuma̱ a alavu a̱ yi we ene ta̱ inan i sa'ani a̱za̱ o ucuwun a̱za̱ e cindere, o uta̱i o Uɗolu wa̱ Nilu reve e reme alyuna a̱tsuma̱ a apumpu. 3Reve inan i na i ri arambi arakpatsutsu a̱za̱ e cindere waru o uta̱ o Uɗolu'u. Reve e isawan zuzu na̱ a̱za̱ o ucuwu'un. 4Reve arambi arakpatsutsu e ina'an a tama aza a sa'ani a̱za̱ o ucuwu'un! Reve Firi'awuna jiwushin.

5A̱vu nlavu m purisa̱ yi reve u yuwisan alavu e ire. Reve we ene a aakunku o mon ta̱ akita e cindere a̱ga̱za̱ a sa'ani a̱za̱ o umatsun. 6Reve waru akita e cindere o uta̱ a aakunku'un, agba afili a ɗa aza a na upepu wa asana u sowoi. 7Reve afili'i o soɗu a̱ga̱za̱ a sa'ani o umatsun e cindere'e! Reve Firi'awuna jiwisan ɗaɗa u revei alavu a ɗa niyi.

8Ana usana u tawai reve okolo a̱ yi a dama. Reve u ɗe oboci na̱ a̱za̱ o urevu a Masar suru, reve u damma le alavu e re a̱ yi'i. Agba ko vuma ta̱ gura cuɗuwa yi urevu u le shi.

9Ɗaɗa zagbain na a casu mogono ili yo oso dammai, <<Ana'an n cuwan ta̱ nu unusu u va̱. 10A mantsa ma na vu yuwain upan na̱ a̱mu na̱ za vu uzuwusun wo opopofu, vu zuwa tsu ta̱ o u'wa ali wa yali wa̱ a̱za̱ e ipiri i mogono. 11Na aayin a na tsu yuwan ta̱ alavu ra, alavu a koyan ɗa nu urevu wa̱ yi. 12Ulobo wa aza a Yahuda u na u da̱na̱ ta̱ pe oɓolo na̱ a̱tsu, aagbashi a yali ya a̱za̱ e ipiri i mogono i ɗa. Ana tsu damma niyi alavu'u, reve u cuɗuwa tsu urevu wa alavu'u, alavu a koyan ɗa nu urevu wa̱ yi. 13Reve ili biti i kuru cine u damma ntsu. A̱mu a̱ ka̱mba̱to mu ta̱ ulinga u va̱, za vu uzuwusun wo opopofu waru a̱vu a̱ sa̱ga̱do yi o uɗanga.>>

14Reve Firi'awuna lyungu a̱ ta̱wa̱ na̱ Isuhu. Reve a̱ jika̱ a̱ ta̱wa̱ na̱ a̱yi diga o u'wa wa ali. Ana u punai, reve wo oto a̱tugu o ro a̱vu u uwa wi isawan a̱ ma̱ka̱ka̱n mo mogono. 15Reve Firi'awuna damma Isuhu, <<N yuwan ta̱ alavu a na za lo revei ucuɗuwu wa̱ yi shi, agba mu uwwa ta̱ a na na̱ vu uwwa alavu'u, vu ta gura cuɗuwa yi.>>

16Reve Isuhu usu yi, <<A̱mu maa gura shi, A̱sula̱ a ɗa aa gura ca Firi'awuna ucuɗuwu wu uyo'o.>>

17A̱vu u damma yi, <<N yuwan ta̱ alavu a na n shi mishin a̱ nge'en mu Uɗolu wa̱ Nilu. 18A̱vu me ene inan i cindere i sa'ani a̱za̱ o ucuwun o uta̱i pe a̱tsuma̱ o uɗolu'u. A̱vu a uwa utamu wa anlya. 19Reve inan i cindere i ro i ta̱wa̱ ɗe arambi ne etele a alanga. Koto me ene icu'un ya arambi e inan tsundolo a Masar shi. 20A̱vu arambi e inan o ndolo o soɗu a̱za̱ a̱ lipu o ndolo. 21Agba ko ana a tama nle, ko za ee reve a na a tama nle shi, adama a na hali a nda a buwa ta̱ urambu cine a̱ shi urambu nu ufaru. Reve n jiwan.

