Ufaru 26
26
Ishiyaku luluma̱i Abimele
1Reve a yuwan ambulu e iɗa'a, cine a̱ shi a yuwain a mantsa ma Ibrahim. Reve Ishiyaku ka̱ra̱ a̱ tyo e iɗa ya Gera uba̱ta̱ wa Abimele mogono ma aza a Filistiya. 2Reve A̱sulazuva o roco aciya̱yi ya̱'a̱ yi a̱vu u damma, <<She vu 'ya̱wa̱ Masar wan, amma vu da̱nu e iɗa i na maa damma wu. 3Vu yuwan nden n limocin e iɗa i nda, reve a̱mu gba n da̱na̱ oɓolo na̱ a̱vu, n zuwaa wu aba'un. N ta ca wu iɗa i nda na̱ a̱vu na̱ muwun mu ugundo ma̱ wu, n to shiton akucunu a na n yuwayin dada va̱ wu Ibrahim. 4N ta zuwa limatan va̱ wu yuwan a̱bunda̱ tsi italyo'o, a̱vu n ca le iɗa i nda suru. O ure u limatan va̱ wu ɗa iɗa yu uvaɗi suru ya̱a̱ tsura̱ aba'un. 5N ta yuwan ne adama a na Ibrahim toni ta̱ adanshi a̱ va̱ reve u kuru ili i na n cigai suru, ni ili i na n zuwai, ni ili i na n dammai, na̱ wila̱ u va̱.>> 6Ɗaɗa Ishiyaku da̱nuyi Gera.
7Reve ana ama o uba̱ta̱'a̱ e ece niyi adama a ka va̱ yi, a̱vu u damma, <<Zawa'a va̱ ɗa.>> Adama a na u shi ta̱ a uwwusa wovon u na waa damma <<Ka va̱ ɗa.>> U shi ta̱ a majiyan <<Ama o uba̱ta̱ u nda a̱ to una mu adama a Rikatu, adama a na u ri ulobonu lon.>>
8Ana Ishiyaku jimai na̱ nden uba̱ta̱'a̱, reve urana u ro Abimele mogono ma aza a Filistiya ma̱ ka̱lyuwa̱ nu usowoto wu upepu reve we ene Ishiyaku a katalasa ka va̱ yi Rikatu. 9Reve Abimele ɗe Ishiyaku reve u damma, <<Mawasan mo ro mo lo shi ka va̱ wu ɗa! O una̱ wu nye vu dammai zawa'a va̱ wu ɗa?>>
Reve Ishiyaku usu, <<N da̱na̱ ta̱ a majiyan a̱ to una mu adama a̱ yi.>>
10A̱vu Abimele damma, <<Nye vu yuwan ntsu ne tsunda? Vu shi ta̱ a zuwa vuma ro a̱tsuma̱ a̱ tsu gura damma u to von na̱ a̱yi. Reve vu shi zuwa tsu tso o'wo a̱za̱ o unusu.>>
11Reve Abimele rono ama a̱ yi suru atsuvu u damma, <<Za na ju'wa̱n vuma nda suru ko ka va̱ yi a̱ to una yi.>>
12Reve Ishiyaku cu'wa̱n e iɗa'a, reve gba a aa'wa'an u gasa ili ya̱ a̱bunda̱, adama a na A̱sulazuva a zuwaa yi ta̱ aba'un. 13Ishiyaku o'wo ta̱ za vu utsuru, reve u uwa a lyuwusa elime hali wo o'wo za vu utsuru lon. 14U ta̱ no oɓolo e ikyon na̱ mgbele ma̱ a̱bunda̱, ni inan ya̱ a̱bunda̱ na agbashi a̱ a̱bunda̱, hali u zuwa aza a Filistiya a uwa tsushu'un na̱ a̱yi. 15Reve o ciɗo oko'o a na agbashi a dada va̱ yi Ibrahim a̱ ka̱pa̱i na̱ wuyun suru a̱yi Ibrahim ubuwu wuma.
16Ɗaɗa Abimele dammai Ishiyaku, <<Vu 'yon vu lyawa iɗa i tsu, adama a na vu la'a tsu ta̱ ucira.>>
17Ɗaɗa Ishiyaku 'yoyin reve u va̱la̱ o uka̱ri wa Gera. 18Reve u ka̱pisa̱ oko'o a na a̱ ka̱pa̱i a mantsa ma Ibrahim dada va̱ yi, aza a na aza a Filistiya a̱ shi a̱ ciɗoi cina Ibrahim kuwa̱. Reve u cayisa le ala a na dada va̱ yi shi ca nle.
