Ufaru 39

Isuhu na̱ ka va Fotifa

1Reve gba a tara Isuhu a̱ tyo Masar. A̱vu Fotifa vuma va Masar za ta̱ a̱tsuma̱ a azagbain a Firi'awuna, yali za na da̱na̱i zagbain va aza a na a̱ da̱na̱i e ipiri o u'wa u mogono Firi'awuna, u tsula yi e ekere a aza a Isma'ila aza a na a̱ 'ya̱wa̱i ɗe na̱ a̱yi.

2A̱sulazuva a̱ da̱na̱ ta̱ oɓolo na̱ Isuhu, waru u tsura̱ ta̱ ulyuwu we elime a̱tsuma̱ o u'wa wu zagbain va̱ yi vuma va Masar. 3Ana Fotifa ta̱wa̱ ta̱ u revei a na A̱sulazuva a̱ ri oɓolo na̱ Isuhu, waru A̱sulazuva a ca yi ta̱ ulyuwu wa elime a̱tsuma̱ e ili i na u yuwain biti. 4A̱vu Isuhu tsura̱ icigi e ekere a za vu u'wa va̱ yi, a̱vu wo o'wo a yuwusaan yi ulinga. A̱vu Fotifa zuwa yi wo o'wo zagbain a̱tsuma̱ o u'wa wa̱ yi, waru ili i na u da̱na̱i ne ele suru u zuwa le e ekere a̱ yi. 5Diga o urana u na u zuwai Isuhu zagbain vu u'wa'a ni ili i na u da̱na̱i ne ele suru, reve A̱sulazuva a̱ ka̱ra̱ a zuwusaa u'wa wa Fotifa vuma va Masar suru aba'un adama a̱ Isuhu. A̱vu ili suru i ka̱ra̱ a̱ walasa mejege a̱tsuma̱ o u'wa'a na̱ a̱ a̱ɗuma̱. 6Ɗaɗa u zuwai ili i na u ri na̱ a̱yi suru e ekere a̱ Isuhu. U da̱na̱ a majiyan me ili i ro shi, she ili i na waa lyuwa.

Isuhu ulobo u sa'ani u ɗa u da̱na̱i waru u tsura̱ ta̱ uruma. 7Ana a tarai mantsa wa'a, reve ka vu zagbain va̱ yi ka̱ra̱ a zuwusaa yi esu, reve u damma, <<Ta̱wa̱ vu von na̱ a̱mu.>>

8A̱vu Isuhu 'yuwan, reve u damma yi, <<Zagbain va̱ ri a majiyan me ili i ro o u'wa u nda shi, waru u lyawa ta̱ ili suru a̱tsuma̱ o u'wa u nda e ekere a̱ va̱. 9Ko vuma la'a mu tsugbain a̱tsuma̱ o u'wa u nda shi! Waru u putsa mu ni ili i ro shi she a̱vu, adama a na a̱vu ka va̱ yi ɗa. Adama a̱ nye maa yuwan cu'un va̱ a̱ba̱jini e iwuya i nda, n yuwaan A̱sula̱ unusu?>> 10Reve u ka̱ra̱ o tonishi yi ana usana suru, waru u 'yuwan a yuwan tsipere na̱ a̱yi a̱vu waru u 'yuwan a̱ da̱nu na̱ a̱yi.

11Urana u ro, reve Isuhu ka̱ra̱ a uwa a̱tsuma̱ o u'wa adama u yuwan ulinga wa̱ yi, waru ko vali ta̱ a̱tsuma̱ a aza a na aa yuwusan ulinga pe o u'wa u da̱na̱ pe shi. 12A̱vu ka'a u reme yi utugu, adansa, <<Vu von na̱ a̱mu.>> Amma a̱vu Isuhu lyawaa yi utugu'u o ukere, a̱vu u suma o uta̱ a alanga.

13Ana we enei u lyawaa yi ta̱ utugu wa̱ yi o ukere wa̱ yi a̱vu u suma o uta̱ a alanga, 14Reve u ɗe agbashi o u'wa a̱ yi na̱ yisaali, a̱vu u damma le, <<Ka̱lyuwa̱i vali va̱ ta̱wa̱a̱ tsu ta̱ na̱ mmaci ma Ibrahim, a̱yi ɗa nda a yuwusaan tsu ulamu! U ta̱wa̱ ta̱ uba̱ta̱ u va̱ tsa̱ra̱ u von na̱ a̱mu, ɗaɗa n yuwain yisaali nu ucira. 15Ana wu uwwai n yuwain yisaali n 'ya̱sa̱in uɗyo, ɗaɗa u lyawaa mu utugu wa̱ yi a̱vu u suma o uta̱ a alanga.>>

16A̱vu u zuwa utugu'u ya̱'a̱ yi she na zagbain va̱ Isuhu ka̱mba̱i o u'wa. 17Reve u ka̱mbuwa̱ yi ili i na i farai u damma, <<Aagbashi a nda, Imaci ya Ibrahim a na vu ta̱wa̱a̱ ntsu, u ta̱wa̱ ta̱ uba̱ta̱ u va̱ adama u zami mu. 18Amma ana n yuwain yisaali n 'ya̱sa̱in uɗyo, ɗaɗa u sumai o uta̱ a alanga u lyawaa numu utugu wa̱ yi o ukere u va̱.>>

19Ana zagbain va̱ Isuhu uwwai adanshi a ka va̱ yi a na, <<Ili i na aagbashi a̱ wu a yuwain na̱ a̱mu ɗa ndolo,>> a̱vu u yuwan upan lon. 20A̱vu zagbain va̱ Isuhu tara yi reve u zuwa yi o u'wa wa ali u na ngono maa zuwusa ama a na a zuwusa o u'wa wa ali u le.

Agba Isuhu pe o u'wa wa ali'i, 21A̱sulazuva a̱ da̱na̱ ta̱ oɓolo na̱ a̱yi, a̱vu u roco yi icigi waru u ca yi isa'ani e ekere a zagbain va̱ a̱za̱ o u'wa wa ali'i. 22Reve zagbain vu u'wa wa ali'i u zuwa Isuhu wo o'wo zagbain va aza a na a̱ ri pe suru, waru a̱yi ɗa aci e ili i na aa yuwan pe suru. 23Zagbain vu u'wa wa ali'i, u zuwa esu e ili i na i ri a mmalu e ekere a Isuhu shi, adama a na A̱sulazuva a̱ da̱na̱ ta̱ oɓolo na̱ a̱yi. Waru ili i na u yuwain suru A̱sulazuva a tsu ca yi ta̱ ulyuwu we elime.

Currently Selected:

Ufaru 39: TSW

Highlight

Copy