22<<A̱tsuma̱ a alavu a̱ va̱, me ene ta̱ waru aakunku a̱ ta̱ na̱ a̱ga̱za̱ e cindere aza a na a̱ ri umatsun ne esu a sa'ani a kungwai. 23A̱vu me enishe aakunku a nda na̱ a̱ga̱za̱ e cindere afili, aza a na upepu wa asana u kpanlatoi. 24A̱vu afili'i o soɗu a̱ga̱za̱ e cindere a sa'ani'i. N damma ta̱ oboci ili i nda, agba ko za gura cuɗuwa mu shi.>>

25A̱vu Isuhu damma Firi'awuna, <<Alavu'u ili i ta̱ i ɗa a dansa, A̱sula̱ a damma ta̱ Firi'awuna ili i na waa zama u yuwan. 26Inan i lipu i cindere na̱ a̱ga̱za̱ o umatsun e ishina i cindere'e suru nle o to rocosu a'wan e cindere o ucuwun. Alavu'u ele ra urevu u ta̱ u ɗa le. 27Arambi e inan i cindere a na a̱ ta̱wa̱i na̱ a̱ca̱pa̱ na afili a̱ a̱ga̱za̱ e ishina a na upepu wa asana u kpanlatoi'i, suru nle u to rocosu a'wan e cindere a ambulu.

28<<Ne ɗa u ri tsoyi cine n damma nuwu: A̱sula̱ o roco wu ta̱ ili i na waa zama u yuwan. 29A ta yuwan a'wan e cindere e ilyalya ya̱ a̱bunda̱ lon e iɗa ya Masar suru. 30Agba no o koto ndolo, a'wan e cindere a ambulu a̱ ta̱ kuru, a̱ te icina na a'wan a sa'ani'i suru, ambulu'u a̱ ta̱ lungusa̱ iɗa'a. 31Aa cuwan nu ucuwun wa̱ a̱bunda̱ u na yuwain e iɗa'a shi adama a na ambulu'u a ta suɗuwa lon. 32Uka̱mbisa̱ wa alavu'u, u roco ta̱ A̱sula̱ a ɗa a foɓoi ili'i waru u ta zuwa ili'i i fara nu ujumu shi.

33<<Gogo, lyawa mogono ma ɗangwa vuma na ri nu urevu nu ugbozu, reve u zuwa yi u ɓa̱na̱ iɗa ya Masar. 34Lyawa waru Mogono ma zuwa azagbain e iɗa'a, tsa̱ra̱ o ɓoloto za ta̱ a̱tsuma̱ ozo o ton yi itana yu uɗuma̱ e iɗa ya Masar suru. Ne ɗa aa yuwan a a'wan e cindere a na a̱ ri ni ilyalya'a. 35Lyawa o ɓoloto ilyalya ya a'wan a sa'ani a na a̱ ta̱wa̱ suru. Reve a zuwa ishina'a o ucira wa Firi'awuna e ilyuci i gbagbain adama e ilyalya. Reve e piri le. 36A ta zuwa ilyalya i ndolo adama e iɗa'a adama a a'wan a ambulu a na a̱ ri lo a̱ ta̱wa̱ e iɗa ya Masar. A̱yi nda u ta putsa na ambulu a̱tsuma̱ e iɗa'a.>>

Masar o ukere wa̱ Isuhu

37Reve Firi'awuna na azagbain a̱ yi suru a̱ usu a̱sa̱la̱'a̱. 38A̱vu u damma azagbain a̱ yi, <<Tsu ta̱ tsura̱ cu'un va̱ Isuhu, za na Ruhu va̱ A̱sula̱ ri a̱tsuma̱ a̱ yi?>>

39Reve Firi'awuna damma Isuhu, <<Ana wo o'woi A̱sula̱ o roco nuwu ili i nda suru, to, za lo na ri nu urevu nu ugbozu tsa̱ wu shi. 40Lyawa vo o'wo zagbain vu u'wa u va̱, waru ama a̱ va̱ suru a̱ ta̱ kuru ili i na vu dammai. E ekere o ootogu o tsugono tsa ɗa goon maa la'a wu tsugbain.>>

41A̱vu u damma Isuhu, <<N zuwa wu ta̱ vo o'wo zagbain e iɗa ya Masar suru.>> 42Reve Firi'awuna foɗo makawani mo urotsu a aakatsu a̱ yi reve wo otowo Isuhu a aakatsu. Reve waru wo oto yi utugu wo okoro u sa'ani, a̱vu wo oto yi ili i yinlu i zinariya a̱ yinlu. 43Reve u zuwa Isuhu kumba keke vi ido va̱ yi o una̱ wu za tsugbain ire va̱ yi. Reve a̱dogari a uwa yisali e elime a̱ yi a dansa, <<Buwayi ure!>> Ne ɗa u zuwai Isuhu aci e iɗa ya Masar suru.