19Reve waru aza a aguɓa a Ishiyaku a̱ ka̱pa̱ ooko'o o uka̱ri wa Gera'a reve a̱ tsura̱ mini ma sa'ani. 20Ɗaɗa aza a aguɓa a Gera e remei mawasan na aza a aguɓa a Ishiyaku adama o ooko'o'o reve a damma, <<Mini ma nda za tsu ɗa.>> Adama o ndolo a ɗa Ishiyaku zuwaa niyi aala Ese, ana <<mawasan.>> 21Reve aza a aguɓa a Ishiyaku a̱ ka̱pisa̱ ooko'o o ro, a̱vu a yuwisan mawasan adama a̱ yi waru. Ɗaɗa Ishiyaku ɗe niyi Sitina, a na n'yuwunlai. 22Ana a lyawai za ndolo'o reve a̱ ka̱pisa̱ za ro waru, agba ko za yuwan mawasan adama a̱ yi shi. Ɗaɗa Ishiyaku ɗe niyi Rihobo, a na <<ure u na u rawai,>> a dansa, <<Gogo nda A̱sulazuva a ca tsu ta̱ ure u na u rawai, tsu ta yuwan a̱bunda̱ lon e iɗa'a.>>
23Diga lo, reve Ishiyaku 'yon a̱ tyo Biyasheba. 24Na ayin o ndolo reve A̱sulazuva a̱ ta̱wa̱ ya̱'a̱ yi, reve u damma yi, <<A̱mu ɗa A̱sula̱ a dada va̱ wu Ibrahim. She vu uwwa wovon wan, adama a na n to oɓolo na̱ a̱vu, waru n ta zuwaa wu aba'un. N ta zuwa ugundo wa̱ wu u yuwan a̱bunda̱ adama a aagbashi a̱ va̱ Ibrahim.>>
25Reve Ishiyaku suwa masa'a lo reve u yuwaan A̱sulazuva a̱ga̱nda̱. Reve u va̱la̱ lo uba̱ta̱'a̱. Reve agbashi a̱ yi a̱ ka̱pa̱ lo ooko'o.
26Urana u ro, reve Abimele mogono oɓolo na̱ Ahuza za na a casu yi a̱sa̱la̱ na̱ Fiko yali ya̱ a̱soja ya̱ yi o uta̱ diga Gera, reve a̱ 'ya̱wa̱ e ene Ishiyaku. 27Reve Ishiyaku ece le, <<Adama a̱ nye i ta̱wa̱i ye ene mu cina ɗe i 'yuwan mu, hali gba i gba̱ra̱ mu e iɗa i ɗu?>>
28Reve a̱ usu yi, <<Gogo nda tsu reve ta̱ a alanga eteshe a na A̱sulazuva a̱ ri oɓolo na̱ a̱vu. A̱yi ɗa i zuwai tsu dammai u lobono ta̱ tsu yuwan nzuwulai na̱ a̱vu. Tsu tarai akucunu a na 29va̱a̱ ju'wa̱n tsu shi cine tsu ju'wa̱n nuwu shi. Tsu roco wu ta̱ isa'ani reve tsu kasa na̱ ma̱za̱nga̱. Gogo gba wu uta̱ ta̱ a alanga eteshe A̱sulazuva a zuwaa wu ta̱ aba'un.>>
30Reve Ishiyaku foɓoo le a̱buki, a̱vu a lyuwa o sowo. 31Ana usana u tawai, reve a̱ 'yon nu usana usana reve a taralai akucunu. Reve Ishiyaku shewun le, a̱vu a kasalai na̱ ma̱za̱nga̱. 32O urana u ndolo gan reve agbashi a Ishiyaku a ta̱wa̱ a damma yi adama o ooko'o a na a̱ ka̱pa̱i, a damma, <<Tsu tsura̱ ta̱ mini!>> 33Ɗaɗa Ishiyaku cayi ooko'o aala Sheba, a na <<akucunu.>> Adama o ndolo a ɗa e ɗesu lyuci'i Biyasheba hali na ana'an.
34Ana Isuwa rawai a'wan amunga, reve u zuwa Yudi usheli wa Beyeri va Hitiya, na̱ Basema usheli wa Elon va Hitiya. 35A̱ma̱ci a nda ra a ca ta̱ Ishiyaku na̱ Rikatu a̱tsuma̱lima̱ lon.
Currently Selected:
Ufaru 26: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
