Ufaru 30
30
1Ana Rahila enei koto u shi u matsaan Yakubu muwun shi, reve u reme tsushu'un na̱ zakpara va̱ yi vu ka. Reve u damma Yakubu, <<Vu ca mu muwun na̱ ne gba shi, she n kuwa̱!>>
2Reve Yakubu yuwan upan na̱ a̱yi, reve u damma yi, <<A̱mu A̱sula̱ a ɗa, za na putsa nuwu a̱ tsura̱ limatan?>>
3Reve u damma, <<Apa Biliha, usheli wa aasula a̱ va̱ uwa ya̱'a̱ yi, tsa̱ra̱ u matsaan mu muwun, tsa̱ra̱ waru n tsura̱ muwun e ekere a̱ yi.>> 4Ɗaɗa gba u cayi Yakubu Biliha usheli wa aasula a̱ yi tsu ka va̱ yi, reve gba u uwa ya̱'a̱ yi. 5Reve Biliha yuwan a̱a̱tsuma̱ reve u matsaan Yakubu mawun mo ulobo. 6Reve Rahila damma, <<A̱sula̱ a yuwaan mu ta̱ uge'etosu u sa'ani, waru wu uwwa ta̱ mesun ma̱ va̱ ɗaɗa u ca numu mawun mo ulobo.>> Ɗaɗa u ca niyi aala Dan.#30:6 Aala'a u shon ta̱ gashi damma Tsuyahuda, <<u yuwan ta̱ uge'etosu wa̱ a̱ɓula̱>>
7Reve usheli wa aasula a Rahila Biliha u yuwisan a̱a̱tsuma̱ a̱vu u matsisaan Yakubu mawun mo ulobo me ire. 8Reve Rahila damma, <<N yuwan ta̱ a̱ba̱jini o uvon na̱ shewun va̱, waru n lyuwa ta̱ aci.>> Ɗaɗa u ca niyi aala Nafutali.#30:8 Aala'a u shon ta̱ gashi damma Tsuyahuda, <<mpolo.>>
9Ana Liyatu enei u buwa a mamatsan shi, reve u tara mawun ma aasula ma̱ yi Zelfa, reve u ca Yakubu adama wo o'wo ka va̱ yi. 10Ɗaɗa Zelfa mawun ma aasula ma Liyatu ma matsaan yi Yakubu mawun mo ulobo. 11Reve Liyatu damma, <<N ga'aan ta̱!>> Ɗaɗa u cayi mawu'un aala Gadu.#30:11 Urevu wa aala'a na Tsuyahuda a̱yi ɗa, <<uga'awun.>>
12Reve Zelfa mawun ma aasula ma Liyatu ma matsisaan Yakubu mawun mo ulobo me ire. 13Reve Liyatu damma, <<N ta̱ na̱ ma̱za̱nga̱! A̱ma̱ci e te ɗe mu za ma̱za̱nga̱.>> Ɗaɗa u ca niyi aala Asha.#30:13 Urevu wa aala'a na̱ Tsuyahuda a̱yi ɗa, <<ma̱za̱nga̱.>>
14A mantsa me ikani i yitabo, reve Roben uwa atsusa reve u zami maruva, reve u ta̱wa̱a̱ mma va̱ yi Liyatu o u'wa. Reve Rahila damma Liyatu, <<Yuwan ankuri ne'e mu pe a̱tsuma̱ a maruva ma na ulobo wa̱ wu u kenei.>>
15A̱vu Liyatu usu yi, <<U rawa a na vu usai vali va̱ shi? Gogo waru vu ciga ta̱ vu usa aralu a maruva a na ulobo u va̱ u ta̱wa̱a̱ numu?>> A̱vu Rahila damma yi, <<Gogo na̱ vu ne'e mu pe a̱tsuma̱ a aralu a maruva a na ulobo wa̱ wu u ta̱wa̱a̱ nuwu, na ayin a ana'an vali tsu to von na̱ a̱vu.>>
16Mantsa ma na Yakubu ta̱wa̱i o una nu ulivu, a̱vu Liyatu uta̱ adama o uga'asan na̱ a̱yi. Reve u damma yi, <<Ciga 'yuwan vu von na̱ a̱mu ana'an, adama a na n tsupa ta̱ o una̱ u maruva ma na ulobo u va̱ u ta̱wa̱yi.>> Na ayin o ndolo reve u von na̱ a̱yi.
