Ufaru 27
27
Yakubu ushi ta̱ aba'un a Isuwa
1Ana Ishiyaku kutsai, reve esu a̱ yi a fara enishe rumbu rumbu, hali u kuɗa̱ e ene, reve u ɗe Isuwa mawun mo ufaru ma̱ yi, a̱vu u damma yi, <<Ulobo u va̱.>> Reve u usu, <<Apa mu.>>
2A̱vu Ishiyaku damma, <<A̱mu ɗa nda n kutsai, n reve urana u na ma̱a̱ kuwa̱ shi. 3Gogo, tara itana i tsuten tsa̱ wu, utan nu ujin wa̱ wu, vu 'ya̱wa̱ o una vu zamiya mu inama. 4A̱vu vu foɓoo mu ilyalya yu uyo'o cu'un na n cigai n lyuwa, tsa̱ra̱ n zuwaa wu aba'un kafu n kuwa̱.>>
5Ana Ishiyaku da̱na̱i a adanshi na̱ mawun ma̱ yi Isuwa, Rikatu uwwa ta̱. Ɗaɗa ana Isuwa ka̱ra̱i a̱ tyo o una, tsa̱ra̱ u 'ya̱wa̱ u ta̱wa̱a̱ ni inama, 6a̱vu Rikatu damma mawun ma̱ yi Yakubu, <<Mu uwwa ta̱ dada va̱ wu a adanshi na̱ zakpara va̱ wu Isuwa, u damma, 7<Ta̱wa̱a̱ mu na̱ nama vu una, vu foɓoo mu ilyalya yu uyo'o, tsa̱ra̱ n lyuwa, tsa̱ra̱ n zuwaa wu aba'un a̱ ma̱ka̱ka̱n ma̱ A̱sulazuva kafu n kuwa̱.> 8Gogo, mawun ma̱ va̱, vu zuwaa mu atsuvu vu yuwan ili i na n damma nuwu. 9'Ya̱wa̱ o uruga vu remee mu mugbgbele n re aza a sa'ani, tsa̱ra̱ n su'wan le, tsa̱ra̱ n yuwan cu'un vi ilyalya yu uyo'o i na dada va̱ wu cigai. 10Vu 'ya̱wa̱a̱ yi, tsa̱ra̱ u lyuwa, tsa̱ra̱ u zuwaa wu aba'un kafu u kuwa̱.>> 11Yakubu gba damma ta̱ mma va̱ yi Rikatu, <<Vu reve zakpara va̱ Isuwa ta̱ ne eleme lon, a̱mu gba ukwan u lipu u va̱ u ta̱ shembu shembu. 12Dada tsu ta gura papura mu. U te reve a na n cigai n yuwan yi ugbozu, reve u yuwaan mu una̱ o una̱ wa aba'un.>>
13Reve mma va̱ yi usu, <<Lyawa una̱ u na waa yuwaan wu u kuru mu. A̱vu de vu kuru ili i na n dammai vu 'ya̱wa̱ vu ta̱wa̱a̱ mu na̱ mugbele'e.>>
14A̱vu u 'ya̱wa̱ u ta̱wa̱a̱, u 'ya̱wa̱a̱ mma va̱ yi, a̱vu mma va̱ yi foɓo ilyalya yu uyo'o i na dada va̱ yi cigai. 15A̱vu Rikatu tara a̱tugu a Isuwa zakpara, aza a na a la'ai ulobonu aza a na a̱ ri o u'wa wa̱ yi, a̱vu wo oto Yakubu zawa'a. 16Kwan mugbgbele n ndolo n ɗa u katalai e ekere a̱ yi nu uba̱ta̱ u yinlu u na u ri ne eleme shi. 17A̱vu u ca Yakubu'u ilyalya yu uyo'o no opopofu a na u foɓoi.
