Ufaru 32
32
Yakubu foɓo ta̱ na waa ga'an na̱ Isuwa
1Ana Yakubu remei ure a̱ ka̱mba̱ o u'wa a̱vu nlingata ma̱ A̱sula̱ n ta̱wa̱ ya̱'a̱ yi. 2Ana Yakubu ene nle, reve u damma, <<Nda uva̱la̱ta̱ wa̱ a̱soja a̱ A̱sula̱ a ɗa!>> Ɗaɗa u zuwayi uba̱ta̱'a̱ ala Mahanayim.#32:2 Urevu wa̱ yi na̱ Tsuyahuda a̱yi ɗa <<Nda̱na̱ta̱ n re.>>
3Yakubu lyungu ta̱ nlingata elime a̱ yi uba̱ta̱ wa Isuwa mawun ma̱ a̱na̱wun ma̱ yi, upasu wa Seyi e iɗa ya Edom. 4U damma le ta̱ a na, <<Apa nda ili i na yaa damma zagbain va̱ Isuwa, <Aagbashi a̱ wu Yakubu a damma ta̱, n yuwan ta̱ nden n limocin na̱ Laban waru gogo n ka̱mba̱ ta̱. 5N ta̱ ni inan, na̱ nloli ni ikyon, na̱ mgbele, na agbashi ali na̱ a̱ma̱ci. N ta̱ lyungusa̱a̱ zagbain va̱ ni ikaka i nda a zuwusa okolo n ta̱ tsura̱ isa'ani e ekere a̱ wu.> >>
6Ana nlingata'a n ka̱mba̱i reve a damma Yakubu, <<Tsu 'ya̱wa̱ ta̱ uba̱ta̱ wa Isuwa zakpara va̱ wu, waru u ta̱ lo o ure a ga'aton wu na ama ukpakuna̱shi (400).>>
7Yakubu uwwa ta̱ wovon lon reve u dama, ɗaɗa u ne'eshein ama a na a̱ ri oɓolo na̱ a̱yi suru, no oɓolo e ikyon na̱ mgbele ni inan na̱ arakumi ba̱ta̱ re. 8U yuwan ta̱ majiyan, <<Nna̱ Isuwa kototo oɓolo a̱ ta̱, za na buwai ta la'a.>>
9Reve Yakubu yuwan avasa u damma, <<A̱sula̱ a Ibrahim kaka vali va̱, na̱ dada va̱ Ishiyaku, A̱sulazuva, za na damma numu, <Ka̱mba̱ o u'wa uba̱ta̱ wa ama a̱ wu, waru n ta zuwa wu vu lyuwa elime.> 10A̱mu aagbashi a̱ wu mu ntsaa vu roco mu icigi na̱ a̱ɓula̱ a na vu roco numu suru shi. Ana n lyawai u'wa aaɗanga a ɗa goon m pasayi Urudu, gogo gba a̱yi ɗa nda mo o'woi oɓolo e re. 11N te ipati ya̱ wu, vu wawa mu e ekere a Isuwa zakpara va̱. N ta uwwusa wovon u na wa̱a̱ ta̱wa̱ wu una mu, na̱ nan mma oɓolo na̱ muwun n le. 12Agba vu yuwan ta̱ nzuwulai, <N ta zuwa ili i wala mejege, reve n zuwa limatan va̱ wu bala cine vu revei wuyun wu nge'en m mala za vuma aa gura kece shi.> >>
13Reve wa asa lo na ayin o ndolo, a̱vu u kene a̱tsuma̱ e ili i na u ri na̱ a̱yi adama u ca zakpara va̱ yi Isuwa uneꞌe. 14U kene ta̱ a̱na̱wun e mgbele ukpaku ure (200), na̱ nga̱ji ushin, ni ikyon ukpaku ure, (200) na̱ a̱giri'i ushin, 15na̱ a̱na̱wun a arakumi mata'atsu na̱ muwun n le, na̱ a̱na̱wun e inan amunga, no ogono kupa, na̱ a̱na̱wun o nloli ushin, no ogono kupa. 16Reve u ne'eshen le e ekere a agbashi a̱ yi oɓolo oɓolo, a̱vu u damma, <<Uwai elime a̱ va̱ reve i lyawa aabala e memere mo oɓolo'o.>>
17Reve u damma aagbashi o ufaru, <<Na̱ Isuwa mawun ma̱ a̱na̱wun ma̱ va̱ ma ga'an na̱ a̱vu u te ece wu, <A̱vu aagbashi a zane a ɗa? Te ɗa va̱a̱ 'ya̱wa̱? Zane ɗa za vi iliyamunga i nda suru i na i ri elime a̱ wu'u?> 18A̱vu vu usu yi, <Aza a aagbashi a̱ wu Yakubu ɗa, uneꞌe u ɗa n lyunguwa̱i zagbain va̱ Isuwa, a̱yi na aciya̱yi u ta̱ lo a̱ ta̱wa̱ a̱ca̱pa̱ a̱ tsu.> >> 19Reve waru u damma za ve ire na̱ za va ta'atsu na aza a na buwai suru aza a na a̱ ka̱lyuwusa̱ oɓolo biti, <<Ne ɗa fo yaa damma Isuwa ni i ga'an na̱ a̱yi. 20I reve i damma ta̱, <Aagbashi a̱ wu Yakubu a̱ ta̱ lo a̱ca̱pa̱ a̱ tsu.> >> Yakubu shi ta̱ a majiyan, <<N ta zuwa okolo a Isuwa a̱ ta̱na̱ nu une'e'e kafu tse enelei esu ne esu. N te itamaha u ta̱ usu mu.>> 21A̱vu une'e'e u wala elime a̱ yi, amma a̱yi na aciya̱yi wa asa ta̱ uba̱ta̱ u na a cu'wain na ayin o ndolo.
