Ufaru 31
31
Yakubu suma ta̱ u lyawa Laban
1Yakubu uwwa ta̱ a na olobo a Laban a ta dansa, <<Yakubu pura̱ ta̱ utsuru wa dada tsu suru. Ili i na u ri ne ele suru ya dada tsu ɗa u tsura̱ nle.>> 2Reve waru we ene majiyan ma Laban a̱ tyo ya̱'a̱ yi ma buwa cine u shi shi.
3Reve A̱sulazuva a damma Yakubu, <<Ka̱mba̱ e iɗa yi nkaya ya̱ wu uba̱ta̱ wa ama a̱ wu, waru n ta̱ da̱na̱ oɓolo na̱ a̱vu.>>
4Ɗaɗa Yakubu lyunguwa̱ yi Rahila na̱ Liyatu a cina yi a atsusa uba̱ta̱ u na u shi a aguɓa e ikyon ya̱ yi. 5Reve u damma le, <<Me ene ta̱ majiyan ma dada ɗu ma buwa cine u shi a̱ tyo ya̱'a̱ va̱ shi, amma A̱sula̱ a dada va̱ o to oɓolo na̱ a̱mu. 6I reve ta̱ n yuwaan ta̱ dada ɗu tsugbashi na̱ a̱tyo o ucira u va̱. 7Agba suru na̱ ne u paala mu ta̱ reve u kita'wa atsupu a̱ va̱ toto kupa. Amma A̱sula̱ a lyawa yi wa amaton mu shi. 8Nnu u damma, <Ikyon ya adaɓa adaɓa i ɗa yo o o'wo atsupu a̱ va̱,> reve ikyo'on suru a matsan aza a adaɓa adaɓa. Nna̱ waru u damma, <Ikyon ya abasa abasa i ɗa yo o'wo atsupu a̱ va̱,> reve ikyo'on suru a matsan aza a abasa abasa. 9Ne ɗa A̱sula̱ a̱ pura̱i oɓolo e iliyamunga ya dada ɗu reve u ca mu.
10<<Urana u ro mantsa ma na a̱ tsu da̱na̱ a̱ tsukoɓu, reve n yuwan alavu, reve me ene nga̱ji n na n ri a̱ tsukoɓu suru a̱ ta̱ na adaɓa adaɓa na abasa abasa. 11Reve Malingata ma̱ A̱sula̱ me ɗe mu a̱tsuma̱ a alavu'u u damma, <Yakubu.> Reve n usu, <A̱mu ɗa nda.> 12Reve u damma mu, <Ve ene nga̱ji n na n ri a̱ tsukoɓu suru a̱ ta̱ na adaɓa na abasa abasa. N zuwa ta̱ o o'wo ne adama a na me ene ta̱ ili i na Laban a yuwusaan wu suru. 13A̱mu ɗa A̱sula̱ a na o roco nuwu aciya̱va̱ a Betel, uba̱ta̱ u na vu zuwai aatali wo o'woi ili yu ucuwusan na vu tsun niyi mani'i ma̱ zetun, uba̱ta̱ u na waru vu yuwaan numu akucunu. Gogo vu 'yon vu lyawushi iɗa i nda vu ka̱mba̱ e iɗa i na a matsan nuwu.> >>
14Reve Rahila na̱ Liyatu a̱ usu Yakubu, <<Ko ili i ta̱ i buwa na tsa̱a̱ tsura̱ agadu a dada tsu shi. 15U tara tsu ta̱ she damma omocin. U wina tsu ta̱, reve waru u pusa̱n ili i na a tsupa niyi adama a̱ tsu. 16Utsuru u nda suru na A̱sula̱ a̱ ushiyi ya dada tsu za tsu ɗa na̱ muwun n tsu. Adama o ndolo yuwan ili i na A̱sula̱ a damma nuwu suru.>> 17A̱vu Yakubu 'yon u kumbato a̱ma̱ci a̱ yi na̱ muwun ma̱ yi a arakumi. 18A̱vu u guɓa oɓolo e iliyamunga ya̱ yi elime, ni ili i na u tsura̱i suru a Fada Aram, adama a̱ ka̱mba̱ e iɗa ya Ka'ana, uba̱ta̱ wa dada va̱ yi Ishiyaku.
19A mantsa'a Laban shi ta̱ ka̱ra̱ adama wu koɗo eleme e ikyon ya̱ yi. Ɗaɗa Rahila iva̱i a̱ma̱li o u'wa a dada va̱ yi. 20A̱vu Yakubu yuwan Laban vuma va Aram ugbozu, u lyawa u reve a na waa suma shi. 21Ne ɗa u sumai ni ili i na u ri na̱ a̱yi suru reve u jika̱ a̱ ka̱ra̱. Reve u pasa Uɗolu wa̱ Yufiriti, a̱vu u saɓa a̱ tyo upasu wi iɗa ya agaɗi ya Giliyadu.