18A̱vu u ka̱ra̱ a̱ 'ya̱wa̱ uba̱ta̱ wa dada va̱ yi, a̱vu u damma, <<Dada!>> A̱vu dada va̱ yi usu, <<Ee, mawun ma̱ ne ma ɗa a̱tsuma̱ a̱ muwun n va̱?>>
19A̱vu u usu, <<A̱mu ɗa mawun mo ufaru ma̱ wu Isuwa, n yuwan ta̱ ununa vu damma numu. 'Yon vu tama inama yu una i na n ta̱wa̱a̱ nuwu, tsa̱ra̱ vu zuwaa mu aba'un.>>
20Amma Ishiyaku ece ta̱ ulobo wa̱ yi, <<Cine tsa ɗa a yuwain vu tsura̱ niyi go'o, mawun ma̱ va̱?>> Reve u usu, <<A̱sulazuva, A̱sula̱ a̱ wu a zuwa ta̱ n ga'an.>>
21Reve Ishiyaku damma Yakubu, <<Ta̱wa̱ zuzu adama n papura wu mawun ma̱ va̱, tsa̱ra̱ n reve ko a̱vu ɗa Isuwa na amayun.>>
22A̱vu u rawa zuzu na̱ dada va̱ yi za na papura niyi, a̱vu u damma, <<Uɗyo wa̱ wu u rotso ta̱ uɗyo wa Yakubu, agba ekere a̱ wu gashi damma ekere a Isuwa.>> 23U gura reve Yakubu shi, adama a na ekere a̱ yi a̱ ta̱ ne eleme oroci a Isuwa. Adama o ndolo, a̱vu Ishiyaku ciga u zuwaa yi aba'un. 24A̱vu gba we ecishe, <<Na amayun a̱vu ɗa mawun ma̱ va̱ Isuwa?>> A̱vu u damma, <<Ee, a̱mu ɗa.>>
25A̱vu Ishiyaku damma, <<Ta̱wa̱a̱ mu ni inama'a, adama na̱ n tama n zuwaa wu aba'un a̱ va̱.>> Reve Yakubu tara u ca dada va̱ yi, a̱vu u tama, reve waru u ta̱wa̱a̱ yi na̱ masayan ma̱ ina̱bi u sowo. 26Reve dada va̱ yi damma yi, <<Ta̱wa̱ zuzu vu katala mu, mawun ma̱ va̱.>>
27Ɗaɗa Yakubu rawai zuzu reve u katala yi. Ana Ishiyaku uwwai ma̱guru ma̱ a̱tugu ma̱ yi, a̱vu u zuwaa yi aba'un u damma, <<Ka̱lyuwa̱, ma̱guru mo a̱tugu mo ulobo u va̱ mo rotso ta̱ ma̱guru ma̱ a̱tsumona ma na A̱sulazuva a zuwayi aba'un. 28Lyawa A̱sula̱ a ca wu a'iza diga zuva, u zuwaa a̱ɗuma̱ a̱ wu umuli, u zuwaa wu aba'un a̱ a̱bunda̱ e ishina na̱ masayan ma̱ ina̱bi. 29Lyawa iɗa i yuwaan wu tsugbashi. Lyawa ama koko'o a̱ ka̱ɗa̱towa̱ wu. Vo o'wo zagbain e ekere a̱za̱ a̱ wu, waru lyawa muwun ma mma va̱ wu n ka̱ɗa̱towa̱ wu. Aza a na suru a yuwaan nuwu una̱, una̱ u te reme le, aza a na waru a zuwaa nuwu aba'un a ta zuwaa le aba'un.>>
30Ana Ishiyaku kotoi a zuwusaa Yakubu aba'un, Yakubu jima ana u lyawai ma̱ka̱ka̱n ma dada va̱ yi shi, a̱vu Isuwa zakpara va̱ yi rawa, cina wu uta̱ ugenge. 31A̱yi waru u foɓo ilyalya yu uyo'o, u 'ya̱wa̱a̱ dada va̱ yi. A̱vu u damma dada va̱ yi, <<Dada, na̱ vu usu, vu 'yon vu tama inama i na n tawain, tsa̱ra̱ vu zuwaa mu aba'un.>>
32A̱vu dada va̱ yi Ishiyaku damma yi, <<Zane ɗa a̱vu?>>
Reve u usu, <<A̱mu ɗa mawun ma̱ wu, mawun mo ufaru, Isuwa.>>