17Reve gba A̱sula̱ a uwwa avasa a Liyatu, reve u yuwan a̱a̱tsuma̱ reve u matsaan Yakubu mawun mo ulobo ma tawun. 18Reve Liyatu damma, <<A̱sula̱ a tsupa mu ta̱ adama a na n cayi Yakubu mawun ma aasula ma̱ va̱.>> Ɗaɗa u ca niyi aala Isaka.#30:18 Na̱ Tsuyahuda aala'a u shon ta̱ she damma, <<Ili yi nkapa. Ko atsupu>> 19Reve Liyatu yuwisan a̱a̱tsuma̱ a̱vu u matsisaan Yakubu mawun mo ulobo ma̱ ta̱li.
20Reve Liyatu damma, <<A̱sula̱ a yuwaan mu ta̱ uneꞌe u sa'ani. Gogo vali va̱ ta tara mu ili i ro, adama a na m matsaan yi ta̱ olobo a̱ ta̱li.>> Ɗaɗa u ca niyi aala Zebulun.#30:20 Na̱ Tsuyahuda aala'a u shon ta̱ she damma, <<ushi,>> nu, <<uneꞌe.>> Ta̱
21A̱ ta̱wa̱ ɗe, reve u matsan mawun mo usheli reve u ca yi aala Dina.
22A̱ ta̱wa̱ ɗe reve A̱sula̱ a cuwan na̱ Rahila, reve wu uwwa avasa a̱ yi, ɗaɗa u ca niyi limatan. 23Reve u reme a̱a̱tsuma̱ reve u matsan mawun mo ulobo. A̱vu u damma, <<Gogo A̱sula̱ a tawa mu ta̱ ili i wono.>> 24A̱vu u ca yi aala Isuhu,#30:24 Aala'a u shon ta̱ she damma Tsuyahuda, <<Lyawa u ca mu za ro,>> na̱, <<U tara ta̱.>> a dansa <<Lyawa A̱sulazuva a̱ da̱shi ca mu mawun mo ulobo mo ro.>>
Utsuru wa Yakubu u da̱shi ta̱
25Ana Rahila matsain Isuhu, a̱vu Yakubu damma Laban, <<Lyawa mu n ka̱ra̱ a̱ ka̱mba̱ o u'wa u va̱ na̱ e iɗa i va̱. 26Ca mu a̱ma̱ci a̱ va̱ na̱ muwun n va̱, aza a na adama e le a ɗa n lingaa nuwu. Vu lyawa tsu, tsu ka̱ra̱ adama a na vu reve ta cu'un vu ulinga u na n yuwaan nuwu.>> 27Reve Laban damma yi, <<Na̱ vu shi a̱ usu, vi isawan. N reve ta̱ ni yindi A̱sulazuva a zuwaa mu ta̱ aba'un adama a̱ wu. 28Damma mu ili i na maa tsupa wu, n ta tsupa wu.>> 29Reve Yakubu usu yi, <<A̱vu na aciya̱wu vu reve ta̱ cu'un vu ulinga u na n yuwaan nuwu, na cine iliyamunga ya̱ wu i da̱shiyi a̱bunda̱ e ekere a̱ va̱. 30Vu reve ta̱ kafu n ta̱wa̱ iliyamunga ya̱ wu wa'a ɗa a̱ da̱na̱i, amma gogo ele ɗa nda a yuwain a̱bunda̱ lon. A̱sulazuva a zuwaa wu ta̱ aba'un uba̱ta̱ u na n lingaa nuwu suru. Amma gogo mantsa ma̱ ne ma ɗa maa yuwaan u'wa u va̱ tsundolo?>> 31A̱vu Laban damma, <<Ili i ne i ɗa maa tsupa wu?>> A̱vu Yakubu usu, <<N ciga vu tsupa mu ili i ro shi. N ta lyuwa elime na aguɓa o oɓolo e ikyon ya̱ wu na̱ n ka̱lyuwusa̱ nle. 32Lyawa ana'an n toni n ka̱lyuwa̱ oɓolo e ikyon ya̱ wu a̱vu mu uta̱a̱ ikyon na̱ a̱giri'i a na a̱ ri adaɓa-adaɓa, na̱ mukyokyon n na n ri na adaɓa a̱ lima̱-lima̱ suru oɓolo na̱ mgbele na̱ nga̱ji n na n ri adaɓa-adaɓa. Ele ndolo ele ɗa o o'wo akunda a̱ va̱. 