Laban saɓa ta̱ Yakubu
22Ana a yuwain rana ta'atsu ɗaɗa a dammai Laban a na Yakubu sumai. 23Ɗaɗa u tarai ama a̱ yi reve u saɓa Yakubu hali rana cindere, reve a cina yi e iɗa ya agaɗi ya Giliyadu. 24Agba reve A̱sula̱ a̱ ta̱wa̱ ya Laban vuma va Aram a̱tsuma̱ a alavu na ayin o ndolo a̱vu u damma yi, <<Vu yuwan ugbozu she vu damma Yakubu ili i ro wan ko yi isa'ani ko yi iwuya.>>
25Laban cina ta̱ Yakubu a mantsa ma na u va̱la̱i e iɗa ya agaɗi ya Giliyadu, a̱vu Laban na ama a̱ yi a rawa a̱ va̱la̱ upasu u na wa agaɗi'i. 26A̱vu Laban damma Yakubu, <<Nye i zuwa vu yuwain ne tsunda? Vu yuwan numu ugbozu reve vu suma ne esheli a̱ va̱ she damma aza a na a̱ pura̱i uba̱ta̱ wu uvon. 27Adama a̱ nye vu sumai upusu vu yuwan numu ugbozu vu damma mu shi? N shi ta̱ o foɓoo wu a̱buki o uka̱ru na̱ ma̱za̱nga̱ ni ishipa na̱ tsuwe'e tsa aganga ni ikumburu. 28Waru nye i zuwa vu lyawa numu n katala muwun n va̱ na ashan a̱ va̱ wu ukaru shi? Vu yuwan ta̱ tsulo! 29N shi ta̱ a gura amaton wu, amma A̱sula̱ a dada va̱ wu a ɓara mu ta̱ yon na ayin, <Vu yuwan ugbozu she vu damma Yakubu ili i ro wan, ko yi isa'ani ko yi iwuya.> 30Ko na wo o'woi vu ka̱ra̱ ta̱ adama a na vu dama ta̱ vu ka̱mba̱ o u'wa wa dada va̱ wu, amma adama a̱ nye vu iva̱i a̱ma̱li a̱ va̱?>>
31A̱vu Yakubu usu, <<M pusa̱ ta̱ adama a na n shi ta̱ a uwwusa wovon a yuwusan majiyan vu ta usa mu esheli a̱ wu. 32Amma nna̱ vu cina za ro na̱ a̱ma̱li a̱ wu, a̱ to una yi. A̱ ma̱ka̱ka̱n ma ama a̱ tsu, vu ka̱lyuwa̱ na aciya̱wu ko vu ta̱ tsura̱ ili i na i ri za va̱ wu uba̱ta̱ u va̱, na̱ vu tsura̱ vu tara yi.>> Yakubu gba reve a na Rahila iva̱i a̱ma̱li'i shi.
33Reve Laban fara uwa o oogodo a Yakubu u bunga̱, reve u uwa o oogodo a Liyatu, reve waru u kuru no ogodo a agbashi e esheli e re'e, agba we ene a̱ma̱li'i shi. Ɗaɗa u uwai o oogodo a Rahila. 34Ashe Rahila pura̱ ta̱ a̱ma̱li o u'wa wa Laban reve u zuwa le za̱la̱ vi ili yi nda̱na̱ta̱ ma aarakumi, reve u da̱nu ɗe. Laban zami ta̱ uba̱ta̱ biti o oogodoꞌo agba u tsura̱ a̱ma̱li'i shi.
35Reve Rahila damma dada va̱ yi, <<She vu yuwan upan na̱ a̱mu adama a na n 'yoyin shi dada, n ta̱ a̱tsuma̱ a̱ a̱shinda̱.>> Reve u gbangaɗa agba we ene a̱ma̱li'i shi.
36Ɗaɗa Yakubu yuwain upan a̱vu u tsuwa̱n Laban adanshi u damma, <<Unusu u ne u ɗa n yuwain? Wila̱ u ne u ɗa n kuɗai hali na vu kuru numu nu usuɗuwu ne tsunda? 37Ko na vu gbangaɗai itana i va̱ biti, nye vu tsura̱i i na i ri za vu u'wa wa̱ wu? Vu uta̱a̱ yi vu zuwa yi a̱ ma̱ka̱ka̱n ma ama a̱ va̱ na ama a̱ wu ee ene, adama a damma a̱mu na̱ a̱vu ko zane ɗa ri mejege.
