Ufaru 29
29
Yakubu rawa ta̱ Fada Aram
1Reve Yakubu lyuwa elime na̱ mmalu hali u rawa e iɗa ya ama a asana. 2Ana u ka̱lyuwa̱i nda, a̱vu we ene ooko'o a atsusa. A̱vu waru we enishe oɓolo e ikyon aza a ta'atsu nven zuzu no ooko'o'o, lo ɗaɗa a tsu ca le mini. Aatali a gbain a ɗa a̱ da̱na̱i ili yu uɓa̱rusu wo ooko'o'o. 3Mantsa ma na oɓolo e ikyon o ɓolotoi uba̱ta̱ u ta̱, ele aza a aguɓa'a a̱ tsu bunda̱la̱ ta̱ aatali a na a̱ ri o una̱ wo ooko'o'o, reve a̱ tsura̱ a ca ikyon i le mini. No o koto, reve a̱ ka̱mba̱ a tsugbisa una̱'a̱.
4A̱vu Yakubu ece aza a aguɓa'a, <<N'utsa̱ n va̱, te ɗa yu uta̱i?>> A̱vu a̱ usu, <<Haran ɗa tsu uta̱i.>>
5A̱vu we ece le, <<I reve ta̱ Laban mawun ma tsukaya ma Naho?>> Reve a damma, <<Ee, tsu reve yi ta̱.>>
6A̱vu we ece le, <<U ta̱ lafiya?>> Reve a̱ usu yi, <<U ta̱ lafiya, usheli wa̱ yi Rahila ɗa ndeɗe a̱ ta̱wa̱ ni ikyon.>>
7Reve Yakubu damma, <<Ana wo o'woi urana u buwa ta̱, waru koto mantsa ma na a̱a̱ ka̱mbuwa̱ ikyun ma yuwan shi, to, cayi ikyo'on mini reve i ka̱mba̱ uba̱ta̱ a alyuna.>>
8Reve a̱ usu, <<Tsaa yuwan tsundolo shi, she no oɓolo e ikyon o ɓoloto uba̱ta̱ u ta̱, reve a̱ bunda̱la̱ aatali'i o una̱ wo ooko'o'o, kafu tsu ca le mini.>>
9Kafu u kpa̱to una̱, a̱vu Rahila rawa ni ikyon ya dada va̱ yi, adama a na a̱yi ɗa za va aguɓa. 10Ana Yakubu enei Rahila usheli wa Laban mawun ma̱ a̱na̱wun ma mma va̱ yi ni ikyon ya Laban, a̱vu u 'ya̱wa̱ uba̱ta̱ o ooko'o'o, reve u keɓe aatali'i, a̱vu u ca ikyon i mawun a̱na̱wun ma dada va̱ yi mini o sowo. 11A̱vu Yakubu katala yi, reve u reme mesun. 12A̱vu u damma Rahila a̱yi imaci ya dada va̱ yi i ɗa, mawun ma Rikatu. A̱vu Rahila suma u damma dada va̱ yi.
13Ana Laban tsura̱i alabari a Yakubu mawun ma tawun va̱ yi, reve u suma u raba yi. A̱vu u katala yi u reme ipapuru ya̱ yi. Reve u tara yi a̱ tyo o u'wa wa̱ yi. A̱vu Yakubu ca Laban aalabari e ili i na i farai suru.
Yakubu zuwa ta̱ Liyatu na̱ Rahila
14Reve Laban damma yi, <<Na amayun a̱vu lipu va̱ ɗa mpasa n va̱.>> Yakubu da̱nu ta̱ woto u ta̱ na̱ Laban. 15A̱vu Laban damma yi, <<Ana vo o'woi imaci i va̱, vu ta yuwaan mu tsugbashi pere? Damma mu ili i na maa tsupa wu.>>
16Laban gba u ta̱ na̱ muwun me esheli n re, Liyatu ɗa aala a zakpara, zawa'a waru aala a̱ yi a ɗa Rahila. 17Liyatu da̱na̱ ta̱ na̱ a̱da̱mba̱lya̱#29:17 Urevu wu danshi nda na̱ Tsuyahuda wu uta̱ a alanga e eteshe shi. e esu, amma Rahila gba u da̱na̱ ta̱ nu urewesu wu ulobonu na̱ lipu sa'ani a̱bunda̱ lon.
