Ufaru 40
40
Isuhu cuɗuwa ta̱ Alavu e re a̱ a̱za̱ e ipiri
1Ana a̱yi ndolo kotoi, reve zagbain na tsu guza̱a̱ mogono ili yo oso oɓolo na̱ zagbain na tsu zuwa̱a̱n mogono opopofu a yuwaan zagbain le mogono ma Masar unusu. 2Reve Firi'awuna yuwan upan lon na azagbagbain e re a̱yi'i za na tsu guza̱a̱ yi ili yo oso oɓolo na̱ za na tsu zuwa̱a̱n yi opopofu. 3A̱vu u zuwa le o u'wa wa ali wa yali wa̱ a̱za̱ e ipiri i mogono uba̱ta̱ u na Isuhu da̱na̱i. 4Yali ya̱ a̱za̱ e ipiri i mogono'o u zuwa le ta̱ e ekere a̱ Isuhu.
Ana a jimanuyi pe mantsa kpara, 5a̱tsuma̱ a ayin o ro, reve ele ra; za na tsu ca mogono ma Masar mokkoto me ili yo oso oɓolo na̱ za na tsu zuwa̱a̱n yi opopofu a yuwan alavu ele pe a̱tsuma̱ o u'wa wa ali'i, za suru na alavu a̱ yi ko'o waru alavu suru nu ucuɗuwu wa̱ yi.
6Ana Isuhu ta̱wa̱i uba̱ta̱ u le nu usana, reve we ene urewesu u le ulukutu. 7Reve we ece azagbain e re a Firi'awuna'a aza a na a da̱na̱i oɓolo na̱ a̱yi o u'wa wa ali o u'wa wu zagbain va̱ yi'i a na, <<Nye i zuwai urewesu u ɗu u ri ulukutu ana'an?>>
8A̱vu a̱ usu yi, <<A̱tsu ra tsu yuwan ta̱ alavu na ayin o yon, agba za pa na waa cuɗuwa tsu alavu'u shi.>>
Reve Isuhu damma le, <<Uba̱ta̱ wa̱ A̱sula̱ a ɗa a̱ tsu tsura̱ ucuɗuwu shi? Yuwain ankuri, damma numu alavu'u.>>
9Reve za vu ucasu wi ili yo oso'o fara damma alavu a̱ yi, u damma, <<A̱tsuma̱ a alavu a̱ va̱, me ene ta̱ ataci a ina̱bi elime a̱ va̱. 10Ataci'i u da̱na̱ ta̱ ne eten a ta'atsu. Ana a̱ kutsa̱i yipa̱lu reve a̱ tsushin yipa̱lu, a̱vu muwun ma ataci'i mi ina. 11N da̱na̱ ta̱ uguzu na̱ mokkoto ma masayan ma̱ ina̱bi ma Firi'awuna o ukere, reve n tara umatsun wa ataci'i a̱vu n kpoko pe o mokkoto'o. A̱vu n zuwaa Firi'awuna o ukere wa̱ yi.>>
12A̱vu Isuhu damma yi, <<Apa nda ucuɗuwu wa alavu'u, urevu we eten a ta'atsu'u a̱yi ɗa rana ta'atsu. 13A̱tsuma̱ a rana ta'atsu Firi'awuna to uta̱a̱ wu a̱tsuma̱ o u'wa wa ali. Reve u ka̱mbuwa̱a̱ wu na̱ tsugbain tsa̱ wu, vu ta zuwaa Firi'awuna mokkoto me ili yo oso o ukere wa̱ yi cine vu yuwusain. 14N te e ipati ya̱ wu ni ili i sa'ani i nda i cina wu, vu cuwan na̱ a̱mu. Vu yuwan adanshi a̱ va̱ uba̱ta̱ wa Firi'awuna, a̱vu vu pati yi wu uta̱a̱ mu pa. 15Adama a na wivu u ɗa e iva̱ numu diga e iɗa i va̱, e iɗa yi Mmaci ma Ibrahim, gogo gba a̱mu ɗa nda o u'wa wa ali, agba n yuwan ili i na wu ntsayi a zuwa mu pa shi.>> 16Ana zagbain vu uzusun wo opopofu enei alavu o ufaru a̱ ta̱ nu urevu u sa'ani, reve u damma fo Isuhu alavu a̱ yi. A̱vu u damma, <<A̱tsuma̱ a alavu a̱ va̱, me ene ta̱ okondo a ta'atsu o opopofu utanuwu a aaci a̱ va̱. 17A̱tsuma̱ a aasaka a na a̱ da̱na̱i zuva suru suru, me ene ta̱ pe ili uzuwun icu'un cu'un a na a̱ zuwa̱yin Firi'awuna, amma reve nnunu n ka̱ra̱ a̱ ka̱ɗa̱sa̱ le pe o ookondo a na n da̱na̱i utanuwu na̱ a̱yi.>>
18Reve Isuhu damma yi, <<Apa nda ucuɗuwu wa alavu'u, urevu wo okondo a ta'atsu'u a̱yi ɗa rana ta'atsu. 19A̱tsuma̱ a rana ta'atsu diga gogo, Firi'awuna to koɗo aaci a̱ wu, reve u sa̱ga̱do lipu va̱ wu o uɗanga. Nnunu n ɗa gba ma̱ ka̱ɗa̱ lipu va̱ wu.>>
20O urana wa ta'atsu a na aa cuwan nu urana u na a matsain Firi'awuna, reve u foɓoo agbashi a̱ yi suru a̱buki. Reve wu uta̱a̱ zagbain na tsu guza̱a̱ yi ili yoso na̱ zagbain vu uzusun wo opopofu, reve a̱ ta̱wa̱ ne ele uba̱ta̱ wa azagbain a̱ yi. 21Reve u ka̱mbuwa̱ zagbain ma̱guza̱ mo mokkoto me ili yo oso tsugbain tsa̱ yi, reve u zuwaa Firi'awuna mokkoto'o o ukere. 22Amma a̱vu u sa̱ga̱do zagbain vu uzusun wo opopofu, cine Isuhu dammai ɗe.
23Agba suru na̱ ne, a̱vu za na a̱ guza̱sa̱ Firi'awuna mokkoto'o wi icina na a ɗa a̱ Isuhu.
Currently Selected:
Ufaru 40: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