38<<A̱tsuma̱ a a'wan ushin a na n da̱nuyi na̱ a̱vu, ikyon ko mgbele ma̱ wu mo oco a̱tsuma̱ shi, agba ko a̱a̱giri'i a̱ ta̱ n lyuwa wu i ɗa shi. 39Na̱ nama vu una vu una kyon va̱ wu biti n tsu ta̱wa̱a̱ wu na̱ a̱yi shi, a̱mu ɗa n tsu tara wo o'wo ulambu u va̱. Hali gba vu tsu damma ta̱ n tsupa ko na̱ shi o una ta̱ iliyamunga nu urana ko na ayin a ɗa. 40Apa ili i na i farai: na̱ a̱bunda̱ n sowo ta̱ usuɗuwu wu urana o urana, na ayin waru uta̱nu u ɗa nda, n tsu tsura̱ nlavu shi. 41A̱tsuma̱ a a'wan ushin a nda n da̱nu ta̱ o u'wa wa̱ wu. N yuwaan wu ta̱ tsugbashi a'wan kupa na̱ a̱za̱ a̱ na̱shi adama n zuwa esheli e re a̱ wu. Reve n yuwan a'wan a̱ ta̱li adama e ikyon na̱ mgbele ma̱ wu. Agba a mantsa'a vu kita'wusa ta̱ atsupu a̱ va̱ hali toto kupa. 42Nna̱ a̱ shi a damma A̱sula̱ a dada va̱, A̱sula̱ a Ibrahim, A̱sula̱ e ili i wovon a Ishiyaku a̱ shi oɓolo na̱ a̱mu shi, vu shi ta̱ a zuwa mu n ka̱ra̱ ekere lya̱nga̱. Agba A̱sula̱ ene ta̱ a̱tsuma̱lima̱ nu ulinga we ekere a̱ va̱, a̱yi ɗa nda u ɓara nuwu yon na ayin.>>
43Reve Laban usu Yakubu, <<A̱ma̱ci a̱ wu esheli a̱ va̱ a ɗa, waru muwun n le a̱za̱ a̱ va̱ ɗa, waru oɓolo e ikyon a na vaa dansa nda suru a̱za̱ a̱ va̱ a ɗa. Ili i na vu ri ne ele suru a̱za̱ a̱ va̱ a ɗa. Agba ana'an n ta̱ ni ili i na maa yuwan reve n guza̱ esheli a̱ va̱ na̱ muwun n le? 44Ta̱wa̱ tsu yuwan akucunu a̱ nden n lafiya a̱tsu ra. Lyawa wo o'wo tsu iroci a̱mu na̱ a̱vu.>>
45Reve Yakubu tara aatali u shuwa̱, wo o'wo ili yu ucuwusan. 46Reve u damma ama a̱ yi, <<Ɓolotoi atali.>> Reve gba o ɓoloto aganga a atali. Reve Laban na̱ Yakubu a lyuwa ilyalya zuzu no oɓolo a atali'i. 47Reve Laban ca atali'i aala Yega Sahaduta.#31:47 Ne elentsu a aza a Arama a̱yi ɗa <<oɓolo a atali a na aa cuwaan tsu.>> Yakubu gba ɗe yi Galid.#31:47 Na̱ Tsuyahuda a̱yi ɗa <<oɓolo a atali a na aa cuwaan tsu.>>
48Laban damma ta̱ Yakubu, <<Aganga a atali a nda u to o'wo tsu iroci a̱mu na̱ a̱vu.>> A̱yi ɗa i zuwai e ɗeyi uba̱ta̱ Galid. 49Waru e ɗe ta̱ uba̱ta̱'a̱ Mizfa adama a na Laban damma ta̱, <<Lyawa A̱sulazuva a zuwa esu a̱ yi ya̱'a̱ tsu a̱mu na̱ a̱vu a mantsa ma na tsu ri e menelei shi.>> 50Reve Laban damma, nna̱ vu yuwan ili i na i lobonoi shi ne esheli a̱ va̱ ko vu tara a̱ma̱ci o ro mee reve shi, amma vu cuwan A̱sula̱ e te inda.
51<<Reve waru Laban damma Yakubu, apa nda aganga a atali na atsura a na n shuwa̱i e memere ma̱ tsu. 52Ele ra o to o'wo tsu ili i na i ri n cuwusaan tsu, a na maa pasa aganga a nda a̱ 'ya̱wa̱ ya̱'a̱ wu adama n yuwaan wu iwuya shi, a̱vu waru vaa pasa aganga a nda na atsura a nda a̱ ta̱wa̱ ya̱'a̱ va̱ adama vu yuwaan mu iwuya shi. 53Lyawa A̱sula̱ a Ibrahim na̱ A̱sula̱ a Naho, A̱sula̱ a dada le e ge'eto a̱mu na̱ a̱vu.>> Ɗaɗa Yakubu kucinai na aala a̱ A̱sula̱ e ili i wovon a dada va̱ yi Ishiyaku. 54Reve Yakubu ca kuci ɗe a aagaɗi'i, a̱vu u ɗe ama a̱ yi a lyuwa. Ana o kotoi alya reve a asa ɗe a aagaɗi'i. 55Na̱ wasasa ana usana u tawai, reve Laban 'yon reve u katala esheli a̱ yi na̱ muwun n tsukaya ma̱ yi a̱vu u zuwaa le aba'un, a̱vu u ka̱ra̱ a̱ ka̱mba̱ o u'wa.
Currently Selected:
Ufaru 31: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