18Yakubu gba ciga ta̱ Rahila, a̱vu u damma Laban, <<N ta yuwaan wu tsugbashi tsa a'wan e cindere adama a Rahila usheli u wa'a wa̱ wu.>>
19Reve Laban usu, <<U la'aa mu ta̱ n ca wu a̱yi a na maa ca nanza. Adama o ndolo, vu da̱nu oɓolo na̱ a̱mu.>> 20A̱vu u yuwan tsugbashi, hali a'wan e cindere adama a Rahila, amma adama a na u ciga niyi lon, a̱vu we ene gashi damma rana meketeci ɗa.
21A̱vu Yakubu damma Laban, <<Ca mu ka va̱, tsa̱ra̱ n uwa ya̱'a̱ yi, adama a na mantsa ma na a paɗa numu ma shiwan ta̱.>>
22A̱vu Laban ɓoloto ama o uba̱ta̱'a̱ suru, a̱vu u yuwan a̱buki. 23Agba ana ulivu u yuwain, reve u tara usheli wa̱ yi Liyatu, u ta̱wa̱a̱ Yakubu. A̱vu Yakubu uwa uba̱ta̱ wa̱ yi. 24(Laban ca ta̱ usheli wa̱ yi Liyatu aagbashi o usheli a̱ yi Zelfa, wo o'wo yi mawun ma aasula.)
25Nu usana u ɗa Yakubu revei Liyatu ɗa. Reve u 'ya̱wa̱ u damma Laban, <<Cine vu yuwan numu tsunda? N lingaa wu ta̱ tsa̱ra̱ n zuwa Rahila, n yuwan ne shi? Cine vu yuwan numu ugbozu?>>
26A̱vu Laban damma, <<Agadu a̱ tsu pa nda, tsu tsu ca zawa'a lolo, tsu lyawa zakpara shi. 27Puro na a yuwan rana cindere lolo'o, a̱vu tsu ca wu Rahila agba vu ta yuwaan mu tsugbashi tsa a'wan e cindere o ro.>>
28A̱vu Yakubu yuwan ne, ana o kotoi rana cindere lolo'o, a̱vu Laban ca yi usheli wa̱ yi Rahila wo o'wo ka va̱ yi. 29(Laban ca ta̱ usheli wa̱ yi Rahila aagbashi o usheli a̱ yi Biliha, wo o'wo yi mawun ma aasula.) 30Reve Yakubu uwa ya Rahila fo. A̱vu u la'a ciga Rahila na̱ Liyatu. U da̱shi ta̱ yuwisaan Laban ulinga hali a'wan e cindere waru.
31Ana A̱sulazuva enei Yakubu ciga Liyatu shi, reve u kpa̱tu'wa̱ umatsutsun wa̱ yi, agba Rahila matsan shi. 32Reve Liyatu yuwan a̱a̱tsuma̱ reve u matsan mawun mo ulobo, reve u ca yi aala Roben.#29:32 Na̱ Tsuyahuda urevu wa̱ yi u ɗa, <<Ene ulobo,>> waru u shon ta̱ she damma,<<We ene ta̱ a̱tsuma̱lima̱ a̱ va̱.>> U damma ta̱,<<A̱sulazuva ene ta̱ a̱tsuma̱lima̱ a̱ va̱, gogo tsunda vali va̱ ta ciga mu.>>
33Reve waru u yuwisan a̱a̱tsuma̱ reve u matsisan mawun mo ulobo. Reve u dammisa, <<Adama a na A̱sulazuva a uwwa ta̱ a na a ciga numu shi ɗaɗa u cayisa numu mawun mo ulobo.>> Ɗaɗa u cayi mawu'un aala Saminu.#29:33 Aala Saminu na̱ Tsuyahuda u shon ta̱ she damma, <<uwwa.>>
34Reve u da̱shi yuwisan a̱a̱tsuma̱ a̱vu waru u matsisan mawun mo ulobo. Reve u damma, <<Gogo tsunda vali va̱ ta suraa mu a̱bunda̱ lon, adama a na m matsan niyi muwun mo olobo n ta'atsu.>> Ɗaɗa gba u ca niyi aala Levi.#29:34 A̱yi aala'a Levi na̱ Tsuyahuda u shon ta̱, <<sura.>> 35U yuwisan ta a̱a̱tsuma̱ reve waru u matsisan mawun mo ulobo. Reve u damma, <<A mantsa ma nda n ta yuwaan A̱sulazuva ica.>> Adama o ndolo a ɗa u cayi mawu'un aala Yahuza. #29:35 A̱yi aala'a u Yahuza na̱ Tsuyahuda u shon ta̱ gashi <<ica>> a̱tsuma̱ e ɗewu. Ɗaɗa u lyawai ne limatan.
Currently Selected:
Ufaru 29: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