A vadalai aala a Yakubu a̱ ka̱mba̱i Isra'ila
22A̱tsuma̱ a ayin o ndolo reve Yakubu 'yon u tara a̱ma̱ci e re a̱ yi, na̱ a̱ma̱ci e re a̱ yi agbashi, na̱ muwun kupa na̱ za ta̱ ma̱ yi reve u pasato le uɗolu wa Jabo. 23Ana u pasato nle upasu u ndeɗe, reve waru u pasato ili i na u ri na̱ a̱yi suru. 24Reve a lyawa yi a̱yi a̱ nde'en. Ɗaɗa vuma ro ta̱wa̱ u remei mpolo na̱ a̱yi hali usana u tawa. 25Ana vuma we enei u gura lyuwa aci shi, ɗaɗa u dukwa̱i a̱a̱la̱ta̱ a aagutsu a Yakubu. Reve u gondoro o uba̱ta̱ u na a̱a̱la̱ta̱'a̱ o ɓoluloi. 26Reve vuma'a u damma, <<Lyawa mu n ka̱ra̱, adama a na usana u tawa ta̱.>> Reve Yakubu damma, <<Maa lyawa wu vu ka̱ra̱ shi she na vu zuwaa mu aba'un.>> 27Ɗaɗa vuma'a we ece niyi, <<Cine tsa ɗa aala a̱ wu?>>
Reve u usu, <<Aala a̱ va̱ ɗa Yakubu.>> 28Reve vuma'a u damma yi, <<Diga ana'an aala a̱ wu a buwa Yakubu shi. E te ɗe wu Isra'ila,#32:28 Urevu wa Isra'ila na̱ Tsuyahuda a̱yi ɗa, <<Za na yuwain mpolo na̱ A̱sula̱, adama a na vu yuwan ta̱ mpolo na̱ A̱sula̱ na ama a̱vu gba vu lyuwa aci>> adama a na vu yuwan ta̱ mpolo na̱ A̱sula̱ na ama a̱vu gba vu lyuwa aci.>> 29A̱vu Yakubu damma, <<Yuwan ankuri damma mu aala a̱ wu.>> A̱vu vuma'a u damma, <<Adama a̱ nye vu cigai vu reve aala a̱ va̱?>> Reve u zuwaa Yakubu aba'un lo uba̱ta̱'a̱.
30Adama o ndolo, reve Yakubu zuwaa uba̱ta̱'a̱ aala Penuwe. Adama a na u damma ta̱, <<Me ene ta̱ A̱sula̱ esu ne esu, agba n kuwa̱ shi.>> 31Urana u shi ta̱ u fara a gawusan a mantsa ma na Yakubu lyawai Penuwe, reve u ka̱ra̱ a mmalu e ishinga̱ɗu adama o usa̱n wa̱ a̱a̱la̱ta̱ a aagutsu a̱ yi. 32A̱yi ɗa i zuwai hali na ana'an aza a Isra'ila a tsu tama aaruva a̱ a̱la̱ta̱ a aagutsu a nama shi, adama a na a̱ a̱a̱la̱ta̱ a aagutsu a ɗaɗa a̱ dukwa̱i Yakubu.
Currently Selected:
Ufaru 32: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
