Ufaru 28
28
Ishiyaku ca̱co ta̱ Yakubu a̱ tyo ya Laban
1Reve Ishiyaku ɗe Yakubu, a̱vu u zuwaa yi aba'un, a̱vu u damma yi, <<Vu zuwa usheli a̱tsuma̱ e esheli a aza a Ka'ana wan. 2'Yon vu tyo Fada Aram, a̱ tyo o u'wa wa Betuwe kaka va̱ wu. Reve vu zuwa usheli a̱tsuma̱ e esheli a mawun ma̱ a̱na̱wun ma makuci ma̱ wu Laban. 3A̱sula̱ Mogono me Ili Suru u zuwaa wu aba'un. A̱vu u ca wu muwun ma̱ a̱bunda̱, tsa̱ra̱ voo o'wo dada vu nɗa ma̱ a̱bunda̱. 4U zuwaa wu aba'un nu ugundo wa̱ wu ununa u zuwayi Ibrahim, vo o'wo ni iɗa i na A̱sula̱ a cayi Ibrahim, uba̱ta̱ u na vu ri nden gogo o tsumocin.>> 5Tsundolo tsa ɗa Ishiyaku dammai Yakubu ka̱ra̱, reve u ka̱ra̱ a̱ tyo Fada Aram, a̱ tyo uba̱ta̱ wa Laban ulobo wa Betuwe vuma va Aram, mawun ma̱ a̱na̱wun ma Rikatu, mma va Yakubu na̱ Isuwa.
6Isuwa tsura̱ ta̱ urevu u na Ishiyaku zuwayi Yakubu aba'un waru u lyungu yi ta̱ a̱ tyo Fada Aram adama u zami ɗe ka. Reve waru u zuwaa yi aba'un, reve u rono yi atsuvu she u zuwa usheli wa aza a Ka'ana wan. 7Waru u tsura̱ ta̱ urevu a na Yakubu yuwain tsutoni na̱ dada na̱ mma va̱ yi reve u 'ya̱wa̱ Fada Aram. 8Reve ana Isuwa revei a na dada va̱ yi Ishiyaku ciga niyi u zuwa usheli wa Ka'ana shi, 9ɗaɗa u ka̱ra̱i a̱ tyo uba̱ta̱ wa Isma'ila, reve u zuwa Mahalata usheli wa Isma'ila ulobo wa Ibrahim, mawun ma̱ a̱na̱wun ma Nibayoti u ɓolo na akapi a̱ a̱ma̱ci a na u ri ne ele.
Yakubu yuwan ta̱ alavu
10Yakubu lyawa ta̱ Biyasheba, a̱vu u saɓa a̱ tyo Haran. 11Ana u rawai uba̱ta̱ u ro na ayin o ndolo, a̱vu wa asa lo, adama a na urana u koto niyi. Reve u tara aatali a ta̱ a̱tsuma̱ a aza a na a̱ ri lo uba̱ta̱'a̱, a̱vu u gbasato aci, a̱vu u von u lantsa. 12A̱vu u yuwan alavu, we ene kolo e iɗa hali u ju'wa̱n zuva. A̱vu nlingata ma̱ A̱sula̱ n da̱na̱ a katsasa na̱ a̱ cipi ɗe. 13A̱sulazuva a̱ da̱na̱ ta̱ lo mishin zuzu na̱ a̱yi adansa, <<A̱mu ɗa A̱sulazuva, A̱sula̱ a Ibrahim kaka va̱ wu, na̱ A̱sula̱ a Ishiyaku. Waru iɗa i na vu ri nven, n ta ca wu a̱yi nu ugundo wa̱ wu. 14Muwun mu ugundo ma̱ wu n to o'wo a̱bunda̱ cine vu revei ma̱buta̱ me iɗa. A ta bala a̱ tyo asana na̱ a̱livu, ugana nu uyagi. Adama a̱ wu nu ugundo wa̱ wu, ama o uvaɗi suru a̱ ta̱ tsura̱ aba'un. 15Vu reve n ta̱ da̱na̱ oɓolo na̱ a̱vu. Waru n ta̱ tiga̱ wu uba̱ta̱ u na vu 'ya̱wa̱i suru. Waru n ta̱ ta̱wa̱to wu pa e iɗa i nda waru. Maa lyawa wu shi, she na̱ n shiton nzuwulai n na n yuwaan nuwu.>>
16A̱vu Yakubu 'yon a̱tsuma̱ a nlavu a̱ yi, a̱vu u damma, <<Amayun, A̱sulazuva a̱ ta̱ pa! U ta̱ pa uba̱ta̱ u nda'a, agba a̱mu n reve shi!>> 17Wu uwwa ta̱ wovon reve u damma, <<Cu'un vu uba̱ta̱ u wovon u ne u ɗa tsunda, u'wa wa̱ A̱sula̱ u ɗa nda'a; pa ɗa una̱ntsutsu a̱ tyo uba̱ta̱ wa̱ A̱sula̱.>> 18Ana Yakubu 'yoyin nu usana, reve u tara aatali a na u gbasatoi aci'i, reve u zuwa yi mishin adama wo o'wo aatali a na a̱ da̱na̱ a cuwusan, reve u tsun ɗe mani'i ma̱ zetun. 19Reve u ca uba̱ta̱'a̱ aala Betel, agba nu ufaru Luz ɗa da̱na̱i aala a̱ lyuci'i.
20Reve Yakubu yuwan akucunu, a na, <<Na̱ A̱sula̱ a̱a̱ da̱na̱ oɓolo na̱ a̱mu, reve waru u ka̱lyuwa̱ mu a̱ 'ya̱wa̱ uba̱ta̱ u na ma̱a̱ 'ya̱wa̱, na̱ waa ca mu ilyalya i na maa lyuwa, ni itana i na moo oto, 21hali n ka̱mba̱ o u'wa wa dada va̱ gbaga, A̱sulazuva a ɗa o o'wo A̱sula̱ a̱ va̱. 22Waru a̱yi aatali a na n shuwa̱i nda woo o'wo ili yu ucuwusan, u to o'wo u'wa wa̱ A̱sula̱. Waru n ta ca wu za ta̱ a̱tsuma̱ a kupa a̱tsuma̱ e ili i na vu ca numu biti.>>
Currently Selected:
Ufaru 28: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