44Reve Firi'awuna damma Isuhu, <<A̱mu ɗa Firi'awuna, amma nna̱ vu damma shi za lo a̱a̱ 'ya̱sa̱n ukere ko anana e iɗa ya Masar shi.>> 45Reve u zuwaa Isuhu aala Zafera Faneya. Reve u ca yi Asena usheli wa Fotifa ganu lyuci va On wo o'wo ka va̱ yi. Reve Isuhu ka̱nda̱ruwa̱ iɗa ya Masar suru.

46Isuhu da̱na̱ ta̱ na a'wan mata'atsu ana u remei a lingasaa Firi'awuna, mogono ma Masar. A̱vu Isuhu lyawa ukobu u mogono'o, a̱vu u ka̱nda̱ruwa̱ iɗa'a suru. 47A̱tsuma̱ a a'wan o utsuru o ndolo reve iɗa'a i matsan ilyalya lon. 48Reve Isuhu ɓoloto ilyalya ya a'wan i cindere o ndolo i na a yuwain e iɗa ya Masar suru reve u zuwa le e ilyuci i gbagbain. A̱ lyuci biti u zuwa ta̱ ilyalya i na a̱ tsura̱i a̱ a̱ɗuma̱ a na a̱ ri lo uka̱nda̱ruwu na̱ a̱yi. 49Reve Isuhu zuwa ilyalya ya̱ a̱bunda̱ lon, tsa̱ a̱bunda̱ a ayuwun a̱ nge'en m mala. A yuwan ta̱ a̱bunda̱ hali u lyawa mekece adama a na u la'a ta̱ ucira u na ee kece. 50Kafu a'wan a ambulu a rawa, a matsaan ta̱ Isuhu olobo e re, aza a na Asena usheli wa Fotifa ganu va On matsaan niyi. 51Reve Isuhu zuwaa ulobo wu ufaru wa̱ yi aala Manase, adama a na u damma ta̱, <<A̱sula̱ a zuwa ta̱ mi icina na̱ a̱tsuma̱lima̱ a̱ va̱ suru nu u'wa wa dada va̱ suru.>> 52Ulobo we ire waru reve u ca yi aala Ifiramu, adama a na u damma ta̱, <<A̱sula̱ a ca mu ta̱ limatan e iɗa i na n sowoi a̱tsuma̱lima̱.>>

53Ana a'wan e cindere a na a uwwai uyo'o wi ilyalya o kotoi e iɗa ya Masar, 54a̱vu e teme a'wan e cindere a ambulu cine Isuhu dammai. A̱vu a yuwan ambulu a akapi e iɗa i na i buwai, agba e iɗa ya Masar ilyalya i da̱na̱ ta̱ pe. 55Ana ambulu a̱ ɓa̱ruyi iɗa ya Masar suru, reve ama'a e showen Firi'awuna adama e ilyalya. Reve Firi'awuna damma aza a Masar suru, <<'Ya̱wa̱i ya̱ Isuhu i yuwan ili i na suru u damma nɗu i yuwan.>>

56Ana ambulu a rawai uba̱ta̱ biti e iɗa'a, reve Isuhu kpa̱tu'wa̱ mpon mi izuwa mi ishina. A̱vu u winaa aza a Masar ilyalya, adama a na ambulu a suɗuwa ta̱ e iɗa ya Masar suru. 57Reve uvaɗi ma̱ɓula̱ u ta̱wa̱ Masar adama a tsula ilyalya uba̱ta̱ wa̱ Isuhu, adama a na ambulu a̱ shi ta̱ a suɗuwa o uvaɗi suru.

Currently Selected:

Ufaru 41: TSW

Highlight

Copy