33A̱ 'ya̱wa̱ elime vu ta̱ ta̱wa̱ vu reve ko n yuwan ta̱ a̱ɓula̱ babu usa̱n. Mantsa ma na va̱a̱ ta̱wa̱ vu ka̱lyuwa̱ ili i na m ɓolotoi, na̱ n ri na̱ megbele ma na ma̱ ri adaɓa-adaɓa shi, ko kyon na ri ulima̱ shi, vu te reve a na e iva̱ niyi.>> 34A̱vu Laban usu, <<U lobono ta̱, lyawa wo o'wo cine vu ta̱wa̱yi na̱ a̱sa̱la̱.>> 35Amma o urana u ndolo a̱vu Laban kakasa nga̱ji aza a na a̱ ri ni iɗana na adaɓa-adaɓa. Reve wu kasa mgbele n na n ri adaɓa-adaɓa suru, za na ri uri suru, na aza a na a̱ ri ulima̱, na̱ kyon na ri ulima̱ suru. Reve u kene le u ca olobo a̱ yi a̱ 'ya̱wa̱ alyuna ne ele. 36Reve Laban 'ya̱wa̱ mmalu mu rana ta'atsu ni ikyon ya̱ yi oɓolo na̱ muwun ma̱ yi, a̱vu u yuwan akasu na̱ Yakubu. A̱vu Yakubu ka̱lyuwusa̱ akapi e ikyon a Laban a na a buwai lo. 37Yakubu zami ta̱ eten o uɗanga u wolilo na̱ za na a̱ tsu ɗe alumon na̱ arumon o uta̱nu, reve wu ɓoso a̱vun uba̱ta̱ u ro adama u lyawa lipu uri ve ete'en. 38Reve u zuwa ete'en elime o oɓolo e ikyon na̱ mgbele'e uba̱ta̱ u na a casu le mini. U zuwa le ta̱ lo adama a na ele ikyon na̱ a̱giri'i a̱ tsu da̱na̱ ta̱ o tsukoɓu mantsa ma na a̱ ta̱wa̱i oso a̱ mini. 39Mantsa ma na oɓolo e ikyon na̱ mgbele'e n ri a tsukoɓu e elime e eten o ndolo, a tsu matsan ta̱ muwun n na n ri ni iɗana na adaɓa adaɓa a̱ lipu le. 40A̱vu Yakubu kakasa ikyo'on diga o oɓolo aza a Laban. Reve u zuwa ikyon i na i ri a̱ma̱ci a̱vu a calai ma̱ka̱ka̱n na aza a Laban aza a na a̱ ri adaɓa adaɓa waru a̱ tu ulima̱. Tsundolo tsa ɗa u yuwain ɗaɗa u ɓolotowoi aciya̱yi oɓolo reve wu kasa le na aza a Laban. 41Mantsa ma na ele aza a na a̱ ri gbaga a̱ ri a tsukoɓu, Yakubu tsu votowon le ta̱ ete'en e elime e le uba̱ta̱ u na a̱ ri o oso a̱ mini, adama a yuwan tsukoɓu zuzu ne ete'e'en. 42Amma u tsu zuwa eten o ndolo a̱ tyo uba̱ta̱ wa aza a na a̱ ri nu ubanakun shi. Adama o ndolo reve aza a na a̱ ri gbaga o o'wo aza a Yakubu. Amma aza a na a la'ashi gbaga shi ele ɗa o o'woi aza a Laban. 43Tsundolo tsa ɗa Yakubu o o'woi za vu utsuru lon. U da̱na̱ ta̱ no oɓolo e mgbele ni ikyon a̱bunda̱, waru u da̱na̱ ta̱ na agbashi ali na̱ a̱ma̱ci, na arakumi na̱ nloli.
Currently Selected:
Ufaru 30: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
