Ufaru 38

Yahuza na̱ Tama

1A mantsa mo ndolo Yahuza shi ta̱ lyawa a̱za̱ a̱ yi, a̱vu u ka̱ra̱ a̱ cipa̱ u da̱nu zuzu na̱ vuma na a̱ tsu ɗe Hira, vuma va Adulam. 2Ɗe ɗa Yahuza ga'ain nu usheli wa Ka'ana za na a tsu ɗe dada va̱ yi Shuwa. Reve u zuwa yi ɗaɗa u voyin na̱ a̱yi, 3a̱vu wi isawan a̱a̱tsuma̱, a̱vu u matsan mawun mo ulobo, a̱vu u ca yi aala Eri. 4Reve u yuwisan a̱a̱tsuma̱ reve u matsisan ulobo reve u ɗe yi Onana. 5Reve waru u yuwisan a̱a̱tsuma̱ o ro, a̱vu u matsisan ulobo waru, a̱vu u ɗe yi Shela. Yahuza da̱na̱ ta̱ Kezibi a mantsa ma na a matsain Shela.

6Reve Yahuza taraa mawun mo ufaru ma̱ yi Eri ka, aala a̱ yi Tama. 7Agba Eri mawun mo ufaru ma Yahuza vuma vi iwuya i ɗa u da̱na̱i e ekere a̱ A̱sula̱, reve A̱sula̱ o una yi.

8Reve Yahuza damma Onana zawa'a ve Eri, <<'Ya̱wa̱ vu von na̱ ma̱runa̱ ka vu zakpara va̱ wu. Reve vu yuwan ili i na yi ntsaayi o una̱ wu zakpara va̱ wu adama vu tsura̱a̱ yi limatan.>> 9Amma Onana reve ta̱ a na muwu'un moo o'wo muwun ma̱ yi shi. A̱yi ɗa i zuwai nu u von na̱ a̱yi, a̱vu wo oco tsali tsa̱ yi a alanga, adama u tsura̱a̱ zakpara va̱ yi limatan wan. 10Ili i na gba u yuwain u yo'onoto A̱sula̱ okolo shi, reve A̱sula̱ o unai fo.

11Reve Yahuza damma jene va̱ yi Tama, <<Vu ka̱mba̱ o u'wa wa dada va̱ wu a̱vu vu yuwan nden n tsura̱na̱ she na̱ mawun ma̱ va̱ Shela kungwa.>> U damma ta̱ ne adama a na u da̱na̱ ta̱ a uwwusa wovon u na Shela fo wa̱ kuwa̱ cine azakpakpara a̱ yi a̱ kuwa̱i. Adama o ndolo a ɗa Tama ka̱ra̱i a̱ ka̱mba̱ o u'wa wa dada va̱ yi a̱vu u da̱nu ɗe.

12Ana a tarai mantsa, reve ka va Yahuza usheli wa Shuwa u kuwa̱. Ana rana va̱ a̱tsumola̱ngu adama o ukwisa̱ wa̱ yi o kotoi, reve Yahuza ni i'utsa̱ ya̱ yi Hira vuma vi iɗa ya Adulam a̱ 'ya̱wa̱ ya Timna, uba̱ta̱ u na ama a na a punusan ikyon ya̱ yi a̱ ri. 13Ana a dammai Tama a na, <<A̱sha̱wa̱ɗu a̱ ta̱ ɗe a̱ tyo Timna u puna ikyon ya̱ yi,>> 14a̱vu u foɗo itana i tsuruna̱ tsa na u shi wotowu ne ele, reve wu pala urewesu wa̱ yi na̱ mamuna, a̱vu u da̱nu o u'uwata wa Inayi, lyuci na ri o ure a̱ tyo Timna. Adama a na u reve ta̱ a na Shela kungwai ɗe agba a zuwa yi wo olo yi shi.

15Ana Yahuza ene niyi, reve u tara yi gashi aashakala a ɗa, adama a na wu palai urewesu wa̱ yi. 16Reve u 'ya̱wa̱ zuzu na̱ a̱yi a̱ nge'en mu ure'e reve u damma yi, <<Ta̱wa̱ n von na̱ a̱vu.>> U damma yi ta̱ ne adama a na u shi u reve a na jene va̱ yi ɗa shi.

