Ufaru 33
33
Yakubu na̱ Isuwa ga'ain
1Ana Yakubu 'ya̱sa̱in aci, reve we ene Isuwa a̱ ta̱wa̱ diga alanga na ama ukpakuna̱shi (400) a̱ yi. Ɗaɗa u ne'eshein Liyatu na̱ Rahila na agbashi a̱ a̱ma̱ci e re muwu'un. 2Reve u fara zuwa agbashi e re'e na̱ muwun n le elime, reve u kuru na̱ Liyatu na̱ muwun ma̱ yi, a̱vu Rahila kuru o ukosu na̱ Isuhu. 3A̱vu Yakubu uwa elime e le, a̱yi a mmalu a̱vu u ka̱ɗa̱tosu urewesu e iɗa hali toto ucindere hali u rawa ya Isuwa. 4Amma a̱vu Isuwa suma u ga'an na̱ a̱yi. Reve u zuwa ekere a̱ yi a̱ yinlu ya̱ yi a̱vu u katala yi a̱vu e reme mesun. 5Ana Isuwa 'ya̱sa̱in aaci we enei a̱ma̱ci na̱ muwun reve we ece, <<Nan zane ɗa nda oɓolo na̱ a̱vu'u?>> Reve Yakubu usu, <<Ele ɗa muwun n na A̱sula̱ ni isa'ani ya̱ yi u ca numu a aagbashi a̱ wu.>> 6Reve a̱ma̱ci a̱ yi e re agbashi na̱ muwun n le a rawa reve a̱ kingyo a̱ ka̱ɗa̱to urewesu e iɗa. 7Reve Liyatu kuru na̱ muwun ma̱ yi, a̱vu a̱ kingyo a̱ ka̱ɗa̱to urewesu e iɗa. O ukosu reve Isuhu na̱ Rahila a̱ kuru, a̱vu a̱ kingyo a̱ ka̱ɗa̱to urewesu e iɗa. 8A̱vu Isuwa damma, <<Oɓolo oɓolo a na n ga'ain ne ele gba nye i ɗa majiyan ma̱ wu?>> A̱vu Yakubu usu, <<Adama n tsura̱ isa'ani e ekere a̱ wu zagbain va̱.>> 9Agba a̱vu Isuwa damma, <<Zawa'a va̱, n ta̱ ni ili i na i rawa numu. Guza̱ ili ya̱ wu.>> 10A̱vu Yakubu usu, <<O'o, yuwan ankuri n na̱ n tsura̱ isa'ani e ekere a̱ wu, ushi le uneꞌe u va̱ u ɗa, adama a na menee mo urewesu ma̱ wu ya̱'a̱ va̱ gashi me ene ta̱ urewesu wa̱ A̱sula̱ na̱ cine vu usu numu. 11N te ipati ya̱ wu vu ushi uneꞌe u na n ta̱wa̱a̱ nuwu, adama a na A̱sula̱ o roco mu ta̱ isa'ani, a̱vu u ca mu ili i na n cigai suru.>> Adama a na Yakubu kakai, reve Isuwa ushi. 12A̱vu Isuwa damma, <<Tsu foɓo tsu reme ure, a̱mu n ta wala elime a̱ ɗu.>> 13Amma a̱vu Yakubu damma yi, <<Zagbain va̱, vu reve muwu'un koto m gbama shi, waru oɓolo e ikyon na̱ mgbele ni inan a̱ ta̱ na̱ muwun n na maa apusa maani. Nna̱ a̱ gba̱ra̱ le nu ucira o urana u ta̱ a̱ ta̱ kuwa̱ suru. 14Yuwan ankuri zagbain va̱, wala elime a̱ tsu, reve n kuru wu ben na̱ mmalu mi ikyon na̱ mgbele ni inan na̱ muwu'un, hali n cina wu a Seyi.>> 15A̱vu Isuwa usu, <<Lyawa n lyawa ama o ro oɓolo na̱ a̱vu.>> Reve Yakubu usu, <<Cine vaa yuwan tsundolo? Isa'ani i na n tsura̱i e ekere a̱ wu yi ntsa ta̱.>> 16Ɗaɗa Isuwa remei ure wa̱ yi a̱ ka̱mba̱ Seyi o urana u ndolo. 17Amma a̱vu Yakubu ka̱ra̱ a̱ tyo Sukot ɗe ɗa u suwai u'wa wa̱ yi na̱ muva̱li adama e iliyamunga ya̱ yi. A̱yi ɗa i zuwai e ɗeyi uba̱ta̱'a̱ Suko.#33:17 Urevu wo Sukot u ɗa muva̱li. 18Ana Yakubu lyawai Fada Aram reve u rawa a̱ lyuci va Shekem a̱tsuma̱ a Ka'ana lafiya, reve u va̱la̱ zuzu na̱ lyuci'i. 19A̱vu u tsula uba̱ta̱ e ekere a̱ muwun ma Hamor dada va Shekem ni ikebe i azurufa ukpaku (100) uba̱ta̱ u na u shuwa̱i oogodo a̱ yi. 20Lo ɗa u suwai masa'a, reve u ɗe yi El Elohi Isra'ila. #33:20 Urevu wa̱ yi u ɗa A̱sula̱ a Isra'ila.
Currently Selected:
Ufaru 33: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