33Reve Ishiyaku je'en lipu lon, reve u damma, <<Zane ɗa zamiyi nama u ta̱wa̱a̱ numu, hali n tama kafu vu ta̱wa̱, hali n zuwaa yi ɗe aba'un. Ee, za va aba'un a ɗa woo o'wo.>>
34Ana Isuwa uwwai adanshi a dada va̱ yi, a̱vu u shon na̱ yisaali yu ucira na̱ a̱tsumola̱ngu a̱bunda̱ lon, a̱vu u damma dada va̱ yi, <<Zuwaa mu aba'un, hali na̱ a̱mu fo, dada va̱.>>
35A̱vu u damma, <<Zawa'a va̱ wu ta̱wa̱ ta̱ ɗe nu ugbozu, u ushi aba'u'un a̱ wu.>>
36A̱vu Isuwa damma, <<Adama o ndolo a ɗa a zuwaa niyi aala Yakubu shi? U yuwan mu ta̱ ne ure. Nu ufaru u usa mu tsugaji, za ve ire u usa aba'un a̱ va̱.>> Reve we ece, <<Vu buwa na aba'un adama a̱ va̱ shi?>>
37Reve Ishiyaku usu Isuwa, <<N zuwa yi ta̱ ɗe wo o'wo elime a̱ wu, waru n zuwa ta̱ ɗe a̱za̱ a̱ yi suru o o'wo agbashi a̱ yi. N ca yi ta̱ ɗe ishina na̱ masayan ma̱ ina̱bi. Nye waru i buwai a na maa yuwaan wu mawun ma̱ va̱?>>
38A̱vu Isuwa lyuwa elime ni ipati ya dada va̱ yi u damma, <<Dada va̱, vu ta̱ na aba'un a̱ ta̱ goon? A̱mu fo zuwaa mu aba'un, dada va̱!>> A̱vu Isuwa 'ya̱sa̱n uɗyo wa̱ yi u uwa mesun.
39A̱vu dada va̱ yi Ishiyaku damma yi, <<Amayun, u'wa wa̱ wu u ta yuwan alanga ni iɗa yu umuli, vu ta yuwan alanga na a'iza a zuva. 40She nu ucira u matsun me pe'eni ma̱ wu ma ɗa va̱a̱ da̱na̱ wuma. Vu ta yuwaan zawa'a va̱ wu tsugbashi. Agba a mantsa ma na vu lyawai lipu shi, vu ta̱ ra̱ɓuwa̱ a̱a̱gba̱la̱ a̱ yi a na u rutsa̱a̱ nuwu.>>
Yakubu suma ta̱ a̱ tyo ya Laban
41Isuwa 'yuwan ta̱ Yakubu adama a na wi iva̱i aba'un a na a̱ shi o'wo za va̱ yi. A̱vu u uwa majiyan u damma, <<Mantsa ma̱ nden ma̱ a̱tsumola̱ngu mo ukwa̱ ma dada tsu ma yuwan ta̱ zuzu, ɗaɗa moo una Yakubu.>>
42Amma ana Rikatu uwwai ili i na Isuwa foɓoi, reve u lyunguwa̱ Yakubu, a̱vu damma yi, <<Isuwa zakpara va̱ wu to votosun ugbozu e ifoɓi i na woo una wu. 43Gogo nda mawun ma̱ va̱, vu poloo mu atsuvu. Vu suma a̱ tyo Haran ya Laban mawun ma̱ a̱na̱wun ma̱ va̱. 44Vu da̱nu ɗe na̱ a̱yi hali she na asuvu a zakpara a̱ wu o von. 45Hali she nu upan wu zakpara va̱ wu u von na̱ a̱vu a̱vu wi icina ili i na vu yuwaan niyi, reve n lyunguwa̱ wu vu ka̱mba̱ o u'wa. Adama a̱ nye maa lamba muwun n va̱ ra urana u ta̱?>>
46A̱vu Rikatu damma Ishiyaku, <<N kuna̱ ta̱ na̱ a̱ma̱ci a aza a Hitiya o ndolo. Ana Yakubu a zuwa pe ka, u ta la'aa mu n kuwa̱.>>
Currently Selected:
Ufaru 27: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