A̱vu u usu yi, <<Nye i ɗa gba vaa ca mu tsa̱ra̱ vu von na̱ a̱mu?>>

17Reve u damma yi, <<N ta̱ lyunguwa̱ wu na̱ megbgbele a̱tsuma̱ e mgbele n va̱.>>

A̱vu Tama damma yi, <<U yuwan ta̱, vu ta ca mu ili i na maa zuwa na wo o'wo nzuwulai hali she na̱ vu lyungu na̱ megbgbele'e?>>

18A̱vu u usu, <<Cu'un vu urotsu u ne u ɗa maa caa wu?>>

Reve Tama damma, <<Iliyinlu i na i ri na aala a̱ wu usa̱ga̱dowu a̱ yinlu ya̱ wu oɓolo na aaɗanga a mmalu ma̱ wu.>> A̱vu u ca yi ele suru. A̱vu u von na̱ a̱yi, a̱vu gba u reme a̱a̱tsuma̱. 19A̱vu Tama 'yon u ka̱ra̱ a̱ ka̱mba̱ o u'wa wa dada va̱ yi, a̱vu u palu'wa mamuna ma na u palai urewesu wa̱ yi, a̱vu wo otowiso itana i tsuruna̱ tsa̱ yi.

20Reve Yahuza zuwa i'utsa̱ ya̱ yi vuma va Adulam u tara megbgbele u 'ya̱wa̱a̱ ka'a, a̱vu u ushi urotsu u na u shi u ca niyi. Agba we ene yi shi. 21A̱vu we ece ama o ro a̱tsuma̱ a Inayi, <<A̱ te aashakala a̱ a̱a̱'isa̱ a na a̱ da̱na̱i pa a̱ nge'en mu ure nden?>>

A̱vu ama'a a̱ usu yi, <<Aashakala o lo a na a̱ tsu da̱nu pa shi.>> 22Reve u ka̱ra̱ a̱ ka̱mba̱ uba̱ta̱ wa Yahuza a̱vu u damma yi, <<Me ene yi shi. Waru ama a na a ri lo uba̱ta̱'a̱ a damma aashakala a̱ a̱a̱'isa̱ o lo a na a̱ tsu da̱nu lo shi.>>

23A̱vu Yahuza damma <<Lyawa yi u guza̱ itana'a, adama tso o'wo ili yi izo'oshi wan. N yuwan ta̱ ukadu adama n tsupa yi na̱ megbgbele agba me ene yi shi.>> 24Ana a yuwain woto ta'atsu, reve a damma Yahuza, <<To jene va̱ wu Tama ta yuwusan tsushakala, waru adama o ndolo u yuwan ta̱ a̱a̱tsuma̱.>>

A̱vu Yahuza damma, <<Uta̱a̱ niyi reve i kula̱to yi?>> 25A mantsa ma na a tara niyi o uta̱, reve u lyungu ikaka a̱ tyo uba̱ta̱ wa̱ a̱sha̱wa̱le. <<Vuma na ri ni itana i nda a̱yi ɗa u yuwan numu a̱a̱tsuma̱. Ka̱lyuwa̱ iliyinlu na aala a na a̱ ri ɗe na aaɗanga a mmalu a nda ve ene ko vu te reve aza a zane ɗa.>>

26A̱vu gba Yahuza reve le a̱vu u damma, <<U la'a mu ta̱ mejege, ana wo o'woi n ca yi mawun ma̱ va̱ Shela wo o'wo vali va̱ yi shi.>> Agba u da̱shi von na̱ yi shi.

27Ana mantsa ma na waa matsan ma yuwain, reve wo o'wo mpishe n ɗa. 28Ana waa matsan le, reve za ta̱ le canana ukere wa̱ yi alanga. A̱vu ka ma̱guza̱ ma limatan ma̱ nla̱ a̱punda̱ a̱ shili o ukere'e, adansa, <<A̱yi nda a̱yi ɗa a fara matsain.>> 29Amma a̱vu u rono ukere'e u ka̱mbuwa̱, a̱vu a fara matsan mawun ma̱ a̱na̱wun ma̱ yi mo ulobo. A̱vu ka ma̱guza̱ ma limata'an u damma, <<Tsunda tsa ɗa vu ɓosoi o uta̱!>> A̱vu e ɗe aala a̱ yi Pere,#38:29 Urevu wa aala'a a̱yi ɗa, <<Moɓoso o uta̱.>> 30Ana a̱yi ndolo kotoi, reve mawun ma̱ a̱na̱wun ma̱ yi ma na a̱ nla̱yi a̱punda̱ a shili mo uta̱, reve e ɗe yi Zera.#38:30 Urevu wa Zera ta gura o'wo <<Ma̱ɗiya̱>> ko <<ekan>>

Currently Selected:

Ufaru 38: TSW

Highlight

Copy